ប្រធានាធិបតីបារាំងទៅម៉ារុក ដើម្បីបញ្ជាក់ពីការជានាគ្នាឡើងវិញ
លោកហ្វ្រង់ស័រ ហូឡង់ ប្រធានាធិបតីបារាំង នឹងបំពេញទស្សនកិច្ចនៅប្រទេសម៉ារ៉ុក ចាប់ពីថ្ងៃសៅរ៍ទី១៩ កញ្ញានេះ រហូតដល់ថ្ងៃអាទិត្យទី ២០ កញ្ញា ដោយមានការទទួលបដិសណ្ឋារកិច្ចជាផ្លូវការ ដោយព្រះចៅម៉ូហាម៉េដ ទី៦ ព្រះមហាក្សត្រម៉ារ៉ុក។ ក្រៅពីកម្មវត្ថុនៃការរឹតចំណងសេដ្ឋកិច្ច រវាងប្រទេសទាំងពីរ ទស្សនកិច្ចនេះ ត្រូវបានគេមើលឃើញថា ជាកាយវិការរបស់បារាំង ដើម្បីបញ្ជាក់ថា ជម្លោះរវាងប្រទេសទាំងពីរបានបិទបញ្ចប់ទៅហើយ ហើយចាប់ពីពេលនេះទៅ គឺប្រទេសទាំងពីរ នឹងជានាគ្នាឡើងវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៧:០៣
តាមការគ្រោងទុក លោក ហ្រ្វង់ស័រ ហូឡង់ នឹងអញ្ជើញទៅដល់ទីក្រុង តង់ហ្ស៊េ ភាគខាងជើងម៉ារ៉ុក នៅវេលាម៉ោង ៣រសៀស ម៉ោងនៅម៉ារ៉ុក ដោយមានព្រះចៅម៉ូហាម៉េដ ទី៦ នៅចាំទទួលស្វាគមន៍។ អមដំណើរជាមួយលោកហូរឡង់ គឺមានរដ្ឋមន្ត្រីបារាំង៣នាក់ សុទ្ធតែស្រី គឺមានលោកស្រីសេហ្គូឡែន រ៉ូយ៉ាល់ រដ្ឋមន្ត្រីក្រសួងបរិស្ថាន លោកស្រី ណាហ្សាត់ វ៉េឡូ ប៊ែលកាសេម រដ្ឋមន្រ្តីក្រសួងអប់រំ ដែលមានដើមកំណើត មកពីម៉ារ៉ុកផ្ទាល់ ហើយនិងចុងក្រោយ គឺលោកស្រី មីរីយ៉ាំ អែល គុមរី រដ្ឋមន្ត្រីក្រសួងការងារ។
តាមការគ្រោងទុក លោកប្រធានាធិបតីបារាំង នឹងអញ្ជើញទៅកន្លែងបីខុសគ្នា។ ទីមួយគឺ នៅស្ថានីយ៍ជួសជុលទូរថភ្លើងថ្មី ដែលសាងសង់សម្រាប់ជួសជុលទូររថភ្លើងល្បឿនលឿន TGV ដែលជារបស់ក្រុមហ៊ុនបារាំង។ វាគឺជាខ្សែររថភ្លើងល្បឿនលឿន តភ្ជាប់ពីក្រុងតង់ហ្ស៊េ ទៅដល់ក្រុងកាហ្សាប្លង់កា ដែលនឹងដាក់ ឲ្យដំណើរការ នៅរវាងឆ្នាំ២០១៧។
បន្ទាប់មកទៀត លោកប្រធានាធិបតីបារាំង និងអញ្ជើញទៅទស្សនកិច្ចនៅ កំពង់ផែក្រុងតង់ហ្ស៊េ។ កំពង់ផែនេះ ជាកំពង់ផែធំទីបី ក្នុងទ្វីបអាហ្វ្រិកទាំងមូលតែម្តង។ ចំណុចពិសេសនៃកំពង់ផែនេះ គឺវាស្ថិតនៅនឹងមាត់ច្រកសមុទ្រ Gibralta រវាងទ្វីបអាហ្វ្រិក និងទ្វីបអឺរ៉ុប ពោលគឺជាច្រកសំខាន់ណាស់ ក្នុងការចរាចរណ៍នាវាដឹកទំនិញ សម្រាប់ប្រទេសដែលនៅជុំវិញសមុទ្រម៉េឌីទែរ៉ាណេ។
បន្ទាប់មក លោកប្រធានាធិបតីបារាំង និងព្រះចៅម៉ូហាម៉េដទី ៦ នឹងរួមគ្នា បញ្ចុះធម្មសិលា បើកការដ្ឋានសាងសង់មជ្ឈមណ្ឌលបណ្តុះបណ្តាលនឹងស្រាវជ្រាវផ្នែកថាមពល ដោយចីរភាព ឧទាហរណ៍ដូចជាថាមពលដើរដោយពន្លឺព្រះអាទិត្យជាដើម។ សូមបញ្ជាក់ថា ក្នុងវិស័យបរិស្ថាន កាត់បន្ថយឧស្ម័នពុលនេះ ម៉ារ៉ុក ជាប្រទេសតែមួយគត់ នៅតំបន់ម៉ាគ្រេប ដែលបានប្រគល់ការសន្យា ទៅដល់គណៈកម្មការៀបចំសន្និសីទស្តីពីអាកាសធាតុ ថានឹងកាត់បន្ថយឧស្ម័នពុលក្នុងបរិយាកាស។ ក្នុងន័យនេះ រដ្ឋាភិបាលម៉ារ៉ុក បានដាក់ទិសដៅអាទិភាពថា ពីនេះរហូតដល់ឆ្នាំ២០២០ គឺម៉ារ៉ុក នឹងប្រើប្រាស់ថាមពលដោយចីរភាព ឲ្យបានដល់៤២%។
សរុបជារួមមក គឺដំណើរទស្សនកិច្ចនេះ បារាំងចង់ បង្កើនកិច្ចសហប្រតិបត្តិការទេ្វរភាគី ជាមួយម៉ារុក ក្នុងវិស័យសេដ្ឋកិច្ច ព្រោះថា ប៉ុន្មានឆ្នាំចុងក្រោយនេះ បារាំងដូចជាធ្លាក់ដៃច្រើន ព្រោះថា ដៃគូពាណិជ្ជកម្មចំបងរបស់ម៉ារ៉ុក បច្ចុប្បន្ននេះមិនមែនបារាំងទេ គឺអេស្ប៉ាញ។
ទស្សនកិច្ចនិម្មិតរូបបង្ហាញថា បារាំង និងម៉ារ៉ុក លែងឈ្លោះគ្នាទៀតហើយ៖
ជាការពិតណាស់ នៅពីក្រោយហេតុផលសេដ្ឋកិច្ចទាំងនេះ គឺថាទស្សនកិច្ចរបស់លោកហ្រ្វង់ស័រ ហូឡង់ ធ្វើឡើងដើម្បីជានិម្មិតរូប ដែលបញ្ជាក់ពីការជានាគ្នាឡើងវិញ រវាងប្រទេសទាំងពីរនេះ។ ដើមហេតុដំបូង ដែលឈានទៅដល់ការមើលមុខគ្នាមិនត្រង់ រវាងបារាំង និងម៉ារ៉ុក គឺ ចាប់ផ្តើមឡើងកាលពីខែកុម្ភៈ ឆ្នាំ២០១៤ កន្លងទៅ។ កាលណោះ នៅបារាំង មានបណ្តឹងតុលាការមួយ ដោយបានចោទ លោក Abdellatif Hammouchi ប្រធាននគរបាលស៊ើបការណ៍សម្ងាត់របស់ម៉ារ៉ុក ពីបទប្រើទារុណកម្មខុសច្បាប់។
ចៅក្រមស៊ើបអង្កេតបារាំង បានចេញដីកាកោះហៅជននេះ ឲ្យមកចូលខ្លួនដើម្បីឆ្លើយសំណួរ។ ភ្លាមៗនោះ រដ្ឋាភិបាលម៉ារ៉ុក បានបដិសេធ ហើយថែមទាំងបាន ព្យួរទុកកិច្ចព្រមព្រៀងសហប្រតិបត្តិការកិច្ចការយុត្តាធិការ រវាងប្រទេសទាំងពីរ ទៀតផង។ ក្រោយមកនៅខែមីនា ឆ្នាំ២០១៤ លោកអគ្គរាជទូតម៉ារ៉ុក ដែលបានធ្វើដំណើរមកដល់បារាំង ត្រូវបានគេចាប់ឆែកឆេរ នៅព្រលានយន្តហោះ ដែលការណ៍នេះ វារឹតតែធ្វើឲ្យម៉ារ៉ុក កាន់តែអន់ចិត្តនឹងបារាំង ថែមទៀត។
អស់រយៈពេល ពេញមួយឆ្នាំ ដោយសារតែរឿងនេះ បារាំង និងម៉ារ៉ុក អត់មាននិយាយរកគ្នាសោះតែម្តង រហូតទាល់តែដល់ខែកុម្ភៈឆ្នាំ ២០១៥ ទើបមានការចុះហត្ថលេខា រវាងរដ្ឋមន្ត្រីក្រសួងយុត្តិធម៌ ប្រទេសទាំងពីរ លើលក្ខខន្តិកៈបំពេញបន្ថែម ស្តីពីកិច្ចសហការគ្នា ក្នុងវិស័យយុត្តិធម៌។ ដូច្នេះ ពេលនេះ គឺបារាំង ចង់បង្ហាញជាឱឡាឫកថា ភាពមិនចុះសម្រុងនឹងគ្នា កន្លងមកគឺជារឿងកន្លងហួសទៅហើយ។
កុំឲ្យម៉ារ៉ុក ច្រណែនអាល់ហ្ស៊េរី៖
ហើយនៅមានចំណុចមួយទៀត ដែលសំខាន់ដែរ គឺថា បារាំង ខិតខំព្យាយាមថ្នមចិត្តម៉ារ៉ុក និងអាល់ហ្សេរី កុំឲ្យច្រណែនគ្នា ព្រោះថា កាលពីខែមិថុនាកន្លងទៅ លោកហ្រ្វង់ស័រ ហូឡង់ បានអញ្ជើញទៅអាល់ហ្សេរី។ ប្រទេសជិតខាងទាំងពីរ អាល់ហ្សេរី និងម៉ារ៉ុកនេះ មានប្រវត្តិជូរចត់ជាមួយបារាំងដូចគ្នា ប៉ុន្តែមិនសូវជាត្រូវគ្នាប៉ុន្មានទេ។ ប្រជាជនបារាំង ដែលមានដើមកំណើត ពីប្រទេសទាំងពីរនេះ ក៏មានច្រើនដែរ ដូច្នេះ វាជាការចាំបាច់ដែល រដ្ឋាភិបាលបារាំង ព្យាយាមយកចិត្តប្រទេសទាំងពីរ ឲ្យបានស្មើរគ្នា។
បារាំងសុខចិត្តធ្វើពលីកម្មវិស័យយុត្តិធម៌ និងសិទ្ធិមនុស្ស ដើម្បីស្តារវិស័យការទូត៖
ធម្មតាទេ ទង្វើររដ្ឋាភិបាលមួយ តែងតែត្រូវបានគេចាំតាមដាន និងរិះគន់ជានិច្ច។ ប៉ុន្តែការរិះគន់ទាំងនេះ វាជាកម្លាំងមួយ ដែលជម្រុញ ឲ្យថ្នាក់ដឹកនំា ហ៊ានប្រឈមមុខនឹងការពិត។ ជាការពិតណាស់ អង្គការអន្តរជាតិជាច្រើន បានរិះគន់បរិហាររដ្ឋាភិបាលម៉ារ៉ុក ថាពុករលួយ និងប្រើប្រាស់កម្លាំង បំបិទសម្លេងប្រឆាំង។ ទាក់ទិន នឹងលក្ខខន្តិកៈថ្មីស្តីពីកិច្ចសហការក្នុងវិស័យយុត្តិធម៌ រវាងប្រទេសទាំងពីរ ក៏មានគេរិះគន់ច្រើនណាស់ដែរ ដោយសារតែវា បានបន្ទាបតំលៃការងារស្វែងរកយុត្តិធម៌ របស់តុលាការបារាំង។
ដោយសារតែចង់ផ្សះផ្សារចំណងការទូត បារាំងសុខចិត្តធ្វើពលីកម្មវិស័យយុត្តិធម៌ ដែលនេះជារឿងមួយមិនអាចទទួលយកបានទេ សម្រាប់អ្នកដែលស្រលាញ់សេរីភាព និងយុត្តិធម្ម។ ប៉ុន្តែ ការដែលរក្សាទំនាក់ទំនងការទូត ឲ្យនៅតែអាក្រក់ មិនព្រមនិយាយគ្នា ក៏វានឹងមិនហុចផលអ្វីទាំងអស់ដែរ។ ដូច្នេះ បើបារាំងចង់និយាយដាស់តឿនកែលម្អ ដល់ម៉ារ៉ុក ក៏គេមិនស្តាប់ដែរ ព្រោះថា ប្រទេសទាំងពីរអត់ត្រូវគ្នាផង។ អញ្ចឹង ទាល់តែស្តារមិត្តភាពនឹងគ្នាសិន ចាំនិយាយគ្នា ពីបញ្ហាផ្សេងៗទៅ វាងាយស្តាប់គ្នាបាន។ ទោះបីជាគោលជំហរបារាំង នាពេលនេះ ផ្តល់អាទិភាពដល់ការរិតចំណងការទូត និងវិស័យសេដ្ឋកិច្ច ក៏ពិតមែន តែមិនមែនមានន័យថា បារាំង មិនខ្វល់ពីបញ្ហាសិទ្ធិមនុស្ស នោះទេ។
តួនាទីម៉ារ៉ុកសំខាន់ ក្នុងការផ្សព្វផ្សាយគោលការណ៍សាសនាអ៊ីស្លាមត្រឹមត្រូវ មិនជ្រុលនិយម៖
នៅមានចំណុច មួយទៀត ដែលសំខាន់សម្រាប់បារាំង គឺតួនាទីរបស់ម៉ារ៉ុក ក្នុងការបោសសម្អាតចលនាអ៊ីស្លាមនិយម របស់ក្រុមជីហាដ។ រដ្ឋាភិបាលម៉ារ៉ុក មានគោលជំហរ មួយអំពាវនាវ ឲ្យអ្នកកាន់សាសនាអ៊ីស្លាមទាំងអស់ អនុវត្តន៍នូវអ្វីដែលជាផ្លូវកណ្តាល កុំឲ្យជ្រុលនិយម ផ្តាច់ការដូចពួកក្រុមជីហាដ។ ការផ្សព្វផ្សាយបណ្តុះស្មារតី ឲ្យដើរតាមផ្លូវត្រឹមត្រូវនេះ គឺត្រូវធ្វើឡើងតាមរយៈ ប្រមុខសាសនាអ៊ីស្លាម នៅតាមវិហារម៉ូស្កេនីមួយ។
ដូច្នេះហើយ បានជាបារាំង សង្ឃឹមលើម៉ារ៉ុក ក្នុងការបណ្តុះបណ្តាលមគុទេសន៍សាសនាអ៊ីស្លាម ឲ្យបានត្រឹមត្រូវ ព្រោះថាពួកគេទាំងនោះហើយ ដែលនឹងទៅផ្សព្វផ្សាយបន្ត នៅតាមវិហារម៉ូស្កេនៅបារាំង។ ទាំងនេះ វានឹងរួមចំណែក កាត់បន្ថយ ការប្រព្រឹត្តិបែកឆ្វេង របស់យុវជនក្មេងៗ ដែលជឿតាមការអូសទាញ របស់ក្រុមជ្រុលនិយម ដូចជាពូកជីហាដ អង្គការរដ្ឋអ៊ីស្លាមជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ