វិធានការរបស់លោកអូបាម៉ានិងលោកខេមេរ៉នប្រឆាំងនឹងកាដាហ្វី
លោកប្រធានាធិបតីអាមេរិកបារ៉ាក់អូបាម៉ានិងលោកនាយករដ្ឋមន្ត្រី អង់គ្លេសដេវីឌខេមេរ៉នបានពិភាក្សាគ្នាតាមរយៈទូរស័ព្ទដើម្បីរិះរក វិធានការមួយចំនួនសម្រាប់ប្រយុទ្ធប្រឆាំងនឹងទង្វើដ៏ហិង្សារបស់ មេដឹកនាំផ្តាច់ការលីប៊ីមូអាម៉ារកាដាហ្វីទៅលើប្រជាពលរដ្ឋរបស់ខ្លួន ដោយរិះរកបង្កើតឲ្យមាន “តំបន់ហាមឃាត់ពុំឲ្យមានយន្តហោះហោះហើរនៅលើប្រទេសលីប៊ី"។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សៀក សារិន
នៅថ្ងៃអង្គារទី៨មីនាម្សិលមិញ សេតវិមានបានប្រកាសឲ្យដឹងថា នាឱកាសជំនួបពិភាក្សាតាមរយៈទូរស័ព្ទ លោកប្រធានាធិបតីអាមេរិកបារ៉ាក់អូបាម៉ានិងលោកនាយករដ្ឋមន្ត្រីអង់គ្លេសដេវីឌខេមេរ៉នបានព្រមព្រៀងគ្នាចាត់ឲ្យមានវិធានការមួយចំនួនដើម្បីប្រយុទ្ធប្រឆាំងនឹងរបបផ្តាច់ការហើយនិងទង្វើដ៏ហិង្សារបស់កាដាហ្វីទៅលើប្រជាជនលីប៊ី។
វិធានការទាំងនោះមានជាអាទិ៍៖
-ធ្វើការឃ្លាំយាមទាំងយប់ទាំងថ្ងៃទៅលើប្រទេសលីប៊ី។
-ផ្តល់ជំនួយមនុស្សធម៌។
-អនុវត្តន៍វិធានការហាមឃាត់ពុំឲ្យមានសព្វាវុធយុទ្ធភ័ណ្ឌចូលប្រទេសលីប៊ី។
-បង្កើតឲ្យមាន “តំបន់ហាមឃាត់ពុំឲ្យមានយន្តហោះហោះហើរនៅលើប្រទេសលីប៊ី"។
សូមបញ្ជាក់ថា លោកប្រធានាធិបតីអាមេរិកបារ៉ាក់អូបាម៉ាបានអំពាវនាវឲ្យមូអាម៉ារកាដាហ្វីចាកចេញពីមុខតំណែងជាច្រើនលើកច្រើនសា។ ក៏ប៉ុន្តែរដ្ឋបាលអាមេរិកដែលជាប់ដៃជាប់ជើងនៅក្នុងសង្គ្រាមនៅប្រទេសអាហ្វហ្គានីស្ថាននិងនៅប្រទេសអ៊ីរ៉ាក់ ហាក់ដូចជានៅរួញរាក្នុងការបញ្ជូនទ័ពឲ្យទៅធ្វើសង្គ្រាមនៅប្រទេសលីប៊ីទៀត។
ចំណែកឯលោកJohn McCain ដែលជាសមាជិកនៃព្រឹទ្ធសភាអាមេរិកមកពីបក្សសាធារណរដ្ឋវិញយល់ថា ការបង្កើតឲ្យមាន“តំបន់ហាមឃាត់ពុំឲ្យមានយន្តហោះហោះហើរនៅលើប្រទេសលីប៊ី"គឺជាវិធានការត្រឹមត្រូវ ហើយមធ្យោបាយដ៏ប្រពៃដើម្បីបណ្តេញកាដាហ្វីឲ្យចាកចេញពីមុខតំណែងគឺ “ត្រូវជួយធ្វើយ៉ាងណាឲ្យសហការីស្មោះស្ម័គ្រចុងក្រោយរបស់កាដាហ្វីរត់ទៅចូលជាមួយពួកអ្នកប្រឆាំងលីប៊ី”។
នៅចំពោះមុខសម្ពាធដ៏សែនខ្លាំងក្លាពីសំណាក់សហគមន៍អន្តរជាតិបែបនេះ សំណួរមួយបានលេចឡើងចោទសួរថា តើមូអាម៉ារកាដាហ្វីអាចនៅបន្តកាន់កាប់អំណាចនៅប្រទេសលីប៊ីទៀតដែរឬទេ?
បើប្រសិនជាកាដាហ្វីយល់ព្រមចាកចេញពីមុខតំណែងមែននោះ មើលទៅគ្មានប្រទេសណាមួយក្នុងលោកយល់ព្រមទទួលយកកាដាហ្វីឲ្យជ្រកនៅឡើយ ក្រៅតែពីប្រទេសវ៉េណេស៊ុយអេឡាមួយចេញ។ ក៏ប៉ុន្តែធ្វើយ៉ាងនេះ កាដាហ្វីបាក់មុខបាក់មាត់ខ្លាំងណាស់នៅចំពោះមុខពិភពអារ៉ាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ