ស្លាប់២នាក់ក្នុងបាតុកម្មតវ៉ានៅវ៉េណេស៊ុយអេឡា មន្ត្រីអ.ស.ប លាតំណែង
ចុះផ្សាយនៅថ្ងៃ៖
ស្តាប់ - ០៥:១៧
នៅវ៉េណេស៊ុយអេឡា ប្រជាជនបានបន្តចុះតាមដងផ្លូវ ថ្ងៃព្រហស្បតិ៍ម្សិលមិញ ធ្វើការតវ៉ាទូទាំងប្រទេស ប្រឆាំងនឹងគម្រោងរដ្ឋធម្មនុញ្ញរបស់ប្រធានាធីបតីម៉ាឌូរ៉ូ។ បាតុករជាយុវជន២នាក់ បានស្លាប់ដោយគ្រាប់កាំភ្លើង។ ម្សិលមិញ អាជ្ញាធរបានចាប់ខ្លួនមនុស្ស១៧៣នាក់។ លោក Isaias Medina ជាមន្ត្រីអង្គការសហប្រជាជាតិក្នុងបេសកកម្មនៅវ៉េណេស៊ុយអេឡាបានលាចុះពីតំណែង ដើម្បីបរិហារការបង្រ្កាបហិង្សារបស់រដ្ឋាភិបាល។ ការតវ៉ាជិត៤ខែមកនេះ បានធ្វើអោយមានមនុស្សស្លាប់៩៩នាក់ និងរាប់រយនាក់ត្រូវបានអាជ្ញាធរចាប់ខ្លួន។
ក្រុមប្រឆាំងសម្រុកធ្វើការតវ៉ានៅទូទាំងប្រទេស
ក្រុមប្រឆាំងសម្រុកចលនាតវ៉ា ជាពិសេសម្សិលមិញនេះ មានការតវ៉ាទូទាំងប្រទេស ដោយសារនៅថ្ងៃ៣០កក្កដានេះ គឺមិនដល់១០ថ្ងៃទេ នឹងមានការបោះឆ្នោតជ្រើសរើសសមាជិកសភាធម្មនុញ្ញ៥៤៥នាក់ ដើម្បីចូលរួមសរសេររដ្ឋធម្មនុញ្ញឡើងវិញ។ ទិសដៅចំបងនៃបាតុកម្មនៅវ៉េណេស៊ុយអេឡា គឺដើម្បីដាក់សម្ពាធប្រធានាធិបតី មិនអោយសម្រេចគម្រោងរដ្ឋធម្មនុញ្ញ និងទាមទារអោយរៀបចំការបោះឆ្នោតមុនអាណត្តិ នៅឆ្នាំ២០១៨។ សូមបញ្ជាក់ថា លោកម៉ាឌូរ៉ូ ត្រូវផុតអាណត្តិប្រធានាធិបតី នៅដើមឆ្នាំ២០១៩។
ក្រុមប្រឆាំងបានទទួលជោគជ័យក្នុងការបោះឆ្នោតសភា កាលពីចុងឆ្នាំ២០១៥ តែលោកម៉ាឌូរ៉ូបែរជាមិនទទួលស្គាល់សភា ហើយតុលាការកំពូលស្ថិតក្រោមឥទ្ធិពលរបស់ប្រធានាធិបតីក៏ធ្លាប់រឹបអូសអំណាចសភាមកកាន់កាប់។ ដូច្នេះ ក្រុមប្រឆាំងមិនសុខចិត្តទេ ត្រូវធ្វើយ៉ាងណារារាំងកុំអោយលោកម៉ាឌូរ៉ូ អាចសម្រេចទិសដៅកែប្រែរដ្ឋធម្មនុញ្ញនោះអោយបាន។ ដូច្នេះ ត្រូវតែបន្តបាតុកម្មដាក់សម្ពាធ កុំអោយមានការបោះឆ្នោតរើសសមាជិកសភា ថ្ងៃ៣០កក្កដា អាចប្រព្រឹត្តទៅបាន។
លោកម៉ាឌូរ៉ូជាប្រធានាធិបតីចង់មានរដ្ឋធម្មនុញ្ញថ្មី ជំនួសរដ្ឋធម្មនុញ្ញឆ្នាំ១៩៩៩។ លោកចង់អោយប្រជាជនគ្រប់ជាន់ថ្នាក់ ចេញមកពីជួរកម្មករ សហគ្រាស រឺក៏ជនពិការជាដើម អាចចូលរួមជ្រើសរើសសមាជិកមួយចំនួនក្នុងសភា។ ក្រុមប្រឆាំងយល់ថា លោកម៉ាឌូរ៉ូ ធ្វើដូច្នេះ ដើម្បីបន្តក្តោបក្តាប់អំណាចតែប៉ុណ្ណោះ។ កាលពីថ្ងៃ១៦កក្កដា ក្រុមប្រឆាំងបានរៀបចំការបោះឆ្នោតប្រជាមតិមិនផ្លូវការ ដែលមានមនុស្សរហូតជាង៧លាននាក់ ទាំងក្នុងនិងក្រៅប្រទេស នាំគ្នាបោះឆ្នោតប្រឆាំងគម្រោងរដ្ឋធម្មនុញ្ញរបស់លោកម៉ាឌូរ៉ូ។ នេះជាជោគជ័យសម្រាប់ក្រុមប្រឆាំង។ សហរដ្ឋអាមេរិកបានទាមទារអោយលោកម៉ាឌូរ៉ូបោះបង់គម្រោងរដ្ឋធម្មនុញ្ញដែរ ដោយគំរាមដាក់ទណ្ឌកម្មសេដ្ឋកិច្ចលើវ៉េណេស៊ុយអេឡា។ លោកដូណាល់ ត្រាំ ថែមទាំងសន្យានៅជិតនឹងប្រជាជនវ៉េណេស៊ុយអេឡា ក្នុងដំណើរការស្វែងរកលទ្ធិប្រជាធិបតេយ្យទៀតផង។ លោកម៉ាឌូរ៉ូខឹងអាមេរិកបានចោទទៅអាមេរិកវិញថា នៅពីក្រោយចលនាតវ៉ានៅវ៉េណេស៊ុយអេឡា។ ប្រឈមនឹងសម្ពាធការទូតអន្តរជាតិ លោកម៉ាឌូរ៉ូប្រកាសនៅតែសម្រេចអោយមានគម្រោងរដ្ឋធម្មនុញ្ញ ដើម្បីសន្តិភាព និងលើកស្ទួយសេដ្ឋកិច្ចឡើងវិញ។
ថ្ងៃ១៦កក្កដា ប្រជាជន៧លាន៦សែននាក់ បានបោះឆ្នោតប្រជាមតិ ចង់អោយកងទ័ពគាំទ្ររដ្ឋធម្មនុញ្ញឆ្នាំ១៩៩៩ តែកងទ័ពមិនបាននៅខាងប្រជាជនទេ។ ដូច្នេះហើយ ស្ថានការណ៍កាន់តែធ្ងន់ ហិង្សាបង្ក្រាបនៅតែមាន រហូតធ្វើអោយលោកអ៊ីសៃអាស មេឌីណា ដែលជាមន្ត្រីអសបនៅវ៉េំណេស៊ុយអេឡា លាចុះពីតំណែង ដើម្បីថ្កោលទោសការបង្ក្រាបបាតុកម្ម។ ប៉ុន្តែ រដ្ឋាភិបាលវ៉េណេស៊ុយអេឡាប្រាប់ថា គាត់ត្រូវបានបណ្តេញចេញពីការងារប៉ុណ្ណោះ។
បាតុករ២នាក់ដែលស្លាប់ដោយគ្រាប់កាំភ្លើងម្សិលមិញនេះ សុទ្ធតែជាយុវជន អាយុ២៤ឆ្នាំ និង២៣ឆ្នាំ ដែលបានចូលរួមបាតុកម្ម នៅជាយក្រុងការ៉ាកាស និងនៅវ៉ាឡិនស្យា ភាគខាងជើងប្រទេស។ ចលនាតវ៉ាទូទៅម្សិលមិញនេះ មានធ្វើនៅតាមទីក្រុងជាច្រើន និងបានបង្កការរាំងស្ទះដល់ចរាចរណ៍។ សហគ្រាស ក្រុមហ៊ុន សហជីព និស្សិត រឺក៏ក្រុមហ៊ុនដឹកជញ្ជូន នាំគ្នាផ្អាកដំណើរការ ដើម្បីចូលរួមបាតុកម្ម។
ដូចជំរាបជូនអញ្ចឹង ក្រុមបាតុករមិនចង់អោយមានការបោះឆ្នោតជ្រើសរើសអ្នកតាក់តែងច្បាប់ថ្មី នៅថ្ងៃ៣០កក្កដានេះទេ។ ពួកគេបារម្ភថា សភាធម្មនុញ្ញថ្មីអាចអោយលោកម៉ាឌូរ៉ូ យកគំរូដឹកនាំសេដ្ឋកិច្ចតាមប្រទេសគុយបា។ ក្រុមប្រឆាំងវិញប្រកាសមិនចូលរួមបោះឆ្នោតទេ។ គម្រោងរដ្ឋធម្មនុញ្ញថ្មីនេះ នឹងជួយអោយលោកម៉ាឌូរ៉ូមានអំណាចពេញលេញ ដើម្បីរំលាយសភា។ ហើយអាណត្តិសភាថ្មីក៏នៅមិនទាន់បានកំណត់ថាត្រូវមានប៉ុន្មានឆ្នាំនៅឡើយ។
បុគ្គលិកក្រុមហ៊ុនប្រេងជាតិ និងស្ថាប័នរដ្ឋបន្តដំណើរការការងារ
អ្នកដែលមិនចូលរួមចលនាតវ៉ាម្សិលមិញ ច្រើនតែជាបុគ្គលិកស្ថាប័នរដ្ឋ បែបយ៉ាងបុគ្គលិកក្រុមហ៊ុនប្រេងជាតិវ៉េណេស៊ុយអេឡា ដែលហៅកាត់ថា PDVSA។ ពួកគេប្រហែលអាចបារម្ភមិនហ៊ានទៅតវ៉ា ព្រោះខ្លាចត្រូវចៅហ្វាយនាយបណ្តេញចេញពីការងារ។ សូមបញ្ជាក់ថា ប្រធានាធិបតីម៉ាឌូរ៉ូ កាន់កាប់ឧស្សាហកម្មប្រេង និងស្ថាប័នរដ្ឋដែលមានបុគ្គលិកជិត៣លាននាក់។
គេនៅចាំពីប្រវត្តិកូដកម្មការងារ ក្នុងស្រុក កាលពីចុងឆ្នាំ២០០២និងដើមឆ្នាំ២០០៣។ កាលនោះ ក្រុមប្រឆាំងអំពាវនាវអោយតវ៉ា ប្រឆាំងអតីតប្រធានាធិបតីអ៊ុយហ្គោ ស្ហាវេស។ កូដកម្មបានរាំងស្ទះការងារផលិតរបស់ក្រុមហ៊ុនប្រេងជាតិ។ កាលនោះ បុគ្គលិកក្រុមហ៊ុនប្រេងជាតិប្រមាណជា១ម៉ឺន៧ពាន់នាក់ ត្រូវបានបណ្តេញពីការងារ។ ដូច្នេះហើយ ទើបឥឡូវនេះ នៅតាមស្ថាប័នរដ្ឋ និងក្រុមហ៊ុនប្រេង គ្មានអ្នកទៅបាតុកម្មនោះ។
ដោយឡែក ប្រជាប្រិយលោកម៉ាឌូរ៉ូ ធ្លាក់ចុះក៏ដោយសារតែបញ្ហាសេដ្ឋកិច្ចដុនដាប ប៉ុន្មានឆ្នាំមកនេះឯង។ ថ្លៃប្រេងឆៅដែលជាប្រភពចំណូលជាតិ បានធ្លាក់ចុះ ប្រជាជនខ្វះស្បៀងអាហារ និងថ្នាំពេទ្យ។ បើគិត១០ឆ្នាំមកនេះ វ៉េណេស៊ុយអេឡាសល់តែសហគ្រាស៣០ភាគរយប៉ុណ្ណោះ ដែលនៅបន្តដំណើរការក្នុងស្រុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ