ពលរដ្ឋចិនម្នាក់បានសារភាពជាចោរលួចបច្ចេកវិទ្យាផលិតយន្តហោះចម្បាំងអាមេរិក
នៅសហរដ្ឋអាមេរិក ក្រសួងយុត្តិធម៌បានប្រកាសឲ្យដឹងនៅថ្ងៃព្រហស្បតិ៍ ទី២៤ មីនានេះថា ពលរដ្ឋចិនម្នាក់ឈ្មោះស៊ូ ប៊ីនបានប្រកាសសារភាពនាថ្ងៃពុធ ទី២៣ មីនាពីបទបានចូលទៅក្នុងប្រព័ន្ធព័ត៌មានវិទ្យារបស់ក្រុមហ៊ុនមួយដែលទទួលបន្ទុកផលិតគ្រឿងសព្វាវុធឲ្យកងទ័ពអាមេរិក។ គោលដៅត្រូវបានលោកស៊ូ ប៊ីនអះអាងថា គឺដើម្បីលួចទិន្នន័យបច្ចេកវិទ្យាស្តីពីយន្តហោះចម្បាំង និងយន្តហោះដឹកជញ្ជូនទ័ពអាមេរិកាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
មានអាយុ ៥០ឆ្នាំ លោកស៊ូ ប៊ីនត្រូវបានចាប់ខ្លួនក្នុងខែមិថុនា ឆ្នាំ ២០១៤ នៅក្នុងប្រទេសកាណាដា តាមសំណើរបស់ក្រសួងយុត្តិធម៌អាមេរិកាំង។ កាលណោះ តុលាការអាមេរិកបានចោទលោកស៊ូ ប៊ីនពីបទបានចូលទៅក្នុងប្រព័ន្ធព័ត៌មានវិទ្យារបស់ក្រុមហ៊ុនផលិតយន្តហោះអាមេរិកប៊ូអ៊ីង (Boeing) និងក្រុមហ៊ុនតូចតាចផ្សេងទៀតក្នុងគោលដៅលួចទិន្នន័យបច្ចេកវិទ្យាយន្តហោះចម្បាំងអាមេរិកប្រភេទ F-២២ និង F-៣៥ ព្រមទាំងយន្តហោះដឹកជញ្ជូនប្រភេទ C-១៧ ផងដែរ។
គឺទើបតែនៅក្នុងខែកុម្ភៈ ឆ្នាំ ២០១៦ នេះទេដែលលោកស៊ូ ប៊ីនបានយល់ព្រមឲ្យរដ្ឋអំណាចកាណាដាបញ្ជូនរូបលោកទៅឲ្យរដ្ឋណាចអាមេរិក។ នៅចំពោះមុខតុលាការអាមេរិក លោកស៊ូ ប៊ីនបានសារភាពត្រង់ៗពីតួនាទីឃុបឃិតរបស់លោកជាមួយនឹងមនុស្សផ្សេងទៀតនៅក្នុងប្រទេសចិន។ លោកស៊ូ ប៊ីនបានអះអាងថា នៅចន្លោះខែតុលា ឆ្នាំ ២០០៨ និងខែមីនា ឆ្នាំ ២០១៤ លោកបានរួមសហការណ៍ជាមួយមនុស្សពីរនាក់នៅចិនដើម្បីចូលទៅក្នុងប្រព័ន្ធព័ត៌មានវិទ្យារបស់ក្រុមហ៊ុនដែលធ្វើការឲ្យកងទ័ពអាមេរិក។ កម្មវត្ថុ គឺលួចយកព័ត៌មានសំខាន់ៗស្តីពីបច្ចេកវិទ្យាយន្តហោះចម្បាំងអាមេរិក រួចបញ្ចូនទៅស្រុកចិន។
លោកស៊ូ ប៊ីនមិនបានបញ្ជាក់ពីអត្តសញ្ញាណរបស់មនុស្សពីរនាក់នៅចិនដែលលោកបានធ្វើការជាមួយទេ តែបើយោងតាមកាសែតកាណាដាមួយឲ្យដឹងថា មនុស្សទាំងពីរនាក់នោះជាមន្រ្តីយោធាចិន។ នៅពេលដែលលួចយកបានទិន្នន័យហើយ លោកស៊ូ ប៊ីននឹងធ្វើការបកប្រែពីភាសាអង់គ្លេសទៅចិន មុននឹងបញ្ជូនទៅស្រុកចិន។ តែក្រសួងយុត្តិធម៌អាមេរិកមិនបានប្រាប់ឲ្យដឹងទេថា តើបុគ្គល ឬក្រសួងណាមួយជាអ្នកទទួលទិន្នន័យទាំងអស់នោះ។ យ៉ាងណាក៏ដោយ លោកស៊ូ ប៊ីននឹងអាចទទួលទោសជាប់ពន្ធនាគារច្រើនបំផុត ៥ឆ្នាំ និងផាកពិន័យជាប្រាក់ចំនួន ២៥ម៉ឺនដុល្លារ។
គួរជម្រាបជូនថា រឿងរ៉ាវមួយនេះបានធ្លាក់មក ចំពេលដែលចិន និងអាមេរិកកំពុងបន្តចោទគ្នាទៅវិញ ទៅមកក្នុងសំណុំរឿងចោរអ៊ីនធ័រនែត។ នាទស្សនកិច្ចរបស់លោកប្រធានាធិបតីចិនស៊ី ជីនពីងនៅអាមេរិកកាលពីខែកញ្ញា ឆ្នាំ ២០១៥ លោកស៊ី ជីនពីង និងសមភាគីអាមេរិកលោកអូបាម៉ាបានឯកភាពគ្នាក្នុងការប្រយុទ្ធប្រឆាំងនឹងចោរអ៊ីនធ័រនែត។ តែអាមេរិកក៏ធ្លាប់បានបញ្ជាក់ថា អាមេរិកត្រូវរងចាំមើលការអនុវត្តន៍ជាក់ស្តែងរបស់ចិន គឺមិនមែនលើតែទ្រឹស្តីនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ