រដ្ឋមន្ត្រីការពារជាតិអាមេរិកបំពេញទស្សនកិច្ចនៅអារ៉ាប៊ីសាអូឌីត
រដ្ឋមន្ត្រីក្រសួងការពារជាតិអាមេរិក លោក James MATTIS អញ្ជើញទៅបំពេញទស្សនកិច្ចនៅទីក្រុងRyadប្រទេសអារ៉ាប៊ីសាអ៊ូឌីតនៅថ្ងៃពុធនេះ។ គោលដៅនៃដំណើរទស្សនកិច្ចនេះ គឺដើម្បីផ្តល់សន្ទុះជាថ្មីទំនាក់ទំនងរវាងសហរដ្ឋអាមេរិកនិងសម្ព័ន្ធមិត្តអារ៉ាប៊ីសាអូឌីតដែលមានគូប្រជែងរួមគ្នាគឺអ៊ីរ៉ង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
លោក MATTIS បានពន្យល់ប្រាប់ថា ដំណើរមកទីក្រុង Ryad នេះ គឺដើម្បីចង់ស្តាប់ជាពិសេសសេចក្តីត្រូវការពិតប្រាកដរបស់អារ៉ាប៊ីសាអ៊ូឌីត។ នៅទីនេះ លោកនឹងត្រូវជួបប្រាស្រ័យជាមួយមហាក្សត្រ Salamane ព្រះអង្គម្ចាស់ Mohammed ben Nayef ដែលជារជ្ជទាយាទទី១ និងរជ្ជទាយាទទី២ដ៏មានឥទ្ធិពលខ្លាំងនៅក្នុងប្រទេសគឺព្រះអង្គម្ចាស់ Mohammed ben Salmane ដែលធ្លាប់ត្រូវបានលោក Donald Trump ទទួលជួបម្តងរួចមកហើយកាលពីមួយខែមុននៅទីក្រុងវ៉ាស៊ីនតោន។
រដ្ឋមន្ត្រីការពារជាតិអាមេរិក បានលើកឡើងដែរថា អារ៉ាប៊ីសាអ៊ូឌីត នៅឱកាសកិច្ចចរចាលើកិច្ចព្រមព្រៀងស្តីពីកម្មវិធីនុយក្លេអ៊ែរអ៊ីរ៉ង់ដែលចុះហត្ថលេខាដោយរដ្ឋបាលលោកអូបាម៉ាកាលពីខែកក្កដាឆ្នាំ២០១៥ មានអារម្មណ៍ថាហាក់ដូចជាបានបាត់បង់ឱកាសល្អ។
ថ្នាក់ដឹកនាំអារ៉ាប៊ីសាអ៊ូឌីតវិញដែលតែងតែព្រួបារម្មណ៍នៅលើការជ្រៀតជ្រែករបស់អ៊ីរ៉ង់នៅក្នុងបណ្តាប្រទេសអារ៉ាបមួយចំនួនដោយ អ៊ីរ៉ង់់ បានយកសហគមន៍អ៊ីស្លាមនិកាយស៊ីអ៊ីតប្រើជាកូនអុកដើម្បីផលប្រយោជន៍របស់ខ្លួនដូចជានៅ Bahreïn ឬ Liban ឬក៏នៅយេមែន។
ជាមួយនឹងរដ្ឋបាលរបស់លោក Donald Trump អារ៉ាប៊ីសាអូឌីត ហាក់ដូចជាមានបង្អែក ដោយរដ្ឋបាលលោកត្រាំ តែងតែបរិហារឥតឈប់ឈរ ថាអ៊ីរ៉ង់គឺជាប្រទេសដ៏គ្រោះថ្នាក់បំផុតនៅតំបន់មជ្ឈិមបូព៌ា។
ថ្នាក់ដឹកនាំមន្ទីរ Pentagone នៅខណៈនេះ ប្រកាន់ជំហរប្រុងប្រយ័ត្ននៅលើសេចក្តីសំរេចចិត្តនានាដែលអាមេរិក អាចនឹងត្រូវជួយអារ៉ាប៊ីសាអូឌីត។ ឧទ្ទាហរណ៍ដូចជាអាមេរិក អាចនឹងលើកចេញវិញ ការហាមឃាត់លក់អាវុធទំនើបៗឲ្យដល់អារ៉ាប៊ីសាអ៊ូឌីត ការហាមលក់អាវុធដែលត្រូវបានសម្រេចនៅក្នុងជំនាន់រដ្ឋបាលលោក អូបាម៉ាកាលពីខែធ្នូមុន ដោយហេតុតែមានជនរងគ្រោះស៊ីវីលស្លាប់ជាច្រើនពេកនៅក្នុងសង្គ្រាមស៊ីវីលនៅយេមែន។
មិនតែប៉ុណ្ណោះរដ្ឋបាលអាមេរិក ក៏មានបំណងចង់អោយអារ៉ាប៊ីសាអ៊ូឌីត បង្កើនកិច្ចប្រឹងប្រែងរបស់ខ្លួនផងដែរនៅលើការចូលរួមយុទ្ធនាការប្រយុទ្ធប្រឆាំងទល់នឹងក្រុមអ៊ីស្លាមជីហាតអង្គការរដ្ឋអ៊ីស្លាមនៅអ៊ីរ៉ាក់និងនៅស៊ីរី ឧទ្ទាហរណ៍ដូចជាជួយនៅលើប្រតិបត្តិការវាយប្រហារតាមជើងអាកាសឬក៏បង្កើនជំនួយមនុស្សធម៌ជាដើម-នេះបើយោងតាមយោបល់របស់រដ្ឋមន្ត្រីការពារជាតិអាមេរិក។ លោក Mattis បានសង្កត់ពាក្យទៀតថា សង្រ្គាមប្រយុទ្ធប្រឆាំងទល់នឹងអង្គការរដ្ឋអ៊ីស្លាម គឺ ជាអាទិភាពចំបងរបស់កងទ័ពអាមេរិកនៅខណៈនេះ។
សូមបញ្ជាក់ថា បន្ទាប់ពីដំណើរទស្សនកិច្ចនៅអារ៉ាប៊ីសាអ៊ូឌីត លោក Mattis នឹងត្រូវបន្តដំណើរទៅកាន់អេហ្ស៊ីពនៅថ្ងៃព្រហស្បតិ៍ស្អែកហើយនៅថ្ងៃសុក លោក នឹងបន្តទស្សនកិច្ចរបស់លោកនៅអ៊ីស្រាអ៊ែល។ នៅទីនោះ រដ្ឋមន្ត្រីការពារជាតិអាមេរិកនឹងត្រូវជួបប្រាស្រ័យជាមួយនាយករដ្ឋមន្ត្រីអ៊ីស្រាអែល មុននឹងអញ្ជើញទៅកាន់ប្រទេសកាតានៅថ្ងៃសៅរ៍ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ