បារាំងអះអាងថាការទម្លាក់អាវុធទៅអោយក្រុមបះបោរលីប៊ីជាអំពើស្របច្បាប់
រដ្ឋមន្រ្តីក្រសួងការបរទេសបារាំង លោក Alain Juppé បានអះអាងកាលពីថ្ងៃសុក្រម្សិលមិញថា បារាំងមិនបានរំលោភលើសេចក្តីសំរេចរបស់ក្រុមប្រឹក្សាសន្តិសុខអង្គការសហប្រជាជាតិក្នុងកិច្ចអន្តរាគមន៍ជួយប្រទេសលីប៊ីនោះទេ។ ការដែលបារាំងផ្តល់អាវុធទៅអោយក្រុមបះបោរដើម្បីការពារជនស៊ីវិលស្លូតត្រង់ពីរបបផ្តាច់ការរបស់លោក Kadhafi។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៥
“ អ្វីដែលយើងបានធ្វើ គឺស្របទៅនឹងសេចក្តីសំរេចរបស់ក្រុមប្រឹក្សាសន្តិសុខអង្គការសហប្រជាជាតិ។ ហើយយើងបានផ្តល់ពត៌មានជាមុនរួចទៅហើយ ទៅកាន់អង្គការខាងលើនិង ដៃគូអង្គការ Otan ” នេះជាសំដីអះអាង របស់លោក Alain Juppé រដ្ឋមន្រ្តីក្រសួងការបរទេសបារាំង។
ការអះអាងការពារខ្លួននេះ គឺធ្វើឡើងបន្ទាប់ពីមានការរិះគន់យ៉ាងខ្លាំង ពីប្រទេសរុស្ស៊ីថា ការដែលបារាំងផ្តល់អាវុធទៅអោយក្រុមបះបោរនៅលីប៊ី គឺជាអំពើខុសច្បាប់។ រុស្ស៊ីបានសរសេរលិខិតមួយ ទៅកាន់ទីក្រុងប៉ារីសដើម្បីពន្យល់ពីរឿងនេះ។
កាលពីដើមខែមិថុនាកន្លងមកបារាំងបាន ទម្លាក់ អាវុធយុទ្ធភ័ណ្ឌមួយចំនួន ទៅអោយក្រុមបះបោរនៅភាគខាងត្បូងរដ្ឋធានី Tripoli ដោយហៅថាជាអាវុធការពារខ្លួន។បារាំងអះអាងថា ប្រជាជនស្លូតត្រង់ត្រូវការជំនួយជាបន្ទាន់ ពីព្រោះពួកគេកំពុងឋិតនៅក្នុងសភាពគ្រោះថ្នាក់និងទទួលរងការគំរាមសង្កត់ ពីកម្លាំងយោធារបស់លោក Kadhafiដែលជាផ្ទាំងស៊ីបរបស់សហគមន៍អន្តរជាតិ។
បារាំងហ៊ានធ្វើបែបនេះដោយផ្អែកទៅលើសេចក្តីសំរេចលេខ១៩៧៣គឺស្របទៅនឹងសេចក្តីសំរេចរបស់ក្រុមប្រឹក្សាសន្តិសុខអង្គការសហប្រជាជាតិដែលអនុញ្ញាតអោយប្រទេសជាសមាជិកអាចប្រើកម្លាំងយោធាដើម្បីការពារអាយុជីវិតជនស៊ីវិលនៅលីប៊ី។
ប៉ុន្តែបារាំងអះអាងថាពួកគេមិនបានផ្តល់អាវុធធុនធ្ងន់ដូចជារថក្រោះមីស៊ីល ដូចការចោទប្រកាន់នោះទេ។ ពួកគេបាន ទម្លាក់ អោយតែអាវុធធុនស្រាលដូចជាកាំភ្លើងយន្ត និងប្រដាប់បាញ់Roquettesប៉ុណ្ណោះ។
បើទោះបីជាមានការខ្វែងគំនិតគ្នាជាមួយនឹងរុស្ស៊ីលើបញ្ហានេះក៏ដោយ ក៏រដ្ឋមន្រ្តីក្រសួងការបរទេសបារាំងអះអាងថាមិនមានភាពអ្វីល្អក់កករកើតឡើង នៅក្នុងកិច្ចសហប្រតិបត្តិការរវាងប្រទេសទាំងពីរទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ