រដ្ឋាភិបាលថ្មីរបស់ដូណាល់ ត្រាំ ចង់កាត់បន្ថយវិភាគទាន ទៅឲ្យអង្គការសហប្រជាជាតិ
ផែនការថ្មីមួយទៀតរបស់លោកដូណាល់ ត្រាំ ប្រធានាធិបតីថ្មីសហរដ្ឋអាមេរិក គឺកាត់បន្ថយ រឺក៏អាចលប់ចោលទាំងស្រុង នូវប្រាក់វិភាគទាន ដែលសហរដ្ឋអាមេរិក ផ្តល់ទៅឲ្យអង្គការសហប្រជាជាតិ ក៏ដូចជាអង្គការមនុស្សធម៌អន្តរជាតិនានា។ រដ្ឋាភិបាលលោកដូណាល់ ត្រាំ កំពុងរៀបចំក្រិត្យច្បាប់ថ្មីពីរ ដើម្បីចាត់ចែងកិច្ចការនេះ។ យោងតាមការផ្សាយរបស់កាសែត New York Times លោកត្រាំ បានកំណត់នូវលក្ខខណ្ឌមួយចំនួន ដើម្បីលប់ចោល លែងផ្តល់ប្រាក់វិភាគទាន តួយ៉ាងដូចជាអង្គការណា ដែលធ្វើការដោយមិនគោរពផលប្រយោជន៍របស់សហរដ្ឋអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
កាសែត New York Times ចុះផ្សាយថា គម្រោងក្រិត្យច្បាប់ទីមួយ នឹងតម្រូវឲ្យបង្កើតក្រុមការងារពិសេសមួយ ដើម្បីធ្វើការវិភាគ វាយតំលៃ ថាតើអង្គការ រឺភ្នាក់ងារចំណុះឲ្យអង្គការសហប្រជាជាតិ ណាខ្លះ ដែលនឹងត្រូវកាត់បន្ថយជំនួយថវិកា រឺក៏ផ្តាច់លែងផ្តល់ឲ្យទាំងស្រុង។ យោងតាមឯកសារផ្លូវការ រដ្ឋាភិបាលលោកត្រាំ បានជំរុញឲ្យអនាគតក្រុមការងារវាយតំលៃនេះ ពិនិត្យឲ្យមែនទែន ជាពិសេស ដូចជា អង្គការដែលធ្វើសកម្មភាពការងាររក្សាសន្តិភាពនៅទូទាំងពិភពលោក រឺក៏អង្គការណាដែលកំពុងជួយប្រទេសនានា តែប្រទេសនោះតែងតែប្រឆាំងនឹងផលប្រយោជន៍របស់សហរដ្ឋអាមេរិក។
លោកត្រាំ ក៏បញ្ជារឲ្យពិនិត្យលើជំនួយថវិការបស់អាមេរិក ទៅឲ្យតុលាការព្រហ្មទណ្ឌអន្តរជាតិ ដែរ។ តែតាមការពិត លោកដូណាល់ ត្រាំ ប្រហែលជាមិនបានដឹងទេថា សហរដ្ឋអាមេរិក មិនបានផ្តល់ថវិកាវិភាគទាន ឲ្យទៅតុលាការព្រហ្មទណ្ឌអន្តរជាតិទេ។
សូមបញ្ជាក់ថា ក្នុងប្រតិបត្តិការរក្សាសន្តិភាពទូទាំងពិភពលោក នៃអង្គការសហប្រជាជាតិ សហរដ្ឋអាមេរិក បានចូលរួមថវិកា ប្រមាណជា២៨% ដែលស្មើនឹង៧៨០០លានដុល្លារ។ បើនិយាយសរុប នៃវិភាគទានទៅឲ្យអង្គការសហប្រជាជាតិ គឺសហរដ្ឋអាមេរិក ចូលរួមប្រមាណជា២២%។ បន្ថែមពីនេះ នៅឆ្នាំ២០១៦ កន្លងទៅ សហរដ្ឋអាមេរិក បានផ្តល់កញ្ចប់ប្រាក់ ដាច់ដោយឡែក ប្រមាណជា៥៤០០លានដុល្លារ ផ្សេងទៀត។
ប្រភពពីកាសែត ដដែល បានឲ្យដឹងថា លោកដូណាល់ ត្រាំ បានកំណត់លក្ខខណ្ឌជាច្រើន ដើម្បីឲ្យក្រុមការងារពិសេសនោះ ពិនិត្យ និងគោរពតាម។ ឧទាហរណ៍ អង្គការណា ដែលទទួលស្គាល់ ដែនដីប៉ាឡេស្ទីន ជាប្រទេសសមាជិកពេញសិទ្ធិ អង្គការណាដែលធ្វើសកម្មភាពជួយទ្រទ្រង់ស្រ្តី ដែលចង់រំលូតកូន រឺអង្គការណា ដែលធ្វើសកម្មភាពលើកកំពស់ការបញ្ឈប់ទណ្ឌកម្ម ទៅលើអ៊ីរ៉ង់ និងកូរ៉េខាងជើង…អង្គការទាំងនោះ នឹងត្រូវអាមេរិកផ្តាច់ជំនួយទាំងស្រុង។ ចំពោះអង្គការចំណុះផ្សេងទៀតទាំងអស់ នៃអង្គការសហប្រជាជាតិ ទោះមិនជាប់លក្ខខណ្ឌខាងលើក៏ដោយ ក៏ជារួម នឹងត្រូវកាត់បន្ថយជំនួយថវិកា ៤០%ដែរ។
ដោយឡែក ក្រិត្យច្បាប់ទីពីរ គឺទាក់ទងទៅនឹងការសើររើ សន្ធិសញ្ញាអន្តរជាតិធំៗ ដែលធ្វើឡើង ក្នុងក្របខណ្ឌអង្គការសហប្រជាជាតិ ហើយដែលមិនជាប់ទាក់ទងនឹងសន្តិសុខជាតិអាមេរិក ការធ្វើបត្យាប័ន រឺពណិជ្ជកម្មអន្តរជាតិ។ កាសែតNew York Times បានសន្និដ្ឋានថាកិច្ចព្រមព្រៀងទីក្រុងប៉ារីស ស្តីពីអាកាសធាតុ ប្រហែលជាមិនជាប់នៅក្នុងចំណោមនេះទេមើលទៅ ព្រោះក្នុងឯកសារយោងរបស់លោកត្រាំ គេបានលើកឡើងតែកិច្ចព្រមព្រៀងពីរប៉ុណ្ណោះ គឺសន្ធិសញ្ញា លប់បំបាត់ការរើសអើងគ្រប់ទំរង់ទៅលើស្ត្រី និងសន្ធិសញ្ញាស្តីពីសិទ្ធិកុមារ។ រឿងដែលគួរឲ្យអស់សំណើចនោះ គឺលោកដូណាល់ ត្រាំ មានបំណងសើររើសន្ធិសញ្ញាទាំងពីរនេះ តែតាមពិត គាត់ប្រហែលជាមិនដឹងទេ ថា សហរដ្ឋអាមេរិក មិនដែលបានផ្តល់សច្ចាប័ន ទៅលើសន្ធិសញ្ញាទាំងពីរនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ