ពលរដ្ឋអាមេរិកចំនួន ១៨ លាននាក់បានបោះឆ្នោតមុនថ្ងៃកំណត់បោះឆ្នោតផ្លូវការ
ចុះផ្សាយនៅថ្ងៃ៖
ស្តាប់ - ០៤:០១
ថ្ងៃអង្គារ ទី៨ វិច្ឆិការសប្តាហ៍ក្រោយនេះ គឺជាថ្ងៃបោះឆ្នោតប្រធានាធិបតីអាមេរិកផ្លូវការ។ នេះជាព្រឹត្តិការណ៏ដ៏សំខាន់មួយសំរាប់សហរដ្ឋអាមេរិក។ នាថ្ងៃនោះ ប្រជាពលរដ្ឋអាមេរិកគ្រប់អាយុបោះឆ្នោតនឹងជ្រើសរើសប្រធានាធិបតីថ្មីជំនួសលោក បារ៉ាក់ អូបាម៉ា។ ប៉ុន្តែ នៅតាមរដ្ឋមួយចំនួន ប្រជាពលរដ្ឋមានសិទ្ធិអាចទៅបោះឆ្នោតបានមុនកំណត់ថ្ងៃបោះឆ្នោតផ្លូវការ។ ហើយនិតិវិធីបោះឆ្នោតពិសេសបែបនេះមានលក្ខណៈខុសគ្នានៅតាមរដ្ឋនិមួយៗដែលបានអនុម័តការបោះឆ្នោតមុនថ្ងៃកំណត់នេះ។ រដ្ឋខ្លះតម្រូវអោយពលរដ្ឋបង្ហាញខ្លួននៅការិយាល័យបោះឆ្នោត។ រដ្ឋខ្លះទៀតផ្តល់ជម្រើសអោយពលរដ្ឋអាចផ្ញើសន្លឹកឆ្នោតតាមប្រេសនីយ៍តែម្តង។
ប្រជាពលរដ្ឋអាមេរិកចំនួនជាង ១៨ លាននាក់ហើយបានទៅបោះឆ្នោតមុនថ្ងៃកំណត់។ ក្នុងចំណោមរដ្ឋចំនួន ៥០ ទូទាំងសហរដ្ឋអាមេរិក សព្វថ្ងៃនេះ មានរដ្ឋចំនួន ៣៧ ដែលបានអនុញ្ញាតអោយពលរដ្ឋរបស់ខ្លួនអាចបោះឆ្នោតបានតាមបែបនេះ។ ប៉ុន្តែ រយៈពេលបោះឆ្នោត និងបែបបទនៃការបោះឆ្នោតមុនថ្ងៃកំណត់ពីរដ្ឋមួយទៅរដ្ឋមួយ គឺមិនដូចគ្នាឡើយ។
ភាពខុសគ្នានេះគឺដោយសារតែប្រព័ន្ធបោះឆ្នោតនិងប្រព័ន្ធច្បាប់ខុសគ្នានៅតាមរដ្ឋនីមួយៗ។ បើទោះបីជាយ៉ាងណាក៏ដោយ ការអនុញ្ញាតិអោយបោះឆ្នោតមុនថ្ងៃកំណត់នេះមានគោលដៅជំរុញពលរដ្ឋអាមេរិកអោយទៅបោះឆ្នោតអោយបានច្រើនកុះករ។
ម៉្យាងទៀត ការបោះឆ្នោតបែបនេះក៏អាចបញ្ចៀសមិនអោយមនុស្សកកស្ទះ ឬឈររង់ចាំយូរនៅតាមការិយាល័យបោះឆ្នោតនាថ្ងៃបោះឆ្នោតផ្លូវការ។ យោងតាមការគណនាបានអោយដឹងថា ជាមធ្យម ការបោះឆ្នោតនេះចាប់ផ្តើមឡើង ២០ ថ្ងៃមុនកាលបរិច្ឆេទផ្លូវការ។ ប៉ុន្តែ ក៏មានរដ្ឋមួយចំនួនតូច ដែលផ្តល់ពេលវេលារហូតទៅដល់ ៤៥ ថ្ងៃ ដើម្បីអោយពលរដ្ឋខ្លួនអាចបោះឆ្នោតមុនកំណត់ថ្ងៃបោះឆ្នោតប្រធានាធិបតីផ្លូវការ។ មានតែរដ្ឋ Oklahoma មួយទេ ដែលទុកពេលតែបីថ្ងៃប៉ុណ្ណោះ ពោលគឺចន្លោះពីថ្ងៃទី ៣ ដល់ ៥ វិច្ឆិកា។
ក្នុងចំនួនរដ្ឋទាំង ៣៧ មានរដ្ឋចំនួន ៣៤ អនុញ្ញាតអោយពលរដ្ឋបង្ហាញខ្លួននៅការិយាល័យបោះឆ្នោត។ ហើយមានតែរដ្ឋចំនួន ២៧ ប៉ុណ្ណោះ ដែលអនុញ្ញាតអោយពលរដ្ឋផ្ញើសន្លឹកឆ្នោតតាមប្រៃសណីយ៍។ មានរដ្ឋតិចតួចប៉ុណ្ណោះ ដែលផ្តល់ជម្រើសទាំងពីរជូនពលរដ្ឋរបស់ខ្លួន។ ហើយក្នុងចំណោមរដ្ឋទាំង ៣៧ មានរដ្ឋចំនួន ២០ ដែលតម្រូវអោយពលរដ្ឋខ្លួនបញ្ជាក់ហេតុផលអោយបានគ្រប់គ្រាន់ ដើម្បីអាចបោះឆ្នោតបានមុនថ្ងៃបោះឆ្នោតផ្លូវការ។ ឧទាហរណ៍អ្នកមានភារកិច្ចជាប់រវល់ខានមិនបាននាថ្ងៃបោះឆ្នោត។ ក្នុងនោះមានដូចជាបុគ្គលិកបម្រើការតាមការិយាល័យបោះឆ្នោត បុគ្គលិកក្រុមការងារឃោសនារបស់គណបក្ស ឬអ្នកជំងឺនៅតាមមន្ទីរពេទ្យជាដើម។
រាល់ការបោះឆ្នោតម្តងៗ គេសង្កេតឃើញចំនួនពលរដ្ឋអាមេរិកទៅបោះឆ្នោតមុនថ្ងៃកំណត់នេះបានកើនឡើងគួរអោយកត់សំគាល់។ ការបោះឆ្នោតមុនថ្ងៃបោះឆ្នោតផ្លូវការនេះត្រូវបានអនុវត្តជាលើកតំបូងកាលពីឆ្នាំ១៩៩២។ ហើយកាលពីឆ្នាំ២០១២ បើយោងតាមការិយាល័យស្ថិតិអាមេរិកបានអោយដឹងថា សម្លេងឆ្នោតចំនួន ៤៦ លានសន្លឹកត្រូវបានបោះមុនថ្ងៃបរិច្ឆេទ។ ចំនួននេះ គឺស្មើនឹង ៣១% នៃសម្លេងឆ្នោតសរុប។ សំរាប់ការបោះឆ្នោតឆ្នាំ២០១៦ នេះ គេបានប៉ាន់ប្រមាណថា ចំនួនសន្លឹកឆ្នោតបោះមុនថ្ងៃកំណត់នេះនឹងកើនឡើងខ្ពស់ជាងការបោះឆ្នោតឆ្នាំ២០១២។
ការបោះឆ្នោតមុនថ្ងៃកំណត់នេះមានឥទ្ធិពលខ្លាំងណាស់នៅតាមរដ្ឋយុទ្ធសាស្រ្តចំនួន ១២។ តួយ៉ាងមានដូចជារដ្ឋ Carolina ខាងជើង, រដ្ឋ Florida, រដ្ឋ Ohio និងរដ្ឋ Nevada ជាដើម។ រដ្ឋទាំងនោះប្រៀបដូចជាសេចក្តីសង្ឃឹមស្លាប់រស់សំរាប់បេក្ខជនប្រធានាធិបតី។ សព្វថ្ងៃនេះ ទាំងលោកស្រី Hillary Clinton ទាំងលោក Donald Trump សុទ្ធសឹងតែចាប់អារម្មណ៍លើរដ្ឋយុទ្ធសាស្រ្តទាំង ១២ នោះ។ ព្រោះកាលពីឆ្នាំ២០១២ ពាក់កណ្តាលនៃពលរដ្ឋនៅតាមបណ្តារដ្ឋទាំងនោះបានបោះឆ្នោតមុនថ្ងៃបោះឆ្នោតផ្លូវការ។ ដូចនេះ បេក្ខជនម្នាក់ៗខិតខំឃោសនានៅតាមរដ្ឋទាំងនោះ ដើម្បីស្វែងរកសម្លេងគាំទ្រអោយបានច្រើន។ នៅសហរដ្ឋអាមេរិក គេប្រើពាក្យថា «swing states» គឺចង់សំដៅទៅលើរដ្ឋទាំងនោះ។ និយាយអោយខ្លី គឺសុទ្ធសឹងតែជារដ្ឋដែលគេពិបាកទស្សន៍ទាយលទ្ធផល។ ហើយជារឿយៗ លទ្ធផលតែងប្រទាញប្រទង់គ្នារវាងគណបក្សធំៗទាំងពីរ។ ឧទាហរណ៍ឆ្នាំនេះ គណបក្សសាធារណរដ្ឋឈ្នះ។ ហើយឆ្នាំបោះឆ្នោតលើកក្រោយបែរជាគណបក្សប្រជាធិបតេយ្យឈ្នះវិញ។ និយាយរួម គឺលទ្ធផលអាចក្រឡាប់ចាក់ពិបាកស្មានដឹងមុន។
ហើយរយៈពេលប៉ុន្មានថ្ងៃចុងក្រោយនេះ ទាំងលោកស្រី Hillary Clinton ទាំងលោក Donald Trump បានខិតខំបង្ហាញវត្តមាននៅរដ្ឋ Flordia។ នេះក៏ព្រោះតែការបោះឆ្នោតមុនថ្ងៃកំណត់ទើបតែបានចាប់ផ្តើមនៅរដ្ឋមួយនេះ។ គិតមកដល់ពេលនេះ បើយោងតាមលទ្ធផលនៃការស្ទង់មតិជាច្រើនបានអោយដឹងថា លោកស្រី Hillary Clinton កំពុងតែដឹកមុខលោក Donald Trump គូប្រជែងរបស់ខ្លួន។ កាលពីជាង ២ សប្តាហ៍មុន លោកស្រី Clinton បានដឹកមុខរហូតទៅដល់ ១២ ពិន្ទុដែលធ្វើអោយគម្លាតកាន់ធំរវាងបេក្ខជនទាំងពីរ។ ប៉ុន្តែ ដំណឹងដ៏ភ្ញាក់ផ្អើលកាលពីថ្ងៃសុក្រសប្តាហ៍មុនរបស់ FBI ជុំវិញការប្រកាសបើកការស៊ើបអង្កេតឡើងវិញលើសំណុំរឿងអ៊ីម៊ែលឯកជនរបស់លោកស្រី Hillary Clinton បានធ្វើអោយស្ថានភាពប្រែប្រួល។ ហើយការប្រែប្រួលនេះអាចជះឥទ្ធិពលដល់មតិអ្នកបោះឆ្នោតអាមេរិក។
យោងតាមការស្ទង់មតិរួមគ្នារបស់ស្ថានីយ៍ទូរទស្សន៍ ABC និង សារព័ត៌មាន Washington Post បានអោយដឹងថា បេក្ខជនទាំងពីរកំពុងតែមានសម្លេងប្រកៀកប្រកើយគ្នាតែ ២ ពិន្ទុប៉ុណ្ណោះ។ លោកស្រី Hillary Clinton ទទួលការគាំទ្រ ៤៧% ខណៈលោក Donald Trump ទទួលបាន ៤៥%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ