ប្រធានាធិបតីបារាំង ស្នើទទួលរៀបចំជំនួបកំពូលស្តីពីការប្រយុទ្ធនឹងក្រុមបូកូហារ៉ាម
មុននឹងចាកចេញពីប្រទេសកាមេរូន កាលពីល្ងាចថ្ងៃសុក្រ ទី៣ កក្កដា លោកប្រធានាធិបតីបារាំង បាន ធ្វើសន្និសីទកាសែត ដោយបានថ្លែងថាបារាំងត្រៀមខ្លួនជានិច្ច ក្នុងការទទួលចាត់ចែងរៀបចំ ឲ្យមានជំនួបកំពូល រវាងប្រទេសអាហ្វ្រិកពាក់ព័ន្ធ ដើម្បីរិះរកយុទ្ធសាស្ត្រ ឲ្យមានប្រសិទ្ធិភាព ក្នុងការប្រយុទ្ធជាមួយ ក្រុមបូកូហារ៉ាម។ ក្រុមអ៊ីស្លាមបូកូអារ៉ាម ដែលមានមូលដ្ឋាននៅភាគខាងជើង ប្រទេសនីហ្សេរីយ៉ា បានធ្វើអំពើព្រៃផ្សៃជាច្រើនករណី ហើយកម្លាំងពួកវា កំពុងតែបង្កអសន្តិសុខ និងអស្ថិរភាព ក្នុងតំបន់ទាំងមូល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
ដំណើរទស្សនកិច្ចរបស់ លោកហ្វ្រង់ស័រ ហូឡង់ ប្រធានាធិបតីបារាំង នៅទ្វីបអាហ្វ្រិក បានបញ្ចប់ទៅ កាលពីល្ងាចថ្ងៃ សុក្រ នៅ ប្រទេសកាមេរូន ជាទីដែលលោក ហូឡង់ បានបញ្ជាក់ពីគោលជំហររបស់រដ្ឋាភិបាលបារាំង ក្នុង ការ ជ្រោមជ្រែងប្រទេសអាហ្វ្រិក ដើម្បីប្រយុទ្ធជាមួយក្រុមឧទ្ទាមបូកូហារ៉ាម។
លោកប្រធានាធិបតីបារាំងបានថ្លែងថា ដរាបណាគ្មានសន្តិសុខ និងប្រជាធិបតេយ្យ គឺគ្មានការអភិវឌ្ឍន៍ទេ។ លោកប្រធានាធិបតី បានឆ្លៀតបន្ថែមផងដែរថា បារាំងគាំទ្រ និងជំរុញឲ្យមានការគោរពសិទ្ធិមនុស្ស និងសិទ្ធិសេរីភាពក្នុងការបញ្ចេញមតិ នៅតាមប្រទេសអាហ្វ្រិក ដែលត្រូវការអភិវឌ្ឍន៍ខ្លួន ទៅរកប្រជាធិបតេយ្យពេញលេញ។
ទាក់ទិន នឹងការប្រយុទ្ធជាមួយក្រុមបូកូហារ៉ាម លោកប្រធានាធិបតីបារាំង បានបញ្ជាក់ថា បារាំងពេញចិត្តនឹងរៀបចំចាត់ចែង ជំនួបកំពូលជាថ្មីម្តងទៀត នៅក្រុងប៉ារីស រវាងប្រទេសអាហ្វ្រិក ដែលរងការគំរាមកំហែង ដោយក្រុមអ៊ីស្លាមជ្រុលនិយមមួយនេះ មានដូចជា នីហ្សេរីយ៉ា កាមេរូន និងឆាដ ដើម្បីរិះរកមធ្យោបាយថ្មីទៀត ដែលមានប្រសិទ្ធិភាព ក្នុងការបង្រ្កាមក្រុមបូកូហារ៉ាម។ លោកបន្តថា ប្រទេសទាំងអស់ត្រូវធ្វើការសហការគ្នាឲ្យល្អប្រសើរ ជាងមុន។ ចំណែកបារាំង និងផ្តល់ការសហការផ្នែកទិន្នន័យព័ត៌មាន ដូចជារូបភាពផ្កាយរណប ស្តីពីទីតាំងយុទ្ធសាស្ត្រ របស់ក្រុមបូកូហារ៉ាម ដើម្បីងាយស្រួល ក្នុងការវាយប្រយុទ្ធ។ បារាំងក៏នឹង អាចបញ្ជូនក្រុមជំនាញ ដើម្បីធ្វើការហ្វឹកហាត់ កងកម្លាំងប្រទេសទាំងបីផងដែរ។
សូមបញ្ជាក់ថា ក្រុមឧទ្ទាមបូកូហារ៉ាម គឺជាក្រុមឧទ្ទាមព្រៃ អ៊ីស្លាមផ្តាច់ការ ដែលបានធ្វើអំពើអមនុស្សធម៌ យ៉ាងសាហាវព្រៃផ្សៃ នៅភាគខាងជើងប្រទេសនីហ្សេរីយ៉ា។ ក្រុមនេះ បានធ្វើសកម្មភាពភេរវកម្ម កាប់សម្លាប់អ្នកភូមិអ្នកស្រុក នៅតំបន់ ជុំវិញបឹងឆាដ ដែលជាព្រំប្រទល់ រវាង ប្រទេសបី នីហ្សេរីយ៉ា កាមេរូន និងឆាដ។ ក្រៅពីសម្លាប់ និងដុតផ្ទះប្រជាជានស្លូតត្រង់ ក្រុមនេះ បានចាប់កេណ្ឌកុមារ និងមនុស្សស្រី ជាច្រើនពាន់នាក់ ចូលទៅក្នុងព្រៃ។ មនុស្សស្រីត្រូវបានក្រុមនេះ យកទៅធ្វើជាទាសករបំរើផ្លូវភេទ ប្រៀបមិនស្មើនឹងសត្វធាតុ។ មួយវិញទៀត ការគម្រាមកំហែង របស់ក្រុមឧទ្ទាមបូកូហារ៉ាមនេះ បានរុញច្រាន ប្រជាជនអាហ្វ្រិកក្នុងតំបន់នេះ ឲ្យរត់ភៀសខ្លួន ហើយមួយចំនួនធំបានធ្វើដំណើរ ផ្សងគ្រោះថ្នាក់ ដើម្បីមកសុំសិទ្ធិជ្រកកោននៅអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ