កូនប្រុសកាដាហ្វី អតីតមេដឹកនាំផ្តាច់ការលីប៊ី បានរួចខ្លួន
ពួកប្រដាប់អាវុធលីប៊ីនៅតំបន់ហ្សេតាន បានប្រកាសដោះលែង លោក សាអ៊ីហ្វ អាល់ អ៊ីស្លាម កូនប្រុសរបស់អតីតមេដឹកនាំផ្តាច់ការលីប៊ី កាដាហ្វី ដែលពួកគេចាប់ឃុំឃាំងតាំងពីឆ្នាំ២០១១។ ឆ្នាំដែលកាដាហ្វីបានស្លាប់។ បើតាមមេធាវី សាអ៊ីហ្វ អាល់ អ៊ីស្លាម កាដាហ្វី បានទទួលសេរីភាព ក្នុងក្របខ័ណ្ឌនៃច្បាប់លើកលែងទោស អនុម័តកាលពីឆ្នាំទៅ។ គេធ្លាប់ឮសេចក្តីប្រកាសលើកលែងទោស ម្តងហើយ តែលើកនេះលោក សាអ៊ីហ្វ អ៊ីស្លាម កាដាហ្វី ពិតជាបានចាកចេញពីតំបន់ហ្សេតាន Zentaneមែន។
ចុះផ្សាយនៅថ្ងៃ៖
ស្តាប់ - ០២:១០
មានអាយុ៤៤ឆ្នាំ សាអ៊ីហ្វ អាល់អ៊ីស្លាម កាដាហ្វី ជាកូនប្រុសដែលមហាជនទូទៅស្គាល់ខ្លាំងជាងគេ ក្នុងចំណោមកូនកាដាហ្វីទាំងអស់ និងត្រូវបានគេចាត់ទុកថាកូនស្នងត្រកូលបន្តអំណាចផង។ សាអ៊ីហ្វ អាល់អ៊ីស្លាម កាដាហ្វី ត្រូវបានតុលាការលីប៊ីកាត់ទោសប្រហារជីវិត នៅឆ្នាំ២០១៥ ពីបទប្រព្រឹត្តឧក្រិដ្ឋកម្មសង្គម និងមនុស្សដែលតុលាការព្រហ្មទណ្ឌអន្តរជាតិចេញដីកាតាមស្វែងរកបំផុត។
តាមការពិត ទោះស្ថិតក្នុងពន្ធនាគារក្តី ក៏ សាអ៊ីហ្វ អ៊ីស្លាម បានទទួលការថែទាំ និងរស់ជាប់ឃុំប្រកបដោយផាសុកបំផុត។ តាំងពីឆ្នាំមុនមក កូនប្រុសកាដាហ្វីម្នាក់នេះ អាចធ្វើដំណើរទៅមកក្នុងក្រុង ហ្សេតាន ដើម្បីជួបមេដឹកនាំធំៗក្នុងតំបន់ តែថ្ងៃនេះសាអ៊ីហ្វ អ៊ីស្លាម បានទទួលសេរីភាពពេញលេញ និងកំពុងធ្វើដំណើរទៅកាន់ទិសដៅសម្ងាត់មួយ ដើម្បីសន្តិសុខ។ មិនដឹងថាទៅទីណាឱ្យប្រាកដទេ ! អាចទៅអេហ្ស៊ីប ឬនៅតែក្នុងប្រទេសលីប៊ី នៅភាគខាងកើតប្រទេស ដែលមានឧត្តមសេនីយ៍ តាសហ្វា ជាសម្ព័ន្ធមិត្តនយោបាយ ឬនៅភាគខាងត្បូង តំបន់ដែលប្រជាពលរដ្ឋនាំគ្នាធ្វើបុណ្យអបអរភ្លាមនៅពេលបានទទួលដំណឹងដោះលែង។
ក្រុមប្រដាប់អាវុធលីប៊ី ស្និទ្ធនឹងរបបកាដាហ្វី តែងលើកឡើងជាញឹកញយដងហើយ ថាមានតែ សាអ៊ីហ្វ អ៊ីស្លាមកាដាហ្វីទេ ដែលអាចបង្រួបបង្រួមលីប៊ី និងនាំលីប៊ីឱ្យស្គាល់ស្ថិរភាព ហើយក្លាយជាបេក្ខជនឈរឈ្មោះបោះឆ្នោតប្រធានាធិបតីបាន។
ប៉ុន្តែបើតាមអ្នកវិភាគខ្លះទៀត កូនប្រុសកាដាហ្វី គ្មានប្រជាប្រិយភាពខ្លាំងពេញប្រទេសទេ។ ការដោះលែងនេះអាចជាការបញ្ចេះកំហឹង និងបង្កភាពប្រេះឆាកាន់តែខ្លាំង។ ពលរដ្ឋលីប៊ីភាគច្រើន នៅតែមិនចង់ឃើញត្រកូលកាដាហ្វីត្រលប់មកដឹកនាំប្រទេសឡើយ។
សម្រាប់ពេលនេះ គេមិនដឹងថាតើ សាអ៊ីហ្វ អ៊ីស្លាម កាដាហ្វី អាចដើរតួអ្វីឡើយនៅក្នុងលីប៊ីដែលបែងភាគ លិច កើត ត្បូង ដឹកនាំដោយក្រុមប្រដាប់អាវុធផ្សេងៗដែលកំពុងប្រយុទ្ធប្រជែងគ្នាដើម្បីអំណាច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ