ច្បាប់សុខភាព ៖ លោក ដូណាល់ត្រាំ បានភ្លក្សរសជាតិបរាជ័យ ជាលើកទីមួយហើយឬ ?!
ចុះផ្សាយនៅថ្ងៃ៖
ស្តាប់ - ០៦:១០
សភាអាមេរិកបានលើកពេលបោះឆ្នោតលុបចោលច្បាប់អូបាម៉ាឃែរ និងអនុម័តច្បាប់ធានារ៉ាប់រងសុខភាពថ្មី ដែលគ្រោងធ្វើនៅថ្ងៃព្រហស្បតិ៍ម្សិលមិញ។ មូលហេតុមកពីសភាមិនអាចរកសំឡេងគាំទ្របានគ្រប់គ្រាន់។ ប៉ុន្តែទោះស្ថិតក្នុងស្ថានភាពបរាជ័យក្តី ក៏ លោក ប្រធានាធិបតី ដូណាល់ ត្រាំ មិនរាថយ ដោយបានចេញបញ្ជាដាក់ឱសានវាទឱ្យសភាថាត្រូវតែធ្វើការបោះឆ្នោតនៅថ្ងៃសុក្រទី ២៤ មីនានេះ។
លោក ដូណាល់ ត្រាំ ដែលតែងតែអួតអាងអំពីសមត្ថភាពដ៏ពូកែ និងមានថ្វីមាត់ចរចាដ៏ចំណាននោះ នៅទីបំផុតមិនអាចបញ្ចុះបញ្ចូលសភាអ្នកតំណាងបក្សសាធារណរដ្ឋ បក្សរបស់លោក ឱ្យគាំទ្រកំណែទម្រង់ច្បាប់ធានារ៉ាប់រងសុខភាព ដើម្បីលុបច្បាប់អូបាម៉ាឃែរបានទេ។
រកសំឡេងគាំទ្រដាច់ខាតមិនបាន ប្រធានសភា លោក Paul Ryan បានប្រកាសលើកពេលអនុម័តច្បាប់ទៅវិញ។ វាពិតជាគួរឱ្យភ្ញាក់ផ្អើលបន្តិចមែន នៅពេលឮថាបក្សសាធារណរដ្ឋ ដែលមានសំឡេងភាគច្រើននៅក្នុងសភាស្រេចទៅហើយ បែរជាមិនអាចសម្រេចអនុម័តច្បាប់ស្នើឡើងដោយប្រធានាធិបតីជាសាធារណរដ្ឋដូចគ្នានោះ។ លោក ត្រាំ ផ្ទាល់ក៏ទំនងជាមិនបានគិតស្មានមិនដល់ ពីមុនមកទេ។
ការបែងខ្ញែកក្នុងផ្ទៃអ្នកសាធារណរដ្ឋ
ការប្រឆាំងចេញពីបក្សប្រជាធិបតេយ្យ ដែលជាបក្សប្រឆាំងនិងមានសំឡេងភាគតិចនៅក្នុងសភាជារឿងធម្មតា តែនេះគឺបណ្តាលមកពីបក្សសាធារណរដ្ឋខ្លួនឯង មានការការបែងខ្ញែកគ្នាច្រើនពួក ច្រើនក្រុម។ សម្រាប់អ្នកសាធារណរដ្ឋ បែបមិនតឹងតែង ការលុបច្បាប់អូបាម៉ាឃែរ ពិតជាមិនអាចទទួលយកបានឡើយ ប្រសិនបើការលុបនោះ ធ្វើឡើងក្រោមហេតុផលថវិកា រដ្ឋត្រូវខាតបង់លុយ។ ព្រោះនៅពេលលុបច្បាប់ចាស់ ដាក់ច្បាប់ថ្មីប្រើ នោះចំនួនអ្នកគ្មានការធានារ៉ាប់រងសុខភាពនឹងកើនឡើងប្រមាណពី ២០ ទៅ២៤លាននាក់។
ចំណែកក្រុមអ្នកសាធារណរដ្ឋ បែបអភិរក្សជ្រុលនិយមវិញ ច្បាប់ថ្មីស្នើឡើងដោយរដ្ឋាភិបាលលោកត្រាំ មិនស៊ីចាក់ជ្រៅ ក្នុងទីផ្សារសាធារណៈ ! ការធានារ៉ាប់រងសុខភាពមិនស្ថិតក្រោមការគ្រប់គ្រងដោយឯកជនទាំងស្រុង។ ហើយវិធានការជំនួយរបស់ច្បាប់អូបាម៉ាឃែរខ្លះ ត្រូវបានរក្សាទុក។ ទើបពួកគេមិនចង់គាំទ្រ។
សភាអាមេរិកមានសមាជិកមកពីបក្សប្រជាធិបតេយ្យ ១៩២រូប និងបក្សសាធារណរដ្ឋ២៣៧រូប ! ដើម្បីអនុម័តច្បាប់មួយបាន សភាអាមេរិកត្រូវការសំឡេងភាគច្រើនដាច់ខាត ២១៥សំឡេង។ ដូច្នេះបក្សសាធារណរដ្ឋអាចអនុញ្ញាតឱ្យមានសំឡេងប្រឆាំងក្នុងបក្សត្រឹមតែ២១សំឡេងប៉ុណ្ណោះ។ តែបើតាមប្រភពទូរទស្សន៍NBC New មានសភាអ្នកតំណាងបក្សសាធារណរដ្ឋចំនួន ៣០រូប គ្រោងនឹងបោះឆ្នោតប្រឆាំង ឬ មាននិន្នាការប្រឆាំងនឹងគម្រោងច្បាប់សុខភាពថ្មី។
ប្រសិនបើដូច្នេះមែន ច្បាប់របស់លោកត្រាំ មិនអាចអនុម័តចេញបានទេ ! ពេលនេះ អ្វីៗស្ថិតក្នុងភាពមិនជាក់លាក់ទាំងអស់។ ការចរចាបញ្ចុះបញ្ចូលនៅតែបន្តធ្វើពេញមួយយប់ថ្ងៃព្រហស្បតិ៍នេះ ! ហើយរហូតដល់យប់ជ្រៅទៅហើយ ក៏គេនៅមិនទាន់ដឹងថាជញ្ជីងផ្អៀងទៅខាងណាដែរ។
បញ្ចុះបញ្ចូលមិនសម្រេច លោកត្រាំ បានប្រើវិធីសំឡុត ដាក់ឱសានវាទ
ច្បាប់អូបាម៉ាឃែរ ជាចំណុចដៅវាយប្រហារ របស់អ្នកសាធារណរដ្ឋ តាំងពីមុននិងក្រោយការបោះឆ្នោតប្រធានាធិបតី។ លោកដូណាល់ ត្រាំ បានយកការលុបច្បាប់ធានារ៉ាប់រងបង្កើតឡើងដោយលោកអូបាម៉ា ដែលមានអាយុ៧ឆ្នាំគត់ នៅសប្តាហ៍នេះ ជាអាទិភាពមួយ និងជាកាតព្វកិច្ចត្រូវសម្រេចមុនគេ ព្រោះសម្រាប់លោកច្បាប់នេះបានធ្វើខាតបង់ប្រាក់រដ្ឋខ្លាំងណាស់។
គ្រាន់តែបានស្បថចូលកាន់តំណែង នៅថ្ងៃទី ២០ មករា ២០១៧ភ្លាម លោកដូណាល់ត្រាំ ចុះហត្ថលេខាលើក្រិត្យមួយប្រឆាំងនឹងអូបាម៉ាឃែរភ្លាមដែរ ជានិម្មិត្តរូបនយោបាយ។ មួយខែក្រោយមកទៀត លោកត្រាំ បានធ្លោយមាត់ថា ច្បាប់សុខភាពមានលក្ខណៈស្មុគស្មាញ មិនគួរឱ្យជឿ !
លោកបានចុះប្រលូកដោយផ្ទាល់ ណាត់ជួបតំណាងសភាដល់សេតវិមាន តែទីបំផុតសភានៅតែមិនអាចអនុម័តច្បាប់សុខភាពថ្មីបាននៅយប់ថ្ងៃព្រហស្បតិ៍ម្សិលមិញ។ ប្រឈមនឹងស្ថានការណ៍បែបនេះ លោកត្រាំ គ្មានជម្រើសអ្វីក្រៅពីត្រូវប្រើធម៌ក្តី បែបគំរាមកំហែង ដាក់ឱសានវាទ ថាសភាត្រូវតែបោះឆ្នោតអនុម័តច្បាប់សុខភាព ដើម្បីលុបនិងយកទៅជំនួសច្បាប់អូបាម៉ាឃែរ នៅសុក្រនេះ!
សម្រាប់លោកត្រាំ ពេលវេលានៃការចរចាត្រូវចប់ ! គេត្រូវតែបោះឆ្នោតអនុម័ត ! បើត្រូវចាញ់ នោះច្បាប់អូបាម៉ាឃែរនឹងបន្តមានជីវិតទៀត ! តែគឺបក្សសាធារណរដ្ឋទាំងមូលដែលត្រូវរងគ្រោះថ្នាក់ ទៅថ្ងៃមុខ ! បក្សសាធារណរដ្ឋ អាចនឹងត្រូវចាញ់ឆ្នោតសភានិងព្រឹទ្ធសភា នៅឆ្នាំ២០១៨ ព្រោះបក្សនេះមិនបានគោរពពាក្យសន្យា លុបច្បាប់សុខភាពរបស់រដ្ឋបាលលោកអូបាម៉ា។
បក្សសាធារណរដ្ឋ សាកល្បងបិទខ្ទប់រំលាយច្បាប់អូបាម៉ាឃែរ តាំងពីលោកបារ៉ាក់អូបាម៉ា នៅកាន់តំណែងប្រធានាធិបតីមកម្ល៉េះ។ បក្សនេះធ្លាប់បានសន្យា ថានៅពេលជាប់ឆ្នោត មានប្រធានាធិបតីអ្នកសាធារណរដ្ឋដឹកនាំប្រទេស នឹងលុបច្បាប់នេះចោលភ្លាម។ ឥលូវមានឱកាសហើយហេតុអ្វីបែរត្រូវទុកឱ្យខកខានទៅវិញ ?! នេះជាលើកទីមួយហើយ គិតចាប់ពីឆ្នាំ២០០៦មក ដែលបក្សសាធារណរដ្ឋមានអំណាចយ៉ាងពេញដៃ កាន់តំណែងប្រធានាធិបតីហើយកាន់កាប់សភា និងព្រឹទ្ធសភាទាំងមូល។ មានអំណាចពេញដៃ ហើយមិនអាចអនុម័តច្បាប់ចេញ បូកផ្សំនឹងស្នាដៃដ៏ស្តួចស្តើងរបស់លោកត្រាំទៀត តើប្រជាពលរដ្ឋនឹងបន្តផ្តល់ជំនឿលើបក្សសាធារណរដ្ឋ នៅពេលបោះឆ្នោតពាក់កណ្តាលអាណាត្តិទៀតឬ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ