ឡូរ៉ង់ បាក់បូ ចោទទាហានបារាំងថាកំពុងតែឈ្លានពានកាន់កាប់កូតឌីវ័រ
ស្ថិតក្នុងភាពទាល់ច្រក បក្សពួករបស់លោកបាក់បូកំពុងធ្វើសង្រ្គាមតាមមធ្យោបាយឃោសនា ដើម្បីលាបពណ៌ថា សង្រ្គាមនៅកូតឌីវ័រពេលនេះ គឺជាសង្រ្គាមប្រឆាំងនឹងការឈ្លានពានបរទេស។ មន្រ្តីជំនិតរបស់លោកបាក់បូ បានចោទទាហានបារាំងថា កំពុងតែឈ្លានពានកាន់កាប់ប្រទេសកូតឌីវ័រ។ ចំណែកតាមទូរទស្សន៍វិញ ក្រុមលោកបាក់បូបានចោទទាហានបារាំងថាកំពុងតែរៀបចំផែនការ ប្រល័យពូជសាសន៍នៅកូតឌីវ័រ។
ចុះផ្សាយនៅថ្ងៃ៖ កែប្រែថ្ងៃទី៖
បទវិភាគរបស់ សេង ឌីណា
ចាប់តាំងពីថ្ងៃអាទិត្យ ម្សិលមិញមក ការវាយប្រយុទ្ធគ្នានៅទីក្រុងអាប៊ីដហ្សង់បានត្រូវផ្អាក។ ក៏ប៉ុន្តែ នាយករដ្ឋមន្រ្តីរបស់លោកវ៉ាត់តារ៉ាបានប្រកាសថា ការវាយលុកចូលក្នុងវិមានប្រធានាធិបតីនឹងធ្វើឡើងក្នុងពេលឆាប់ៗ ខាងមុខនេះ នៅពេលដែលកងកម្លាំងជំនួយមកដល់។
ប្រភពព័ត៌មានមិនច្បាស់ការណ៍មួយបានឲ្យដឹងថា អគ្គសេនាធិការកងទ័ព ដែលបានផ្តាច់ខ្លួនពីលោកបាក់បូ កាលពីថ្ងៃពុធ បានចេញពីស្ថានទូតអាហ្វ្រិកខាងត្បូង ទៅជួបលោកបាក់បូ នៅវិមានប្រធានាធិបតី។ មេទ័ពកំពូលរូបនេះទំនងជាចង់វិលត្រឡប់ទៅចូលក្រុមលោកបាក់បូវិញ។ ក៏ប៉ុន្តែ រហូតមកទល់ពេលនេះ គេនៅមិនទាន់អាចបញ្ជាក់ច្បាស់អំពីព័ត៌មាននេះនៅឡើយទេ។
បារាំងប្រមូលផ្តុំពលរដ្ឋបារាំង ដើម្បីត្រៀមជម្លៀសចេញ
ចាប់តាំងពីមានការវាយប្រយុទ្ធគ្នា នៅកណ្តាលក្រុងអាប៊ីដហ្សង់ មានពលរដ្ឋបរទេសជាងមួយពាន់នាក់ (ក្នុងនោះប្រមាណពាក់កណ្តាលជាពលរដ្ឋបារាំង) បាននាំគ្នារត់ទៅជ្រកកោនក្នុងបន្ទាយទាហានបារាំង ស្ថិតនៅប៉ែកខាងត្បូងទីក្រុងអាប៊ីដហ្សង់។
កាលពីថ្ងៃអាទិត្យ លោកសាកូហ្ស៊ីបានកោះប្រជុំបន្ទាន់ជាមួយនាយករដ្ឋមន្រ្តី រដ្ឋមន្រ្តីក្រសួងការបរទេស រដ្ឋមន្រ្តីក្រសួងការពារជាតិ និងអគ្គសេនាធិការកងទ័ពចម្រុះបារាំង ដើម្បីជជែកអំពីវិបត្តិកូតឌីវ័រ។ នៅក្រោយការប្រជុំនេះ លោកប្រធានាធិបតីបារាំងបានបញ្ជាឲ្យកងទ័ពបារាំងប្រមែប្រមូលពលរដ្ឋ បារាំងនៅអាប៊ីដហ្សង់ទាំងអស់ឲ្យនៅជុំគ្នា ដើម្បីងាយស្រួលក្នុងការការពារសុវត្ថិភាព និងងាយស្រួលជម្លៀសចេញ ក្នុងករណីចាំបាច់។
គួរបញ្ជាក់ថា បច្ចុប្បន្ននេះ មានពលរដ្ឋបារាំងសរុប ចំនួន ១២ ២០០នាក់ កំពុងរស់នៅក្នុងប្រទេសកូតឌីវ័រ ក្នុងនោះ ជាងពាក់កណ្តាលជាអ្នកមានសញ្ជាតិពីរ (បារាំង និងកូតឌីវ័រ)។
បារាំងបញ្ជូនទាហានបន្ថែម ៤៥០នាក់ ទៅកូតឌីវ័រ
នៅថ្ងៃចន្ទនេះ អគ្គសេនាធិការដ្ឋានកងទ័ពបារាំងបានប្រកាសបញ្ជូនទាហាន ១៥០នាក់បន្ថែមទៀត ទៅកូតឌីវ័រ បន្ថែមពីចំនួនទាហាន ៣០០នាក់ ដែលបានបញ្ជូនបន្ថែម កាលពីថ្ងៃអាទិត្យ ធ្វើឲ្យចំនួនទាហានបារាំង នៅកូតឌីវ័រ កើនឡើងដល់ ១ ៦៥០ នាក់។ ទាហានទាំងនេះមានបេសកកម្មការពារសុវត្ថិភាពពលរដ្ឋបរទេស យោងតាមអាណត្តិរបស់អ.ស.ប.។
នៅពេលនេះ ទាហានបារាំងបានកាន់កាប់ព្រលានយន្តហោះអន្តរជាតិអាប៊ីដហ្សង់។ បារាំងបានអះអាងថា ការកាន់កាប់ព្រលានយន្តហោះនេះ ត្រូវបានធ្វើឡើង ក្នុងគោលដៅរក្សាច្រកហោះហើរ ដើម្បីជម្លៀសពលរដ្ឋបរទេសចេញពីកូតឌីវ័រ។
កាលពីថ្ងៃអាទិត្យ មានពលរដ្ឋបារាំង និងពលរដ្ឋលីបង់ ចំនួន ១៦៧នាក់ ត្រូវបានទាហានបារាំងជម្លៀសចេញពីកូតឌីវ័រ តាមរយៈជើងហោះហើរពិសេស ចេញពីព្រលានយន្តហោះអាប៊ីដហ្សង់ ទៅប្រទេសសេណេហ្កាល់។
បាក់បូចោទទាហានបារាំងថាចូលឈ្លានពានកាន់កាប់ប្រទេសកូតឌីវ័រ
ទីប្រឹក្សារបស់លោកបាក់បូ បានហៅទង្វើរបស់ទាហានបារាំង ដែលចូលកាន់កាប់ព្រលានយន្តហោះអាប៊ីដហ្សង់ ថាជាសកម្មភាពឈ្លានពានកាន់កាប់ប្រទេសកូតឌីវ័រ។
នៅលើកញ្ចក់ទូរទស្សន៍ TRI ដែលកាន់កាប់ដោយក្រុមលោកបាក់បូ គេឃើញមានសារជាអក្សររត់ជាប្រចាំ ដោយសរសេរថា “ទាហានរបស់សាកូហ្ស៊ីកំពុងរៀបចំផែនការប្រល័យពូជសាសន៍នៅកូតឌីវ័រ ដូចកាលនៅប្រទេសរវ៉ាន់ដា។ ប្រជាជនកូតឌីវ័រ ចូរនាំគ្នាចេញមកឲ្យបានច្រើននៅតាមដងផ្លូវ”។ សារមួយទៀតសរសេរថា “ទាហានបារាំងកាន់កាប់ព្រលានយន្តហោះ។ ពួកយើងកំពុងស្ថិតក្នុងភាពគ្រោះថ្នាក់ហើយ”។
ការឃោសនា គឺជាផ្នែកមួយនៃសង្រ្គាមនៅកូតឌីវ័របច្ចុប្បន្ន។ ក្រុមរបស់លោកបាក់បូ កំពុងព្យាយាមលាបពណ៌សង្រ្គាមបច្ចុប្បន្នថា ជាសង្រ្គាមប្រឆាំងនឹងមហាអំណាចអាណានិគម ដែលចង់ចូលមកកាន់កាប់កូតឌីវ័រសាជាថ្មី។
អ.ស.ប.ចោទក្រុមលោកវ៉ាត់តារ៉ាថាបានសម្លាប់រង្គាលជនស៊ីវិល
មន្រ្តីអ.ស.ប.ប្រចាំកូតឌីវ័រ (ONUCI) បានរាយការណ៍ថា ក្នុងចន្លោះពីថ្ងៃទី២៨ ដល់ថ្ងៃទី៣០ មីនា ២០១១កន្លងទៅនេះ មានជនស៊ីវិលកូតឌីវ័រចំនួន ៣៣០នាក់ បានបាត់បង់ជីវិត។ ក្នុងនោះ ភាគច្រើនស្លាប់ដោយស្នាដៃកងកម្លាំងរបស់លោកវ៉ាត់តារ៉ា។
រដ្ឋាភិបាលរបស់លោកវ៉ាត់តារ៉ាបានច្រានចោលការចោទប្រកាន់នេះ ហើយថែមទាំងបានរិះគន់អ.ស.ប.ទៀតផងថា បានផ្តល់របាយការណ៍ ដោយគ្មានភស្តុតាងបញ្ជាក់ច្បាស់លាស់។ រដ្ឋាភិបាលលោកវ៉ាត់តារ៉ាបានគាំទ្រឲ្យមានការស៊ើបអង្កេតអន្តរជាតិ ទៅលើករណីស្លាប់ប្រជាជនស៊ីវិលនេះ។ នាយករដ្ឋមន្រ្តីរបស់លោកវ៉ាត់តារ៉ាបានប្រកាស នៅថ្ងៃចន្ទនេះថា អ្នកណាដែលទទួលខុសត្រូវក្នុងការកាប់សម្លាប់ជនស៊ីវិលនឹងត្រូវ ទទួលទោសតាមច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ