អាមេរិក៖លោកអូបាម៉ា និងលោកដូណាល់ត្រាំព្យាយាមបង្កើតបរិយាកាសល្អសម្រាប់ពលរដ្ឋអាមេរិក និងពិភពលោក
ចុះផ្សាយនៅថ្ងៃ៖
ស្តាប់ - ០៧:៤០
នៅសហរដ្ឋអាមេរិក ជំនួបរវាងលោកប្រធានាធិបតីផុតអាណត្តិបារ៉ាក់ អូបាម៉ា និងលោកប្រធានាធិបតីជាប់ឆ្នោតថ្មីដូណាល់ ត្រាំនៅសេតវិមាននាថ្ងៃព្រហស្បតិ៍ ទី១០ វិច្ឆិកាបានធ្វើឲ្យពិភពលោកចាប់អារម្មណ៍យ៉ាងខ្លាំង។ ក្រៅពីជំនួបរវាងលោកអូបាម៉ា និងលោកត្រាំ ក៏មានជំនួបក្នុងពេលជាមួយគ្នារវាងលោកអនុប្រធានាធិបតីផុតអាណត្តិរបស់លោកអូបាម៉ា និងលោកអនុប្រធានាធិបតីថ្មីរបស់លោកត្រាំ។ បន្ទាប់មក ក៏មានជំនួបរវាងភរិយាលោកអូបាម៉ា និងភរិយាលោកត្រាំផងដែរ។ ទន្ទឹមគ្នានេះ កំហឹងរបស់ពលរដ្ឋអាមេរិកប្រឆាំងលោកត្រាំក៏កំពុងបន្តមាន និងដែលលោកត្រាំបានចាត់ទុកជាការអុជអាលពីមធ្យោបាយឃោសនាមហាជនក្នុងស្រុក។
លោកបារ៉ាក់ អូបាម៉ាជាអ្នកផ្តួចផ្តើមគំនិតឲ្យមានជំនួបមួយទល់មួយរវាងលោក និងលោកប្រធានាធិបតីទើបជាប់ឆ្នោតថ្មីថ្មោងដូណាល់ ត្រាំនៅសេតវិមាននាថ្ងៃព្រហស្បតិ៍ ទី១០ វិច្ឆិកា។ ទង្វើរបៀបនេះអាចថាជាប្រពៃណីទំនៀមទម្លាប់ក៏បាន ឬមួយថាជារឿងចាំបាច់ក៏បានដែរ តែលោកអូបាម៉ាមិនចាំបាច់រៀបចំយ៉ាងទាន់ហន់នៅ ១ថ្ងៃក្រោយការជាប់ឆ្នោតរបស់លោកត្រាំទេ មានន័យថា លោកអូបាម៉ាអាចរៀបចំនៅប៉ុន្មានថ្ងៃខាងមុខក៏បានដែរ ព្រោះគេត្រូវរង់ចាំរហូតដល់ថ្ងៃទី២០ មករាឆ្នាំ ២០១៧ ទើបលោកដូណាល់ ត្រាំចូលកាន់តំណែងជាផ្លូវការ។
ក៏ប៉ុន្តែ ការដែលលោកអូបាម៉ាចង់ធ្វើឲ្យបានឆាប់ៗពេលនេះ ព្រោះលោកចង់បង្ហាញប្រាប់ពិភពលោកពីឯកភាពជាតិ និងចង់រំងាប់ភាពពុះកញ្រ្ជោលនៅក្នុងសង្គមអាមេរិកាំង។ ដូចគ្រប់គ្នាបានដឹងហើយថា ជោគជ័យរបស់លោកដូណាល់ ត្រាំបានធ្វើឲ្យពិភពលោក ក៏ដូចជាពលរដ្ឋអាមេរិកទូទៅភ្ញាក់ផ្អើល និងមានក្តីបារម្ភ។ រហូតមកដល់ថ្ងៃសុក្រ ទី១១ វិច្ឆិកានេះ បាតុកម្មហិង្សាប្រឆាំងលោកដូណាល់ ត្រាំបាន និងកំពុងបន្តមាននៅសឹងតែគ្រប់រដ្ឋអាមេរិកាំង ហើយបាតុករភាគច្រើនជាសកម្មជនគាំទ្រលោកស្រីគ្លីនតុន។
លោកអូបាម៉ា និងលោកដូណាល់ ត្រាំសុទ្ធតែមានមេរៀនជូរចត់រវាងគ្នា។ គេចាំបានមិនភ្លេចរហូតដល់ថ្ងៃឃោសនាចុងក្រោយ លោកអូបាម៉ាបានចុះធ្វើយុទ្ធនាការជួយលោកស្រីគ្លីនតុនដោយបរិហារលោកត្រាំចំៗថា ជាមនុស្សមិនឲ្យគួរទុកចិត្តប្រគល់កូដនុយក្លេអ៊ែរឲ្យ។ ជាការឆ្លើយតបវិញ លោកត្រាំបានដៀលលោកអូបាម៉ាជាប្រធានាធិបតីស្ទើរទឹកដែលមិនសូវស្គាល់ប្រវត្តិសាស្រ្ត។ កាលពីប៉ុន្មានឆ្នាំកន្លងទៅនៅក្នុងពិធីជប់លៀងមួយ លោកត្រាំដែលមានវត្តមានជាមួយលោកអូបាម៉ាហ៊ានទាំងថ្លែងជាសាធារណៈថា លោកអូបាម៉ាមិនបានកើតក្នុងទឹកដីអាមេរិក គ្មានសញ្ជាតិអាមេរិកាំង និងមានរាងមិនសមធ្វើជាប្រធានាធិបតីអាមេរិក។ លោកអូបាម៉ាក៏បានឡើងតបជាសាធារណៈភ្លាមៗនាឱកាសនោះដោយធ្វើឲ្យលោកត្រាំអាម៉ាសមុខយ៉ាងខ្លាំងនៅចំពោះមុខភ្ញៀវ។
រាត្រីទឹកខ្មេះក្លាយជារាត្រីទឹកឃ្មុំ !
លោកអូបាម៉ា និងលោកដូណាល់ ត្រាំគ្មានជម្រើសអ្វីក្រៅពីសម្រុះសម្រួលគ្នាដើម្បីបង្ហាញពិភពលោកអំពីឯកភាពជាតិរបស់អាមេរិក និងក៏ដើម្បីប្រយោជន៍ពលរដ្ឋអាមេរិកាំង។ នៅក្នុងជំនួបមួយទល់មួយដែលបានអូសបន្លាយដល់ទៅ ៩០នាទី និងដែលគ្មានវត្តមានអ្នកកាសែត មានសំណុំរឿងជាតិ និងអន្តរជាតិជាច្រើនដែលឥស្សរជនទាំងពីរបានលើកយកទៅជជែក រួមទាំងការដើរពិនិត្យទីកន្លែងផ្សេងៗនៅក្នុងសេតវិមានរបស់ពីសំណាក់លោកដូណាល់ ត្រាំផងដែរ។
គួរបញ្ជាក់ថា ពិតមែនតែលោកដូណាល់ ត្រាំត្រូវចូលកាន់តំណែងជាផ្លូវការនៅថ្ងៃទី២០ មករាឆ្នាំក្រោយមែន តែចាប់ពីពេលនេះទៅ លោកត្រាំ និងក្រុមការងាររបស់លោកផ្តើមធ្វើការជាមួយលោកអូបាម៉ា និងក្រុមការងារលោកអូបាម៉ាបណ្តើរៗដើម្បីធ្វើយ៉ាងណា ឲ្យការផ្ទេរតំណែង និងការផ្ទេរការងារមានដំណើរការដោយសន្សឹមៗ ដោយរលូន និងមានប្រសិទ្ធិភាព។ ទោះបីជាលោកអូបាម៉ា និងលោកត្រាំមិនចង់មើលមុខគ្នាដោយរឿងគំនុំផ្ទាល់ខ្លួនក៏ដោយ ក៏អ្នកទាំងពីរបានរក្សាទុកគំនុំផ្ទាល់ខ្លួនមួយកន្លែង ហើយព្យាយាមជំនះភាពខុសគ្នាដើម្បីធ្វើការរួមគ្នាក្នុងផលប្រយោជន៍ប្រទេសជាតិ។
នៅចំពោះមុខក្រុមអ្នកកាសែតដែលត្រូវបានអនុញ្ញាតឲ្យចូលថតរូប និងសម្លេងលោកដូណាល់ ត្រាំ និងលោកអូបាម៉ា លោកអូបាម៉ាបានថ្លែងឲ្យដឹងពីកិច្ចសន្ទនាដ៏ប្រសើរជាមួយលោកត្រាំ និងថា អាទិភាពទី១ របស់លោក
ក្នុងរយៈពេល ២ខែខាងមុខ គឺសម្រួលការផ្ទេរតំណែងដើម្បីធានាភាពជោគជ័យរបស់ប្រធានាធិបតីទើបជាប់ឆ្នោត។ លោកត្រាំបានឆ្លើយដោយ
សម្តីគួរឲ្យភ្ញាក់ផ្អើលថា លោកមានក្តីគោរពច្រើនចំពោះលោកអូបាម៉ា និងសប្បាយចិត្តនឹងធ្វើការងារជាមួយលោកអូបាម៉ានៅថ្ងៃខាងមុខ និងទទួលយកមតិយោបល់ពីលោកអូបាម៉ា។
លោកដូណាល់ ត្រាំបានបន្ថែមនៅចុងបញ្ចប់ថា លោកមានកិត្តិយសខ្លាំងណាស់ដែលបានស្ថិតក្បែរលោកអូបាម៉ា និងថា លោកសង្ឃឹមនឹងបានជួបលោកអូបាម៉ាជាច្រើនដងទៀតនាពេលខាងមុខ។
ទ្រឹស្តី និងការអនុវត្តជាក់ស្តែងជាពីរផ្ទុយគ្នា
តិច ឬច្រើន និងទោះបីជាទង្វើសម្របសម្រួលរបស់លោកអូបាម៉ា និងលោកត្រាំជាឆាកល្ខោន ឬមួយជាឆន្ទៈពិតក៏ដោយ ក៏កាយវិការទាំងអស់នេះបានចូលរួមជួយកាត់បន្ថយភាពតានតឹង និងស្ថានការណ៍ស្រពិចស្រពិលច្រើនណាស់។ ជាក់ស្តែង តម្លៃភាគហ៊ុននៅលើទីផ្សារភាគហ៊ុនក្នុងលោកដែលបានធ្លាក់ចុះខ្លាំងនៅក្រោយការជាប់ឆ្នោតភ្លាមរបស់លោកដូណាល់ ត្រាំក៏ផ្តើមឡើងក្រឺតៗវិញនៅថ្ងៃសុក្រ ទី១១ វិច្ឆិកា។ ទន្ទឹមគ្នានេះ គេក៏សង្កេតឃើញមានពាក្យពេចន៍មួយចំនួនដែលលោកត្រាំបានថ្លែងនាពេលឃោសនាបោះឆ្នោត ដូចយ៉ាងពាក់ព័ន្ធនឹងជនអន្តោប្រវេសន៍ដែលបានធ្វើឲ្យគ្រប់គ្នាបារម្ភខ្លាំងក៏ស្រាប់តែត្រូវបានលប់ចេញពីគេហទំព័ររបស់លោកត្រាំទៅវិញ។
បន្តិចម្តងៗ ឥស្សរជនក្នុងគណបក្សសាធារណរដ្ឋរបស់លោកត្រាំដែលធ្លាប់ឈប់គាំទ្រលោកត្រាំដោយសារផ្ទុះរឿងអាស្រូវមួយចំនួនក៏ផ្តើមគាំទ្រលោកត្រាំឡើងវិញ។ ជាការពិត គ្រប់គ្នាបារម្ភខ្លាំងពីគោលនយោបាយរបស់លោកត្រាំទាក់ទងនឹងនយោបាយផ្ទៃក្នុងក៏ដូចជានយោបាយអន្តរជាតិ។ តែគេមិត្រូវភ្លេចនិយាយទេថា គេមិនអាចយកទ្រឹស្តី និងវោហារនៅក្នុងយុទ្ធនាការឃោសនាទៅអនុវត្តន៍ជាក់ស្តែងនៅពេលដែលទទួលបានអំណាចពិតប្រាកដឡើយ។ កិច្ចព្រមព្រៀង និងសន្ធិសញ្ញាជាច្រើនដែលរដ្ឋបាលលោកអូបាម៉ាបានអនុម័តក្នុងស្រុក ឬមួយជាមួយប្រទេសផ្សេងក៏លោកត្រាំមិនអាចសម្រេចកែប្រែ ឬមួយលប់ចោលទាំងស្រុងតាមតែចិត្តចង់នោះដែរ ព្រោះអ្វីៗនឹងត្រូវឆ្លងកាត់នៅក្នុងសភា និងព្រឹទ្ធសភា។
ឃើញថា លោកដូណាល់ ត្រាំដែលជាមាហសេដ្ឋីគ្មានបទពិសោធន៍នយោបាយនឹងត្រូវប្រឈមនឹងការលំបាកជាច្រើនដោយចៀសមិនរួចនាពេលខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ