ក្រុមជីហាតនៃអង្គការរដ្ឋអ៊ីស្លាមប្រកាសចេញមុខជាអ្នកធ្វើភេរវកម្មនៅ ទុយនីស៊ី
នៅប្រទេសទុយនីស៊ី អាជ្ញាធរបានប្រកាសឲ្យដឹងថា ភេរវជនទាំង២រូបដែលបានបាញ់សម្លាប់អ្នកទេសចរបរទេស ២០នាក់ នៅសារមន្ទីរ បារដូ ក្នុងក្រុងទុយនីស ធ្លាប់ត្រូវបានបំពាក់បំប៉ន ហ្វឹកហ្វឺន ឲ្យចេះប្រើអាវុធ នៅក្នុងប្រទេសលីប៊ី។ នៅល្ងាចថ្ងៃព្រហស្បតិ៍ ទី ១៩មីនា ក្រុមជីហាត នៃអង្គការរដ្ឋអ៊ីស្លាមបានប្រកាសទទួលខុសត្រូវលើអំពើភេរវកម្មដែលបានសម្លាប់មនុស្សសរុប ២១នាក់ កាលពីថ្ងៃពុធ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
ការស៊ើបអង្កេតរបស់ប៉ូលិសទុយនីស៊ីបានផ្តល់លទ្ធផលជាបណ្តើរៗ។ តាមអនុរដ្ឋលេខាធិការទុយនីស៊ី ទទួលបន្ទុកកិច្ចការសន្តិសុខ ភេរវជនទាំង២រូប ដែលចូលបាញ់ប្រហារទៅលើក្រុមអ្នកទេសចរ នៅសារមន្ទីរ បារដូ ចេញមកពីក្រុមអ៊ីស្លាមជ្រុលនិយម តាហ្វីរីស។ ពួកគេបានធ្វើដំណើរ ដោយលួចលាក់ ចេញពីទុយនីស៊ី ទៅប្រទេសលីប៊ី នៅខែធ្នូ ចុងឆ្នាំមុន។ នៅលីប៊ី មានជំរំហ្វឹកហ្វឺនយោធាជាច្រើន ដែលបង្កើតឡើងជាពិសេសសម្រាប់ប្រជាជនទុយនីស៊ី ដូចជានៅទីក្រុងបិនហ្គាហ្ស៊ី ឬ សាប៉្រាតា ជាដើម។ នៅទីនោះ ភេរវជនបានទទួលការហ្វឹកហាត់ឲ្យចេះប្រើកាំភ្លើងមុននឹងត្រលប់ចូលទៅប្រទេសទុយនីស៊ីវិញ។
តាមអនុរដ្ឋលេខាធិការទុយនីស៊ី ភេរវជនទាំងពីរនាក់ធ្លាប់ស្ថិតនៅក្នុងបញ្ជីតាមដានរបស់ទីភ្នាក់ងារស៊ើបការណ៍សម្ងាត់ទុយនីស៊ី។ ប៉ូលិសដឹងថា ពួកគេទាំងពីរមកពីក្រុមអ៊ីស្លាមជ្រុលនិយម តាហ្វីរីស និងសង្ស័យថា ពួកគេអាចធ្វើសកម្មភាព បង្កអសន្តិសុខនៅថ្ងៃណាមួយ។ ប៉ុន្តែ ប៉ូលិសនៅមិនទាន់ប្រមូលបានភស្តុតាងគ្រប់គ្រាន់ ដើម្បីអាចចាប់ខ្លួនជនសង្ស័យទាំងពីរ។ ជាក់ស្តែង ភេរវជនម្នាក់ គឺ យ៉ាស៊ីន អាប៊ីឌី ធ្លាប់ត្រូវបានប៉ូលិសឃាត់ខ្លួនម្តងហើយ នៅមុនចាកចេញទៅលីប៊ី ប៉ុន្តែ ក៏ត្រូវដោះលែងទៅវិញ។
ទុយនីស៊ីមានជនជាតិរបស់ខ្លួន ច្រើនជាងគេ ប្រមាណ ៣០០០នាក់ នៅក្នុងជួរកងទ័ពបរទេសរបស់ក្រុមជីហាត។ អាជ្ញាធរទុយនីស៊ីបារម្ភថា ជនជាតិទុយនីស៊ី ៥០០នាក់ដែលបានត្រលប់ចូលស្រុកវិញ នឹងអាចបង្កអំពើភេរវកម្ម នៅពេលណាមួយ។
កាលពីថ្ងៃព្រហស្បតិ៍ ក្រុមជីហាតនៃអង្គការរដ្ឋអ៊ីស្លាមបានប្រកាសថា គឺមនុស្សរបស់ខ្លួន ដែលធ្វើភេរវកម្មសម្លាប់ជនបរទេស នៅសារមន្ទីរ បារដូ។ ក្រុមជីហាត នៃអង្គការរដ្ឋអ៊ីស្លាម ដែលមានវត្តមាននៅប្រទេសស៊ីរី អ៊ីរ៉ាក់ និងបោះទីតាំងនៅលីប៊ី ប្រទេសជិតខាងរបស់ទុយនីស៊ី នៅបានគំរាមបង្កភេរវកម្មផ្សេងទៀត ប្រឆាំងនឹងទុយនីស៊ី ដោយប្រើពាក្យនេះ ភេរវកម្ម កាលពីថ្ងៃពុធ គ្រាន់តែជាការចាប់ផ្តើមប៉ុណ្ណោះ។ គេមិនដឹងច្បាស់ទេថា ឧក្រិដ្ឋជនទាំងពីររូប ដែលធ្វើភេរវកម្ម កាលពីថ្ងៃពុធ ជា មានជាប់ពាក់ព័ន្ធនឹងក្រុមជីហាត ដែរ ឬយ៉ាងណានោះទេ។ ប៉ុន្តែ តាមប៉ូលិស គេរកឃើញ គ្រឿងផ្ទុះជាច្រើន នៅលើខ្លួន របស់ភេរវជន គឺ ដូចជាការការអះអាងរបស់ក្រុមជីហាត នៃអង្គការរដ្ឋអ៊ីស្លាម ដែលថា វីរបុរសរបស់ខ្លួន មានបំពាក់ដោយអាវុធស្វ័យប្រវត្តិ និងគ្រាប់បែក ដើម្បី ចូលទៅបំផ្ទុះ ធ្វើភេរវកម្មនៅសារមន្ទីរ បារដូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ