ដូណាល់ត្រាំ សម្រេចផ្អាកកម្មវិធីទទួលជនភៀសខ្លួនមកពីប្រទេសអ៊ីស្លាម
ចុះផ្សាយនៅថ្ងៃ៖
មួយសប្តាហ៍កន្លងផុតទៅ លោកដូណាល់ ត្រាំ ប្រធានាធិបតីថ្មីរបស់សហរដ្ឋអាមេរិក បានសម្រេចធ្វើក្រិត្យច្បាប់ ជាច្រើន ដែលបង្កភាពច្របូកច្របល់។ ចុងក្រោយគេនេះ នៅថ្ងៃសុក្រទី ២៧មករា លោកដូណាល់ត្រាំ បានសម្រេចបិទទ្វារសហរដ្ឋអាមេរិក ផ្អាកឈប់ទទួលជនភៀសខ្លួនមួយរយៈ ទៅលើប្រទេសមួយចំនួន ដែលជាប្រទេសកាន់សាសនាអ៊ីស្លាម។ លោកដូណាល់ ត្រាំ អះអាងថា វិធានការនេះ គឺដើម្បីការពារសហរដ្ឋអាមេរិក កុំឲ្យពួកភេរវជនអ៊ីស្លាម ធ្វើដំណើរចូល។ ភ្នាក់ងារអង្គការសិទ្ធិមនុស្ស បានថ្កោលទោសវិធានការបែបរើសអើងប្រកាន់ពូជសាសន៍ និងអមនុស្សធម៌របស់លោកដូណាល់ ត្រាំ ដែលបង្ហាញថា លោកមិនខ្វល់ពីអាយុជីវិតរបស់ជនភៀសខ្លួន ដែលរត់គេចពីសង្រ្គាមទេ។
ហាមប្រជាជនអ៊ីស្លាមមកពី៧ប្រទេស មិនឲ្យចូលសហរដ្ឋអាមេរិក៖
វិធានការទីមួយ គឺលោកដូណាល់ត្រាំ សម្រេចផ្អាករយៈពេល៣ខែ មិនទទួលជនអន្តោប្រវេសន៍ មកពីប្រទេសកាន់សាសនាអ៊ីស្លាមចំនួន៧ប្រទេស គឺប្រទេស ស៊ីរី អ៊ីរ៉ាក់ អ៊ីរ៉ង់ លីប៊ី សូម៉ាលី ស៊ូដង់ និងយេមែន។ មានន័យថា ប្រជាជនដែលកាន់លិខិតឆ្លងដែនប្រទេសទាំង៧នេះ មិនអាចធ្វើដំណើរចូលសហរដ្ឋអាមេរិកទេ លើកលែងតែអ្នកដែលកាន់លិខិតឆ្លងដែនផ្លូវការ ឬក៏មនុស្សដែលជាបុគ្គលិករបស់អង្គការអន្តរជាតិ។
វិធានការទីពីរ គឺរដ្ឋាភិបាលលោកដូណាល់ ត្រាំ នឹងផ្អាកកម្មវិធីទទួលជនភៀសខ្លួនដែលរត់គេចពីប្រទេសមានសង្រ្គាម ទោះមកពីប្រទេសណាក៏ដោយ ក្នុងរយៈពេល៤ខែ។ លើកលែងតែជនភៀសខ្លួនមកពីប្រទេសស៊ីរី គឺសហរដ្ឋអាមេរិក ផ្អាកឈប់ទទួលរហូត រហូតទាល់តែមានបទបញ្ជាថ្មីណាមួយផ្សេងទៀត។ កម្មវិធីទទួលជនភៀសខ្លួនរត់គេចពីសង្រ្គាមនេះ ត្រូវបានដាក់ឲ្យអនុវត្តនៅឆ្នាំ១៩៨០ ហើយគឺជាគោលនយោបាយមួយល្អណាស់ ក្នុងការជួយសង្រ្គោះស្រោចស្រង់ប្រជាជន ដែលគ្នារត់គេចពីសង្រ្គាម។ តួយ៉ាង ជនភៀសខ្លួនខ្មែរយើង ដែលរត់គេចពីរបបខ្មែរក្រហម គឺត្រូវបានទទួលយកទៅស្នាក់នៅ ក្នុងសហរដ្ឋអាមេរិក តាមរយៈកម្មវិធីនេះឯង។ ចាប់តាំងពីអនុវត្តមក កម្មវិធីទទួលយកជនភៀសខ្លួនដោយសង្រ្គាមនេះ ធ្លាប់ត្រូវបានព្យួរម្តងគត់ រយៈពេល៣ខែ ក្រោយហេតុការណ៍ភេរវកម្មថ្ងៃទី១១កញ្ញា ឆ្នាំ២០០១។
ទាក់ទិនទៅនឹងជនភៀសខ្លួនមកពីប្រទេសស៊ីរី លោកដូណាល់ ត្រាំ ធ្លាប់បានប្រកាសថា លោកចង់បង្កើតតំបន់សុវត្ថិភាពពិសេសមួយ នៅស៊ីរី រឺក៏នៅក្បែរស៊ីរី ដើម្បីទទួលយកជនភៀសខ្លួន។ ក៏ប៉ុន្តែក្នុងខ្លឹមសារក្រិត្យច្បាប់ដែលគាត់បានចុះហត្ថលេខា គេមិនឃើញមានអ្វីនិយាយពីចំណុចនេះទេ។
សូមរំលឹកដែរថា នៅឆ្នាំ២០១៦ កន្លងទៅរដ្ឋាភិបាលលោកអូបាម៉ា បានទទួលជនភៀសខ្លួនដោយសង្រ្គាម ប្រមាណជាជាង៨ម៉ឺននាក់ ដែលក្នុងនោះមានជាង១ម៉ឺននាក់មកពីស៊ីរី។ លោកអូបាម៉ា មានបំណងតំឡើងឲ្យដល់១១ម៉ឺននាក់ តែរដ្ឋាភិបាលថ្មីរបស់លោកត្រាំ បានបន្ថយថានឹងទទួលយកជនភៀសខ្លួនដោយសង្រ្គាម មិនឲ្យលើសពី៥ម៉ឺននាក់ទេ សម្រាប់ឆ្នាំ២០១៧នេះ។
វិធានការអមនុស្សធម៌ រើសអើង និងផ្ទុយពីរដ្ឋធម្មនុញ្ញ៖
ជារួម វិធានការទាំងនេះ គឺជាវិធានការបែបរើសអើងបំផុត។ អ្នកដែលត្រូវទទួលរងផលប៉ះពាល់ ដោយការបិទផ្អាកនេះ គឺមិនមែនមានតែជនភៀសខ្លួនដែលរត់គេចពីសង្រ្គាមទេ តែសូម្បីតែជនអន្តោប្រវេសន៍ធម្មតា ក៏នឹងត្រូវជួបការលំបាកដែរ។ ផលប៉ះពាល់ទីមួយ គឺមានន័យថា ជនភៀសខ្លួន ដែលគ្នារត់គេចពីសង្រ្គាម នឹងត្រូវនៅកកកុញ នៅតាមតំបន់ដែលគ្មានសុវត្ថិភាព។ មានន័យថាអាយុជីវិតពួកគេ និងអាចជួបគ្រោះថ្នាក់។
ឧទាហរណ៍ ជនភៀសខ្លួនខ្លះ ដែលសមាជិកគ្រួសារ មួយផ្នែកបានមកដល់សហរដ្ឋអាមេរិកហើយ តែនៅមួយមួយផ្នែកទៀត នៅមិនទាន់បានមកដល់សហរដ្ឋអាមេរិក។ អញ្ចឹង មានន័យថា ពួកគេនឹងត្រូវបែកគ្នា ដោយសារវិធានការថ្មីនេះ។ ករណីមួយទៀត សម្រាប់ជនជាតិអ៊ីរ៉ាក់ ដែលធ្លាប់បំរើការងារឲ្យកងទ័ពអាមេរិក ប្រាកដជាជួបនឹងការលំបាក ព្រោះពួកគេមិនអាចមកសុំសិទ្ធិជ្រកកោននៅសហរដ្ឋអាមេរិកបានទេ។ ចំណែកនៅក្នុងស្រុក ពួកគេនឹងរងការធ្វើទុក្ខបុកម្នេញពីពួក ជីហាតអ៊ីស្លាម។
ទាំងនេះ គឺជាផលលំបាក ដែលមានទៅលើជនភៀសខ្លួន តែ ប្រជាជនសាមញ្ញផ្សេងទៀត ដែលមានដើមកំណើតមកពីប្រទេសកាន់សាសនាអ៊ីស្លាម ទាំង៧ខាងលើ ក៏មិនអាចធ្វើដំណើរចូលសហរដ្ឋអាមេរិកដែរ។ ពោលគឺទោះអ្នកនោះ ត្រូវធ្វើដំណើរមកបន្តការសិក្សា មកលេងបងប្អូន ឬមួយមកទទួលការព្យាបាលជំងឺនៅសហរដ្ឋអាមេរិកជាដើម។ ហើយសូម្បីតែអ្នកដែលមាន ប័ណ្ណស្នាក់នៅ ដែលយើងហៅថា Green Card រួចហើយក៏ដោយ ក៏គេមិនឲ្យធ្វើដំណើរចូលសហរដ្ឋអាមេរិកដែរ។
ការហាមឃាត់ មិនឲ្យប្រជាជនមកពីប្រទេសកាន់សាសនាអ៊ីស្លាម ចូលសហរដ្ឋអាមេរិកបែបនេះ គឺជាវិធានការបែបរើសអើងខ្លាំងណាស់។ យ៉ាងណាមិញ ទាក់ទងនឹងជនភៀសខ្លួនមកពីស៊ីរី លោកដូណាល់ត្រាំ ថែមទាំងបានព្រលយពាក្យថា លោកនឹងផ្តល់អាទិភាព ទទួលយកតែជនភៀសខ្លួនណា ដែលមិនកាន់សាសនាអ៊ីស្លាម។ គឺគាត់ចង់សំដៅដល់ប្រជាជនស៊ីរី មួយចំនួនតូចដែលកាន់សាសនាគ្រិស្ត។ វិធានការរុញអ្នកកាន់សាសនាអ៊ីស្លាមចេញ យកតែអ្នកកាន់សាសនាគ្រិស្តនេះ ត្រូវបានលោកStephen Legomsky មន្ត្រីជំនាញផ្នែកច្បាប់ និងសិទ្ធិជនភៀសខ្លួន ដែលធ្លាប់ធ្វើការឲ្យរដ្ឋាភិបាលលោកអូបាម៉ា មានប្រសាសន៍ថា ជាវិធានការដែលផ្ទុយពីរដ្ឋធម្មនុញ្ញរបស់សហរដ្ឋអាមេរិក។ ដូច្នេះមានន័យថា អង្គការការពារសិទ្ធិមនុស្សនានា នឹងមិនបង្អង់ ដើម្បីប្តឹងចោទលោកដូណាល់ ត្រាំទេ។
ដូណាល់ ត្រាំ៖ មិនឲ្យអ្នកកាន់សាសនាអ៊ីស្លាមចូល គឺដើម្បីការពារសហរដ្ឋអាមេរិក ពីអំពើភេរវកម្ម
បណ្តាញព័ត៌មានទូទាំងពិភពលោក គេបានសរសេររិះគន់ ថាក្នុងនាមប្រធានាធិបតីមហាអំណាចកំពូលនៃពិភពលោក គួរណា តែធ្វើគំរូល្អឲ្យប្រទេសដទៃ តែលោកដូណាល់ ត្រាំ បែរជាធ្វើរឿងមិនសមហេតុផល ធ្វើឲ្យសហរដ្ឋអាមេរិកអព្វឱនកិត្តិយស។ សហរដ្ឋអាមេរិកគឺជាទឹកដីនៃជនអន្តោប្រវេសន៍ តាំងតែពីដំបូងមក តែពេលនេះ លោកត្រាំ កំពុងលប់ដានប្រវត្តិសាស្ត្រនេះ។
ហាមឃាត់មិនឲ្យប្រជាជនអ៊ីស្លាមចូលអាមេរិក ដោយលើកឡើងថា ដើម្បីកុំឲ្យពួកភេរវកម្មអ៊ីស្លាមចូល អញ្ចឹងគឺមានន័យថា លោកដូណាល់ ត្រាំ ចង់បានន័យថា ឲ្យតែជនជាតិអ៊ីស្លាម សុទ្ធតែពួកភេរវកម្មទាំងអស់។ ជាការពិត វាមានពួកជ្រុលនិយមអ៊ីស្លាម ដែលវាមានបណ្តាញគ្នាវា តែប្រជាជនស្លូតត្រង់ដែលគ្នាវេចសំពាយ រត់គេចពីសង្រ្គាម គ្នាគ្មានបំណងអ្វីក្រៅតែពីសុំកន្លែងសុខសន្តិភាពនោះទេ។
លោក ដូណាល់ ត្រាំ គាត់ប្រហែលមិនបានដឹងទេ ថាភេរវកម្មនៅអាមេរិកកន្លងមក គឺភាគច្រើន បង្កឡើងដោយពួកជ្រុលនិយម ដែលរស់នៅក្នុងសហរដ្ឋអាមេរិកស្រាប់ មិនមែនអ្នកដែលទៅពីស៊ីរី រឺពីអ៊ីរ៉ាក់ទេ។ ហើយមួយទៀត ការបាញ់រះ សម្លាប់មនុស្សដែលកើតមានឡើង ជាញឹកញាប់នៅសហរដ្ឋអាមេរិក មិនមែនអ្នកកាន់សាសនាអ៊ីស្លាមបង្កឡើងទេ តែគឺកូនចៅពួកជនជាតិអាមេរិកខ្លួនឯងនឹង ដែលមានកាំភ្លើងប្រើពេញៗដៃ បាញ់បោះដោយសេរី។ នេះទើបជាបញ្ហាសន្តិសុខចំបង ដែលលោកត្រាំ គួរគិតគូ មិនមែនមកលាបពណ៌ លើអ្នកកាន់សាសនាអ៊ីស្លាម ទាំងអស់អញ្ចឹងទេ។
ត្រលប់មកនិយាយពីផែនការប្រយុទ្ធនឹងអំពើភេរវកម្មវិញ កាលពីល្ងាចថ្ងៃសុក្រ ទី២៧មករា ដែរលោកដូណាល់ ត្រាំ បានទៅមន្ទីរបញ្ចកោណ ដើម្បីជួបពិភាក្សាជាមួយមេទ័ពអាមេរិកធំៗ ស្តីពីសង្រ្គាម ប្រឆាំងនឹងក្រុមជីហាតអង្គការរដ្ឋអ៊ីស្លាម នៅអ៊ីរ៉ាក់ និងស៊ីរី។ កន្លងមក គាត់តែងតែរិះគន់កងទ័ពអាមេរិកថា ធ្វើការស៊ើកៗ វាយមិនឈ្នះពួកជីហាតអ៊ីស្លាមសោះ។ សម្រាប់ពេលនេះ នៅអ៊ីរ៉ាក់ មានទាហានកុម្មង់ដូរពិសេសរបស់អាមេរិក ប្រហែល៥ពាន់នាក់ ហើយនៅស៊ីរី មានតែ៥រយនាក់ទេ។ កងទ័ពអាមេរិក ធ្វើប្រតិបត្តិការដោយប្រយោល តាមរយៈការទម្លាក់គ្រាប់បែក លើមូលដ្ឋានរបស់ពួកជីហាត។
យើងមិនទាន់ដឹងថា លោកត្រាំ នឹងសម្រេចយ៉ាងណាទេ។ តើលោកត្រាំ នឹងសម្រេចបញ្ជូនទ័ពថ្មើរជើង ទៅអ៊ីរ៉ាក់ និងស៊ីរី បន្ថែមទៀត ឬយ៉ាងណា? អ្នកនាំពាក្យសេតវិមានរបស់លោកត្រាំ ក៏ធ្លាប់បានប្រាប់ដែរថា កងទ័ពអាមេរិក អាចនឹងធ្វើបេសកកម្មរួម ជាមួយកងទ័ពរុស្ស៊ី។ បើ បញ្ជូនទ័ពទៅថែម មានន័យថាកងទ័ពអាមេរិក ក៏ត្រូវត្រៀមខ្លួនបាត់បង់ជីវិតមនុស្សបន្ថែមដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ