ការវិវឌ្ឍន៍ទៅនៃចលនាប្រឆាំងនៅប្រទេសលីប៊ី
គ្មានឡើយព័ត៌មានពិតប្រាកដ ស្តីពីចំនួនអ្នកដែលបានស្លាប់ ក្រោមគ្រាប់កាំភ្លើងរបស់កងទ័ព នៅប្រទេសលីប៊ី។ មានស្លាប់យ៉ាងតិច២៣៣នាក់ នេះបើយោងទៅតាម Human Rights Watch។ ចំនួនអ្នកស្លាប់អាចកើនទៅដល់៣០០ ឬ ៤០០នាក់ នេះបើយោងទៅតាមសហព័ន្ធរួមអន្តរជាតិការពារសិទ្ធិមនុស្ស។ កាលពីថ្ងៃចន្ទទី២១កុម្ភៈម្សិលមិញ ជាលើកទីមួយបង្អស់តាំងពីមានបាតុកម្មប្រឆាំងកើតឡើង បុរសខ្លាំងនៃរបបលីប៊ីដែលបានកាន់អំណាច៤២ឆ្នាំកន្លងមកហើយ បានបង្ហាញមុខតាមកញ្ចក់ទូរទស្សន៍ជាតិ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ តាន់ ហ្សង់-ហ្វ្រង់ស្វ័រ
លោកកាដាហ្វីបានបង្ហាញមុខមួយភ្លែតតាមកញ្ចក់ទូរទស្សន៍ជាតិ ហើយបានថ្លែងថាលោកមិនបានចាកចេញពីប្រទេសទៅកាន់ប្រទេសវេណេស៊ុយអេឡា ដូចគេថានោះឡើយ។ ទូរទស្សន៍ជាតិដដែល ក៏កំពុងបន្តផ្សព្វផ្សាយតទៅទៀតដែរ រូបភាពរបស់បណ្តាជនអ្នកគាំទ្រលោកកាដាហ្វីដែលបានចុះតាមដងផ្លូវ ស្រែកជេរប្រទេចពួកប្រឆាំងនិងពួកបស្ចិមប្រទេស។
នៅថ្ងៃអង្គារទី២២កុម្ភៈនេះ ក្រុមប្រឹក្សាសន្តិសុខអង្គការសហប្រជាជាតិ ក៏ដូចសម្ពន្ធអារ៉ាប់ដែរ ត្រូវបើកអង្គប្រជុំដើម្បីជជែកគ្នាអំពីស្ថានភាពនៅប្រទេសលីប៊ី។ មិនតែប៉ុណ្ណោះ លោកអគ្គលេខាធិការអង្គការសហប្រជាជាតិ បាន គីមូន បានប្រាប់ឲ្យដឹងថា លោកបានសំណេះសំណាលតាមទូរស័ព្ទ ជាមួយលោកកាដាហ្វីនិងបានទាមទារឲ្យបុរសខ្លាំងលីប៊ីបញ្ឈប់ជាបន្ទាន់ ការវាយបង្ក្រាបទៅលើហ្វូងបាតុករប្រឆាំង។
យ៉ាងណាក៏ដោយ នាពេលដែលព័ត៌មានស្តីពីការវាយបង្ក្រាបយ៉ាងសាហាវយង់ឃ្នងទៅលើពួកបាតុករបាននិងកំពុងបន្តធ្លាក់មកដល់ ការថ្កោលទោសពីសំណាក់សហគមន៍អន្តរជាតិក៏មានលក្ខណៈកាន់តែច្បាស់ដែរ។ សម្រាប់លោកប្រធានាធិបតីបារាំង ការប្រើកម្លាំងយោធាវាយបង្ក្រាបពួកប្រឆាំងគឺជាទង្វើមួយដែលគេមិនអាចទទួលយកបាន។ លោកនាយករដ្ឋមន្ត្រីអ៊ីតាលី និងលោកស្រីរដ្ឋមន្ត្រីការបរទេសអាមេរិក ក៏បានទាមទារឲ្យលោកកាដាហ្វី បញ្ឈប់ការបង្ហូរឈាមជាបន្ទាន់ដែរ។
ដូចគ្នាអ៊ីចឹងដែរ បណ្តារដ្ឋមន្ត្រីការបរទេសអឺរ៉ុបទាំង២៧ ដែលបានរួមប្រជុំគ្នាកាលពីថ្ងៃចន្ទម្សិលមិញ បានថ្កោលទោសជាសំឡេងតែមួយទៅលើរបបលីប៊ីរបស់លោកកាដាហ្វីដែរ។
ទន្ទឹមនេះ ព័ត៌មានលេចឮឲ្យដឹងថា ពួកបាតុករបានវាយដណ្តើមយកបានទីក្រុងមួយចំនួននិងកំពុងបន្តប្រយុទ្ធជាមួយកងទ័ព នៅក្នុងរដ្ឋធានីTripoli តែម្តង។ រីឯក្រុមហ៊ុនបរទេសវិញបានផ្តើមជម្លៀសបុគ្គលិកការងាររបស់ពួកគេចេញពីប្រទេសលីប៊ី។ សហរដ្ឋអាមេរិកបានបញ្ជា ឲ្យក្រុមអ្នកការទូតរបស់ខ្លួនចាកចេញបណ្តើរៗពីប្រទេសលីប៊ី។ ដូចគ្នាអ៊ីចឹងដែរ បណ្តាប្រទេសអឺរ៉ុបមួយចំនួនរួមទាំងប្រទេសរុស្ស៊ីផង ក៏បាននិងកំពុងរៀបចំជម្លៀសជនជាតិរបស់ខ្លួនដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ