ក្រុមបះបោរប្រឆាំងលីប៊ីធ្វើការវាយលុកខិតកាន់តែជិតដល់រដ្ឋធានីទ្រីប៉ូលី
ក្រុមបះបោរប្រឆាំងចាប់ធ្វើការវាយលុកនៅថ្ងៃពុធម្សិលមិញនៅប៉ែក ខាងលិចនៃប្រទេសលីប៊ី ដោយវាយយកបានភូមិឈ្មោះGoualichឋិតនៅប្រមាណ៥០ប្លាយគីឡូម៉ែត្រ ខាងត្បូងនៃរដ្ឋធានីទ្រីប៉ូលី។ ទាំងនេះក្រោយពីមានក្រោយពីមានសង្គ្រាមរ៉ាំរ៉ៃអស់រយៈពេលជាច្រើន សប្តាហ៍។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
នាឱកាសវាយប្រហារគ្នានៅថ្ងៃពុធម្សិលមិញ ក្រុមបះបោរប្រឆាំងលីប៊ីចាប់ទាហានស៊ីឈ្នួលធ្វើសង្គ្រាមបម្រើរបបផ្តាច់ការកាដាហ្វ៊ីបានជាច្រើននាក់។ ទាហានស៊ីឈ្នួលធ្វើសង្គ្រាមទាំងនោះបានឆ្លើយប្រាប់ថា អ្នកខ្លះមកពីប្រទេសហ្កាណា អ្នកខ្លះទៀតមកពីប្រទេសម៉ាលី។
មុននឹងវាយលុកយកបានភូមិឈ្មោះ Goualich នេះ គេសង្កេតឃើញមានការបាញ់ឆ្លងឆ្លើយតបតគ្នាយ៉ាងខ្លាំងក្លារវាងកាំភ្លើងធំនៃក្រុមអ្នកបះបោរប្រឆាំងលីប៊ីហើយនិងកងកម្លាំងបម្រើកាដាហ្វ៊ី។ យន្តហោះនៃបក្សសម្ព័ន្ធ OTAN បានហោះហើរត្រួតពិនិត្យនៅលើតំបន់នោះ ប៉ុន្តែពុំបានធ្វើការទម្លាក់គ្រាប់បែកឡើយ។
គួរកត់សម្គាល់ថា បន្ថែមពីលើជំនួយតាមផ្លូវអាកាសពីសំណាក់បក្សសម្ព័ន្ធអូតង់ នៅពេលថ្មីៗនេះ ក្រុមអ្នកបះបោរប្រឆាំងលីប៊ីទទួលបានជំនួយសព្វាវុធបារាំងដែលទម្លាក់ផ្តល់ឲ្យតាមឆត្រយោងនៅតំបន់ភ្នំ Nefoussa ផងទៀត។
ម្យ៉ាងទៀតនៅថ្ងៃពុធម្សិលមិញ ប្រជាជនលីប៊ីរាប់ម៉ឺននាក់បាននាំគ្នាចុះថ្នល់ស្រែកប្រឆាំងនឹងរបបផ្តាច់ការកាដាហ្វ៊ីនៅទីក្រុងបេងហ្កាហ្ស៊ី ដោយបានលើកគ្រវីទង់ជាតិនិងស្រែកបណ្តេញមូអាម៉ារកាដាហ្វ៊ីឲ្យចាកចេញពីមុខតំណែង។
នៅលើវិស័យការទូតវិញ គណៈប្រតិភូនៃក្រុមអ្នកបះបោរប្រឆាំងលីប៊ី CNT ឬក្រុមប្រឹក្សាជាតិអន្តរកាលនឹងត្រូវទទួលជាលើកទីមួយនៅថ្ងៃទី១៣កក្កដាខាងមុខនេះដោយអ្នកតំណាងនៃ២៨ប្រទេសនៃបក្សសម្ព័ន្ធអួតង់នៅទីក្រុងព្រុចសែល។
រីឯឥស្សរជនសំខាន់ទីពីរនៃក្រុមអ្នកបះបោរប្រឆាំងលីប៊ីឬក្រុមប្រឹក្សាជាតិអន្តរកាលលោក Mahmoud Jibril បានប្រកាសអំពាវនាវនៅថ្ងៃពុធម្សិលមិញនៅទីក្រុងអង់ការ៉ា ឲ្យសហគមន៍អន្តរជាតិយកមូលនិធិរបស់របបផ្តាច់ការកាដាហ្វ៊ីដែលឃាត់ផ្អាប់ទុកនោះផ្តល់ឲ្យក្រុមប្រឹក្សាជាតិអន្តរកាលប្រើប្រាស់សម្រាប់ផ្តួលរំលំកាដាហ្វ៊ី។
សូមបញ្ជាក់ថា ប្រទេសលីប៊ីបានស្គាល់ការងើបបះបោរប្រឆាំងនឹង របបផ្តាច់ការកាដាហ្វ៊ីតាំងពីពាក់កណ្តាលខែកុម្ភៈឆ្នាំ២០១១។ មេដឹកនាំរបបផ្តាច់ការមូអាម៉ារកាដាហ្វ៊ីដែលបានឡើងមកកាន់កាប់អំណាចនៅប្រទេសលីប៊ីអស់រយៈពេល៤២ឆ្នាំមកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ