ជនអន្តោប្រវេសន៍ខុសច្បាប់នៅសហរដ្ឋអាមេរិកកំពុងសំរុកចូលទៅសុំសិទ្ធិរស់នៅក្នុងប្រទេសកាណាដា
ចុះផ្សាយនៅថ្ងៃ៖
ស្តាប់ - ០៤:០៦
គ្រាន់តែរយៈពេលពីរខែប៉ុណ្ណោះក្នុងឆ្នាំ២០១៧នេះ ប្រទេសកាណាដាបានទទួលពាក្យសុំសិទ្ធិរស់នៅ ចំនួន ៥ ៥២០ ច្បាប់។ តួលេខនេះ គឺខ្ពស់ជាងបណ្តាឆ្នាំមុនៗរហូតទៅដល់ទ្វេដងឯណោះ។ អ្នកដាក់ពាក្យសុំសិទ្ធិរស់នៅទាំងនោះ គឺក្នុងឋានៈជាជនភៀសខ្លួន។ទន្ទឹមគ្នានេះផងដែរ ប្រទេសកាណាដាក៏កំពុងប្រឈមនឹងបាតុភូតអន្តោប្រវេសន៍ថ្មីមួយទៀត។ នោះគឺការសំរុកលួចឆ្លងចូលព្រំដែនពីសំណាក់ជនអន្តោប្រវេសន៍ខុសច្បាប់រស់នៅសហរដ្ឋអាមេរិក។ បណ្តាជនទាំងនោះកំពុងតែភ័យខ្លាចនឹងការបណ្តេញចេញក្រោយពីលោកប្រធានាធិបតី ដូណាល់ ត្រាំ បានដាក់គោលនយោបាយអន្តោប្រវេសន៍ដ៏តឹងរ៉ឹងមួយ។
កាលពីថ្ងៃទី២១ មីនាកន្លងទៅនេះ ក្រសួងអន្តោប្រវេសន៍កាណាដាបានផ្សព្វផ្សាយរបាយការណ៍ស្ថិតិមួយស្តីពីការសុំសិទ្ធិរស់នៅក្នុងឋានៈជាជនភៀសខ្លួន។ បើយើងប្រៀបធៀបជាមួយនឹងបណ្តាឆ្នាំមុនៗ ពោលគឺ ចន្លោះពីឆ្នាំ២០១១ ដល់ឆ្នាំ២០១៥ ប្រទេសកាណាដាបានទទួលពាក្យសុំសិទ្ធិរស់នៅក្នុងឋានៈជាជនភៀសខ្លួនជាមធ្យមក្នុងចំនួនតែ ១៧ ១៤៤ នាក់ប៉ុណ្ណោះក្នុងមួយឆ្នាំ។ ប៉ុន្តែ អ្វីដែលគួរឲ្យភ្ញាក់ផ្អើល សំរាប់រយៈពេល ២ ខែដើមឆ្នាំ២០១៧ ប្រទេសកាណាដាបានទទួលពាក្យសុំរបៀបនេះរហូតទៅដល់ចំនួន ៥ ៥២០ ច្បាប់។ បើតាមការប៉ាន់ស្មាន ពីពេលនេះរហូតទៅដល់ចុងឆ្នាំ ប្រសិនបើចំនួននេះនៅតែបន្តកើនឡើងបែបនេះ ប្រទេសកាណាដាអាចនឹងទទួលអ្នកសុំរស់នៅក្នុងប្រទេសរបស់ខ្លួនក្នុងឋានៈជាជនភៀសខ្លួនរហូតទៅដល់ ៣ ម៉ឺននាក់។
សូមរំលឹកផងដែរ កាលពីឆ្នាំ២០១៦ ចំនួនជនភៀសខ្លួនសុំសិទ្ធិរស់នៅបានកើនឡើងរហូតទៅដល់ចំនួន ២៣ ៨៩៥ នាក់។ ប៉ុន្តែ កាលទេសៈពេលនោះមានលក្ខណៈពិសេស ព្រោះវាជាការសន្យារបស់លោក Justin Trudeau ក្នុងពេលយុទ្ធនាការស្វែងរកសម្លេងឆ្នោត។ ក្រោយពីបានជាប់ឆ្នោតជានាយករដ្ឋមន្រ្តីកាណាដា លោក Trudeau បានគោរពពាក្យសន្យាដោយបានយល់ព្រមទទួលយកជនភៀសខ្លួនស៊ីរីជាង ២ ម៉ឺន។ ជនភៀសខ្លួនមួយចំនួនបានទទួលការឧបត្ថម្ភពីសំណាក់រដ្ឋាភិបាលកាណាដាដោយផ្ទាល់តែម្តង។ ចំណែកជនភៀសខ្លួនមួយផែ្នកធំទៀតត្រូវបានធានារ៉ាប់រងដោយពលរដ្ឋ និងបណ្តាសមាគមកាណាដានានា។
របាយការណ៍របស់ក្រសួងអន្តោប្រវេសន៍នេះក៏គាប់ជួនគ្នាផងដែរ ខណៈពេលដែលប្រទេសកាណាដាកំពុងតែទទួលប្រឈមនឹងបញ្ហាអន្តោប្រវេសន៍ថ្មីមួយទៀត។ នោះគឺជនអន្តោប្រវេសន៍ខុសច្បាប់រស់នៅសហរដ្ឋអាមេរិកកំពុងតែសំរុកលួចឆ្លងព្រំដែនមកដាក់ពាក្យសុំសិទ្ធិរស់នៅក្នុងប្រទេសកាណាដា។ ចាប់តាំងពីដើមឆ្នាំ២០១៧នេះ ភ្នាក់ងារប៉ូលីសព្រំដែនកាណាដាបានស្ទាក់ចាប់ជនអន្តោប្រវេសន៍ខុសច្បាប់ចំនួន ១ ១៣៤ នាក់ ដែលបានលួចឆ្លងព្រំដែន។ ជនអន្តោប្រវេសន៍និយមលួចឆ្លងព្រំដែនតាមខេត្តចំនួនបី គឺខេត្តកេបិច ខេត្តម៉ានីតូបា និងខេត្តកូឡំប៊ីប្រ៊ីតានិក។ ភាគច្រើននៃជនទាំងនោះបានសំរេចចិត្តប្រថុយចូលប្រទេសកាណាដា ព្រោះសំណើសុំសិទ្ធិរស់នៅលើទឹកដីអាមេរិករបស់ពួកគេត្រូវបានបដិសេធ។
ចំណែកមួយចំនួនទៀតបានសំរេចចិត្តចាកចេញពីសហរដ្ឋអាមេរិក ព្រោះគេបារម្ភភ័យខ្លាចនយោបាយអន្តោប្រវេសន៍ដ៏តឹងរ៉ឹង និងរើសអើងរបស់លោកប្រធានាធិបតី ដូណាល់ ត្រាំ។ បើយោងតាមបណ្តាសារព័ត៌មានកាណាដានានាបានឲ្យដឹងថា អ្នកលួចឆ្លងព្រំដែនទាំងនោះបានឆ្លៀតឱកាសកេងចំណេញពីកិច្ចព្រមព្រៀងកាណាដា-អាមេរិកស្តីពីជនភៀសខ្លួន។ តាមរយៈកិច្ចព្រមព្រៀមនោះ ប្រសិនបើមានជនអន្តោប្រវេសន៍ខុសច្បាប់ពីសហរដ្ឋអាមេរិកលួចឆ្លងចូលទឹកដីកាណាដាដោយពុំបានចូលតាមរយៈប៉ុស្តិ៍ត្រួតពិនិត្យព្រំដែនត្រឹមត្រូវ ប្រទេសកាណាដាគ្មានសិទ្ធិបណ្តេញជនអន្តោប្រវេសន៍ខុសច្បាប់ទាំងនោះចេញពីទឹកដីកាណាដាឡើយ។ ករណីនេះក៏អនុវត្តដូចគ្នាសំរាប់ជនអន្តោប្រវេសន៍ខុសច្បាប់នៅកាណាដា ដែលចង់ទៅរស់នៅសហរដ្ឋអាមេរិក។ ម៉្យាងទៀត បាតុភូតលួចឆ្លងដែនចូលប្រទេសកាណាដានេះក៏ដោយសារតែមានបណ្តាញក្រុមមេខ្យល់ជាអ្នករៀបចំផងដែរ។
អាជ្ញាធរកាណាដា និងអាមេរិកកំពុងតែស៊ើបអង្កេតករណីនេះ ដើម្បីចៀសវាងអំពើកេងប្រវ័ញ្ចជួញដូរមនុស្ស។ កន្លងមក លោកនាយករដ្ឋមន្រ្តីកាណាដា Justin Trudeau បានបង្ហាញជំហរទទួលស្វាគមន៍ចំពោះបណ្តាជនសុំសិទ្ធិរស់នៅលើទឹកដីកាណាដា។ ជាក់ស្តែងកាលពីខែមករាកន្លងទៅនេះ ពោលគឺប៉ុន្មានថ្ងៃក្រោយពីលោកប្រធានាធិបតីអាមេរិក ដូណាល់ ត្រាំ បានចេញក្រឹត្យប្រឆាំងអន្តោប្រវេសន៍ខុសច្បាប់ ពេលនោះ លោក Justin Trudeau បានសរសេរនៅលើបណ្តាសង្គម Twitter ដោយអះអាងថា កាណាដាបើកទ្វារស្វាគមន៍។ ហើយលោកស្នើឲ្យជនអន្តោប្រវេសន៍ខុសច្បាប់ទាំងនោះរៀបចំដាក់ពាក្យសុំសិទ្ធិរស់នៅលើទឹកដីកាណាដា។ ក្នុងជំនួបរវាងលោក Justin Trudeau និងលោក ដូណាល់ ត្រាំ កាលពីថ្ងៃទី១៣ កុម្ភៈកន្លងទៅនេះ លោកនាយករដ្ឋមន្រ្តីកាណាដាក៏បានបង្ហាញទស្សនៈផ្ទុយគ្នានឹងគោលនយោបាយអន្តោប្រវេសន៍ដ៏តឹងរ៉ឹងរបស់លោកប្រធានាធិបតី ដូណាល់ ត្រាំ។
សព្វថ្ងៃនេះ មានជនអន្តោប្រវេសន៍ខុសច្បាប់ប្រមាណជាង ១១ លាននាក់នៅលើទឹកដីសហរដ្ឋអាមេរិក។ ក្នុងនោះមានជនជាតិម៉ិចស៊ិកជាង ៥ លាននាក់។ ក្រោយពីបានក្លាយខ្លួនជាប្រធានាធិបតីអាមេរិក លោក ដូណាល់ ត្រាំ គ្រោងបណ្តេញជនអន្តោប្រវេសន៍ខុសច្បាប់ ដែលបានប្រព្រឹត្តបទល្មើសឧក្រិដ្ឋ។ បើតាមការគ្រោងទុក ជនអន្តោប្រវេសន៍ខុសច្បាប់ចន្លោះពី ២ ទៅ ៣ លាននាក់នឹងត្រូវបណ្តេញចេញពីទឹកដីអាមេរិក។ កាលពីសម័យលោកអតីតប្រធានាធិបតី បារ៉ាក់ អូបាម៉ា ចន្លោះពីឆ្នាំ២០០៩ ដល់ឆ្នាំ២០១៥ សហរដ្ឋអាមេរិកបានបណ្តេញជនអន្តោប្រវេសន៍ខុសច្បាប់ចំនួនជាង ២,៥ លាននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ