សហគមន៍អន្តរជាតិអបអរសាទរចំពោះជោគជ័យ នៃការបោះឆ្នោតប្រជាមតិថ្មីនៅម៉ារ៉ុក
កាលពីថ្ងៃសុក្រ ទី១ កន្លងទៅ ប្រជាជនម៉ារ៉ុកភាគច្រើនលើសលុបបានបោះឆ្នោតគាំទ្រកំណែទម្រង់រដ្ឋធម្មនុញ្ញ ដែលស្នើដោយព្រះមហាក្សត្រ Mohammed ទី៦។ លោក Nicolas Sarkozy ប្រធានាធិបតីបារាំង លោកស្រី Hillary Clinton រដ្ឋមន្រ្តីក្រសួងការបរទេសអាមេរិក និងសហគមន៍អឺរ៉ុបបានកោតសរសើរលទ្ធផលនេះថា ជាជំហានឆ្ពោះទៅកាន់លទ្ធិប្រជាធិបតេយ្យដ៏ប្រសើរមួយនៅក្នុងប្រទេសអារ៉ាប់មួយនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣១
នៅក្នុងលិខិតជាផ្លូវការមួយ លោកប្រធានាធិបតីបារាំង Nicolas Sarkozy បានកោតសរសើរ ព្រះមហាក្សត្រ Mohammed ទី៦ដែលបានរៀបចំអោយមាន ការបោះឆ្នោតប្រជាមតិថ្មី។ ការបោះឆ្នោតដែលបង្ហាញពីសំឡេងគាំទ្រជាង៩៨ភាគរយរបស់ប្រជាជន ម៉ារ៉ុក ទៅលើកំណែទម្រង់រដ្ឋធម្មនុញ្ញថ្មី។
គួរបញ្ជាក់ថាកំណែទម្រង់រដ្ឋធម្មនុញ្ញដែលបានស្នើដោយព្រះមហាក្សត្រសព្វថ្ងៃ គឺធ្វើឡើង ដើម្បីឆ្លើយតបទៅនឹងការតវ៉ាជាច្រើនលើកជាច្រើនសារបស់ប្រជាជន ម៉ារ៉ុកដែលមិនពេញចិត្តនឹងរបបបច្ចុប្បន្ន។ ការតវ៉ាដែលបានធ្វើឡើងជាហូរហែតាំងពីខែកុម្ភៈមក។
អត្ថបទរដ្ឋធម្មនុញ្ញថ្មីនេះសំដៅពង្រឹងរបបរាជានិយម លទ្ធិប្រជាធិបតេយ្យ រដ្ឋសភានិងសង្គម។ ព្រះមហាក្សត្រនៅតែបន្តអោយមានសិទ្ធិជ្រើសរើសនាយករដ្ឋមន្រ្តីដឹកនាំប្រទេស ប៉ុន្តែ ប្រមុខរដ្ឋាភិបាលអាចមានសិទ្ធិរំលាយរដ្ឋសភា ដែលកាលពីមុនអំណាចនេះឋិតនៅលើព្រះមហាក្សត្រ។
ម្យ៉ាងវិញទៀត ក្រុមបឹ្រក្សាច្បាប់ជាន់ខ្ពស់មួយ ដែលដឹកនាំដោយ Mohammed ទី៦ នឹងត្រូវបង្កើតឡើងដើម្បីធានាប្រព័ន្ធយុត្តិធម៌ជាតិ។
លោក Nicolas Sarkozyបានវាយតម្លៃថា នេះគឺជាគំរូដ៏ល្អដែលអាចជួយអោយប្រទេស ម៉ារ៉ុក ដោះស្រាយវិបត្តិរបស់ខ្លួនដោយសន្តិវិធី។ ប្រធានាធិបតីបារាំងរូបនេះក៏បានជំរុញអោយ ម៉ារ៉ុក ចូលរួមទៅក្នុងភាពជាដៃគូនៅ Deauvilleដែលគាំទ្រប្រទេសអ៉ារាប់ទាំងឡាយអោយធ្វើដំណើរឆ្ពោះទៅកាន់លទ្ធិប្រជាធិបតេយ្យដ៏ពេញលេញមួយ។
តែទោះបីជាយ៉ាងណាក៏ដោយ ចលនាប្រឆាំងមួយចំនួននៅតែបន្តនៅក្នុងប្រទេស។ពួកគេរិះគន់ថា កំណែទម្រង់ថ្មីមិនមានលក្ខណៈប្រជាធិបតេយ្យគ្រប់គ្រាន់ហើយមានការកេងបន្លំសន្លឹកឆ្នោតនៅពេលបោះឆ្នោតប្រជាមតិកន្លងមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ