ផែនការធ្វើភេរវកម្មរបស់មេដឹកនាំអាល់កៃដាធ្វើឲ្យអាមេរិកបន្តបិទទ្វារស្ថានទូត នៅបរទេស
ចុះផ្សាយនៅថ្ងៃ៖
ស្តាប់ - ០៦:៥៨
កាលពីចុងសប្តាហ៍មុន អាមេរិកចាប់បានសំឡេងសន្ទនារបស់មេដឹកនាំអាល់កៃដា ដែលបាននិយាយពីគម្រោងធ្វើភេរវកម្ម នៅក្នុងប្រទេសយេម៉ែន។ ក្រសួងការបរទេសអាមេរិកបានសម្រេចពន្យាររយៈពេលបិទស្ថានទូតអាមេរិក នៅដើមបូព៌ា និងនៅអាហ្រ្វិក រហូតដល់ថ្ងៃសៅរ៍ចុងសប្តាហ៍នេះ។ ជាមួយគ្នានេះ នៅយេម៉ែន ជាទីដែលការគំរាមកំហែងធ្វើភេរវកម្មមានកម្រិតខ្ពស់ សហរដ្ឋអាមេរិក និងអឺរ៉ុប បានសម្រេចបន្តបិទទ្វារស្ថានទូតរបស់ខ្លួនមួយរយៈ។
មេដឹកនាំអាល់កៃដា ដែលមន្រ្តីស៊ើបការណ៍សម្ងាត់អាមេរិកចាប់សំឡេង នោះ គឺ លោកអៃម៉ាន់ អាល់ ហ្សាវ៉ារី ដឹកនាំកំពូល របស់អាល់កៃដាបច្ចុប្បន្ន ដែលគ្រប់គ្រងបណ្តាញអាល់កៃដា បន្តពី អូសាម៉ា បិនឡាដិន ដែលត្រូវកងកុម្ម៉ង់ដូរអាមេរិកបាញ់សម្លាប់ កាលពីឆ្នាំ ២០១១កន្លងទៅ។ នៅក្នុងសន្ទនាដែលភ្នាក់ងារស៊ើបការណ៍សម្ងាត់អាមេរិកចាប់បាន មេដឹកនាំកំពូល អៃម៉ាន់ អាល់ ហ្សាវ៉ារីបានចេញបញ្ជាទៅណាសែ អាល់ វុហៃស៊ី ដែលជា មេដឹកនាំក្រុមអាកាប់ (AQAP) បណ្តាញអាល់កៃដា នៅយេម៉ែន ឲ្យធ្វើសកម្មភាពអ្វីមួយ ជាពិសេស នៅថ្ងៃអាទិត្យទី ៤សីហា។ ដោយសារព័ត៌មាននេះ មេរិកបានប្រកាសបិទជាបន្ទាន់ បិទទ្វារស្ថានទូតរបស់ខ្លួន នៅតំបន់ដើមបូព៌ា និងនៅអាហ្រ្វិកខាងជើង សម្រាប់ថ្ងៃអាទិត្យ និងពន្យារដល់ថ្ងៃសៅរ៍ ទី ១០ សីហា។
រដ្ឋាភិបាលប្រទេសលោកខាងលិចចាត់ទុកក្រុមអាល់កៃដា នៅ ឧបទ្វីបអារ៉ាប់ ឬអាកាប់ ថា ជាក្រុមគំរាមកំហែងសន្តិសុខដ៏មានសក្តានុពល របស់ក្រុមអាល់កៃដា នាពេលបច្ចុប្បន្ននេះ គឺបន្ទាប់ពីបណ្តាញអាល់កៃដា នៅអាហ្វហ្កានីស្ថាន និងប៉ាគីស្ថានត្រូវ យន្តហោះគ្មានមនុស្សបើកDrones របស់អាមេរិក វាយប្រហារខ្ចាត់ខ្ចាយ។ ក្រុមអាកាប់ ឬអាល់កៃដា នៅឧបទ្វីបអារ៉ាប់ មានសកម្មភាពរស់រវើក និងមានសមត្ថភាពជាងគេ។ ក្រុមនេះ មានសមាជិកមួយចំនួន មកពីអារ៉ាប៊ី សាអ៊ូឌីត ដែលពូកែមានស្នាដៃ ច្នៃប្រឌិតបង្កើតគ្រាប់បែក ដែលមានកម្លាំងផ្ទុះខ្លាំង។
គឺក្រុមអាកាប់ដែល ធ្លាប់បានច្នៃគ្រាប់បែក ដើម្បីធ្វើភេរវកម្មអត្តឃាត ដូចជាច្នៃគ្រាប់បែក ដាក់ក្នុងខោខ្លី របស់សមាជិកខ្លួនម្នាក់ ដែលគេចាប់បាននៅក្នុងយន្តហោះ ដែលហោះសំដៅទីក្រុងDetroit របស់អាមេរិក កាលពីរដូវបុណ្យណូអែល ឆ្នាំ ២០០៩។ អាកាប់ក៏ជាម្ចាស់លាក់គ្រឿងផ្ទុះ នៅក្នុងម៉ាស៊ីនបោះពុម្ព ដែលត្រូវផ្ញើទៅអាមេរិក ហើយដែលគេរកឃើញទាន់ពេល។ បើតាមមន្រ្តីអាមេរិកដែលសុំមិនបញ្ចេញឈ្មោះ នៅក្នុងសំឡេងសន្ទនាដែលគេចាប់បាន រវាងមេដឹកនាំក្រុមអាល់កៃដា គេបានដឹងថា ក្រុមអាល់កៃដា មានគម្រោងធ្វើភេរវកម្មអត្តឃាត ដោយលើកនេះ គេអាចលាក់គ្រឿងផ្ទុះ នៅក្នុងខ្លួនភេរវករ ដើម្បីជៀសផុត ពីការត្រួតពិនិត្យចាប់បាន របស់ក្រុមប្រឆាំងភេរវកម្ម។
យុទ្ធសាស្រ្តប្រឆាំងក្រុមអាល់កៃដា របស់អាមេរិក នៅយេម៉ែន គឺការប្រើយន្តហោះDrones គ្មានមនុស្សបើកដើម្បីវាយប្រហារទៅលើសម្បុករបស់ក្រុមអាល់កៃដា។ នៅថ្ងៃចន្ទ ទី ៥ សីហា យន្តហោះDrones អាមេរិកបានបាញ់សម្លាប់បុរសជាតិយេម៉ែន៤នាក់ ដែលអាមេរិកបញ្ជាក់ថា គឺជាក្រុមរបស់អាល់កៃដា នៅយេម៉ែន។ ប៉ុន្តែ យ៉ាងណាក៏ដោយអាមេរិកនៅតែមិនអាចបំបែកសំបុករបស់ក្រុមអាល់កៃដា នៅយេម៉ែនបានទេ។ ទីមួយគឺដោយសារហេតុផលទីតាំងភូមិសាស្រ្ត។ មេដឹកនាំរបស់អាល់កៃដា នៅអារ៉ាប់ ឬក្រុមអាកាប់ បានរួចខ្លួនពីការវាយប្រហាររបស់យន្តហោះអាមេរិក ដោយសារគេលាក់ខ្លួន នៅក្នុងតំបន់ភ្នំ និងការពារដោយក្រុមកុលសម្ព័ន្ធភ្នំ។ ទីពីរ ក្រុមអាកាប់ បានឆ្លៀតយកប្រយោជន៍ពីវិបត្តិ និងអស្ថិរភាព នយោបាយ នៅយេម៉ែន និងនៅប្រទេសមួយចំនួន ដែលជួបបដិវត្តន៍អារ៉ាប់ ដើម្បីពង្រឹងវត្តមាន និងកម្លាំងរបស់ខ្លួន នៅភាគខាងត្បូងប្រទេសយេម៉ែន។ ក្រុមអាកាប់ កំពុងទាក់ទាញក្រុមជីហាត ឬពួកអ៊ីស្លាមជ្រុលនិយម កាន់តែច្រើន បន្ទាប់ពីក្រុមអ៊ីស្លាម ដូចជា នៅអេហ្ស៊ីប ជាដើម ត្រូវទទួលរងការគាបសង្កត់ពីរដ្ឋាភិបាល។
គេជឿថា ក្រុមអាកាប់ ឬអាល់កៃដា នៅឧបទ្វីបអារ៉ាប់ មានសមាជិកប្រមាណពី៤០០ទៅ ៦០០នាក់ ដែលពួកគេទាំងនោះភាគច្រើន ជាពួកជីហាត មកពីប៉ាគីស្ថាន។ ក្រុមអាកាប់ រឹតតែរឹងមាំ ដោយសារមានការចូលរួមប្រមូលផ្តុំពីក្រុមភេរវករត្រូវអាជ្ញាធរអារ៉ាប៊ី សាអ៊ូឌីត ប្រមាញ់ ដេញចេញពីប្រទេស ក្រុមភេរវករ និងដែលត្រូវអាមេរិកដោះលែងចេញពីគុក Guatamamo។
ក្រុមអាកាប់នេះ ត្រូវដឹកនាំដោយ ណាសែ អាល់ វុហៃស៊ី ដែលធ្លាប់ធ្វើជាលេខាផ្ទាល់ខ្លួនពិសេសរបស់អូសាម៉ា បិនឡាដិន។ វុហៃស៊ី ធ្លាប់រត់គេចចេញពី អាហ្វហ្កានីស្ថាន ទៅអ៊ីរ៉ង់ មុនពេលត្រូវរដ្ឋាភិបាលអ៊ីរ៉ង់ធ្វើបត្យាប័នបញ្ជូនទៅប្រទេសយេម៉ែនវិញ នៅឆ្នាំ ២០០៣។ នៅឆ្នាំ ២០០៦ វុហៃស៊ី បានលួចរត់ចេញពីគុក ក្នុងអំឡុងព្រឹត្តិការណ៍ហែកគុករបស់អ្នកទោសរាប់រយនាក់ ក្នុងទីក្រុងសាណា ប្រទេសយេម៉ែន។ បន្ទាប់មក វុហៃស៊ីនេះបានប្រើកេរ្តិ៍ឈ្មោះ អាល់កៃដា ដើម្បីបង្កើតក្រុមឧទ្ទាម នៅភាគខាងត្បូងប្រទេសយេម៉ែន ដែលមានឈ្មោះថា អាកាប់នេះ គឺក្រុមអាល់កៃដានៅឧបទ្វីបអារ៉ាប់។
ដោយសារតែបទពិសោធន៍ហែកគុករបស់មេដឹកនាំអាល់កៃដា កាលពីថ្ងៃអាទិត្យទី ៤សីហា ប៉ូលិសInterpol ទាញសញ្ញាប្រកាសអាសន្ន បន្ទាប់ពីមានការលួចរត់គេចពីគុករបស់អ្នកទោសរាប់រយនាក់នៅក្នុងប្រទេសចំនួន ៩។ ប៉ូលិសInterpol សង្ស័យថា អាចពួកអាល់កៃដា ជាអ្នកចូលរួមជួយរំដោះអ្នកទោស រាប់រយនាក់ ដែលជា ឧក្រិដ្ឋជន និងភេរវករ ដែលគេចាប់បាន ដូចជានៅក្នុងប្រទេសប៉ាគីស្ថាន។ ហើយគេកំពុងតាមដានមើលថា តើការជួយរំដោះអ្នកទោស លើកនេះ មានពាក់ព័ន្ធនឹងគម្រោងធ្វើភេរវកម្ម ដែលមេដឹកនាំអាល់កៃដា បានលើកឡើង នៅក្នុងសន្ទនា ដែលអាមេរិកចាប់សំឡេងបានទាំងនោះដែរឬទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ