ក្រុមឧទ្ទាមអ៊ីស្លាមបូកូហារ៉ាំ ចាប់ក្មេងប្រុស៤០នាក់នៅនីហ្សេរីយ៉ា
មនុស្សប្រុស ទាំងក្មេងទាំងជំទង់ ចំនួន៤០ នាក់ ត្រូវបានពួក ឧទ្ទាមអ៊ីស្លាមជ្រុលនិយម បូកូហារ៉ាំ បានចាប់ យកចូលទៅក្នុងព្រៃ កាលពីថ្ងៃសុក្រ ទី២ មករា។ ពួកឧទ្ទាមអ៊ីស្លាមជ្រុលនិយមនេះ តែងតែចេញមកធ្វើប្រតិបត្តិការ សម្លាប់ប្រជាជននីហ្សេរីយ៉ា និងប្លន់អ្នកភូមិ ស្ទើរតែជារៀងរាល់ថ្ងៃ។ កាលពីប៉ុន្មានខែមុន ពួកនេះ បានចាប់យកក្មេងស្រីសិស្សសាលា ចំនួន២០០នាក់។ ការចាប់យកក្មេងប្រុសលើកនេះ ត្រូវបានគេសង្ស័យថា ពួកវានឹងយកក្មេងទាំងនោះ ទៅធ្វើជាទាហាន បំរើពួកវា។
ចុះផ្សាយនៅថ្ងៃ៖
ស្តាប់ - ០១:៤៧
ពួកឧទ្ទាមអ៊ីស្លាម បូកូហារ៉ាំ នៅនីហ្សេរីយ៉ា តែងតែចេញ មកធ្វើបាប សម្លាប់ និងប្លន់អ្នកភូមិ ជាញឹកញាប់។ ជាក់ស្តែង កាលពីយប់ ថ្ងៃសុក្រ ទី ២ មករា នេះ ពួកបូកូហារ៉ាំ បានលើកគ្នា ចូលមកភូមិមួយ ចំងាយប្រហែល ២០ គីឡូមែត្រពីព្រៃ សាំប៊ីសា ដែលជាមូលដ្ឋានលាក់ខ្លួន របស់ពួកវា។
តាមការរាយការណ៍របស់អ្នកភូមិ ពួកបូកូហារ៉ាំ ដែលមានកាន់កាំភ្លើងគ្រប់ដៃ បានជិះឡាន Pick-up ចូលមកក្នុងភូមិ ហើយបានប្រមែលប្រមូលប្រជាជនក្នុងភូមិ ឲ្យឈរនៅខាងមុខផ្ទះប្រធានភូមិ។ បន្ទាប់ពីបានធ្វើបទប្រៀនប្រដៅប្រជាជន អំពីទ្រឹស្តីសាសនាអ៊ីស្លាមរបស់ពួកវា ពួកបូកូហារ៉ាំ បានជ្រើសរើសយក មនុស្សប្រុស៤០នាក់ យកទៅតាមពួកវាក្នុងព្រៃ។ មនុស្សប្រុសទាំងអស់ មានទាំងក្មេង និងក្មេងជំទង់ ដែលមានអាយុ ចន្លោះ ពី ១០ ទៅ ២៣ឆ្នាំ។
ហេតុការណ៍ដែលកើតឡើង នៅក្បែរព្រៃរបស់ពួកបូកូហារ៉ាំ មិនសូវមាននរណាដឹងឭ ទាន់ពេល ដោយសារតែប្រជាជន គ្មានមធ្យោបាយទំនាក់ទំនង ជាមួយអាជ្ញាធរ។ ដោយសារតែសង្គ្រាម ប្រព័ន្ធខ្សែទូរស័ព្ទ ត្រូវបានកាត់ផ្តាច់ទាំងស្រុង ក្នុងតំបន់ទាំងនោះ។ ដោយឡែក គេបានទទួលដំណឹងនេះ ក៏ដោយសារប្រជាជន បានរត់ភៀសខ្លួន នៅថ្ងៃបន្ទាប់ ជាច្រើនគីឡូមែត្រ មកដល់ ក្រុងម៉ៃឌូហ្គូរី។
អ្នកភូមិម្នាក់បានប្រាប់ថា គាត់មានកូនប្រុស៣នាក់ ដែលត្រូវបានពួកបូកូហារ៉ាំ ចាប់យកទៅ កាលពីថ្ងៃសុក្រ។ គាត់ជឿថា ពួកបូកូហារ៉ាំ បានចាប់ក្មេងប្រុសៗ យកទៅ គឺដើម្បីបង្វឹកហាត់ ធ្វើជាទាហាន បំរើពួកវា។ យើងនៅចាំបាន ថា កាលពីប៉ុន្មានខែមុននេះ ពួកព្រៃបូកូហារ៉ាំ បានចាប់យកក្មេងសិស្សសាលា ស្រីៗ ចំនួន២០០នាក់។ រហូតមកដល់ពេលនេះ គេមិនដែលបានដំណឹង សុខទុក្ខរបស់ក្មេងស្រី ទាំងនោះទេ។
វាគ្មានអ្វីគួរឲ្យសង្ស័យទេ គឺពួកបូកូហារ៉ាំ ចាប់មនុស្សទាំងនោះ យកទៅធ្វើការបំរើពួកវា គឺស្រីៗ ត្រូវពួកវាយកទៅ ធ្វើជាទាសករផ្លូវភេទ ឯប្រុសៗវិញ គឺត្រូវធ្វើការងារ ប្រចាំថ្ងៃនៅក្នុងជំរុំរបស់ពួកវា ព្រមទាំង ត្រូវពួកវាបញ្ជូន ឲ្យទៅស្លាប់ នៅជួរមុខ ក្នុងពេលពួកវា ចេញធ្វើប្រតិបត្តិការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ