ឡូរ៉ង់បាក់បូនៅតែតស៊ូជានិច្ចនៅកូតឌីវ័រ
ឡូរ៉ង់បាក់បូដែលការពារដោយយុទ្ធជនស្មោះស្ម័គ្រនឹងខ្លួនប្រដាប់ដោយ អាវុធទំនើបៗ នៅតែពួនលាក់ខ្លួននៅក្នុងវិមានប្រធានាធិបតីនៅទីក្រុងអាបីដហ្សង់ ក្រោយពីបានរុញច្រានការវាយលុករបស់កងកម្លាំងយោធារបស់វ៉ាត់តារ៉ា កាលពីថ្ងៃពុធម្សិលមិញ។ រីឯកងកម្លាំងយោធាបារាំងក៏បាន ធ្វើការវាយប្រហារជាថ្មីទៀតនៅយប់ថ្ងៃពុធ ម្សិលមិញទៅលើចំណុចទីតាំងយោធាដែលមាននៅវិមានរបស់ឡូរ៉ង់បាក់បូនៅ ទីក្រុងអាបីដហ្សង់។
ចុះផ្សាយនៅថ្ងៃ៖ កែប្រែថ្ងៃទី៖
បទវិភាគរបស់ សៀក សារិន
ក្រោយពីបរាជ័យក្នុងការវាយលុកដោយកងកម្លាំងរបស់វ៉ាត់តារ៉ាទៅលើវិមានប្រធានាធិបតីនៅទីក្រុងអាបីដហ្សង់ដើម្បីចាប់ខ្លួនឡូរ៉ង់បាក់បូកាលពីថ្ងៃពុធម្សិលមិញ នៅថ្ងៃព្រហស្បតិ៍ទី៧មីនានេះ អ្វីៗនៅមានលក្ខណៈពុំជាក់ច្បាស់នៅឡើយ។ បើយោងតាមប្រភពខ្លះបានឲ្យដឹងថា គេឮសូរមានកាំភ្លើងស្វ័យប្រវត្តបាញ់តទល់គ្នាហើយនិងមានឮស្នូរកាំភ្លើងធំបាញ់លាន់ឮរប៉េះរប៉ោះ។ ចំណែកឯ កងកម្លាំងយោធារបស់ប្រធានាធិបតីវ៉ាត់តារ៉ាបានបន្តដំណើរសម្រុកចូលទីក្រុងអាបីដហ្សង់។ ទាហានរបស់ប្រធានាធិបតីវ៉ាត់តារ៉ាបានធ្វើការយាមល្បាតនៅតាមសង្កាត់Cocody ដែលឋិតនៅប៉ែកខាងជើងនៃទីក្រុងអាបីដហ្សង់ហើយដែលមានវិមានរបស់ឡូរ៉ង់បាក់បូនៅទីនោះ។ កងកម្លាំងយោធារបស់វ៉ាត់តារ៉ាក៏បានចាប់ក្តោបក្តាប់សង្កាត់Plateau ដោយហេតុថាគោលបំណងធំរបស់គេគឺវាយយកវិមានប្រធានាធិបតី។
ចំណែកឯឡូរ៉ង់បាក់បូនិងភរិយានៅតែពួនលាក់ខ្លួននៅក្នុងវិមានប្រធានាធិបតីនៅទីក្រុងអាបីដហ្សង់ ក្រោយពីបានរុញច្រានការវាយសម្រុករបស់កងកម្លាំងយោធារបស់វ៉ាត់តារ៉ាកាលពីថ្ងៃពុធម្សិលមិញ។
ការប្រឆាំងទទឹងរឹងរូសរបស់ឡូរ៉ង់បាក់បូគឺពិតជាទង្វើឆ្កួតលីលាគ្មានន័យ ដោយឡូរ៉ង់បាក់បូនៅតែថ្លែងប្រកាសថា ខ្លួនជាអ្នកឈ្នះឆ្នោត ដូច្នេះគេគ្មានត្រូវការចាកចេញពីមុខតំណែងប្រធានាធិបតីកូតឌីវ័រឡើយ ទោះបីជាមានសម្ពាធពីសំណាក់សហគមន៍អន្តរជាតិនិងពីសំណាក់ប្រទេសបារាំងយ៉ាងណាក្តី។
ហើយបើយោងតាមសេចក្តីប្រកាសរបស់រដ្ឋមន្ត្រីក្រសួងការពារជាតិបារាំងលោកGérard Longuet ប្រទេសបារាំងពុំចូលធ្វើអន្តរាគមន៍យោធាដើម្បីទម្លាក់ឡូរ៉ង់បាក់បូចេញពីតំណែងប្រធានាធិបតីកូតឌីវ័រឡើយ។ ក៏ប៉ុន្តែនៅប៉ុន្មានម៉ោងក្រោយពីកងកម្លាំងយោធារបស់ប្រធានាធិបតីវ៉ាត់តារ៉ាពុំបានទទួលជោគជ័យក្នុងការវាយលុកទៅលើវិមានរបស់ឡូរ៉ង់បាក់បូ កងកម្លាំងយោធាបារាំងក៏បានធ្វើការវាយប្រហារជាថ្មីទៀតនៅយប់ថ្ងៃពុធម្សិលមិញទៅលើចំណុចទីតាំងយោធាដែលមាននៅវិមានរបស់ឡូរ៉ង់បាក់បូនៅទីក្រុងអាបីដហ្សង់។
រីឯឧទ្ថម្ភាគចក្រនៃកងកម្លាំងយោធាបារាំងក៏បានបាញ់វាយលុកទៅលើតំបន់ដែលឋិតនៅជិតវិមានរបស់ឡូរ៉ង់បាក់បូដើម្បីធ្វើការរំដោះលោកឯកអគ្គរដ្ឋទូតនៃប្រទេសជប៉ុននៅកូតឌីវ័រ។ ទាំងនេះដើម្បីឆ្លើយតបទៅនឹងសំណើសុំរបស់អ ស ប ។
ការវាយលុកដោយកងកម្លាំងរបស់វ៉ាត់តារ៉ាទៅលើវិមានប្រធានាធិបតីនៅទីក្រុងអាបីដហ្សង់ដើម្បីចាប់ខ្លួនឡូរ៉ង់បាក់បូកាលពីថ្ងៃពុធម្សិលមិញពុំបានទទួលជោគជ័យគឺបណ្តាលមកពីឡូរ៉ង់បាក់បូនៅមានកាំភ្លើងធំនិងនៅមានយុទ្ធជនស្មោះស្ម័គ្ររាប់ពាន់នាក់នៅឡើយតាមការពាររូបលោក។ នៅចំពោះមុខសភាពការណ៍បែបនេះ កងកម្លាំងយោធារបស់វ៉ាត់តារ៉ាដែលពុំសូវមានសព្វាវុធធុនធ្ងន់ហើយនិងនៅមានកង្វះខាតពិសោធន៍ច្រើននៅឡើយ ពិតជាមានការពិបាកនឹងដណ្តើមយកជោគជ័យក្នុងការវាយលុកចូលចាប់ឡូរ៉ង់បាកបូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ