អាមេរិក៖លោកដូណាល់ ត្រាំចេញមុខការពារក្រឹត្យប្រឆាំងអន្តោប្រវេសន៍ និងប្រឆាំងជនភៀសខ្លួន
ចុះផ្សាយនៅថ្ងៃ៖
ស្តាប់ - ០៧:០៩
នៅសហរដ្ឋអាមេរិក ក្រឹត្យស្តីពីជនអន្តោប្រវេសន៍ និងជនភៀសខ្លួនចុះហត្ថលេខាដោយលោកប្រធានាធិបតីដូណាល់ ត្រាំកាលពីថ្ងៃសុក្រ ទី២៧ មករាបាន និងកំពុងបង្កឲ្យមានរឿងអាស្រូវ និងប្រតិកម្មយ៉ាងព្រោងព្រាតនៅទូទាំងពិភពលោក។ នៅអង់គ្លេស លោកស្រីនាយករដ្ឋមន្រ្តី Theresa May មិនបានឯកភាពនឹងចំណាត់ការលើជនអន្តោប្រវេសន៍ និងជនភៀសខ្លួនរបស់លោកត្រាំទេ។ នៅបារាំង លោកប្រធានាធិបតីហ្រ្វង់ស័រ ហូឡង់បានព្រមានលើត្រាំពីវិធានការអាត្មានិយមដែលអាចបង្កឲ្យមានផលវិបាកសេដ្ឋកិច្ច និងនយោបាយ។ នៅកាណាដា លោកនាយករដ្ឋមន្រ្តី Trudeau បានបើកទ្វារទទួលជនភៀសខ្លួនដោយគ្មានការរើសអើង។
ស្ថានការណ៍ដែលច្របូកច្របល់ និងស្រពិចស្រពិលខ្លាំងជាងគេ គឺក្បួនបាតុកម្មនៅព្រលានយន្តហោះ John F. Kennedy ក្នុងក្រុងញូយ៉កនាយប់ថ្ងៃសៅរ៍ ទី២៨ មករា។ គឺក្បួនបាតុកម្មចូលរួមដោយបាតុករជិត ២ ០០០នាក់តាមការអំពាវនាវរបស់សមាគមន៍ការពារជនអន្តោប្រវេសន៍ និងការពារជនភៀសខ្លួន។ ក្រៅពីវត្តមានពួកបាតុករ ក៏គេសង្កេតឃើញមានកម្លាំងប៉ូលិសជាច្រើនរយនាក់ផ្សេងទៀត។ បាតុកម្មនៅព្រលានយន្តហោះក្រុងញូយ៉ក គឺដើម្បីទាមទារឲ្យមានការដោះលែងអ្នកដំណើរជនអន្តោប្រវេសន៍ជាច្រើននាក់ដែលត្រូវបានគេឃាត់ខ្លួននៅព្រលានយន្តហោះមិនឲ្យចូលក្នុងទឹកដីអាមេរិក ទោះបីជាពួកគេមានទិដ្ឋាការស្របច្បាប់ ឬមួយមានកាន់ក្រដាសស្នាមរស់នៅស្របច្បាប់ក្នុងទឹកដីអាមេរិកដែលគេហៅថា Green card ក៏ដោយ។
មនុស្សដែលត្រូវបានឃាត់ខ្លួននៅព្រលានយន្តហោះ John F. Kennedy ក្រុងញូយ៉កសុទ្ធសឹងជាជនជាតិដែលស្ថិតក្នុងបញ្ជីប្រទេសហាមឃាត់ដោយក្រឹត្យរបស់លោកប្រធានាធិបតីដូណាល់ ត្រាំ គឺស៊ីរី អ៊ីរ៉ាក់ អ៊ីរ៉ង់ លីប៊ី សូម៉ាលី ស៊ូដង់ និងយេម៉ែន។ ក្រៅពីព្រលានយន្តហោះ John F. Kennedy ក្រុងញូយ៉ក ក្បួនបាតុកម្មដូចគ្នានេះក៏ត្រូវបានរៀបចំធ្វើនៅព្រលានយន្តហោះអន្តរជាតិផ្សេងទៀតក្នុងទឹកដីអាមេរិក។ សមាគមន៍ការពារជនអន្តោប្រវេសន៍ និងជនភៀសខ្លួនឲ្យដឹងថា មានអ្នកដំណើរពី ១០០ ទៅ ២០០នាក់ត្រូវបានឃាត់ខ្លួននៅព្រលានយន្តហោះក្នុងទឹកដីអាមេរិក។
ទន្ទឹមគ្នានេះ សមាគមន៍ការពារជនអន្តោប្រវេសន៍ និងការពារជនភៀសខ្លួនក៏បានដាក់ពាក្យបណ្តឹងភ្លាមៗសុំអន្តរាគមន៍ពីចៅក្រមសហព័ន្ធលោកស្រី Ann Donnelly តាមការទាមទាររបស់ជនជាតិអ៊ីរ៉ាក់ចំនួនពីរនាក់ដែលមានទិដ្ឋាការត្រឹមត្រូវ។ នៅទីបំផុត ចៅក្រមបានសម្រេចឲ្យព្យួរបណ្តោះអាសន្នលើការអនុវត្តន៍ក្រឹត្យប្រធានាធិបតី ដោយរារាំងមិនឲ្យមានការចាប់បញ្ជូនជនឃាត់ខ្លួនត្រឡប់ទៅកន្លែងដើម និងបានអនុញ្ញាតឲ្យមានការដោះលែងជនជាតិអ៊ីរ៉ាក់ទាំងពីរនាក់ឲ្យចូលក្នុងទឹកដីអាមេរិក។ គេអាចនិយាយបានថា ការតទល់តាមផ្លូវតុលាការលើក្រឹត្យរបស់លោកដូណាល់ ត្រាំបានចាប់ផ្តើមហើយ។
ក្រឹត្យលោកដូណាល់ ត្រាំកំពុងបង្កឲ្យមានប្រតិកម្មប្រឆាំង និងក្តីបារម្ភ
ក្រៅពីការតទល់តាមផ្លូវតុលាការនៅអាមេរិក ក្រឹត្យរបស់លោកដូណាល់ ត្រាំប្រឆាំងអន្តោប្រវេសន៍ និងជនភៀសខ្លួនក៏កំពុងទទួលរងការប្រឆាំង និងក្តីបារម្ភពីថ្នាក់ដឹកនាំបរទេសភាគច្រើននៅក្នុងលោក។ តែក្នុងនោះ ក៏មានប្រតិកម្មគាំទ្រ និងសាទរ ពិសេសពីលោកនាយករដ្ឋមន្រ្តីអ៊ីស្រាអែលនេតាន់យ៉ាហ៊ូដែលថ្លែងថា វិធានការរបស់លោកត្រាំ គឺត្រឹមត្រូវ ១០០%។ លោកនេតាន់យ៉ាហ៊ូបានផ្តោតសំខាន់លើគម្រោងសាងសង់ជញ្ជាំងដែលលោកត្រាំចង់សង់នៅតាមបណ្តោយព្រំដែនជាមួយប្រទេសម៉ិចស៊ិក។ លោកនេតាន់យ៉ាហ៊ូបានបញ្ជាក់ថា លោកក៏បានសង់ជញ្ជាំងនៅតាមព្រំដែនប៉ែកខាងត្បូងអ៊ីស្រាអែលដែរ និងថា វិធានការនេះពិតជាបានរារាំងជនអន្តោប្រវេសន៍ខុសច្បាប់មែន។
តែបើនិយាយពីអ្នកប្រឆាំងលើចំណាត់ការរបស់លោកដូណាល់ ត្រាំ ពិសេសទាក់ទងនឹងក្រឹត្យប្រឆាំងអន្តោប្រវេសន៍ និងជនភៀសខ្លួនមានច្រើន ដោយចាប់ផ្តើមពីលោកស្រីនាយករដ្ឋមន្រ្តីអង់គ្លេស Theresa May។ លោកស្រី Theresa May យល់ឃើញថា នយោបាយអន្តោប្រវេសន៍របស់អាមេរិកជារឿងផ្ទៃក្នុងរបស់អាមេរិក តែលោកស្រីមិនឯកភាពនឹងវិធានការរបស់លោកត្រាំរបៀបនេះទេ។ សម្រាប់ភាគីបារាំង លោកប្រធានាធិបតីហ្រ្វង់ស័រ ហូឡង់បានព្រមានលោកត្រាំតាមទូរស័ព្ទពីផលវិបាកសេដ្ឋកិច្ច និងនយោបាយដែលអាចកើតមានពីវិធានការអាត្មានិយមរបស់លោកត្រាំ។ លោកហូឡង់បានយល់ឃើញថា ប្រឈមនឹងពិភពលោកមិនជាក់ច្បាស់ និងអស្ថិរភាព វិធានការអាត្មានិយមជាដំណោះស្រាយគ្មានច្រកចេញ និងរម្លឹកប្រាប់លោកត្រាំថា ការទទួលយកជនភៀសខ្លួនដែលរត់គេចពីសង្រ្គាម ជាកាតព្វកិច្ចមួយ។
នៅកាណាដាដែលគេស្គាល់ជាប្រទេសទទួលជនភៀសខ្លួនដោយដៃទាំងពីរ លោកនាយករដ្ឋមន្រ្តី Trudeau មិនបានធ្វើអត្ថាធិប្បាយអ្វីលើក្រឹត្យប្រឆាំងអន្តោប្រវេសន៍ និងជនភៀសខ្លួនរបស់លោកត្រាំទេ តែបានសរសេរនៅក្នុងបណ្តាញសង្គម Tweeter របស់លោកថា កាណាដាបើកទ្វារទទួលគ្រប់ពេលអ្នកដែលបានរត់គេចពីសង្រ្គាម និងពីការធ្វើទុក្ខបុកម្នេញដោយគ្មានការរើសអើង និងការប្រកាន់និន្នាការសាសនាអ្វីទាំងអស់។ តាមលោក Trudeau ភាពចម្រុះជាតិសាសន៍ និងសាសនាជាកម្លាំងរបស់កាណាដា។
លោកដូណាល់ ត្រាំមិនឈឺក្បាលនឹងចំណាប់អារម្មណ៍របស់អ្នកដទៃ
លោកដូណាល់ ត្រាំមិនឈឺក្បាល និងបានចេញមុខការពារលើភាពស្របច្បាប់នៃក្រឹត្យដែលលោកបានចុះហត្ថលេខា។ ពិតណាស់ថា ក្រឹត្យប្រឆាំងអន្តោប្រវេសន៍ និងជនភៀសខ្លួនកំពុងបង្កឲ្យមានភាពស្រពិចស្រពិល និងច្របូកច្របល់យ៉ាងខ្លាំង ព្រោះវាមានជាប់ពាក់ព័ន្ធទាំងជនអន្តោប្រវេសន៍ និងជនភៀសខ្លួនដែលមានលិខិតស្នាមរស់នៅស្របច្បាប់ក្នុងទឹកដីអាមេរិក ក៏ដូចជាសិស្សនិស្សិតដែលមានទិដ្ឋាការរៀនសូត្រក្នុងទឹកដីអាមេរិក។ តែលោកត្រាំបានយល់ឃើញថា ការអនុវត្តន៍ក្រឹត្យរបស់លោកកំពុងមានដំណើរការដោយរលូន គ្មានបញ្ហាអ្វីទាំងអស់។
ទន្ទឹមគ្នានេះ លោកដូណាល់ ត្រាំបានរម្លឹកជាថ្មីថា ក្រឹត្យប្រឆាំងអន្តោប្រវេសន៍ និងជនភៀសខ្លួនរបស់លោកមិនមែនសំដៅលើប្រជាជនអ្នកកាន់សាសនាអ៊ីស្លាមទូទៅទេ តែសំដៅប្រទេសដែលអាចបង្កគ្រោះថ្នាក់ដល់សន្តិសុខ និងសុវត្ថិភាពប្រទេស និងពលរដ្ឋអាមេរិកាំង។ ដោយឡែក ក្រុមទីប្រឹក្សាសេតវិមានក៏បានចេញមុខធានាថា អ្នកដែលមានលិខិតស្នាមស្របច្បាប់រស់ក្នុងទឹកដីអាមេរិក និងដែលកំពុងមានវត្តមាននៅបរទេសពេលនេះ នឹងត្រូវទទួលការពិនិត្យមើលឡើងវិញមួយករណីម្តងៗ។ ជាការពិត ក្រឹត្យរបស់លោកត្រាំសំដៅលើប្រទេសកាន់សាសនាអ៊ីស្លាមចំនួន ៧ គឺស៊ីរី អ៊ីរ៉ាក់ អ៊ីរ៉ង់ លីប៊ី សូម៉ាលី ស៊ូដង់ និងយេម៉ែន។
តែគេមិនត្រូវភ្លេចនិយាយទេថា ភេរវជនដែលបានបង្កភេរវកម្មនៅ San Bernardino ក្នុងរដ្ឋ California និងនៅ Orlando ក្នុងរដ្ឋ Florida កាលពីខែធ្នូ ឆ្នាំ ២០១៥ និងខែមិថុនា ឆ្នាំ ២០១៦ មានប្រភពចេញពីប្រទេសអាហ្វហ្កានីស្ថាន ប៉ាគីស្ថាន និងអារ៉ាប៊ីសាអូឌីតដែលមិនឋិតក្នុងបញ្ជីប្រទេសនៃក្រឹត្យរបស់លោកដូណាល់ ត្រាំទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ