នីហ្សេរីយ៉ា ព្រមព្រៀងឈប់បាញ់ជាមួយបូកូអារ៉ាំ តែសេរីភាពសិស្សស្រីៗនៅតែមិនជាក់លាក់
អាជ្ញាធរនីហ្សេរីយ៉ា បានប្រកាស នៅថ្ងៃសោរ៍នេះ ព្រមព្រៀងឈប់បាញ់ជាមួយ ពួកអ៊ីស្លាមជ្រុលនិយម បូកូអារ៉ាំ ដែលតែងបង្កគ្រោះភ័យនិងមហន្តរាយ ពេញផ្ទៃប្រទេសតាមរយៈភេរវកម្មបោកគ្រាប់បែក។ ក៏ប៉ុន្តែ សេរីភាពរបស់សិស្សស្រីៗជាង២០០នាក់ ដែលពួកភេរវនិយមនេះបានចាប់ខ្លួនកាលពីខែមេសា នៅភូមិChibok រហូតផ្អើលអស់ពិភពលោកទាំងមូល នៅតែស្ថិតក្នុងស្ថានភាពមិនជាក់លាក់។ មានព័ត៌មានចម្រូងចម្រាសគ្នាខ្លាំង ខ្លះថាមានការព្រមព្រៀងដោះលែងសិស្សស្រីទាំងអស់នោះហើយ ខ្លះថាកំពុងចរចាអំពីរបៀបរបបដោះលែង ...
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៧
ប្រធានាធិបតី និងយោធានីហ្សេរីយ៉ា បានជូនដំណឹង នៅល្ងាចថ្ងៃសុក្រម្សិលមិញ អំពីការព្រមព្រៀងឈប់បាញ់ជាមួយពួកអ៊ីស្លាមជ្រុលនិយមជីហាត បូកូអារ៉ាំ និង ដោះលែង សិស្សស្រីៗទាំងជាងពីរនាក់ ដែលសុទ្ធតែមានអាយុជីវិតនៅឡើយ និងមានសុខភាពល្អ។
ចំណែក ប្រមុខការទូតឆាដ លោក មូសា ហ្វាគី មូហាម៉ាត់ ដែលជាដើរតួជាអន្តរការី ក្នុងវិបត្តិនីហ្សេរីយ៉ានេះ បានលើកឡើងត្រឹមតែមានព្រមព្រៀងជាគោលការណ៍ ហើយមិនបានទទួលព័ត៌មានអ្វីទាក់ទងនឹងសុខភាព ឬស្ថានភាពឃុំឃាំងក្មេងស្រីជាចំណាប់ខ្មាំងនោះទេ។ ភាគីទាំងពីរ នីហ្សេរីយ៉ា និងបូកូអារ៉ាំ ត្រូវគោរពបទឈប់បាញ់សិន បន្ទាប់មកទើបត្រូវជួបគ្នាជាថ្មី ដើម្បីពិភាក្សាអំពីបែបបទដោះលែងសិស្សស្រីៗ ជាថ្នូរនឹងការសេរីភាពក្រុមបូកូអារ៉ាប កំពុងជាប់ឃុំឃាំង ក្នុងដៃអាជ្ញាធរនីហ្សេរីយ៉ា។
ប៉ុន្តែនៅមានចំណុចអាថ៌កំបាំងច្រើន ! ហេតុដូច្នេះហើយបានជាសហរដ្ឋអាមេរិកក៏ដូចជាបារាំងទទួលយកដំណឹងព្រមដោះលែងសិស្សជីបុក ដោយប្រុងប្រយ័ត្នបំផុត។ ប្រភពស្និទ្ធនឹងប្រធានាធិបតីបារាំងវិញ បានបញ្ជាក់អំពីចរចាជាមួយក្រុមជ្រុលនិយមនេះ តែរក្សាសិទ្ធិប្រុងប្រយ័ត្នសិន ដរាបណាក្រុមបូកូអារ៉ាំ មិនទាន់ចេញមតិយោបល់អ្វីទេនោះ។
កិច្ចព្រមព្រៀងឈប់បាញ់ភ្លាមៗនេះ នឹងមានបន្តដោយការដោះលែងចំណាប់ខ្មាំងទាំង២១៩នាក់។ ការហោះឆ្វែលស៊ើបការណ៍របស់អាមេរិក អង់គ្លេសនិងបារាំង ជាចំណែកមួយរុញច្រានឱ្យពួកបូកូអារ៉ាំឱ្យជ្រើសរើសផ្លូវចរចា។ នេះបើតាមប្រភពព័ត៌មានដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ