រុស្ស៊ី-អាមេរិក ទម្លាក់ទំនួលខុសត្រូវដាក់គ្នាទៅវិញទៅមករឿងបទឈប់បាញ់នៅស៊ីរី
ចុះផ្សាយនៅថ្ងៃ៖
ស្តាប់ - ០៥:៣៥
មានការផ្ទុះអាវុធ ទម្លាក់គ្រាប់បែក និងប្រយុទ្ធគ្នាយ៉ាងសន្ធោសន្ធៅ នៅថ្ងៃសុក្រទី ១៦កញ្ញ បណ្តាលឱ្យជនស៊ីវិលបីនាក់រងរបួស ក្នុងនោះពីរនាក់ជាកុមារ។ នេះគឺជាជនគ្រោះ និងការរំលោភបទឈប់បាញ់ដ៏ធ្ងន់ធ្ងរដំបូងគេ គិតចាប់តាំងពីបទឈប់បាញ់នៅស៊ីរី បានចូលជាធរមាន តាំងពីថ្ងៃចន្ទដើមសប្តាហ៍មក។ រុស្ស៊ី និងអាមេរិក បានទម្លាក់កំហុសដាក់គ្នាទៅវិញទៅមក ហើយនៅទីបំផុតជំនួបប្រជុំបន្ទាន់របស់ក្រុមប្រឹក្សាសន្តិសុខអង្គការសហប្រជាជាតិ ក៏ត្រូវលុបចោល។
បន្ទាប់ពីបានស្គាល់ភាពស្ងប់ស្ងាត់បីថ្ងៃ ក្មេងអាចរត់លេងដោយគ្មានសំឡេងគ្រាប់កំដរ ការទម្លាក់គ្រាប់បែក ពីលើអាកាស និងការប្រយុទ្ធគ្នាយ៉ាងសាហាវ ដោយបាញ់រ៉ុកកែតផង បានផ្ទុះឡើងកាលពីថ្ងៃសុក្រ និងបន្តប្រយុទ្ធគ្នារវាងកងកម្លាំងរដ្ឋាភិបាលក្រុងដាម៉ា ជាមួយពួកឧទ្ទាមរហូតដល់យប់ជ្រៅ។
ជាលទ្ធផលមានផលប៉ះពាលខ្លាំងដល់ផ្នែកការទូត ! ជំនួបបន្ទាន់របស់ក្រុមប្រឹក្សាសន្តិសុខអង្គការសហប្រជាជាតិ ដែលមានសមាជិកអចិន្ត្រៃយ៍និងមិនអចិន្ត្រៃយ៍ទាំង១៥ ចូលរួមប្រជុំដោយបិទទ្វារ ស្រាប់តែត្រូវបានប្រកាសលុបចោលទៅវិញ នៅនាទីចុងក្រោយតែម្តង តាមសំណើរបស់រុស្ស៊ីនិងអាមេរិក។
ក្រុមប្រឹក្សាសន្តិសុខអង្គការសហប្រជាជាតិ ត្រូវជួបប្រជុំគ្នាជាបន្ទាន់នៅល្ងាចថ្ងៃសុក្រម្សិលមិញ ដើម្បីផ្តល់ការគាំទ្រដល់បទឈប់បាញ់នៅស៊ីរី ដែលជាលទ្ធផលនៃកិច្ចព្រមព្រៀងអាមេរិកនិងរុស្ស៊ី និងដែលបានចូលជាធរមាន តាំងពីថ្ងៃចន្ទមក។ គ្រប់គ្នាសង្ឃឹមថានឹងមានការពន្យារពេលបទឈប់បាញ់ជាបន្តទៀត នាឱកាសជំនួបប្រជុំយប់មិញនេះ។
រុស្ស៊ីចោទអាមេរិកគ្មានតម្លាភាព
បើគ្មានជំនួបប្រជុំ សេចក្តីសម្រេចចិត្តរបស់សហប្រជាជាតិក៏ ទំនងជាគ្មានដែរ ! ព្រោះសហរដ្ឋអាមេរិកថាមិនព្រមចែករំលែកព័ត៌មានជុំវិញ ខ្លឹមសារលម្អិតនៃកិច្ចព្រមព្រៀងអាមេរិករុស្ស៊ីលើវិបត្តិស៊ីរី ជាមួយក្រុមប្រឹក្សាសន្តិសុខ។
សម្រាប់ឯកអគ្គរដ្ឋទូតរុស្ស៊ីប្រចាំអង្គការសហប្រជាជាតិ តើក្រុមប្រឹក្សាអាចផ្តល់ការគាំទ្រយ៉ាងដូចម្តេចទៅកើត បើអង្គការមិនបានទាំងអានព័ត៌មានសំខាន់ៗ សរសេរក្នុងកិច្ចព្រមព្រៀងនោះផង។ កិច្ចព្រមព្រៀងអាមេរិក-រុស្ស៊ី ដែលជាចំណែកមួយនៃបទឈប់បាញ់ចូលជាធរមានកាលពីថ្ងៃចន្ទ ដើម្បីបើកផ្លូវផ្តល់ជំនួយមនុស្សធម៌ថ្នាំពេទ្យនិងស្បៀងអាហារដល់ជនស៊ីវិល។ ហើយបន្ទាប់មកបើបទឈប់បាញ់ត្រូវបានប្រកាន់ខ្ជាប់យូរ នោះម៉ូស្គូនិងវ៉ាស៊ីនតោននឹងធ្វើកិច្ចសហប្រតិបត្តិការយោធារួមគ្នា សហការកម្ចាត់ពួកជីហាត។ មិនតែប៉ុណ្ណោះ ភាគីអាមេរិកថែមទាំងចង់បញ្ចេញបញ្ចូល កែប្រែកិច្ចព្រមព្រៀង ដោយសាកល្បង បកស្រាយ និងព្រលាត់ចុះព្រលាត់ឡើងកិច្ចព្រមព្រៀង។ នេះបើពាក្យចោទប្រកាន់របស់ប្រមុខការទូតរុស្ស៊ី។
ប្រធានាធិបតីរុស្ស៊ី លោកពូទីន បានទាមទារឱ្យអាមេរិកបង្កើនតម្លាភាព។ ជាដំបូងឡើយ រុស្ស៊ីបានចោទប្រកាន់សហរដ្ឋអាមេរិក ថាមិនបានបញ្ចេញសកម្មភាពគ្រប់គ្រាន់ក្នុងការដាក់សម្ពាធលើពួកឧទ្ទាមប្រឆាំង ឱ្យដកខ្លួនចេញពីពួករណសិរ្សជីហាត ហ្វាតេះ អែលឆាម។
ជំនួយមនុស្សធម៌យឺតយ៉ាវជ្រុល
សហរដ្ឋអាមេរិក មិនបាននៅស្ងៀមទេ និងបានទន្ទេញពាក្យដដែល ជាថ្មីទៀត កាលពីថ្ងៃសុក្រថា សហរដ្ឋអាមេរិកមិនអាចធ្វើសហប្រតិបត្តិការយោធាជាមួយរុស្ស៊ី នៅស៊ីរី បានឡើយ ល្គិកណារបបលោកបាស្ហារ អាល់អាសាដ មិនបើកផ្លូវ ឬដកថយចេញពីតំបន់ឡោមព័ទ្ធ។ បើតាមក្រសួងការបរទេសអាមេរិក ភាគីម្ខាងទៀត គោរពមិនតាមអ្វីដែលមានចែងក្នុងកិច្ចព្រមព្រៀង នោះគឺ “ភាពយឺតយាវម្តងហើយម្តងទៀត នៃការបញ្ជូនជំនួយមនុស្សធម៌ ទៅឱ្យប្រជាជនស៊ីវិល”។
អ្នកនាំពាក្យសេតវិមាន បានរៀបរាប់ស្ថានការណ៍ថា នៅពេលម៉ោងនិយាយគ្នានេះ កាមីញ៉ុងដែលមានផ្ទុកជំនួយស្បៀងអាហារ និងថ្នាំសង្កូវចាំបាច់សម្រាប់ជីវិត កំពុងជាប់កុននៅតំបន់ទ្រនាប់ ជាប់ព្រំដែនរវាងតួកគីនិងស៊ីរី។ ការជាប់គាំងនេះ គឺជាទំនួលខុសត្រូវរបស់រដ្ឋាភិបាលក្រុងដាម៉ាស ដែលពុំព្រមដកខ្លួនចេញពីការឡោមព័ទ្ធ។ ហេតុដូច្នេះហើយបានជាសម្រាប់ភ្នែកអាមេរិក គឺគ្មានការធានាសន្តិសុខនិងសុវត្ថិភាពដល់ក្រុមដឹកជំនួយមនុស្សធម៌។
ភ្នាក់ងារសារព័ត៌មានបារាំងបានអះអាងថា គ្មានឃើញចលនាដឹកជញ្ជូនតាមផ្លូវទេ នៅថ្ងៃសុក្រម្សិលមិញ។ ហើយបើតាមអង្គការអ្នកសង្កេតការណ៍សិទ្ធិមនុស្សស៊ីរី ថ្វីបើកងទ័ពរុស្ស៊ីបានដកចេញពីមែន តែកងទ័ពរដ្ឋាភិបាលក្រុងដាម៉ាស នៅតែដាក់ពង្រាយពេញ។
ពេលនេះស្ថានភាពស៊ីរីកាន់តែដុនដាប និងស្មុគស្មាញមួយជាន់ទៀត បន្ទាប់ពីក្រសួងការពារជាតិអាមេរិកបានប្រកាសថាបានពង្រាយទ័ពពិសេស ជាជំនួយកងទ័ពតួកគី និងកងយុទ្ធជនឧទ្ទាមអ៊ីស្លាមមិនតឹង ដើម្បីសម្រុកកម្ចាត់ពួកអង្គការរដ្ឋអ៊ីស្លាមនៅភាគខាងជើងប្រទេសស៊ីរី។ ជនម្នាក់ដែលមានថានៈស្មើនឹងរដ្ឋមន្ត្រីក្រសួងព័ត៌មានរបស់អង្គការរដ្ឋអ៊ីស្លាម បានស្លាប់ ក្នុងប្រតិបត្តិការផ្លូវអាកាសរបស់សម្ព័ន្ធមិត្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ