នាយករដ្ឋមន្ត្រីកាណាដា ទៅអាមេរិកដើម្បីស្តារមិត្តភាព
លោកចាស្ទីន ទ្រុយដូ នាយករដ្ឋមន្ត្រីថ្មីវ័យក្មេងរបស់កាណាដា បានអញ្ជើញទៅទស្សនកិច្ចនៅសហរដ្ឋអាមេរិកនៅថ្ងៃព្រហស្បតិ៍ទី ១០ មីនា តាមការអញ្ជើញរបស់លោកអូបាម៉ា ប្រធានាធិបតីសហរដ្ឋអាមេរិក។ នេះជាទស្សនកិច្ច ដែលក្រៅពីដើម្បីជជែកពីទំនាក់ទំនងទ្វេភាគី គឺវាជានិមិ្មតរូបនៃការស្តារមិត្តភាពរបស់ប្រទេសទាំងពីរឡើងវិញ។ អស់រយៈពេល១៩ឆ្នាំមកហើយ ដែលមិនមាននាយករដ្ឋមន្ត្រីកាណាដាណា ទៅបំពេញទស្សនកិច្ចនៅសហរដ្ឋអាមេរិកទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
ចាប់តាំងពីឆ្នាំ១៩៩៧មកដល់ពេលនេះ គឺលោកចាស្ទីន ទ្រុយដូ ជានាយករដ្ឋមន្ត្រីកាណាដាទីមួយហើយ ដែលបានទៅបំពេញទស្សនកិច្ច ព្រមទាំងលៀងភោជនីយាហារ នៅក្នុងសេតវិមានប្រធានាធិបតីអាមេរិក។ ទំនាក់ទំនងរវាងប្រទេសអាមេរិកខាងជើងទាំងពីរ ដែលជាប់ភូមិផងរបងនឹងគ្នា កាន់តែជួបភាពរង្គោះរង្គើរ ក្នុងរយៈពេលកាន់តំណែងរបស់អតីតនាយករដ្ឋមន្ត្រីកាណាដាលោក ស្តេហ្វិន ហារពើរ។ លោកអូបាម៉ា ដែលជាអ្នកប្រជាធិបតេយ្យ មានស្មារតីបើកទូលាយ មិនពេញចិត្តនឹងគំនិតបែបអភិរក្សជ្រុលនិយម របស់លោកអតីតនាយករដ្ឋមន្ត្រីកាណាដាទេ។
ប៉ុន្តែលោក ចាស្ទីន ទ្រុយដូ នាយករដ្ឋមន្ត្រីរូបសង្ហារ វ័យ៤៤ឆ្នាំ របស់កាណាដា ដែលទើបតែចូលកាន់តំណែងកាលពីខែវិច្ឆិកាកន្លងមកនេះ កំពុងតែទទួលបានការគាំទ្រយ៉ាងភ្លូកទឹកភ្លូកដី មិនថានៅកាណាដា មិនថានៅសហរដ្ឋអាមេរិកទេ។ ប្រជាជនក៏ដូចជាអ្នកនយោបាយប្រជាធិបតេយ្យអាមេរិក ពេញចិត្តនឹងស្មារតីស្វាហាប់ បើកទូលាយរបស់លោក នាយករដ្ឋមន្ត្រីកាណាដា។ មានគោលជំហរនយោបាយជាច្រើនរបស់នាយករដ្ឋមន្រីកាណាដា ដែលអ្នកដ៏ទៃគួរត្រូវយកគំរូតាម ជាពិសេសទាក់ទិន និងស្មារតីបង្រួបង្រួមគ្នា ការមិនចោទប្រកាន់ទំលាក់កំហុសទៅវិញទៅមក ស្មារតីមិនប្រកាន់ពូជសាសន៍ រឺស្អប់ខ្ពើមម្ខាង ស្រលាញ់តែម្ខាង។ មានអ្នកខ្លះបានទាំងប្រៀបប្រដូចប្តីប្រពន្ធរបស់លោក នាយករដ្ឋមន្ត្រីកាណាដ ទៅនឹងប្តីប្រពន្ធ ប្រធានាធិបតីអាមេរិក លោកកេណឺឌី ទៀតផង។
ជាការពិត ដំណើរទស្សនកិច្ច ដ៏សែនទន្ទឹងរងចាំនេះ គឺជាឱកាសអាចឲ្យមេដឹកនាំទាំងពីរ អាមេរិក និងកាណាដា បានមើលចិត្តគ្នា និងស្គាល់គ្នាឲ្យច្បាស់។ ក្រៅពីពិធីលៀងអាហារ ដោយមានការចូលរួមពីភ្ញៀវធំៗផងនេះ ភាគីទាំងពីរបានលើកយកបញ្ហាធំមកពិភាក្សានោះគឺ បញ្ហាបរិស្ថាន ការបញ្ចេញឧស្ម័នពុលក្នុងបរិយាកាស។ ប្រទេសទាំងពីរ ដែលជាម្ចាស់ហត្ថលេខីនៃសន្និសីទក្រុងប៉ារីសស្តីពីបរិស្ថាន កាលពីខែធ្នូឆ្នាំ២០១៥ បានសន្យានៅថ្ងៃព្រហស្បតិ៍ទី ១០ មីនា ថានឹងសហការគ្នា ដើម្បីកាត់បន្ថយការបញ្ចេញឧស្ម័នមេតានឲ្យបានពី៤០ទៅ ៤៥% ពីនេះរហូតដល់ឆ្នាំ២០២៥។
សូមបញ្ជាក់ថា ឧស្ម័នមេតាន ដែលបញ្ចេញតាមរយៈឧស្ម័នហ្គាសធម្មជាតិ គឺមានផ្ទុកឧស្ម័នកាបូនិកដល់ទៅ ២៥%លើសឱស្ម័នដ៏ទៃទៀត។ សកម្មភាពបំលែង និងបូមយកហ្គាសធម្មជាតិទាំងនេះនៅសហរដ្ឋមេរិក គឺជាការព្រួយបារម្ភចំបង នៃអ្នកការពារបរិស្ថានទាំងនៅអាមេរិក ក៏ដូចជាកាណាដា។ លោកនាយករដ្ឋមន្ត្រីកាណាដា បានប្តេជ្ញាថាលោកនឹងធ្វើការដើម្បីកាត់បន្ថយឧស្ម័នពុល ដែលជាប្រភពនៃការកើនឡើងកំដៅផែនដី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ