ក្រុមប្រឹក្សាសន្តិសុខកោះប្រជុំបន្ទាន់ដើម្បីផ្តល់ការគាំទ្រលើកិច្ចព្រមព្រៀងឈប់បាញ់នៅស៊ីរី
ក្រុមប្រឹក្សាសន្តិសុខអង្គការសហប្រជាជាតិបើកកិច្ចប្រជុំបន្ទាន់មួយនៅថ្ងៃសុក្រ ទី១៦ កញ្ញាដើម្បីសិក្សាស្វែងរកការគាំទ្រពីប្រទេសសមាជិកចំពោះកិច្ចព្រមព្រៀងឈប់បាញ់នៅស៊ីរីដែលអនុម័តរួមគ្នាដោយអាមេរិក និងរុស្ស៊ី។ តាមការសង្កេតជារួម បទឈប់បាញ់ត្រូវបានភាគីពាកព័ន្ធគោរពតិច ឬច្រើន។ តែក្តីបារម្ភរបស់សហគមន៍អន្តរជាតិនៅពេលនេះ គឺការរារាំងរបស់រដ្ឋាភិបាលស៊ីរីក្នុងការដឹកជញ្ជូនជំនួយមនុស្សធម៌ទៅឲ្យប្រជាជនស៊ីរីដែលកំពុងជាប់កុននៅក្នុងទីក្រុងអាឡិប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
កិច្ចប្រជុំបន្ទាន់របស់ក្រុមប្រឹក្សាសន្តិសុខអង្គការសហប្រជាជាតិ គឺជាកិច្ចប្រជុំបិទទ្វារដោយមិនអនុញ្ញាតឲ្យក្រុមអ្នកកាសែតចូលយកការណ៍ទេ។ សមាជិកក្រុមប្រឹក្សាសន្តិសុខបានចូលរួមជជែក និងពិគ្រោះយោបល់គ្នាលើកិច្ចព្រមព្រៀងឈប់បាញ់នៅស៊ីរីដែលអាមេរិក និងរុស្ស៊ីបានអនុម័តកាលពីថ្ងៃទី៩ កញ្ញាកន្លងទៅ។ កិច្ចព្រមព្រៀងដែលបានចូលជាធរមានតាំងពីថ្ងៃចន្ទដើមសប្តាហ៍នេះត្រូវបានភាគីពាក់ព័ន្ធ ពិសេសរដ្ឋាភិបាលស៊ីរី និងក្រុមបះបោរគោរពតាមតិច ឬច្រើន។ តែកម្មវត្ថុនៃកិច្ចប្រជុំបន្ទាន់របស់ក្រុមប្រឹក្សាសន្តិសុខពេលនេះ គឺផ្តល់ការគាំទ្រ និងជួយផ្តល់សន្ទុះបន្ថែមលើកិច្ចព្រមព្រៀងដើម្បីឲ្យមានការគោរពពេញលេញ។
ប្រទេសរស្ស៊ីបានដាក់គំនាបលើអង្គការសហប្រជាជាតិដើម្បីឲ្យអង្គការពិភពលោកមួយនេះផ្តល់ការគាំទ្រលើកិច្ចព្រមព្រៀង តែមានប្រទេសសមាជិកខ្លះដូចយ៉ាងបារាំងចង់ដឹងពីខ្លឹមសារលំអិតរបស់កិច្ចព្រមព្រៀងអាមេរិក រុស្ស៊ីជាមុនសិន។ ផ្អែកតាមកិច្ចព្រមព្រៀង បទឈប់បាញ់រយៈពេល ១សប្តាហ៍នៅស៊ីរីនឹងអនុញ្ញាតឲ្យអាមេរិក និងរុស្ស៊ីរៀបចំបង្កើតមជ្ឈមណ្ឌលទំនាក់ទំនងកងទ័ពរវាងប្រទេសទាំងពីរនៅក្នុងយុទ្ធនាការវាយប្រហារពួកជីហាតអង្គការរដ្ឋអ៊ីស្លាមក្នុងទឹកដីស៊ីរី។ ជារួម ការផ្ទុះអាវុធដាក់គ្នារវាងទ័ពរដ្ឋាភិបាលស៊ីរី និងក្រុមបះបោរហាក់ដូចជាស្ងប់ស្ងាត់ តែរដ្ឋាភិបាលស៊ីរីនៅបន្តរារាំងមិនឲ្យមានការដឹកជញ្ជូនជំនួយមនុស្សធម៌ទៅឲ្យប្រជាជនស៊ីរីដែលកំពុងជាប់កុននៅក្នុងទីក្រុងអាឡិប។
កិច្ចប្រជុំបន្ទាន់របស់ក្រុមប្រឹក្សាសន្តិសុខអង្គការសហប្រជាជាតិពេលនេះបានធ្វើឡើង ទន្ទឹមគ្នានឹងកិច្ចប្រជុំក្រុមសន្តិសុខជាតិអាមេរិកកោះប្រជុំដោយលោកអូបាម៉ា និងដែលមានគោលដៅពិនិត្យមើលលើកិច្ចព្រមព្រៀងឈប់បាញ់នៅស៊ីរីដូចគ្នា។ ដោយឡែកនៅរុស្ស៊ី អ្នកនាំពាក្យវិមានក្រិមឡាំងបានបញ្ជាក់នៅថ្ងៃសុក្រ ទី១៦ កញ្ញាថា មូស្គូបានត្រៀមខ្លួននឹងដាក់គំនាបបន្ថែមលើរបបស៊ីរី និងកងទ័ពដើម្បីឲ្យមានការអនុវត្តន៍លើកិច្ចព្រមព្រៀងឈប់បាញ់ឲ្យបាន ១០០%។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ