លោកដូណាល់ ត្រាំ បំពេញទស្សនកិច្ចនៅអារ៉ាប៊ីសាអូឌីត
ចុះផ្សាយនៅថ្ងៃ៖
ស្តាប់ - ០៥:៥៣
ព្រឹកថ្ងៃសៅរ៍២០ឧសភានេះ ប្រធានាធិបតីអាមេរិក ដូណាល់ ត្រាំ បានធ្វើដំណើរទៅដល់ ទីក្រុងរីយ៉ាត ប្រទេសអារ៉ាប៊ីសាអូឌីត។ ព្រះមហាក្សត្រសាល់ម៉ាន បានទទួលលោកត្រាំយ៉ាងអធិកអធម។ នេះជាទស្សនកិច្ចលើកដំបូងរបស់លោកត្រាំ នៅក្រៅប្រទេស គិតតាំងពីលោកឡើងកាន់អំណាចមក។ គណបក្សសាធារណរដ្ឋសង្ឃឹមថា ទស្សនកិច្ចលោកដូណាល់ ត្រាំ នៅបរទេសលើកនេះ អាចជួយបន្ធូររឿងអាស្រូវនយោបាយរបស់លោកត្រាំបានខ្លះ។
ហេតុអ្វីលោកដូណាល់ ត្រាំ ជ្រើសរើសអារ៉ាប៊ី សាអូឌីត ជាប្រទេសទី១ សម្រាប់ទស្សនកិច្ចដំបូងរបស់លោកនៅបរទេស?
ជាទូទៅ ប្រធានាធិបតីអាមេរិក អាណត្តិមុនៗ តែងជ្រើសរើសប្រទេសជិតខាង ដូចជាកាណាដា រឺក៏ម៉ិចស៊ិក ក្នុងដំណើរទស្សកិច្ចលើកដំបូងនៅក្រៅប្រទេស។ ទិសដៅចំបងនៃទស្សនកិច្ចលោកត្រាំនៅអារ៉ាប៊ីសាអូឌីត គឺដើម្បីបង្ហាញជំហរអាមេរិកក្នុងការបន្តកិច្ចសហប្រតិបត្តិការជាមួយសម្ព័ន្ធមិត្ត ក្នុងការកំចាត់ភេរវកម្ម ក្នុងតំបន់។ ឆ្លៀតពេលនេះ គេមើលឃើញដែរថា លោកត្រាំចង់ស្តារទំនាក់ទំនងរវាងអាមេរិក ជាមួយអារ៉ាប៊ីសាអូឌីតឡើងវិញ ព្រោះក្នុងអាណត្តិរបស់លោកអូបាម៉ា ទំនាក់ទំនងរវាងអាមេរិក និងអារ៉ាប៊ីសាអូឌីតមិនសូវជាល្អូកល្អឺនទេ។ លោកអូបាម៉ានិងមេដឺកនាំមហាអំណាចលោកខាងលិច បានសម្រេចចេញកិច្ចព្រមព្រៀងនុយក្លេអ៊ែរជាមួយអ៊ីរ៉ង់ ដែលជាសត្រូវរបស់អារ៉ាប៊ីសាអូឌីត ក្នុងតំបន់។ ប្រទេសអារ៉ាប់និកាយស៊ុននីត និងអ៊ីស្រាអែល មិនសូវចូលចិត្តលោកអូបាម៉ាទេ។
កន្លងមក ក្នុងពេលឃោសនាបោះឆ្នោតអាមេរិក លោកដូណាល់ ត្រាំ ក៏ធ្លាប់រិះគន់កិច្ចព្រមព្រៀងនុយក្លេអ៊ែរអ៊ីរ៉ង់ដែរ។ អញ្ចឹងពេលលោកត្រាំ ជាប់ឆ្នោតនៅអាមេរិក អារ៉ាប៊ី សាអូឌីតសប្បាយចិត្តមិនតិចទេ។ លោកដូណាល់ ត្រាំ នឹងជួយស្តារទំនាក់ទំនងអាមេរិក-អារ៉ាប៊ីសាអូឌីត អោយប្រសើរឡើងវិញ។ កាលពីខែមិនា លោកត្រាំ ធ្លាប់ទទួលរាជបុត្រស្នងរាជលំដាប់ទី២របស់អារ៉ាប៊ី សាអូឌីត គឺព្រះអង្គម្ចាស់ បេន សាល់ម៉ាន នៅសេតវិមានរួចហើយ។ ហើយរដ្ឋមន្ត្រីការពារជាតិអាមេរិកជីម ម៉ាទីស ក៏បានទៅទីក្រុងរីយ៉ាតរួចហើយដែរ។
លោកត្រាំ ធ្លាប់លើកឡើងថាគឺនៅអារ៉ាប៊ីសាអូឌីតហ្នឹងហើយ ដែលអាមេរិកនឹងចាក់គ្រឹះធ្វើកិច្ចសហប្រតិបត្តិការ និងគាំទ្រប្រទេសសម្ព័ន្ធមិត្ត ដើម្បីកំចាត់ក្រុមជ្រុលនិយម។ ថ្ងៃអាទិត្យស្អែក ទីក្រុងរីយ៉ាតរៀបជំនួបកំពូលអារ៉ាប់ មានមេដឹកនាំមកពីជាង៥០ប្រទេសចូលរួម។ ក្នុងឧកាសនេះ លោកត្រាំក៏អាចឆ្លៀតពង្រឹងទំនាក់ទំនងអាមេរិក និងប្រទេសអារ៉ាប់ផ្សេងទៀតផងដែរ។
គេមើលឃើញថា ប្រតិបត្តិការអាមេរិកកំចាត់ក្រុមភេរវកម្ម កំចាត់ក្រុមជ្រុលនិយមក្នុងតំបន់ ក៏ជាមូលហេតុរបស់លោកត្រាំ ក្នុងការផ្សព្វផ្សាយឧស្សាហកម្មអាវុធរបស់អាមេរិកដែរ។ លោកត្រាំចង់លក់អាវុធអោយអារ៉ាប៊ីសាអូឌីត តាមរយៈកិច្ចសន្យាជាច្រើន ដែលមានតម្លៃ១០០ពាន់លានដុល្លារ។ ប៉ុន្តែ គេសួរថា តើក្រុងរីយ៉ាតអាចចុះហត្ថលេខាទិញដែរទេ ហើយបើទិញ តើត្រូវបង់លុយដូចម្តេច ព្រោះពេលនេះ ថ្លៃប្រេងឆៅដាំក្បាលចុះ មិនទាន់ងើបតម្លៃឡើងបានស្រួលទេ។ និយាយរឿងរកស៊ីនេះ អារ៉ាប៊ីសាអូឌីត ជាប្រទេសមហាសេដ្ឋីប្រេង លោកដូណាល់ ត្រាំ ជាប្រធានាធិបតី មានបទពិសោធន៍រកស៊ីជ្រៅជ្រះ នេះក៏អាចជាមូលហេតុចំបងមួយដែរ ដែលធ្វើអោយលោកត្រាំ ជ្រើសរើសអារ៉ាប៊ីសាអូឌីត ជាប្រទេសដំបូងក្នុងដំណើរទស្សនកិច្ច។
ប្រធានាធិបតីអាមេរិក ទស្សនកិច្ចអារ៉ាប៊ីសាអូឌីត ២ថ្ងៃ រហូតថ្ងៃអាទិត្យស្អែក រួចលោកបន្តដំណើរទៅអ៊ីស្រាអែល ប៉ាឡេស្ទីន បុរីវ៉ាទីកង់ និងបែលហ្ស៊ិក។ នៅបែលហ្ស៊ិក លោកនឹងចូលរួមជំនួបអូតង់ រួចហើយលោកបន្តទៅស៊ីស៊ីល ចូលរួមជំនួបប្រទេសឧស្សាហកម្មG៧។
ទិសដៅសន្ទរកថារបស់លោកដូណាល់ ត្រាំ នៅទីក្រុងរីយ៉ាត គឺចៀសបង្កភាពតានតឹងជាមួយប្រទេសអ៊ីស្លាម
ក្នុងជំនួបមេដឺកនាំប្រទេសអារ៉ាប់និងប្រទេសកាន់សាសនាអ៊ីស្លាម មកពីជាង៥០ប្រទេស នៅអារ៉ាប៊ីសាអូឌីត ថ្ងៃអាទិត្យស្អែកនេះ លោកត្រាំ នឹងថ្លែងសន្ទរកថា លើកឡើងពីចក្ខុវិស័យសន្តិភាពរបស់សាសនាអ៊ីស្លាម។ ដើម្បីពង្រឹងចំណងអាមេរិកជាមួយបណ្តាប្រទេសនៅតំបន់បូព៌ា លោកត្រាំក៏នឹងឆ្លៀតបង្ហាញថាអាមេរិកគាំទ្រប្រទេសកាន់សាសនាអ៊ីស្លាម ក្នុងការស្វែងរកស្ថិរភាពសន្តិភាពក្នុងតំបន់ ប្រឈមនឹងក្រុមជ្រុលនិយម។ ដើម្បីចៀសវាងភាពតានតឹងជាមួយប្រទេសកាន់សាសនាអ៊ីស្លាម លោកត្រាំច្បាស់ជាមិននិយាយពីបញ្ហាសិទ្ធិមនុស្ស រឺក៏ក្រឹត្យអន្តោប្រវេសន៍របស់លោក ដែលហាមឃាត់ពលរដ្ឋមកពីប្រទេសចំនួន៧មិនអោយជាន់ទឹកដីអាមេរិកទេ។
គួររំលឹកថា ក្រឹត្យអន្តោប្រវេសន៍របស់លោកដូណាល់ ត្រាំ មានទិសដៅចូលរួមបង្ការភេរវកម្មនៅអាមេរិក ប៉ុន្តែមើលអោយជាក់ស្តែង តាមក្រឹត្យនេះ គេរឹតតែឃើញថា លោកត្រាំជាមនុស្សមិនភ្លេចប្រយោជន៍រកស៊ីរបស់លោកនៅតាមប្រទេសអារ៉ាប់ដែរ។ ក្រឹត្យលោកត្រាំហាមឃាត់ពលរដ្ឋ៧ប្រទេសមិនអោយចូលអាមេរិក មានពលរដ្ឋមកពីប្រទេសដូចជាអ៊ីរ៉ាក់ អ៊ីរ៉ង់ ស៊ីរី ស៊ូដង់ រឺសូម៉ាលី ជាដើម។ ប្រទេសទាំងនេះសុទ្ធតែជាប្រទេសក្រីក្រ។ តែប្រទេសកាន់សាសនាអ៊ីស្លាម ប្រទេសអ្នកមានដូចជាអារ៉ាប៊ី សាអូឌីត អេមៀរ៉ាតអារ៉ាប៊រួម រឺប្រទេសដូចជាអេហ្ស៊ីប គ្មានឈ្មោះក្នុងបញ្ជីលោកត្រាំទេ។ នៅអារ៉ាប៊ីសាអូឌីត សំបូរក្រុមហ៊ុនអាមេរិករកស៊ី នៅអេហ្ស៊ីបមានក្រុមហ៊ុនរកស៊ីយីហោត្រាំ ដល់ទៅ២ ហើយនៅអេមៀរ៉ាតអារ៉ាប់រួមក៏មានយីហោត្រាំដែរ។ អញ្ចឹងលោកត្រាំមិនបានហាមឃាត់ពលរដ្ឋប្រទេសធំៗទាំងនេះមិនអោយជាន់ដីអាមេរិកទេ ព្រោះកុំអោយខាតប្រយោជន៍សហគ្រាសអាមេរិក រឺសហគ្រាសយីហោត្រាំ។
ព្រឹទ្ធសភាអាមេរិកប្រកាសថា លោកចេម ខមី អតីតនាយកFBIព្រមចូលបំភ្លឺរឿងអាស្រូវនយោបាយរបស់លោកត្រាំ
បក្សកាន់អំណាចសាធារណរដ្ឋសង្ឃឹមថា ទស្សនកិច្ចលោកត្រាំនៅក្រៅប្រទេសអាចជួយបន្ធូរបរិយាកាសអាប់អួរក្នុងស្រុក ដែលបង្កឡើងដោយរឿងអាស្រូវរបស់លោកដូណាល់ ត្រាំ មួយរយៈចុងក្រោយមនេះ។ ប៉ុន្តែ ព្រឹទ្ធសភាអាមេរិកទើបនឹងប្រកាសថា លោកចេម ខមី ជាអតីតនាយកFBI ដែលលោកត្រាំបណ្តេញចេញពីតំណែងយ៉ាងទាន់ហន់ កាលពី១០ថ្ងៃមុន បានព្រមឡើងមកធ្វើបំភ្លឺទាក់ទងរឿងអាស្រូវនយោបាយលោកត្រាំ។
ចម្លើយបំភ្លឺរបស់លោកខមី នៅមុខសភា មានសារៈសំខាន់ណាស់ អាចអោយគ្រប់គ្នាដឹងថា តើលោកដូណាល់ ត្រាំពិតជាចង់លូកដៃក្នុងកិច្ចការស៊ើបអង្កេតរបស់ FBI តើលោកត្រាំពិតជាធ្លាប់បានសុំអោយអតីតនាយក FBIបិទបញ្ចប់ការស៊ើបអង្កេតលើអតីតទីប្រឹក្សាសន្តិសុខជាតិ ម៉ៃឃើល ភ្លីន ដែររឺយ៉ាងណា។ គេមើលឃើញថា លោកត្រាំបានបណ្តេញលោកខមី ពីតំណែងនាយកFBI កាលពីថ្ងៃ៩ឧសភា ក៏ដោយសារFBIស៊ើបអង្កេតពីទំនាក់ទំនងដែលក្រុមការងារលោក អាចជាប់ពាក់ព័ន្ធជាមួយរុស្ស៊ីនោះហើយ។ ការបំភ្លឺរបស់លោកខមី ទាក់ទងរឿងអាស្រូវអស់នេះ មានសារៈសំខាន់ណាស់ ព្រោះបើលោកត្រាំបានអន្តរាគមន៍ ក្នុងការងារស៊ើបអង្កេតរបស់FBIមែន គេអាចចោទលោកត្រាំថាលូកដៃក្នុងប្រព័ន្ធយុត្តិធម៌ អញ្ចឹងគេអាចធ្វើនិតិវិធីទំលាក់លោកពីអំណាចបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ