ទុយនីស៊ី៖មនុស្សរាប់ម៉ឺននាក់បានដើរដង្ហែក្បួនដើម្បីប្រឆំាងនឹងភេរវនិយម
នៅរសៀលថ្ងៃអាទិត្យ ទី២៩ មីនា មានមនុស្សរាប់សិបម៉ឺននាក់បាននំាគ្នាដើរដង្ហែក្បួននៅតាមផ្លូវនានាក្នុងទីក្រុងទុយនីស ប្រទេសទុយនីស៊ីដើម្បីប្រឆំាងនឹងភេរវនិយម។ ក្បួនដង្ហែពេលនេះបានរៀបចំឡើង ជាង ១០ថ្ងៃក្រោយព្រឹត្តិការណ៍បាញ់ប្រហារលើសារៈមន្ទីរបារដូកាលពីថ្ងៃទី១៨ មីនាកន្លងទៅ។ ការបាញ់ប្រហារកាលណោះបានបណ្តាលឲ្យស្លាប់មនុស្ស ២០នាក់ ភាគច្រើនជាអ្នកទេសចរណ៍បរទេស។ ក្រៅពីវត្តមានប្រជាជនទុយនីស៊ី ក៏មានវត្តមានថ្នាក់ដឹកនំាជាន់ខ្ពស់បរទេសជាច្រើនរូប ដូចជាវត្តមានលោកប្រធានាធិបតីបារំាងហ្រ្វង់ស័រ ហូឡង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
គឺជាក្បួនដង្ហែដើម្បីសន្តិភាព និងប្រឆំាងនឹងភេរវនិយមដែលមានមនុស្សចូលរួមជាច្រើនម៉ឺននាក់។ វត្តមានអ្នកចូលរួមមានតំាងពីក្មេង ចាស់ និងគ្រប់ស្រទាប់វណ្ណៈទំាងអស់ តំាងពីប្រជាជនសាមញ្ញរហូតដល់ថ្នាក់ដឹកនំានយោបាយគ្រប់និន្នាការ ព្រមទំាងអង្គការសហជីពនានា។ នៅក្នុងហ្វូងមនុស្ស គេសង្កេតឃើញមានការស្រែកប្រឆំាងនឹងភេរវនិយម ព្រមទំាងលើកបដាយ៉ាងព្រោងព្រាតដោយសរសេរថា យើងជាបារដូ យើងមិនត្រូវការភេរវនិយមទេ និងយើងមិនចុះញ៉មជាដាច់ខាត។ ជាមួយគ្នានេះ ប្រជាជនទុយនីស៊ីក៏បានឆ្លៀតស្រែកផ្ញើសារទៅកាន់បរទេសដោយអំពាវនាវជនបរទេសកុំឲ្យបារម្ភភ័យខ្លាចមកដើរកំសាន្តក្នុងប្រទេសទុយនីស៊ី។ សាររបៀបនេះ គឺជាការធានាចំពោះជនបរទេស បន្ទាប់ពីមានការវាយប្រហារលើសារៈមន្ទីរបារដូដោយបណ្តាលឲ្យស្លាប់មនុស្ស ២០នាក់ ភាគច្រើនជាអ្នកទេសចរណ៍បរទេសកាលពីថ្ងៃទី១៨ មីនាកន្លងទៅ។
នាឱកាសក្បួនដង្ហែដើម្បីប្រឆំាងនឹងភេរវនិយមនេះ គេសង្កេតឃើញមានវិធានការសន្តិសុខយ៉ាងម៉ឹងម៉ាត់ តំាងពីកងកម្លំាងប៉ូលិស និងកងឧទ្ធម្ភាគចក្រ។ នេះក៏ដោយសារថា ក្រៅពីវត្តមានប្រជាជនទុយនីស៊ីគ្រប់ជាន់ថ្នាក់ ក៏គេឃើញមានវត្តមានថ្នាក់ដឹកនំាជាន់ខ្ពស់បរទេសជាច្រើនរូបដែរ ក្នុងនោះមានប្រធានាធិបតីបារំាង ប៉ូឡូញ និងប្រធានរដ្ឋអំណាចប៉ាឡេស្ទីន ព្រមទំាងនាយករដ្ឋមន្រ្តីអ៊ីតាលី និងប្រមុខការទូតអឺរ៉ុបជាច្រើនរូបទៀត។ តែវត្តមានគួរឲ្យចាប់អារម្មណ៍ខ្លំាងនោះ គឺប្រមុខរដ្ឋាភិបាលអាល់ហ្សេរី ព្រោះអាល់ហ្សេរីក៏បានរួមប្រយុទ្ធទល់នឹងភេរវនិយមនៅតាមបណ្តោយព្រំដែនជាមួយទុយនីស៊ីដែរ។
ក្បួនដង្ហែដើម្បីសន្តិភាព និងប្រឆំាងភេរវនិយមក្នុងប្រទេសទុយនីស៊ីពេលនេះនំាឲ្យគេនឹកឃើញដល់មហាក្បួនដង្ហែក្នុងទីក្រុងប៉ារីស ប្រទេសបារំាងកាលពីថ្ងៃទី១១ មករា បន្ទាប់ពីអំពើភេរវកម្មវាយប្រហារលើទស្សនាវដ្តី Charlie Hebdo និងហាងលក់ទំនិញ Hyper Cacher របស់ជនជាតិជ្វីហ្វដោយបណ្តាលឲ្យមានមនុស្សស្លាប់សរុប ១៧នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ