មន្ត្រីការទូតជាន់ខ្ពស់ចិន ទៅសេតវិមានអាមេរិក ពិភាក្សាពីទំនាក់ទំនងមហាអំណាចទាំងពីរ
ចុះផ្សាយនៅថ្ងៃ៖
ស្តាប់ - ០៦:០១
ទំនាក់ទំនងរវាងចិន និងសហរដ្ឋអាមេរិក កំពុងស្ថិតក្នុងភាពស្រពេចស្រពិល ម្តងក្តៅម្តងត្រជាក់ ក្រោយការឡើងកាន់តំណែងរបស់លោកដូណាល់ ត្រាំ។ បន្ទាប់បីបានរិះគន់ចិន កប់ៗមាត់ក្នុងកំឡុងពេលឃោសនាបោះឆ្នោត លោកដូណាល់ ត្រាំថែមទាំងបានព្រមាន លែងទទួលស្គាល់គោលការណ៍ទឹកដីចិន តែមួយថែមទៀតផង។ តែទីបំផុត ក្នុងរយៈពេលមួយខែចុងក្រោយនេះ អ្វីៗហាក់បានវិលទៅរកការស្រុះស្រួលគ្នា រវាងមហាអំណាចទាំងពីរ។ នៅថ្ងៃចន្ទនេះ លោកទីប្រឹក្សារដ្ឋចិនម្នាក់ ដ៏មានឥទ្ធិពល បានចេញដំណើរយ៉ាងតក់ក្រហល់ ទៅកាន់ក្រុងវ៉ាស៊ីនតោន ដើម្បីជួបជជែកជាមួយមន្ត្រីនៃសេតវិមាន ស្តីពីទំនាក់ទំនងរវាងចិន និងអាមេរិក។
បញ្ជូនអ្នកជំនាញកិច្ចការបរទេស ដើម្បីទៅស្ទាបកំដៅរបស់អាមេរិក
នេះជាលើកទីមួយហើយ ដែលមានជំនួបទ្វេរភាគី ក្នុងក្របខណ្ឌខ្ពស់បែបនេះ រវាងសហរដ្ឋអាមេរិកនិង ចិន នៅក្រោយពេលដែលរដ្ឋាភិបាលថ្មីរបស់លោកដូណាល់ ត្រាំ បានចូលកាន់តំណែង។ ជំនួបនេះ គឺជាការអញ្ជើញរបស់រដ្ឋាភិបាលសហរដ្ឋអាមេរិក។
យោងតាមការចុះផ្សាយរបស់ទីភ្នាក់ងារព័ត៌មានចិនថ្មី ដែលបានស្រង់សំដីប្រកាសរបស់អ្នកនាំពាក្យក្រសួងការបរទសចិន បានឲ្យដឹងកាលពីយប់ថ្ងៃអាទិត្យម្សិលមិញថា លោក យ៉ាង ជាឈី នឹងអញ្ជើញទៅក្រុងវ៉ាស៊ីនតោន រយៈពេលពីរថ្ងៃ។ លោក យ៉ាង ជាឈី គឺជាមន្ត្រីការទូតជាន់ខ្ពស់ម្នាក់ របស់ចិន ដែលមានតំណែងជាទីប្រឹក្សារដ្ឋ ផ្នែកកិច្ចការបរទេស របស់លោកប្រធានាធិបតីចិន។ បើតាមទំលាប់ នៅប្រទេសចិនតំណែងទីប្រឹក្សារដ្ឋផ្នែកកិច្ចការបរទេសនេះ មានឥទ្ធិពលធំជាងរដ្ឋមន្ត្រីការបទេសទៅទៀត។
លោក យ៉ាង ជាឈី មានអាយុ៦៦ឆ្នាំ ធ្លាប់ជារដ្ឋមន្ត្រីក្រសួងការបរទេសចិនដែរ នៅរវាងឆ្នាំ២០០៧ ដល់ ២០១៣ ហើយលោកម្នាក់នេះ ក៏ធ្លាប់ជាឯកអគ្គរដ្ឋទូតរបស់ចិន ប្រចាំនៅសហរដ្ឋអាមេរិកដែរ។ ដូច្នេះហើយ បានជារាល់កិច្ចការទំនាក់ទំនងផ្លូវរដ្ឋ រឺដោះស្រាយបញ្ហានានា គឺប្រធានាធិបតីចិន តែងតែបញ្ជូនលោក យ៉ាង ជាឈីទៅជាមុន។
រៀបចំជំនួបរវាង ស៊ី ជីនពីង និង ដូណាល់ ត្រាំ
មកត្រឹមពេលនេះ ទាំងខាងសេតវិមាន ទាំងខាងរដ្ឋាភិបាលចិន មិនបានផ្តល់ដំណឹងអ្វី ឲ្យបានល្អិតល្អន់ទេ ទាក់ទងនឹងជំនួបនេះ។ គេមិនទាន់ដឹងថាលោក យ៉ាង ជាឈី នឹងទៅជួបប្រជុំជាមួយនឹងអ្នកណា ឲ្យប្រាកដទេនៅសេតវិមាន។ គេក៏មិនប្រាកដដែរថា មន្ត្រីការបទេសចិនរូបនេះ នឹងត្រូវបានលោកដូណាល់ ត្រាំ ទទួលឲ្យជួបដែរ។
ក៏ប៉ុន្តែ ទីភ្នាក់ងារព័ត៌មានចិនថ្មី បានស្រង់សំដីអ្នកជំនាញ ផ្នែកកិច្ចការបរទេសចិនម្នាក់ ដែលបាននិយាយថា កម្មវត្ថុមួយដ៏សំខាន់ ក្នុងចំណោមកម្មវត្ថុដែលត្រូវពិភាក្សាគ្នា គឺ លោកយ៉ាង ជាឈី ត្រូវទៅនិយាយជាមួយសេតវិមានអាមេរិក ស្តីអំពីរការរៀបចំជំនួបទ្វេរភាគី ដោយផ្ទាល់ រវាងលោក ដូណាល់ ត្រាំ និងលោក ស៊ី ជីនពីង។ ត្រង់ចំណុចនេះ យើងនៅមិនទាន់ដឹងថា ពេលណា ប្រធានាធិបតីនៃមហាអំណាចទាំងពីរនេះ នឹងជួបគ្នាទេ ហើយក៏មិនដឹងថា អ្នកណា មកផ្ទះអ្នកណាដែរ។
ក្រៅពីចំណុចនេះ ទីភ្នាក់ងារព័ត៌មានផ្លូវការចិននេះ គ្រាន់តែបានលើកឡើងថា លោក យ៉ាង ជាឈី នឹងត្រូវពិភាក្សាជាមួយមន្ត្រីជាន់ខ្ពស់អាមេរិក ស្តីពីទំនាក់ទំនងទ្វេរភាគី និងការសម្រុះសម្រួលស្តីពីផលប្រយោជន៍រួមគ្នា រវាងមហាអំណាចទាំងពីរ។ គួរ រំលឹកថា ដើមឆ្នាំ ២០១៧នេះ ស្ថានភាពទូទៅនៃទំនាក់ទំនងការទូត រវាងប្រទេសទាំងពីរ មានភាពប្រែព្រួលខ្លាំង គួរឲ្យព្រួយបារម្ភណាស់ ។ ការបញ្ជូនមន្ត្រីជាន់ខ្ពស់ផ្នែកការទូតរបស់ចិន ទៅជួបជាមួយមន្ត្រីសេតវិមាន នាពេលនេះ វាបង្ហាញ ប្រាប់ពីចេតនាក្នុងការស្រុះស្រួលគ្នា។
ដូណាល់ ត្រាំ ប្តូរឥរិយាបថច្រើន ប្រឈមមុខនឹងចិន
ជម្លោះទាស់ទែងគ្នា វាមិនដែរបង្កផលល្អទេ សម្រាប់ភាគីណាក៏ដោយ ក្នុងក្របខណ្ឌអ្វីក៏ដោយ មិនថារវាងមនុស្ស រឺរវាងប្រទេសនីមួយៗនោះទេ។ ជាងនេះទៅទៀត សហរដ្ឋអាមេរិក និងចិនគឺជាមហាអំណាច ទាំងវិស័យយោធា ទាំងវិស័យសេដ្ឋកិច្ច ដូច្នេះ វាគ្មានផលល្អសម្រាប់ពិភពលោកទេ បើប្រទេសទាំងពីរនេះ ឈ្លោះគ្នា។ ទំនាក់ទំនង រវាងចិន និងអាមេរិក មួយរយៈនេះ ម្តងក្តៅម្តងត្រជាក់ ដោយសារតែគោលជំហរមិនច្បាស់លាស់ របស់លោកដូណាល់ ត្រាំ។
លោក ត្រាំ បានរិះគន់ ចោទប្រកាន់ចិន ថាជាអ្នកប្លន់យកការងារ និងរោងចក្ររបស់អាមេរិក ទៅបង្កើតនៅចិនអស់។ ក្រោយមកទៀត លោក ត្រាំ បាននិយាយទូរស័ព្ទជាមួយប្រមុខរដ្ឋាភិបាលតៃវ៉ាន់ទៀត ដែលការនេះ បានធ្វើឲ្យចិនខឹងសម្បើមណាស់ ព្រោះវាហាក់មានន័យថា សហរដ្ឋអាមេរិក ចង់ទទួលស្គាល់តៃវ៉ាន់ ជាប្រទេសពេញសិទ្ធិ ដាច់ពីចិន។ ចាប់តាំងពីឆ្នាំ១៩៧៩មក នៅពេលដែលសហរដ្ឋអាមេរិក ចាប់បើកទំនាក់ទំនងជាមួយចិនឡើងវិញ គឺមិនដែលមានប្រធានាធិបតីអាមេរិកណា ហ៊ានធ្វើបែបនេះទេ។ ក៏ប៉ុន្តែ ក្រោយចូលកាន់តំណែង គេសង្កេតឃើញលោក ដូណាល់ ត្រាំ ហាក់បន្ទន់ឥរិយាបថច្រើន។ តាមការស្មាន ប្រហែលជាទីប្រឹក្សា ឬមន្ត្រីជំនិតរបស់គាត់ បានផ្តល់យោបល់ថា មិនត្រូវបង្កជំលោះជាមួយចិនទេ ព្រោះអាមេរិកអាចនឹងខាតធ្ងន់។
កាលពីមានប្រជុំកំពូល ប្រទេសសេដ្ឋកិច្ចនាំមុខទាំង២០ នៅអាល្លឺម៉ង់ គេឃើញលោក Rex Tillerson រដ្ឋមន្ត្រីការបរទេសអាមេរិក បានជួបប្រជុំទ្វេរភាគីជាមួយលោក Wang Yi រដ្ឋមន្ត្រីការបរទេសចិន។ ក្នុងឱកាសនោះ លោករដ្ឋមន្ត្រីការបរទេសអាមេរិក បានស្នើសុំឲ្យចិន ជួយដាក់គំនៀបទៅលើកូរ៉េខាងជើង។ ក្រោយមកតែប៉ុន្មានថ្ងៃ គឺគេឃើញចិន បានធ្វើដូចអាមេរិកសំណូមពរមែន ដោយបានបិទបញ្ឈប់ការនាំចូលធ្យូងថ្មរបស់កូរ៉េខាងជើង។ ត្រង់ចំណុចនេះ យើងឃើញកាន់តែច្បាស់ថា ចិនមិនចង់បិទផ្លូវជាមួយអាមេរិកទេ។
ភាពអត្មានិយមរបស់ ដូណាល់ ត្រាំ អាចឲ្យចិនជិះសេះលែងដៃ
បើយោងតាមសម្តីលោក តៅ វ៉េនចាវ អ្នកវិភាគម្នាក់ នៅវិទ្យាសា្ថនស្រាវជ្រាវចិនអាមេរិក បានពន្យល់ថា លោកដូណាល ត្រាំ មិនមែនល្ងង់ ទៅបង្កជម្លោះជាមួយចិនទេ។ ក្នុងចំណោមប្រទេសដែលលោកដូណាល់ ត្រាំ រិះគន់កន្លងមកក្នុងពេលឃោសនា គឺមានតែចិន ទេ ដែលលោកត្រាំ បានបន្ទន់សម្តីទៅវិញ។ អ្នកវិភាគម្នាក់នេះយល់ថា វាគឺជាទំងន់រវាងមហាអំណាចពីរដ៏សំខាន់។ អាមេរិកមិនអាចអត់ចិន ចិនក៏មិនអាចអត់អាមេរិកដែរ។
ចំណុចមួយទៀត គួរពិចារណាដែរ គឺថាចិនសង្កេតឃើញពីចំណុចខ្សោយរបស់លោកដូណាល់ ត្រាំ។ លោកត្រាំ មាននិន្នាការដឹកនាំប្រទេសបែបអត្មានិយម និងការពារប្រយោជន៍អាមេរិកជ្រុលបំផុត។ ដូច្នេះមានន័យថា សំណុំរឿងកិច្ចការបរទេសផ្សេងទៀត នៅតំបន់អាស៊ីប៉ាស៊ីហ្វិក បើសិនជាអាមេរិកមិនចំណេញទេ គឺលោកត្រាំមិនទៅខ្វល់ឡើយ។ អញ្ចឹងមានន័យថា ចិនអាចយកចិត្តអាមេរិក បានដោយងាយ តាមរយៈការផ្តល់ប្រយោជន៍ឲ្យមួយផ្នែក ហើយសុំឲ្យអាមេរិកបើកផ្លូវឲ្យខ្លួនធ្វើអ្វីបានតាមចិត្ត លើបញ្ហាផ្សេង ដូចជាសំណុំរឿងជម្លោះក្នុងសមុទ្រចិនខាងត្បូងជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ