វិបត្តិនយោបាយនៅប៊ូរុនឌី៖ ភាពស្រពេចស្រពិលជុំវិញការបោះឆ្នោត
ភាពស្រពេចស្រពិលកំពុងតែចោទឡើង ក្នុងប្រទេសប៊ូរុនឌី ជុំវិញកាលបរិច្ឆេទបោះឆ្នោតជ្រើសរើសតំណាងរាស្រ្ត និងប្រធានាធិបតី របស់ប្រទេសនេះ ដែលកំពុងតែជួបចលាចលនយោបាយ ពាសពេញប្រទេស អស់រយៈពេលមួយខែមកហើយ។ វិបតិ្តកាន់តែធ្ងន់ធ្ងរ ទៅទៀត ដោយសារតែនៅថ្ងៃសៅរ៍ទី ៣០ ឧសភា មានលេចឮដំណឹងថា សមាជិកក្រុមប្រឹក្សាជាតិរៀបចំការបោះឆ្នោតប៊ូរុនឌីពីររូប បានលាលែងពីតំណែង ហើយបាននាំគ្នារត់ចោលស្រុក បាត់ទៅហើយ។
ចុះផ្សាយនៅថ្ងៃ៖
ស្តាប់ - ០២:០១
ចលាចលនយោបាយ ដោយសារមានការប្រឈមមុខដាក់គ្នារវាង ប្រជាជននឹង ក្រុមអាជ្ញាធរ បានកើតឡើងពាសពេញប្រទេសប៊ូរុនឌី អស់រយៈពេលមួយខែមកហើយ។ ប្រជាជនបានធ្វើការបះបោរ ដើម្បីប្រឆាំង នឹងបេក្ខភាពប្រធានាធិបតីរបស់លោក Nkurunziza ដែលជាប្រធានាធិបតីបច្ចុប្បន្ន កាន់អំណាចបានពីរអាណត្តិរួចមកហើយ តាំងពីឆ្នាំ២០០៥មក។ ទាហានប៊ូរុនឌី បានប៉ុនប៉ងធ្វើរដ្ឋប្រហារ ទំលាក់ លោក Nkurunziza កាលពីសប្តាហ៍មុន ប៉ុន្តែមិនបានសម្រេច។
សូមបញ្ជាក់ថា ប្រទេសប៊ូរុនឌី កំពុងត្រៀមរៀបចំបោះឆ្នោតសំខាន់ៗ បន្តបន្ទាប់គ្នា ពោលគឺបោះឆ្នោតសភា និងឃុំសង្កាត់ នៅថ្ងៃសុក្រទី ៥មិថុនា បោះឆ្នោតប្រធានាធិបតី នៅថ្ងៃទី ២៦មិថុនា និងបោះឆ្នោតព្រឹទ្ធសភា នៅថ្ងៃទី ១៧កក្កដា។ ប្រឈមមុខនឹងភាពចលាចលយ៉ាងធ្ងន់ធ្ងរ សហគមន៍អន្តរជាតិបានអំពាវនាវ ឲ្យពន្យាពេលរៀបចំការបោះឆ្នោតទាំងនេះ។
អ្វីដែលជាការព្រួយបារម្ភនោះ គឺថា ប្រជាជនដែលគាំទ្រ គណបក្សកាន់អំណាច របស់លោក Nkurunziza និងក្រុមប្រជាជនដែលប្រឆាំង បានធ្វើសកម្មភាពជ្រុលនិយម គម្រាមកំហែង និងកាប់សំលាប់គ្នាទៅវិញទៅមក។ មិនត្រឹមតែប៉ុណ្ណោះ អាជ្ញាធរដែលជាដៃជើងរបស់ប្រធានាធិបតី ក៏បានចូលរួម ធ្វើឲ្យបរិយាកាសនេះ មានភាពតឹងតែង និងស្អប់គំគួនគ្នាទៅវិញទៅមក ផងដែរ។ ស្ថិតក្នុងបរិយកាសអួរអាប់បែបនេះ គេមិនសង្ឃឹមថា ការបោះឆ្នោត នឹងប្រព្រឹតិ្តទៅដោយសេរី និងយុត្តិធម៌នោះទេ។
ដោយឡែក នៅថ្ងៃសៅរ៍ទី ៣០ ឧសភា តាមប្រភពព័ត៌មានច្បាស់ការបានឲ្យដឹងថា លោកស្រី អនុប្រធានក្រុមប្រឹក្សាជាតិរៀបចំការបោះឆ្នោត បានដាក់ពាក្យលាឈប់ ហើយបានរត់ចោលស្រុក ទៅសំងំលាក់ខ្លួននៅបរទេសបាត់ទៅហើយ។ ចំណែកសមាជិកម្នាក់ទៀត ដែលមានលេចឮដំណឹងថាបានរត់ចោលស្រុកដែរនោះ គេនៅមិនទាន់អាចទទួលបានព័ត៌មាន ច្បាស់ការនៅឡើយទេ។ បើសិនជាមានសមាជិកពីរនាក់ ក្នុងចំណោម៥នាក់ លាឈប់ពិតមែន មានន័យថា ក្រុមប្រឹក្សាជាតិរៀបចំការបោះឆ្នោត នឹងមិនអាច ចេញសេចក្តីសម្រេចអ្វី បានទាំងអស់។
ក្នុងខណៈនេះដែរ ជំនួបកំពូលក្រុមប្រទេសទ្វីបអាហ្វ្រិក ដែលកំពុងតែធ្វើឡើង នៅក្នុងប្រទេសតង់ហ្សានី នៅថ្ងៃនេះ គឺជាឱកាសដែលបណ្តាប្រទេសអាហ្វ្រិកទាំងអស់ ត្រូវរួមយោបល់គ្នា ក្នុងការស្វែងរកដំណោះស្រាយនយោបាយនៅប៊ូរុនឌី ដើម្បីចៀសវាង កុំឲ្យសង្គ្រាមស៊ីវីលផ្ទុះឡើង ក្នុងប្រទេសដ៏តូច និងក្រីក្រមួយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ