កូតឌីវ័រ៖ កងកម្លាំងលោកវ៉ាត់តារ៉ាវាយលុកចូលដល់ទីក្រុងអាប៊ីដហ្សង់
កងទ័ពរបស់លោកអាឡាសាន វ៉ាត់តារ៉ា (Alassane Ouattara) ប្រធានាធិបតីកូតឌីវ័រ ដែលទទួលស្គាល់ដោយសហគមន៍អន្តរជាតិ បានវាយលុកចូលដល់ទីក្រុងអាប៊ីដហ្សង់ (Abidjan) កាលពីយប់ថ្ងៃព្រហស្បតិ៍ ម្សិលមិញ។ នៅពេលនេះ ពួកគេកំពុងតែប្រយុទ្ធដណ្តើមកាន់កាប់វិមានប្រធានាធិបតី ដែលជាទីជម្រករបស់លោកឡូរ៉ង់ បាក់បូ (Laurent Gbagbo) ប្រធានាធិបតីផុតអាណត្តិ ប៉ុន្តែ មិនព្រមចុះចេញពីអំណាច។ក្នុងរយៈពេលតែប៉ុន្មានថ្ងៃសោះ លោកវ៉ាត់តារ៉ា ដែលត្រូវលោកបាក់បូឡោមព័ទ្ធឲ្យនៅតែក្នុងសណ្ឋាគារ ត្រឡប់ទៅជាអ្នកគ្រប់គ្រងប្រទេសកូតឌីវ័រវិញ។ ចំណែកលោកបាក់បូ ត្រូវទាហានរបស់លោកវ៉ាត់តារ៉ាឡោមព័ទ្ធវិញម្តង។
ចុះផ្សាយនៅថ្ងៃ៖ កែប្រែថ្ងៃទី៖
បទវិភាគរបស់ សេង ឌីណា
អស់រយៈពេល ៤ខែកន្លងមកហើយ ដែលកូតឌីវ័រស្ថិតក្នុងវិបត្តិនយោបាយ។ លោកអាឡាសាន វ៉ាត់តារ៉ា ត្រូវបានសហគមន៍អន្តរជាតិទទួលស្គាល់ថា ជាប្រធានាធិបតីថ្មី កើតចេញពីការបោះឆ្នោត កាលពីខែវិច្ឆិកា ២០១០។ ក៏ប៉ុន្តែ លោកឡូរ៉ង់ បាក់បូ ដែលជាប្រធានាធិបតីផុតអាណត្តិ បានបដិសេធមិនចុះចេញពីអំណាច។ ប្រធានាធិបតីទាំងពីរបានស្បថចូលកាន់មុខតំណែងតែរៀងៗខ្លួន ក៏ប៉ុន្តែ លោកបាក់បូ កាន់កាប់វិមានប្រធានាធិបតី និងទីក្រុងអាប៊ីដហ្សង់ទាំងមូល។ ចំណែកលោកវ៉ាត់តារ៉ាវិញ ត្រូវកងទ័ពរបស់លោកបាក់បូ ឡោមព័ទ្ធជុំជិត ត្រូវបង្ខំចិត្តយកសណ្ឋាគារធ្វើជាទីស្តីការគណៈរដ្ឋមន្រ្តី។
ដល់វេនលោកបាក់បូត្រូវគេឡោមព័ទ្ធវិញម្តង
នៅពេលនេះ ស្ថានភាពបានបញ្ច្រាស់មកវិញ។ កងកម្លាំងរបស់លោកវ៉ាត់តារ៉ា (អតីតទាហានឧទ្ទាម) ដែលកាន់កាប់កូតឌីវ័រមួយកំណាត់ ប៉ែកខាងជើង បានចាប់ផ្តើមវាយលុកចូលមកទិសខាងត្បូង កាលពីថ្ងៃចន្ទ ២៨ មីនា ២០១១។ ក្រោយពីបានវាយដណ្តើមកាន់កាប់ទីក្រុងយ៉ាមូស៊ូក្រូ (រដ្ឋធានីថ្មីរបស់កូតឌីវ័រ) និងកំពង់ផែច្រកនាំចេញកាកាវ (San Pedro) កងកម្លាំងរបស់លោកវ៉ាត់តារ៉ា បានវាយលុកចូលដល់ទីក្រុងអាប៊ីដហ្សង់ កាលពីយប់ថ្ងៃព្រហស្បតិ៍ ម្សិលមិញ។
នៅថ្ងៃព្រហស្បតិ៍ដដែលនោះ ព្រលានយន្តហោះអន្តរជាតិនៅអាប៊ីដហ្សង់ ត្រូវបានប្រគល់ទៅឲ្យកងទ័ពមួកខៀវកាន់កាប់។ ទាហានរបស់លោកបាក់បូ បានដកចេញពី សណ្ឋាគារ Golf ដែលជាទីជម្រករបស់លោកវ៉ាត់តារ៉ា។ លោកប្រធានាធិបតីវ៉ាត់តារ៉ា ក៏ចាប់ផ្តើមមានសេរីភាពធ្វើដំណើរចេញចូល ក្នុងទីក្រុងអាប៊ីដហ្សង់តាមចិត្ត។
ផ្ទុយមកវិញ គឺលោកបាក់បូ ដែលត្រូវរត់គេចខ្លួនវិញម្តង។ អស់រយៈពេលប្រមាណ ១សប្តាហ៍កន្លងមកហើយ ដែលលោកបាក់បូបានបាត់មុខពីទីសាធារណៈ។ ស្ថានីយ៍វិទ្យុ និងទូរទស្សន៍រដ្ឋ ដែលជាមធ្យោបាយឃោសនាដ៏សំខាន់បំផុតរបស់លោកបាក់បូ ត្រូវបានកងទ័ពរបស់លោកវ៉ាត់តារ៉ាវាយដណ្តើមយក ហើយបិទលែងឲ្យផ្សាយ។ នៅពេលនេះ ការវាយប្រយុទ្ធគ្នាកំពុងតែបន្តធ្វើ រវាងកងទ័ពរបស់លោកវ៉ាត់តារ៉ា និងក្រុមអង្គរក្សរបស់លោកបាក់បូ ដើម្បីដណ្តើមកាន់កាប់វិមានប្រធានាធិបតី។
ទណ្ឌកម្មអន្តរជាតិបានផ្តល់ផ្លែផ្កា
មូលហេតុចម្បងនៃបរាជ័យរបស់លោកបាក់បូ គឺទណ្ឌកម្មអន្តរជាតិ។ ទ្រព្យសម្បត្តិរបស់ក្រុមលោកបាក់បូ ត្រូវបានគេផ្អាប់ទុក។ លុយពីធនាគារកណ្តាលក៏លោកបាក់បូលែងអាចប៉ះពាលបាន ដោយសារគេលែងទទួលស្គាល់ហត្ថលេខាមន្រ្តីរបស់លោកបាក់បូ។ ធនធានរបស់រដ្ឋាភិបាលបាក់បូ ក៏ចាប់ថមថយ ពីមួយថ្ងៃ ទៅមួយថ្ងៃ។ លុយសម្រាប់ជួលទាហានស៊ីឈ្នួលបរទេសក៏លែងមាន។ លុយសម្រាប់បើកប្រាក់ខែឲ្យទាហានក៏លែងមាន។
ណាមួយគ្មានប្រាក់ខែផង ណាមួយត្រូវប្រឈមមុខនឹងអតីតទាហានឧទ្ទាម ដែលមានភាពក្លាហាន និងមានបទពិសោធន៍ក្នុងសមរភូមិផង ទាហានរបស់លោកបាក់បូ ក៏បានបោះបង់ចោលសមរភូមិ បណ្តោយឲ្យកងទ័ពរបស់លោកវ៉ាត់តារ៉ាវាយដណ្តើមយកទីក្រុងម្តងមួយៗ រហូតមកដល់អាប៊ីដហ្សង់។
កាលពីថ្ងៃពុធ អគ្គសេនាធិការកងទ័ពជាតិ ដែលជាមេទ័ពកំពូលរបស់លោកបាក់បូ បានប្រកាសលាឈប់ពីអំណាច ហើយរត់ទៅជ្រកកោនក្នុងស្ថានទូតអាហ្វ្រិកខាងត្បូង។ មន្រ្តីកងកម្លាំងប្រដាប់អាវុធផ្សេងទៀត ក៏បានចាប់ផ្តើមផ្តាច់ខ្លួនពីលោកបាក់បូជាបន្តបន្ទាប់។ គិតរហូតមកទល់នឹងថ្ងៃសុក្រនេះ មានទាហាន ប៉ូលិស និងប៉េអឹម ប្រមាណ ៥ម៉ឺននាក់ ដែលបានផ្តាច់ខ្លួនពីលោកបាក់បូ។
បាក់បូនៅតែមិនព្រមចុះចេញ
ទោះជាយ៉ាងណាក៏ដោយ លោកបាក់បូ នៅមានកងអង្គរក្ស និងកងកុម្ម៉ង់ដូពិសេស ប្រមាណ ២ ៥០០នាក់ផ្សេងទៀត ដែលកំពុងប្រយុទ្ធការពារវិមានប្រធានាធិបតី។ ទាហានទាំងនោះ សុទ្ធតែបានទទួលការហ្វឹកហ្វឺនម៉ត់ចត់ និងបំពាក់ទៅដោយអាវុធទំនើបៗ។ ដូច្នេះ បើសិនជាលោកបាក់បូ មិនព្រមទម្លាក់អាវុធចុះចាញ់ទេ សមរភូមិនៅអាប៊ីដហ្សង់ ប្រាកដជានឹងត្រូវបង្ហូរឈាមច្រើនជាមិនខាន។
នៅថ្ងៃសុក្រនេះ តំណាងរបស់លោកបាក់បូ ប្រចាំទីក្រុងប៉ារីស បានប្រកាសថា លោកបាក់បូ នឹងមិនចុះចេញពីអំណាចនោះទេ ហើយបានចោទប្រកាន់លោកវ៉ាត់តារ៉ាថា កំពុងតែធ្វើរដ្ឋប្រហារ។ ប្រភពពីមនុស្សស្និទ្ធិនឹងលោកបាក់បូក៏បានឲ្យដឹងដែរថា លោកបាក់បូ នឹងមិនសុខចិត្តនិរទេសខ្លួនទៅបរទេសនោះទេ ដោយសុខចិត្តនៅតស៊ូប្រយុទ្ធនៅក្នុងវិមានប្រធានាធិបតី រហូតដល់ដំណាក់កាលចុងក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ