អាមេរិក៖ហេតុអ្វីបានជាទីប្រឹក្សាសន្តិសុខជាតិរបស់លោកដូណាល់ ត្រាំបង្ខំចិត្តចុះចេញពីតំណែង?
ចុះផ្សាយនៅថ្ងៃ៖
ស្តាប់ - ០៧:២៦
នៅសហរដ្ឋអាមេរិក លោក Michael Flynn ទីប្រឹក្សាសន្តិសុខជាតិរបស់លោកប្រធានាធិបតីដូណាល់ ត្រាំបានបង្ខំចិត្តលាចុះពីតំណែងនាយប់ថ្ងៃចន្ទ ទី១៣ កុម្ភៈ។ ការលាឈប់របស់លោក Michael Flynn បានធ្វើឡើង បន្ទាប់ពីបណ្តាញសារព័ត៌មានអាមេរិកបានទម្លាយរឿងរ៉ាវទាក់ទងនឹងកិច្ចសន្ទនាតាមទូរស័ព្ទរវាងលោក Flynn និងឯកអគ្គរដ្ឋទូតរុស្ស៊ីប្រចាំសហរដ្ឋអាមេរិកកាលពីខែធ្នូ ឆ្នាំ ២០១៦ ពោលក្នុងពេលដែលលោកបារ៉ាក់ អូបាម៉ានៅជាប្រធានាធិបតី។ សេតវិមានបានដាក់ជំនួសកន្លែងលោក Michael Flynn ដោយឧត្តមសេនីយចូលនិវត្តន៍ម្នាក់ទៀត គឺលោក Joseph Kellogg។
លោកដូណាល់ ត្រាំ និងរដ្ឋបាលរបស់លោកបានចូលកាន់តំណែងជាផ្លូវការក្នុងថ្ងៃទី២០ មករា។ តែនៅក្នុងពេលរង់ចាំការផ្ទេរតំណែងជាផ្លូវការរវាងលោកបារ៉ាក់ អូបាម៉ា និងលោកដូណាល់ ត្រាំ លោកត្រាំក៏បានផ្តើមធ្វើការជ្រើសរើសបណ្តើរៗនូវឥស្សរជនដែលត្រូវកាន់តំណែងនេះ ឬតំណែងនោះ ក្នុងនោះ លោក Michael Flynn ត្រូវបានលោកដូណាល់ ត្រាំប្រគល់តួនាទីជាទីប្រឹក្សាសន្តិសុខជាតិរបស់លោក។
ក៏ប៉ុន្តែ ក្នុងពេលដែលរដ្ឋបាលអាមេរិក និងសេតវិមានកំពុងស្ថិតក្នុងដៃរបស់លោកអូបាម៉ា លោក Michael Flynn បានឆ្លៀតប្រើតួនាទីរបស់ខ្លួនចូលអន្តរាគមន៍នៅក្នុងកិច្ចការមួយចំនួន ពិសេសទំនាក់ទំនងរវាងអាមេរិក និងរុស្ស៊ី។ រឿងរ៉ាវមួយនេះត្រូវបានទម្លាយដោយកាសែតអាមេរិក Washington Post កាលពីថ្ងៃទី១២ កុម្ភៈដែលថា លោក Flynn បានទូរស័ព្ទនិយាយប្រាប់ឯកអគ្គរដ្ឋទូតរុស្ស៊ីប្រចាំសហរដ្ឋអមេរិកលោក Sergey Kislyak កុំឲ្យបញ្ចេញប្រតិកម្ម និងកុំឲ្យបារម្ភរឿងទណ្ឌកម្មដែលលោកអូបាម៉ាបានប្រកាសដាក់លើរុស្ស៊ីកាលពីថ្ងៃទី២៩ ធ្នូ ឆ្នាំ ២០១៦។
នៅក្នុងកិច្ចសន្ទនាតាមទូរស័ព្ទជាមួយលោក Sergey លោក Flynn បាននិយាយធានាថា នៅពេលលោកដូណាល់ ត្រាំចូលកាន់តំណែងជាផ្លូវការ រដ្ឋបាលរបស់លោកត្រាំនឹងសើរើ ពិនិត្យមើលឡើងវិញនូវទណ្ឌកម្មមួយនេះរបស់លោកអូបាម៉ា និងបន្ថែមថា រដ្ឋបាលរបស់លោកត្រាំនឹងមិនតឹងតែងដូចរដ្ឋបាលរបស់លោកអូបាម៉ាទេ។
លោកអូបាម៉ាដាក់ទណ្ឌកម្មរុស្ស៊ីដែលលូកដៃក្នុងរឿងបោះឆ្នោតអាមេរិក
គឺនៅក្នុងសម័យបោះឆ្នោតប្រធានាធិបតីអាមេរិកឆ្នាំ ២០១៦ ដែលកម្តៅការទូតរវាងអាមេរិក និងរុស្ស៊ីបានឡើងដល់កំពូល ពិសេសក្នុងពេលដែលបេក្ខនារីហ៊ីលឡារី គ្លីនមកពីគណបក្សប្រជាធិបតេយ្យបានចាញ់ឆ្នោតគួរឲ្យភ្ញាក់ផ្អើលប្រឈមនឹងបេក្ខជនដូណាល់ ត្រាំមកពីគណបក្សសាធារណរដ្ឋ។ រដ្ឋបាលអាមេរិករបស់លោកអូបាម៉ាបានចង្អុលចំមុខរុស្ស៊ីពីបទលូកដៃក្នុងរឿងបោះឆ្នោតប្រធានាធិបតីអាមេរិកដោយជួយឲ្យលោកដូណាល់ ត្រាំទទួលជោគជ័យ។ នៅថ្ងៃទី២៩ ធ្នូ ឆ្នាំ ២០១៦ លោកអូបាម៉ាបានប្រកាសចេញនូវវិធានការមួយចំនួនប្រឆាំងរុស្ស៊ី ពិសេសបណ្តេញភ្នាក់ងារស៊ើបការណ៍រុស្ស៊ីចំនួន ៣៥នាក់ចេញពីទឹកដីអាមេរិក រួមទាំងបិទការិយាល័យចំនួនពីររបស់ទីភ្នាក់ងារស៊ើបការណ៍សម្ងាត់រុស្ស៊ីនៅញូយ៉ក និងនៅ Maryland។
ទង្វើរបស់លោកអូបាម៉ាកាលណោះបានធ្វើឲ្យសមភាគីរុស្ស៊ីពូទីនក្តៅស្លឹកត្រចៀកងំ និងមានវិធានការតបវិញចាស់ដៃ ពោលគ្រោងបណ្តេញមន្រ្តីអាមេរិកចេញពីទឹកដីរុស្ស៊ីដូចគ្នា។ តែដោយមានអន្តរាគមន៍ពីលោក Michael Flynn ទីប្រឹក្សាសន្តិសុខជាតិរបស់លោកដូណាល់ ត្រាំ លោកពូទីនក៏បានស្ងប់ចិត្តមកវិញ រួចបែរជាប្រកាសថា រុស្ស៊ីនឹងមិនបណ្តេញមន្រ្តីអាមេរិកចេញពីរុស្ស៊ីទេ។ លោកពូទីនបានបន្ថែមថា រុស្ស៊ីរក្សាសិទ្ធិក្នុងការចាត់វិធានការបកនឹងអាមេរិក តែនៅចំពោះមុខ ជាពេលវេលាដែលត្រូវពង្រឹងឡើងវិញនូវទំនាក់ទំនងរវាងរុស្ស៊ី និងអាមេរិកជាមួយរដ្ឋបាលរបស់លោកដូណាល់ ត្រាំ។
តាមរយៈចម្លើយរបៀបនេះនាំឲ្យគេយល់បានភ្លាមថា លោកពូទីននិយាយដៀមដាមដាក់លោកអូបាម៉ា និងចង់ប្រាប់លោកអូបាម៉ាថា រុស្ស៊ីមិនឈឺក្បាលនឹងទណ្ឌកម្មនោះទេ ព្រោះលោកត្រាំនឹងដកវាក្រវាត់ចោលវិញនៅពេលលោកត្រាំចូលកាន់តំណែង។
លោក Michael Flynn បានរងសម្ពាធ និងបង្ខំចិត្តចុះចេញ
កុំតែកាសែត Washington Post បានទម្លាយឲ្យដឹងកាលពីថ្ងៃទី១២ កុម្ភៈ ម្ល៉េះរឿងរ៉ាវមួយនេះក៏មិនទាន់ឈានដល់ការលាចុះពីមុខតំណែងរបស់លោក Michael Flynn នាពេលនេះដែរ។ ម្យ៉ាងទៀត កាសែត Washington Post បានទទួលព័ត៌មានដ៏រសើបមួយនេះពីក្រសួងស៊ើបការណ៍សម្ងាត់អាមេរិក។ កាសែត Washington Post ឲ្យដឹងថា គឺលោក Michael Flynn ជាអ្នកទូរស័ព្ទទៅកាន់លោកឯកអគ្គរដ្ឋទូតរុស្ស៊ី Sergey ប្រចាំសហរដ្ឋអាមេរិក ហើយថា ក្រសួងស៊ើបការណ៍សម្ងាត់បានលួចស្តាប់ទូរស័ព្ទលោក Sergey ពោលមិនមែនលួចស្តាប់ទូរស័ព្ទលោក Michael Flynn ទេ។
ក្រោយបែកធ្លាយរឿងនេះភ្លាម លោក Michael Flynn មិនបានបដិសេធថា លោកមិនបានទូរស័ព្ទនិយាយជាមួយលោក Sergey ទេ តែថានៅក្នុងកិច្ចសន្ទនានោះ លោកមិនបាននិយាយពីរឿងទណ្ឌកម្មដែលលោកអូបាម៉ាបានដាក់លើរុស្ស៊ីទេ។ ធ្ងន់ធ្ងរជាងនេះ លោក Michael Flynn ថែមទាំងនិយាយភូតភរ និងធានាអះអាងពីភាពគ្មានកំហុសរបស់ខ្លួនប្រាប់លោកអនុប្រធានាធិបតីអាមេរិក Mike Pence។ លោក Pence ក៏ជឿទាំងស្រុង ព្រមទាំងចេញមុខការពារលោក Michael Flynn ទៀតផង។ តែបញ្ហានៅត្រង់ថា ក្រសួងស៊ើបការណ៍សម្ងាត់អាមេរិកមានព័ត៌មានគ្រប់គ្រាន់ដែលបញ្ជាក់ថា លោក Michael Flynn បាននិយាយធានាលោក Sergey ពីទណ្ឌកម្មនោះមែន។
ទីបំផុត រឿងរ៉ាវមួយនេះបែកធ្លាយកាន់តែខ្ចរខ្ចាយរហូតធ្វើឲ្យសេតវិមានទើសទាល់ចិត្តលែងហ៊ានចេញមុខការពារលោក Michael Flynn។ ជាមួយនឹងពាក្យភូតភរ និងសម្ពាធពីគ្រប់ទិសទី លោក Michael Flynn គ្មានជម្រើសអ្វីក្រៅពីដកខ្លួនចេញ។ នេះពិតជារឿងមួយកម្រឃើញមានណាស់នៅក្នុងអតីតកាលដែលអ្នកកាន់តំណែងដ៏សំខាន់មួយនេះបានបង្ខំចុះចេញ ពិសេសក្នុងពេលដែលរដ្ឋបាលរបស់លោកដូណាល់ ត្រាំទើបចូលដឹកនាំបានតែ ៣សប្តាហ៍។ ក្រុមអ្នកវិភាគបានមើលឃើញថា អាចនឹងមានរឿងអាស្រូវជាច្រើនទៀតដែលកំពុងរង់ចាំលោកដូណាល់ ត្រាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ