រដ្ឋមន្ត្រីក្រសួងការបរទេសអាល្លឺម៉ង់ថ្លែងប្រាប់ពីភាពទាល់ច្រកក្នុងការដោះស្រាយវិបត្តិលីប៊ីតាមផ្លូវយោធា
នៅទីក្រុងប៉េកាំងនៅថ្ងៃសុក្រទី១មេសានេះ លោកGuido Westerwelleប្រមុខការទូតអាល្លឺម៉ង់បានថ្លែងថា វិបត្តិនៅប្រទេសលីប៊ីនឹងពុំអាចមានដំណោះស្រាយតាមផ្លូវអាវុធឡើយ។ លោកGuido Westerwelleបានអំពាវនាវឲ្យមេដឹកនាំលីប៊ីកាដាហ្វ៊ីបិទបញ្ចប់ការឈប់បាញ់គ្នា។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សៀក សារិន
នាឱកាសជំនួបពិភាក្សាជាមួយលោករដ្ឋមន្ត្រីក្រសួងការបរទេសចិន លោកGuido Westerwelleប្រមុខការទូតអាល្លឺម៉ង់បានថ្លែងព្រមានថា “វិបត្តិនៅប្រទេសលីប៊ីនឹងពុំអាចមានដំណោះស្រាយតាមផ្លូវយោធាឡើយ”។
“គេអាចដោះស្រាយបានតាមផ្លូវនយោបាយដោយចៀសវាងការប្រើអាវុធ ដូច្នេះគេត្រូវតែរៀបចំឲ្យមានអភិក្រមនយោបាយសម្រាប់រិះរកដំណោះស្រាយ។ ទាំងនេះ ត្រូវចាប់ផ្តើមឡើងដោយមានការឈប់បាញ់គ្នាមួយដែលគោរពដោយមេដឹកនាំលីប៊ីកាដាហ្វ៊ី។នេះជាការគូសបញ្ជាក់របស់លោកGuido Westerwelleប្រមុខការទូតអាល្លឺម៉ង់។
ចំណែកឯរដ្ឋមន្ត្រីក្រសួងការបរទេសចិនវិញបានបញ្ជាក់ថា “ប្រទេសចិននិងប្រទេសអាល្លឺម៉ង់បានបោះឆ្នោតអនុបវាទទៅលើសេចក្តីសម្រេចចិត្ត១៩៧៣នៃអ ស ប កាលពីថ្ងៃទី១៧មីនាឆ្នាំ២០១១ដែលបានបើកផ្លូវឲ្យមានការវាយប្រហារតាមផ្លូវអាកាសទៅលើប្រទេសលីប៊ីពីរថ្ងៃក្រោយមក។ ទាំងនេះសឲ្យឃើញថា ប្រទេសចិននិងប្រទេសអាល្លឺម៉ង់មានជំហរអនុបវាទខុសពីប្រទេសបារាំង ប្រទេសអង់គ្លេស និងសហរដ្ឋអាមេរិក”។
លោកប្រមុខការទូតចិនបានថ្លែងឲ្យដឹងទៀតថា ប្រទេសចិនមានការបារម្ភនៅចំពោះមុខការបន្តវាយប្រហារនៅប្រទេសលីប៊ីដែលបានបណ្តាលឲ្យមានប្រជាជនស៊ីវិលស្លាប់និងរបួសជាច្រើននាក់។
កាលពីថ្ងៃពុធកន្លងទៅ លោកប្រធានាធិបតីចិនហ៊ូ ជិនតាវបានថ្លែងប្រាប់លោកប្រធានាធិបតីបារាំងនីកូឡាសាកូហ្ស៊ីថា “ការវាយប្រហារទៅលើប្រទេសលីប៊ីនេះ អាចធ្វើឲ្យប៉ះពាល់ដល់គោលគំនិតដើមនៃសេចក្តីសម្រេចចិត្ត១៩៧៣នៃអ ស ប ដែលគ្រោងការពារប្រជាជនស៊ីវិលស្លូតត្រង់”។
ហើយលោកGuido Westerwelleប្រមុខការទូតអាល្លឺម៉ង់បានទិតៀនដោយមិនចំពោះទៅលើលោកសាកូហ្ស៊ីថា “ការគំរាមទៅលើមេដឹកនាំផ្តាច់ការនៃប្រទេសអារ៉ាប់ដោយប្រើអន្តរាគមន៍យោធាអន្តរជាតិពុំមែនជាមធ្យោបាយសម្រាប់ដោះស្រាយបញ្ហានៅពេលបច្ចុប្បន្ននេះឡើយ”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ