លោកស្រី គ្លីនតុន ជ្រើសលោក ទីម គែន TIM KAINE ជាបេក្ខជនអនុប្រធានាធិបតី
គឺជាជម្រើសដ៏មានហេតុផល ដែលបញ្ជាក់កាន់តែច្បាស់អំពីភាពហ្មត់ចត់របស់ លោកស្រី ហ៊ីឡារី គ្លីនតុន ប្រឈមនឹងលោក ដូណាល់ ត្រាំ។ នៅល្ងាចថ្ងៃសុក្រម្សិលមិញ លោកស្រី គ្លីនតុន ប្រកាសជ្រើសយកលោក ទីម គែន ជាបេក្ខជនអនុប្រធាន សម្រាប់ប្រកួតប្រជែងក្នុងសម័យបោះឆ្នោតប្រធានាធិបតី នៅថ្ងៃទី ៨ វិច្ឆិកា ២០១៦ខាងមុខ។ តើលោក ទីម គែន ជានរណា ?
ចុះផ្សាយនៅថ្ងៃ៖
ស្តាប់ - ០១:៣៩
លោកទីម គែន មិនដែលចាញ់ឆ្នោតសោះ ! នេះជាសេចក្តីពន្យល់របស់លោកស្រីគ្លីនតុន ដូច្នេះ លោកនឹងក្លាយជាដៃគូរួមឆ្នោតយ៉ាងល្អ ! មិនសូវលេចមុខជាសាធារណៈមែន តែលោក ទីម គែន មានបុគ្គលិកលក្ខណៈដូចអ្វីដែលលោកស្រីគ្លីនតុនចង់បាន និងមានសមត្ថភាពគ្រប់គ្រងប្រទេសភ្លាមៗ។
អាយុ ៥៨ឆ្នាំ ជាអតីតអភិបាលរដ្ឋ Virginia លោកទីម គែន ជាមនុស្សសាច់ការ និងធ្វើការមិនខ្លាចហត់។ មាននិន្នាការកណ្តាលនិយម ប្រឆាំងជាលក្ខណៈបុគ្គលនឹងការរម្លូតកូន តែគោរពសេចក្តីសម្រេចចិត្តរបស់ស្ត្រី។ ជាអ្នកនយោបាយដែលប្រឆាំងនឹងទោសប្រហារជីវិត ប៉ុន្តែមិនបានរំលាយច្បាប់នេះទេនៅពេលបានក្លាយជាអភិបាលរដ្ឋ។ លោក ទីម គែន មិនដែលប្រឆាំងនឹងកិច្ចព្រមព្រៀងផ្តោះប្តូរពាណិជ្ជកម្មសេរីឡើយ។ លោកគិតថាជាកិត្តិយសបំផុត ចំពោះជម្រើសរបស់លោកស្រីគ្លីនតុន។
ខាងលោកសិនដឺ អាចនឹងខកចិត្ត។ អ្នកប្រជាធិបតេយ្យខ្លះមើលឃើញលោក ទីម គែន ថាគ្មានទម្ងន់សម្រាប់ប្រឈមនឹងលោកដូណាល់ ត្រាំឡើយ។ ប៉ុន្តែសារព័ត៌មានអាមេរិកយល់ថា លោកស្រីគ្លីនតុន បានជ្រើសរើសផ្លូវដែលគ្មានហានិភ័យ។ លោក ទីម គែន ពុំដែលមានជាប់រឿងអាស្រូវ និងមានប្រវត្តិនយោបាយគ្មានកំហុស។
ខាងក្រុមសាធារណរដ្ឋរបស់លោកដូណាល់ ត្រាំ បានសើចចំអកភ្លាមគ្មានបង្អង់ជម្រើសរបស់លោកស្រីគ្លីនតុន ដោយចាត់ទុកថាជាដៃគូខ្សោយ មិនអាចប្តូរផ្លាស់ការដឹកនាំប្រទេសបានឡើយ ព្រោះម្នាក់ក្រលេខក្រឡុច ម្នាក់ពុករលួយ។ សូមបញ្ជាក់ថា ចំពោះ លោក ដូណាល់ ត្រាំ បេក្ខជនអនុប្រធានាធិបតីដែលត្រូវមកឈរឈ្មោះរួមគ្នា គឺលោក Mike Pence ជាអ្នកអភិរក្សខ្លាំងបំផុត និងការពារតម្លៃសង្គមបែបកាតូលិកយ៉ាងខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ