ការប្រយុទ្ធគ្នាជាថ្មីនៅថ្ងៃអាទិត្យ៨ឧសភា២០១១នៅជិត Misrata
ការវាយប្រយុទ្ធគ្នា ចាប់ផ្តើមឡើងវិញនាថ្ងៃអាទិត្យ៨ឧសភានេះ នៅជិតទីក្រុងកំពង់ផែ Misrata។ Misrata ទីក្រុងរបស់ចលនាបះបោរលីប៊ីនេះ ត្រូវបានឡោមព័ទ្ធតាំងពីជាង២ខែកន្លងមកហើយដោយកងកម្លាំងរបស់លោក កាដាហ្វី។ គេឃើញ ផ្សែងភ្លើង ឆាបឆេះយ៉ាងទ្រលោម ចេញពី កំពង់ផែ Misrata មួយថ្ងៃបន្ទាប់ ពីការបាញ់គ្រាប់ផ្លោងរបស់កងកម្លាំងកាដាហ្វី បំផ្លាញ កន្លែងស្តុកទុកប្រេងសាំង។
ចុះផ្សាយនៅថ្ងៃ៖
ស្តាប់ - ០២:០០
ការវាយប្រយុទ្ធគ្នា បានប្រព្រឹត្តទៅនៅប៉ែកខាងលិចនៃទីក្រុងដ៏ធំនេះដែលជាប់ឆ្នេរសមុទ្រ និង ចម្ងាយ ២០០គម ប៉ែកខាងកើតនៃទីក្រុង ទ្រីប៉ូលី ក្នុង តំបន់ Bourgueya ។
នៅកំពង់ផែ គេ ឃើញ ផ្សែងភ្លើង ហុយទ្រលោមពេញទីក្រុង ដែលបណ្តាលមកពីភ្លើងឆេះនៅ កន្លែង ទុកប្រេងសាំង ដែលនៅទីនេះ ប្រជាជន ប្រមាណ ៥០ ម៉ឺននាក់កំពុងតែនាំគ្នាតម្រង់ជួរនៅពីមុខស្ថានីយបូមប្រេង ដោយហេតុភ័យព្រួយអស់ប្រេងសាំងប្រើប្រាស់។
នៅថ្ងៃសៅរ៍ម្សិលមិញ កងទ័ពរដ្ឋាភិបាលលីប៊ី បានបង្កើនការវាយលុកយ៉ាងខ្លាំងទៅលើកំពង់ផែ Misrata ដែលជាមធ្យោបាយតែមួយគត់ ក្នុងការឡោមព័ទ្ធទីក្រុងនេះ កុំ ឲ្យចលនាបះបោរអាចទទួលជំនួយស្បៀងអាហារឬ ក៏ដឹកជម្លៀសអ្នករបួសឬ ក៏ជម្លៀសជនភៀសខ្លួន។
នៅពេលព្រឹក កន្លែងស្តុកប្រេងសាំងមួយ នៅជិតផែត្រូវឆាបឆេះភ្លើងដោយការផ្លោងគ្រាប់បែកមួយនិង បណ្តាលឲ្យផ្ទុះឆេះ រាលដាលដល់ទីកន្លែងស្តុកប្រេងផ្សេងៗទៀត។
យោងតាមចលនាបះបោរលីប៊ី--កងទ័ពស្មោះត្រង់នឹងលោកកាដាហ្វី--បាញ់បំផ្លាញតែនៅកន្លែងដែលមានស្តុកប្រេងសាំងពេញព្រៀប- ហើយក៏ប្រហែលជាមានរនុកក្នុងឲ្យដៃដែរទើប ពួកទាហាន ធ្វើការកំទេចចំៗ ទីកន្លែងស្តុកប្រេងសាំង។ មិនតែប៉ុណ្ណោះ ចលនាបះបោរ ចោទថា ពួកទ័ពកាដាហ្វី នៅពេលព្រឹក -បានប្រើឧទ្ធម្ភាគចក្រដែលមានសញ្ញា កាកបាទក្រហមដើម្បីទម្លាក់គ្រាប់មីន នៅក្នុងទឹកនៅកំពង់ផែ Misrata ដែរ។
ដោយឡែក-- អ៊ីតាលី សន្យាថា នឹង ផ្តល់អាវុធ ក្នុងពេលឆាប់ៗនេះ ឲ្យដល់ចលនាបះបោរលីប៊ី ដើម្បីជាជំនួយសំរាប់ ការពារខ្លួន ប្រឈមមុខទល់នឹងកងទ័ពរបស់លោកកាដាហ្វី ដែលបានធ្វើឲ្យចលនាបះបោរលីប៊ី ខាតបង់យ៉ាងធ្ងន់ធ្ងរកាលពីថ្ងៃសៅរ៍ម្សិលមិញ។
ម្យ៉ាងទៀត ជម្លោះនៅក្នុងប្រទេសលីប៊ីនេះ បានបណ្តាលឲ្យមនុស្សស្លាប់ ជាច្រើនពាន់នាក់។ នេះបើយោងតាម រដ្ឋអាជ្ញានៃតុលាការព្រហ្មទណ្ឌអន្តរជាតិ លោក Luis Moreno-Ocampo ដែល កំពុងសុំ ដីកាចាប់ខ្លួនជន៣នាក់ ពីបទឧក្រិដ្ឋកម្មប្រឆាំងមនុស្សជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ