អាមេរិក៖គណបក្សសាធារណរដ្ឋផ្តើមនីតិវិធីស្តីពីច្បាប់សុខភាពថ្មីដើម្បីជំនួសច្បាប់ Obamacare
នៅសហរដ្ឋអាមេរិក គណបក្សសាធារណរដ្ឋដែលមានសម្លេងច្រើននៅសភាបានផ្តើមនីតិវិធីជជែកនាថ្ងៃចន្ទ ទី៦ មីនាលើសំណើថ្មីស្តីពីកំណែទម្រង់ច្បាប់ស្តីពីសុខភាព។ គោលដៅ គឺដើម្បីដាក់ច្បាប់ថ្មីនេះជំនួសច្បាប់ស្តីពីសុខភាពអនុម័តក្នុងជំនាន់លោកអូបាម៉ាដែលហៅថា Obamacare។ សូមជម្រាបជូនថា កំណែទម្រង់លើប្រព័ន្ធសុខភាពដោយសំដៅលប់ច្បាប់ Obamacare ជាការចង់បានរបស់លោកដូណាល់ ត្រាំដែលលោកយល់ថា បានធ្វើរដ្ឋចំណាយលុយច្រើនណាស់។
ចុះផ្សាយនៅថ្ងៃ៖
សំណើច្បាប់ថ្មីស្តីពីសុខភាពដែលមានការថ្លឹងថ្លែង និងជជែកពិភាក្សាយ៉ាងលំអិតជាមួយសេតវិមានទើបបានបោះផ្សាយ រួចនឹងត្រូវដាក់ឲ្យមានការជជែកដេញដោលគ្នានៅក្នុងសភានាប៉ុន្មានខែខាងមុខ។ លោក Paul Ryan ប្រធានក្រុមតំណាងរាស្រ្តសម្លេងភាគច្រើនបានថ្លែងថា វាល្មមដល់ពេលដែលត្រូវបើកទំព័រថ្មីដើម្បីស្រោចស្រង់ប្រព័ន្ធសុខភាព និងបិទបញ្ចប់ច្បាប់ស្តីពីសុខភាពសល់ពីជំនាន់លោកអូបាម៉ា Obamacare ដ៏មហន្តរាយ។
សូមជម្រាបជូនថា ច្បាប់ស្តីពីសុខភាព Obamacare ត្រូវបានអនុម័តក្នុងឆ្នាំ ២០១០ ដោយសភាដែលក្រុមអ្នកប្រជាធិបតេយ្យមានសម្លេងភាគច្រើន និងដែលតាំងពីក្រោយការអនុម័តមក ច្បាប់មួយនេះបានអនុញ្ញាតឲ្យពលរដ្ឋអាមេរិកជាង ២០លាននាក់ទទួលបានសេវាធានារ៉ាប់រងដោយមានជំនួយពីរដ្ឋជាលើកទី១ នៅក្នុងជីវិតរបស់ពួកគេ។ ច្បាប់ Obamacare បានជួយធ្វើឲ្យពលរដ្ឋអាមេរិកដែលគ្មានសេវាធានារ៉ាប់រងសុខភាពទាល់តែសោះថយចុះពាក់កណ្តាល ពី ១៦%មកនៅប្រមាណជា ៨,៩% ក្នុងឆ្នាំ ២០១៦។
សំណើច្បាប់ថ្មីស្តីពីសុខភាពដែលបានបង្ហាញចេញក្នុងថ្ងៃចន្ទ ទី៦ មីនានឹងត្រូវដាក់ឲ្យសភាជជែកដេញដោលគ្នានៅប៉ុន្មានខែខាងមុខ។ ពិតណាស់ថា ច្បាប់ថ្មីនេះមានគោលដៅជំនួសច្បាប់ Obamacare តែក៏មានការរក្សាទុកនូវមាត្រាសំខាន់ចំនួនពីរ ទី១ ទុកលទ្ធភាពឲ្យកូនៗបន្តស្ថិតក្នុងសេវាធានារ៉ាប់រងជាមួយឱពុក ម្តាយរហូតដល់អាយុ ២៦ឆ្នាំ និងទី២ ហាមក្រុមហ៊ុនធានារ៉ាប់រងមិនឲ្យរើសអើងក្នុងការទទួលអ្នកចង់បានសេវាធានារ៉ាប់រងដោយពិនិត្យមើលលើប្រវត្តិជម្ងឺរបស់ពួកគេ។
យ៉ាងណាក៏ដោយ និងបើទោះបីជាគណបក្សសាធារណរដ្ឋរបស់លោកដូណាល់ ត្រាំមានសម្លេងភាគច្រើននៅសភា និងព្រឹទ្ធសភាដែលអាចលុបច្បាប់ Obamacare ដោយគ្មានឧបសគ្គក៏ដោយ ក៏មានសមាជិកព្រឹទ្ធសភាខ្លះរបស់បក្សសាធារណរដ្ឋបានសម្តែងក្តីបារម្ភពីវិធានការយ៉ាងគំហុក និងទាញសញ្ញាព្រមានទុកជាមុនថា គេត្រូវចៀសវាងកុំឲ្យពលរដ្ឋអាមេរិកាំងណាដែលកំពុងទទួលបានសេវា Obamacare បែរជាបាត់បង់ទាំងស្រុងនូវសេវាធានារ៉ាប់រងសុខភាពរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ