អាមេរិក៖លោកដូណាល់ ត្រាំថ្លែងសុន្ទរកថាលើកទី១ នៅមុខសភាពេញអង្គ
ចុះផ្សាយនៅថ្ងៃ៖
ស្តាប់ - ០៦:៤០
នៅយប់ថ្ងៃអង្គារ ទី២៨ កុម្ភៈនេះ លោកប្រធានាធិបតីអាមេរិកដូណាល់ ត្រាំនឹងឡើងថ្លែងសុន្ទរកថានៅមុខសភាពេញអង្គ។ នេះជាលើកទី១ តាំងពីឡើងកាន់តំណែងបានជាង ១ខែដែលលោកត្រាំថ្លែងសុន្ទរកថានៅចំពោះមុខសមាជិកសភា និងសមាជិកព្រឹទ្ធសភា។ អន្តរាគមន៍លើកទី១ របស់លោកត្រាំនៅមុខសភាពេញអង្គយប់នេះធ្វើឡើង បន្ទាប់ពីលោកបានប្រកាសឲ្យដឹងពីការដំឡើងថវិកាយោធាចំនួន ៥៤ ០០០លានដុល្លារដោយគិតចាប់ពីឆ្នាំ ២០១៨។ សូមជម្រាបជូនថាបច្ចុប្បន្ននេះ អាមេរិកមានថវិកាយោធាប្រចាំឆ្នាំចំនួន ៦០៤ ៥០០លានដុល្លារ។
ការឡើងថ្លែងសុន្ទរកថារបស់លោកដូណាល់ ត្រាំនៅមុខសភាពេញអង្គយប់ថ្ងៃអង្គារ ទី២៨ កុម្ភៈនេះមិនមែនជាការឡើងថ្លែងសុន្ទរកថាស្តីពីនយោបាយទូទៅដូចដែលប្រធានាធិបតីអាមេរិកគ្រប់រូបធ្លាប់ធ្វើទេ តែជាបទអន្តរាគមន៍ ឬមួយក៏ថាជាវិញ្ញាសារនៃការតភ្ជាប់ទំនាក់ទំនងរវាងអំណាចនីតិប្រតិបត្តិ និងអំណាចនីតិប្បញ្ញត្តិ។ ចូរកុំភ្លេចថា តាំងពីឡើងកាន់តំណែងបានជាង ១ខែមក នេះជាលើកទី១ ដែលលោកដូណាល់ ត្រាំឡើងថ្លែងសុន្ទរកថានៅចំពោះមុខសមាជិកសភា និងសមាជិកព្រឹទ្ធសភាមកពីគ្រប់គណបក្សនយោបាយទាំងអស់។
គួររម្លឹកជូនបន្តិចថា សុន្ទរកថាស្តីពីនយោបាយទូទៅដែលច្រើនធ្វើក្នុងខែមករារៀងរាល់ឆ្នាំច្រើនថ្លែងដោយប្រធានាធិបតីកាន់អំណាចបាន ១ឆ្នាំដើម្បីធ្វើតុល្យការការងារសម្រេចបានក្នុងឆ្នាំកន្លងទៅ និងដាក់កម្មវិធីនយោបាយសម្រាប់ឆ្នាំបន្ទាប់។ តែសម្រាប់លោកដូណាល់ ត្រាំដែលទើបតែឡើងកាន់អំណាច គឺជាឱកាសអនុញ្ញាតឲ្យលោកនិយាយប្រាប់ពលរដ្ឋអាមេរិក និងសភាពេញអង្គពីការងារអាទិភាពដែលលោកត្រូវធ្វើភ្លាមៗដើម្បីប្រយោជន៍ប្រទេសជាតិ និងពលរដ្ឋអាមេរិកាំងដូចដែលលោកបានសន្យានៅក្នុងថ្ងៃស្បថចូលកាន់តំណែងថា « America first »។
បន្ទាប់មក បទអន្តរាគមន៍របស់លោកដូណាល់ ត្រាំនៅមុខសភាពេញអង្គថ្ងៃនេះក៏ជាឱកាសមួយអនុញ្ញាតឲ្យលោកត្រាំ និងគណបក្សសាធារណរដ្ឋរបស់លោកផ្តើមចាប់ដៃធ្វើការរួមគ្នាដោយដាក់ចេញនូវគោលនយោបាយអាទិភាពសម្រាប់ឆ្នាំនេះ និងឆ្នាំបន្ទាប់ ពិសេសធ្វើកំណែទម្រង់ក្នុងផ្នែកពន្ធដារ ធនាគារ បរិស្ថាន និងសើរើពិនិត្យមើលឡើងវិញនូវប្រព័ន្ធសុខភាពដ៏ចម្រូងចម្រាស Obamacare របស់លោកអូបាម៉ា។
ឱកាសដើម្បីស្រោចស្រង់កម្រិតប្រជាប្រិយភាពឡើងវិញ
គួរបញ្ជាក់ថា សុន្ទរកថារបស់លោកដូណាល់ ត្រាំនៅយប់នេះធ្វើឡើង ចំពេលដែលកម្រិតប្រជាប្រិយភាពរបស់លោកកំពុងធ្លាក់ចុះ។ នេះពិតជារឿងមួយដែលគេសូវឃើញមាននៅក្នុងប្រវត្តិប្រធានាធិបតីអាមេរិកដែលរូបប្រធានាធិបតីថ្មីទើបឡើងកាន់តំណែងមិនបានប៉ុន្មានផង ក៏ស្រាប់ធ្លាក់ប្រជាប្រិយភាពយ៉ាងគំហុកដូចនេះ។ ជាទូទៅគេសង្កេតឃើញថា ប្រធានាធិបតីថ្មីទើបចូលកាន់តំណែងច្រើនមានកម្រិតប្រជាប្រិយភាពខ្ពស់ ហើយរឿងធ្លាក់ចុះ ឬកើនបន្ថែមនៅឆ្នាំបន្ទាប់ៗទៀត គឺអាស្រ័យលើការងារដែលសម្រេចបាន។
តែទោះជាយ៉ាងនេះក្តី លោកត្រាំអាចនឹងនៅបន្តទទួលការគាំទ្រពីក្រុមសកម្មជនគណបក្សសាធារណរដ្ឋ។ កម្រិតប្រជាប្រិយភាពលោកត្រាំធ្លាក់ចុះក៏ដោយសារតែអាកប្បកិរិយា អត្តចរិត និងការនិយាយច្រើនផ្តេសផ្តាស់លឿនជ្រុល រួចត្រឡប់មកកែតម្រូវជាក្រោយ រួមទាំងវិធានការមួយចំនួនដែលធ្វើតាមនឹកឃើញ គ្មានហេតុផលត្រឹមត្រូវ។ ជាក់ស្តែង ក្រិត្យប្រឆាំងជនអន្តោប្រវេសន៍ដែលទីបំផុតត្រូវតុលាការព្យួរ ឬមួយក៏ការចេញមុខប្រឆាំងពួកអ្នកកាសែតដោយចាត់ទុកជាសត្រូវរបស់ពលរដ្ឋជាដើម។ បន្ទាប់មក រឿងអាស្រូវទាក់ទងនឹងឥស្សរជនខ្លះដែលលោកត្រាំបានតែងតាំង និងគ្រោងតែងតាំង តែបែរជាត្រូវបង្ខំចិត្តលាចុះពីមុខតំណែង និងបដិសេធមិនទទួលតំណែងទៅវិញ។
បន្ទាប់មកទៀត នៅមានជំហរស្រពិចស្រពិលទាក់ទងនឹងកិច្ចព្រមព្រៀងអន្តរជាតិដែលអាមេរិកមានជាមួយប្រទេសផ្សេង ឬមួយក៏ជំហរប្រែប្រួលរបស់អាមេរិកនៅក្នុងទំនាក់ទនងជាមួយប្រទេសខ្លះដែលលោកត្រាំបានធ្វើឲ្យប្រទេសពាក់ព័ន្ធក្តៅក្រហាយមិនតិចទេ។ ដូច្នេះមានរឿងអាស្រូវច្រើនណាស់ដែលបានកើតមានឡើងនៅក្នុងខែទី១ នៃការឡើងកាន់តំណែងរបស់លោកត្រាំ និងដែលលោកត្រូវពន្យល់ បំភ្លឺឲ្យបានច្បាស់លាស់នៅក្នុងសុន្ទរកថាចំពោះមុខសភាពេញអង្គយប់នេះ។
កាត់បន្ថយចំណាយទៅបរទេស និងបង្កើនការចាយវាយក្នុងស្រុក
នៅក្នុងសុន្ទរកថាយប់នេះដែរ លោកត្រាំក៏ត្រូវនិយាយពីហេតុផលដែលលោកបានសម្រេចដំឡើងថវិកាយោធាដល់ទៅ ៥៤ ០០០លានដុល្លារចាប់ពីឆ្នាំ ២០១៨ ពោលដំឡើងជិត ១០%។ បច្ចុប្បន្ននេះ អាមេរិកមានថវិកាការពារជាតិចំនួន ៦០៤ ៥០០លានដុល្លារ ពោលច្រើនជាងឆ្ងាយណាស់ពីប្រទេសចិន ឬរុស្ស៊ីដែលស្ថិតលំដាប់ថ្នាក់ទី២ និងទី៣។ សូម្បីតែថវិកាការពារជាតិចំនួន ៧ប្រទេសបន្ទាប់ពីអាមេរិកបូកបញ្ចូលគ្នាក៏មិនស្មើនឹងអាមេរិកម្នាក់ឯងផង។
លោកដូណាល់ ត្រាំបានប្រកាសដំឡើងនៅថ្ងៃចន្ទ ទី២៧ កុម្ភៈដោយពន្យល់ថា ដើម្បីការពារពលរដ្ឋអាមេរិកាំង និងចង់ផ្ញើសារទៅកាន់ពិភពលោកស្តីពីកម្លាំង និងការប្តេជ្ញាចិត្តរបស់អាមេរិក។ លោកដូណាល់ ត្រាំបានប្រើរូបមន្តក្នុងពេលឃោសនាបោះឆ្នោតដែលថា អាមេរិកត្រូវកាត់បន្ថយចំណាយទៅបរទេស និងបង្កើនការចាយវាយក្នុងស្រុក។ នៅក្នុងន័យនេះ អ្នកនំាពាក្យសេតវិមានបានប្រកាសឲ្យដឹងពីការកាត់បន្ថយថវិកាសម្រាប់ក្រសួងមួយចំនួនដែលមិនសូវសំខាន់ និងដែលបានចំណាយច្រើនទៅបរទេស ពិសេសគឺក្រសួងការបរទេស និងក្រសួងអភិវឌ្ឍន៍។
ដូច្នេះឃើញថា នេះជាដំណឹងអាក្រក់មួយសម្រាប់ប្រទេសក្រីក្រនៅអាហ្វ្រិក ឬនៅអាស៊ីដែលធ្លាប់ទទួលជំនួយអាមេរិកតាមរយៈលុយសុទ្ធ ឬតាមរយៈកម្មវិធីអភិវឌ្ឍន៍ផ្សេងៗ។ យ៉ាងណាក៏ដោយពេលនេះ ប្រតិកម្មមានច្រើន ពិសេសពីក្រុមអ្នកប្រជាធិបតេយ្យដែលគេយល់ឃើញពីភាពចាំបាច់ក្នុងការពង្រឹងនយោបាយការបរទេសអាមេរិកក្នុងលោក និងពីភាពមិនចាំបាច់ក្នុងការដំឡើងថវិកាយោធា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ