មហាក្សត្រម៉ារ៉ុកធ្វើទស្សនកិច្ចនៅប៉ារីស ចំពេលដែលមានរឿងបែកធ្លាយថា ព្រះអង្គមានគណនី ក្នុងធនាគារHSBCដែលជាប់ពាក់ព័ន្ធនឹងការគេចពន្ធ
កាលពីថ្ងៃចន្ទទី ៩កុម្ភៈ នៅក្នុងដំណើរទស្សនកិច្ចជាឯកជនរបស់មហាក្សត្រម៉ារ៉ុក មូហាម៉េដ ទី៦ ក្នុងទីក្រុងប៉ារីស ប្រមុខដឹកនាំបារាំង និងព្រះចៅម៉ារ៉ុកបានប្រកាសផ្សាភ្ជាប់ ទំនាក់ទំនងជាផ្លូវការ រវាងប្រទេសទាំងពីរឡើងវិញ និងសន្យាពង្រឹងកិច្ចសហប្រតិបត្តិការទ្វេភាគី ជាពិសេស នៅក្នុងផ្នែកប្រយុទ្ធប្រឆាំងនឹងអំពើភេរវកម្ម។ វត្តមានរបស់ព្រះចៅម៉ារ៉ុក ក្នុងទឹកដីបារំាង ធ្វើឡើង នៅចំថ្ងៃ ដែលកាសែតបារាំង Le Monde បានចុះផ្សាយព័ត៌មានដែលថា ព្រះមហាក្សត្រម៉ារ៉ុក មានឈ្មោះនៅក្នុងបញ្ជីក្រុមមនុស្សដែល ដាក់លុយក្នុងធនាគារអង់គ្លេស HSBC ក្នុងប្រទេសស្វ៊ីស ដើម្បីលួចគេចពន្ធ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៥៧
ព័ត៌មានលេចធ្លាយដែលថា ព្រះមហាក្សត្រម៉ារ៉ុក មានគណនី ដែលជាប់ពាក់ព័ន្ធនឹងរឿងគេចពន្ធ នៅក្នុងធនាគារអង់គ្លេស HSBC អាចជារឿងអាស្រូវរបស់ព្រះរាជវង្សម៉ារ៉ុក នៅក្នុងក្រសែភ្នែករបស់អន្តរជាតិ ប៉ុន្តែ នៅម៉ារ៉ុកផ្ទាល់ រឿងនេះ មិនមែនជារឿងថ្មីនោះទេ។ ប្រជាជនម៉ារ៉ុកដឹងច្បាស់ណាស់ថា ព្រះមហាក្សត្រ និងរាជវង្សម៉ារ៉ុក ដែលមានសិទ្ធិ មានអំណាចពេញដៃ មានទ្រព្យសម្បត្តិ ច្រើនហូរហៀ ស្រាប់ទៅហើយ។ ដូច្នេះ ពួកគេមិនឆ្ងល់ទេ នៅពេលដឹងថា ព្រះមហាក្សត្រ និងរាជវង្សម៉ារ៉ុកដទៃទៀត មានទឹកប្រាក់សន្ធឹកសន្ធាប់ ប្រមាណ ៨លានអឺរ៉ូ នៅក្នុងគណនី ធនាគារ HSBCដែលកាសែតបារាំង Le monde បានបកអាក្រាតកាលពីថ្ងៃម្សិលមិញនោះ។ ទឹកប្រាក់៨លានអឺរ៉ូនេះ គឺនៅតិចតួចណាស់ ព្រោះបើតាមទស្សនាវដ្តី អាមេរិកាំង Forbes ព្រះចៅម៉ារ៉ុក មូហាមេដ ទី ៦ អាចមានទ្រព្យសម្បត្តិសរុបប្រមាណ ២ពាន់អឺរ៉ូឯណោះ។
មួយវិញទៀត រដ្ឋាភិបាលម៉ារ៉ុកហាក់មិនភ្ញាក់ផ្អើលនឹងការចុះផ្សាយបកអាក្រាតរបស់កាសែតបារាំង ព្រោះថា ទីក្រុងប៉ារីស ធ្លាប់ជូនព័ត៌មាននេះ តាំងពីយូរមកហើយ ទៅរាជធានី រ៉ាបា។ ប៉ុន្តែ យ៉ាងណាក៏ដោយ ការចុះផ្សាយរឿងអាស្រូវដែលថា ព្រះមហាក្សត្រមានគណនី មានជាប់ពាក់ព័ន្ធនឹងប្រតិបត្តិការគេចមិនបង់ពន្ធ នៅក្នុងធនាគារអង់គ្លេស HSBC នឹងអាចធ្វើទំនាក់ទំនងដែលទើបចាប់ល្អនឹងគ្នា រវាងបារាំង និងម៉ារ៉ុក នឹងអាចជួបរកាំរកូសនឹងគ្នា ឡើងវិញ ទៅថ្ងៃអនាគត ព្រោះថា អាជ្ញាធរម៉ារ៉ុក មិនចូលចិត្តឲ្យគេ ជាពិសេស បារាំង ដែលធ្លាប់ជាម្ចាស់អាណានិគមក្នុងអតីតកាល យករាជវង្សម៉ារ៉ុក ទៅប្រឡាក់ប្រលូស នៅក្នុងរឿងអាស្រូវនោះទេ។
បារាំង និងម៉ារ៉ុកនៅតែត្រូវការគ្នាដើម្បីប្រយុទ្ធប្រឆាំងនឹងក្រុមភេរវនិយម
បន្ទាប់ពីរកាំរកូស ការទូត ជាមួយ គ្នា អស់ជាងមួយឆ្នាំ បារាំង នឹងម៉ារ៉ុកបានសម្រេចបិទទំព័រចាស់ និងបើកទំព័រថ្មី នឹងគ្នាឡើងវិញ នៅដើមឆ្នាំនេះ។ សូមរំលឹកជូនថា ម៉ារ៉ុកធ្លាប់អន់ចិត្ត ខឹងនឹងបារាំង ដែលមិនតម្លៃ ដល់ម៉ារ៉ុក ដូចជាបារាំងងាកទៅចាប់ដៃគូជាមួយអាល់ហ្សេរី ដែលជាគូប្រជែងរបស់ម៉ារ៉ុក នៅក្នុងប្រតិបត្តិការប្រឆាំងក្រុមភេរវជននៅប្រទេសម៉ាលី។ ម៉ារ៉ុកខឹងនឹងរដ្ឋាភិបាលបារាំង ដែលប្រើអាជ្ញាធររបស់ខ្លួនឲ្យចូលទៅក្នុងស្ថានទូតម៉ារ៉ុក ក្នុងក្រុងប៉ារីស និងសម្រេចតាមផ្លូវតុលាការ ចោទប្រកាន់អនុប្រធានចារកិច្ចម៉ារ៉ុក ក្នុងទឹកដីបារាំង ពីបទធ្វើទារុណកម្ម។
លើសពីនោះ ម៉ារ៉ុកបានចាត់ទុក ការចាប់ឆែកឆេររដ្ឋមន្រ្តី ការបរទេសម៉ារ៉ុក នៅព្រលានយន្តហោះ បារាំង កាលពីខែមីនា ឆ្នាំមុន ថា ជាឥរិយាបថមើលងាយ របស់បារាំងទៅលើម៉ារ៉ុក។ ក្នុងកែវភ្នែករបស់ម៉ារ៉ុក រដ្ឋាភិបាលបារាំងមិនដែលផ្តល់តម្លៃដល់ខ្លួនម្តងណាទេ។ ប៉ុន្តែ ដូចគេដឹងហើយថា បើទោះបីជាបារាំង និងម៉ារ៉ុក មានទំនាក់ទំនងល្អក់កករនឹងគ្នា ប៉ុន្តែ ប្រទេសទាំងពីរ ជាដៃគូសេដ្ឋកិច្ចដែលមិនអាចខ្វះបាន ព្រោះបារាំង ជាដៃគូធ្វើពាណិជ្ជកម្មធំទីមួយរបស់ម៉ារ៉ុក។ ចំណែក ម៉ារ៉ុកមានប្រជាជនរបស់ខ្លួនជាង១លាននាក់ រស់នៅ ក្នុងទឹកដីបារាំង។
ម្យ៉ាងទៀត អំពើភេរវកម្ម នៅទីក្រុងប៉ារីស ប្រឆាំងនឹងទស្សនាវដ្តីឆាលី អិបដូរ កាលពីថ្ងៃទី ៧មករា បានជួយឲ្យម៉ារ៉ុក និងបារាំង ត្រលប់មកត្រូវរ៉ូវគ្នាឡើងវិញ ព្រោះថា បារាំងត្រូវការម៉ារ៉ុក ក្នុងផ្នែកចារកិច្ចដើម្បីប្រយុទ្ធប្រឆាំងនឹងអំពើភេរវកម្ម។ ចាប់តាំងពីមានភេរវកម្មក្នុងទីក្រុងប៉ារីស នៅដើមឆ្នាំនេះ ម៉ារ៉ុកបានជួយបារាំងបានច្រើន ជាពិសេស គឺចាប់បានជីហាតបារាំងជាច្រើន ដែលកំពុងមានវត្តមានក្នុងទឹកដីម៉ារ៉ុក។ រដ្ឋមន្រ្តីយុត្តិធម៌បារាំង និងម៉ារ៉ុក ទើបបានចុះកិច្ចព្រមព្រៀងជាមួយគ្នា កាលពីសប្តាហ៍មុន នៅក្នុងក្របខ័ណ្ឌសហប្រតិបត្តិការប្រយុទ្ធប្រឆាំងនឹងអំពើភេរវកម្មរួមគ្នា។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ