តុលាការកំពូលនៅទីក្រុងការ៉ាកាស ត្រូវទទូលរងការវាយប្រហារដោយឧទ្ធម្ភាគចក្រ
នៅប្រទេសវ៉េណេស៊ុយអេឡា កាលពីថ្ងៃអង្គារ៍ម្សិលមិញ ឧទ្ធម្ភាគចក្រមួយគ្រឿងរបស់ប៉ូលីស បានវាយប្រហារទៅលើទីស្នាក់ការរបស់តុលាការកំពូលនៅទីក្រុងការ៉ាកាសនិងទៅលើក្រសួងមហាផ្ទៃ-នេះការគូសបញ្ជាក់របស់ប្រធានាធិបតីវេណេស៊ុយអេឡាលោក Nicolas Maduro និងរដ្ឋាភិបាលរបស់លោក។ ការវាយប្រហារនេះ ពុំបានបណ្តាលឲ្យមានជនគ្រោះទេ តែ លោក Maduro បានបរិហារថា ជាអំពើភេរវកម្ម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
យោងតាមអាជ្ញាធរវ៉េណេស៊ុយអេឡា ឧទ្ធម្ភាគចក្រនោះ បានធ្វើការបាញ់រះចំនួន១៥ដងប្រឆាំងទៅលើក្រសួងមហាផ្ទៃ ដែលនៅទីនោះ មានជនចំនួនរាប់សិបនាក់ចូលរួមនៅក្នុងពិធីមួយ។ គ្រាប់បែកដៃចំនួន៤គ្រាប់ទៀត ត្រូវបានគេទម្លាក់ពីលើអាកាសប្រឆាំងទៅលើទីស្នាក់ការតុលាការកំពូលរបស់វ៉េណស៊ុយអេឡាដែរ។លោក Maduro ប្រធានាធិបតីវេណេស៊ុយអេឡា បានបរិហារហៅការវាយប្រហារនោះថា ជាអំពើភេរវកម្មមួយដែលបង្កឡើយដោយពួកអ្នកប្រឆាំងនឹងរូបលោក។
នៅក្នុ្ងងសេចក្តីជូនដំណឹងមួយ រដ្ឋាភិបាលវ៉េណស៊ុយអេឡា បានគូសបញ្ជាក់ទៀតថា “ឧទ្ធម្ភាគចក្រនោះ ត្រូវបាន Pilote របស់នគរបាលមួយរូបឈ្មោះ Oscar Perez ជាអ្នកលួចយក"។
នៅក្នុងវីដេអូមួយដែលបង្ហោះនៅលើគណនី Instagram មួយរបស់ខ្លួន លោក Oscar Perez បានឈរបង្ហាញរូបភាពខ្លួននៅពីមុខជនចំនួនជាច្រើននាក់ផ្សេងទៀតដែលប្រដាប់ដោយអាវុធនិងបានបញ្ជាក់អះអាងថា "ការវាយប្រហារនោះ គឺជាការចូលរូមប្រតិបត្តិការមួយដើម្បីស្តារប្រជាធិបតេយ្យនៅវ៉េណស៊ុយអេឡា"។ ពីឡុត Perez ថែមទាំងថ្លែងបន្តទៀតថា លោក ជាអ្នកតំណាងអោយក្រុមចម្រុះមួយរបស់មន្ត្រីយោធា ប៉ូលីសនឹងអ្នករដ្ឋការវេណេស៊ុយអេឡាដែលធ្វើការប្រឆាំងទល់នឹងរដ្ឋាភិបាលឧក្រឹដ្ឋរបស់លោក Maduro ។ មិនតែប៉ុណ្ណោះ លោកPerzថែមទាំងបានអំពាវនាវផងដែរឲ្យលោកប្រធានាធិបតីវ៉េណស៊ុយអេឡាចុះចេញពីអំណាច។
គួរំលឹកថា វេណស៊ុយអេឡា ធ្លាប់ជួបនឹងវិបត្តិនយោបាយដ៏ហិង្សាថ្មីមួយកាលពីដើមខែមេសាកន្លងទៅនេះ អំពើហិង្សាដែលបណ្តាលឲ្យមនុស្សស្លាប់យ៉ាងតិច៧៥នាក់។
ក្រុមអ្នកដឹកនាំខាងបក្សប្រឆាំងវិញ បានអំពាវនាវតាំងពីជាយូរពេលកន្លងមកហើយដល់សមាជិកនៃកងកម្លាំងសន្តិសុខទាំងអស់នៅទូទាំងប្រទេសឲ្យនាំគ្នាងើបបះបោរកុំស្តាប់បង្គាប់រដ្ឋាភិបាលទៀតផង។
ចំណែកមតិភាគខ្លះខាងបក្សប្រឆាំង យល់ឃើញថា ការវាយប្រហារដោយប្រើឧទ្ធម្ភាគចក្រនេះ អាចជាការរៀបចំឡើងដោយរដ្ឋអំណាចវ៉េណស៊ុយអេឡាដើម្បីបញ្ជាក់ពីភាពត្រឹមត្រូវរបស់ខ្លួននៅក្នុងការបង្ក្រាបដាក់សម្ពាធទៅលើក្រុមអ្នកប្រឆាំងនឹងរដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ