សហគមន៍អន្តរជាតិដាក់គំនាបកាន់តែខ្លាំងលើលោក ឡូរ៉ង់ បាក់បូ
សហគមន៍អន្តរជាតិ មិនអាចឈរនៅស្ងៀមបានទៀតទេ នៅចំពោះមុខស្ថានការណ៍ហិង្សាបង្ហូរឈាម កាលពីថ្ងៃព្រហស្បតិ៍និងសុក្រម្សិលមិញ នៅក្នុងប្រទេសកូតឌីវ័រ។ អឺរ៉ុប អាមេរិក អង្គការសហប្រជាជាតិ និងសហគមន៍សេដ្ឋកិច្ចនៃរដ្ឋអាហ្វ្រិកខាងលិច បានចេញថ្លែងការណ៍ មួយហើយមួយទៀត ថ្កោលទោសអំពើហិង្សា និង បង្ខំលោក ឡូរ៉ង់ បាក់បូ (Laurent Gbagbo) ឲ្យប្រគល់តួនាទីប្រធានាធិបតីទៅឲ្យលោក អាឡាសាន វ៉ាត់តារ៉ា (Alassane Ouattara) ដែលជាអ្នកឈ្នះឆ្នោត ទទួលស្គាល់ដោយសហគមន៍អន្តរជាតិ ប្រសិនបើលោកបាក់បូមិនចង់ទទួលទណ្ឌកម្មអន្តរជាតិទេ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ អៀង សុខម៉ិញ
ប្រតិកម្មអន្តរជាតិបានផ្ទុះឡើងយ៉ាងព្រោងព្រាត មួយថ្ងៃក្រោយអំពើហិង្សាបង្ហូរឈាម រវាងទាហានស្និទ្ធនឹងលោកប្រធានាធិបតីផុតអាណត្តិបាក់បូ និងក្រុមសកម្មជនរបស់លោកប្រធានាធិបតីវ៉ាត់តារ៉ា ទទួលស្គាល់ដោយសហគមន៍អន្តរជាតិ ដែលមានចេតនាចង់ដណ្តើមយកទីស្នាក់ការទូរទស្សន៍ជាតិ។
សហភាពអឺរ៉ុប តាមរយៈលោកប្រធានាធិបតីបារាំង នីកូឡា សាកូហ្ស៊ី បានដាក់ឱសានវាទឲ្យលោកបាក់បូចាកចេញពីតំណែង យ៉ាងយូរបំផុតនៅចុងសប្តាហ៍នេះ។ ពុំនោះទេ ចាប់ពីថ្ងៃចន្ទទី២០ធ្នូទៅ ឈ្មោះលោកបាក់បូនិងភរិយា នឹងត្រូវចាត់បញ្ជូលក្នុងបញ្ជីស៊ីប ជនដែលសហភាពអឺរ៉ុបដាក់ទណ្ឌកម្ម។
ដូចគ្នានេះដែរ សហរដ្ឋអាមេរិកបានប្រកាសត្រៀមខ្លួនជាស្រេចនឹងដាក់ទណ្ឌកម្មលើរូបលោក បាក់បូ ព្រមទាំងក្រុមគ្រួសារដូចជាសហភាពអឺរ៉ុបដែរ ដោយថែមទាំងបានព្រមានលោកបាក់បូថា ដល់វេលាដែលត្រូវឲ្យប្រគល់តំណែងប្រធានាធិបតីទៅឲ្យលោក វ៉ាត់តារ៉ា ហើយ។
កងទ័ពមួយខៀវ អាចនឹងចេញធ្វើសកម្មភាព ប្រសិនបើលោក បាក់បូ នៅរឹងទទឹងមិនព្រមចាកចេញពីតំណែងនោះទេ។ នេះបើតាមការអះអាងរបស់លោក បាន គីមូន អគ្គលេខាធិការអង្គការសហប្រជាជាតិ ដែលយល់ថាការបន្តស្ថិតនៅកាន់តំណែងរបស់លោកបាក់បូគឺជាឆាកល្ខោនប្រជាធិបតេយ្យ។
ចំណែកខាងអាហ្វ្រិកវិញ លោក ហ្សង់ ពីង ប្រធានគណៈកម្មការសហភាពអាហ្វ្រិក បានអញ្ជើញទៅដល់ក្រុងអាប៊ីហ្សង់ ហើយនៅថ្ងៃសុក្រម្សិលមិញ ដើម្បីពាំនាំយកលិខិតរបស់ប្រធានសហគមន៍សេដ្ឋកិច្ចនៃរដ្ឋអាហ្វ្រិកខាងលិច ដែលសរសេរស្នើឲ្យ លោកបាក់បូ ប្រគល់តំណែងប្រធានាធិបតី ជាបន្ទាន់ ទៅឲ្យប្រធានាធិបតីជាប់ឆ្នោត លោក វ៉ាត់តារ៉ា។ ក្នុងជំនួបជាមួយលោក ហ្សង់ពីង លោក បាក់បូ នៅតែបង្ហាញពីជំហររឹងរូសទាមទារចង់បាន ការបែងចែកអំណាចជាអនុប្រធានាធិបតីឲ្យទៅលោកវ៉ាត់តារ៉ា។
ស្ថានភាពនយោបាយហាក់នៅជាប់គាំងរហូតមកទល់ពេលនេះ ប៉ុន្តែជាសំណាងល្អ តាំងពីថ្ងៃម្សិលមិញមក ក្រុងអាប៊ីហ្សង់ ហាក់បានស្គាល់ភាពស្ងប់ស្ងាត់បន្តិច ព្រោះសកម្មជនរបស់លោកវ៉ាត់តារ៉ា មិនបានដង្ហែក្បួនទៅស្ថានីយ៍ទូរទស្សន៍ដូចការគ្រោងទុក។ តែនៅឆ្ងាយពីទីក្រុងបន្តិច ការប៉ះទង្គិចរវាងក្រុមអ្នកស្មោះស្ម័គ្រលោក វ៉ាត់តារ៉ា ជាមួយនឹងក្រុមទាហានអ្នកគាំទ្រលោកបាក់បូ មានស្លាប់យ៉ាងហោចណាស់ក៏ម្នាក់ដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ