អារ៉ាប៊ីសាអូឌីតទទួលស្គាល់ថា លោក Khashoggi ត្រូវបានគេសម្លាប់នៅក្នុងកុងស៊ុលរបស់ខ្លួន
ចុះផ្សាយនៅថ្ងៃ៖
នៅទីបំផុត អារ៉ាប៊ីសាអូឌីត បានទទួលស្គាល់ជាផ្លូវការ នៅថ្ងៃសៅរ៍នេះ ថាអ្នកកាសែតលោក ហ្សាម៉ាល់ ខាស្ហូហ្ស៊ី (Jamal Khashoggi)ពិតជាត្រូវបានស្លាប់នៅក្នុងស្ថានកុងស៊ុល របស់រាជាណាចក្រអារ៉ាប៊ីសាអូឌីត ប្រចាំក្រុងអ៊ីស្តង់ប៊ូល ប្រទេសតួកគីមែន។ ជាការស្លាប់ ដោយហេតុតែមានការវាយតប់គ្នា ដែលគ្មានពាក់ព័ន្ធនឹងរាជទាយាទ ម៉ូហាម៉េដ បេន សាល់ម៉ាន Mohamed Ben Salmanទេ។ នេះបើតាមរបាយការណ៍អង្កេតជាតិ ដែលប្រកាសអំពីការចាប់ខ្លួនជនជាប់សង្ស័យចំនួន១៨នាក់។
រដ្ឋអាជ្ញាអារ៉ាប៊ីសាអូឌីត បានចេញសេចក្តីថ្លែងការណ៍ផ្សាយជាសាធារណៈនៅថ្ងៃនេះ បញ្ជាក់ថា អ្នកកាសែត ហ្សាម៉ាល់ ខាស្ហូហ្ស៊ី (Jamal Khashoggi)បានឈ្លោះទាស់ទែងសំដីជាមួយអ្នកដែលគាត់បានជួបក្នុងស្ថានកុងស៊ុលនៅទីក្រុងអ៊ីស្តង់ប៊ូល រួចក៏រាលដាលទៅជាជម្លោះវាយតប់ដាល់គ្នា ទើបបណ្តាលឱ្យអ្នកកាសែតត្រូវស្លាប់។ ប្រភពជាន់ខ្ពស់រដ្ឋាភិបាលអារ៉ាប៊ីសាអូឌីត បានព្រលយបន្ថែមទៀតថា អ្នកកាសែតខាស្ហូហ្ស៊ីបានស្លាប់ដោយគេច្របាច់ក នៅពេលប្រវាយប្រតប់គ្នានោះ។
ពោលគឺផ្ទុយស្រលះពីប្រភពព័ត៌មានរបស់តួកគី កាលពីដំបូងដែលថា លោក ហ្សាម៉ាល់ ខាស្ហូហ្ស៊ី ទំនងជាត្រូវបានគេចាប់ខ្លួន វាយសួរចម្លើយ រួចសម្លាប់នៅក្នុងស្ថានកុងស៊ុល ក្រោយមកមានការកាត់សពជាចម្រៀកៗផង។ តាំងពីហេតុការណ៍បានផ្ទុះឡើងនៅថ្ងៃទី ២តុលា អារ៉ាប៊ីសាអូឌីត តែងបានបដិសេធពាក្យចោទប្រកាន់របស់តួកគី ដោយអះអាងថាអ្នកកាសែតបានដើរចេញពីស្ថានកុងស៊ុលវិញទៅហើយ។
សូមអាន ៖ អារ៉ាប៊ីសាអូឌីត ថាមិនដែលមានបំណងសម្លាប់លោក Jamal Khashoggi ទេ!
ប៉ុន្តែនៅថ្ងៃនេះ ក្រៅអំពីទទួលការស្លាប់របស់អ្នកកាសែតនៅក្នុងស្ថានកុងស៊ុលរបស់ខ្លួនហើយ អារ៉ាប៊ីសាអូឌីត បានប្រកាសដក អ្នកទទួលខុសត្រូវជាន់ខ្ពស់ពីរនាក់ ចេញពីតំណែង និងចាប់ខ្លួនជនសង្ស័យចំនួន១៨នាក់ផ្សេងទៀត។ បើតាមប្រភពញូវយ៉កថែមស៍ ក្នុងចំណោមជនសង្ស័យចាប់ខ្លួនបាន មានបួននាក់ជាភ្នាក់ងារសន្តិសុខរបស់រាជទាយាទ ម៉ូហាម៉េដ បេនសាល់ម៉ាន Mohamed Ben Salmanផង។
ចំណែកអ្នកទទួលខុសត្រូវជាន់ខ្ពស់ ដែលត្រូវដកចេញពីតំណែង ទាំងពីររូប (ឧត្តមសេនីយ៍ Ahmed Al-Assiri ឥស្សរជនជាន់ខ្ពស់នៃភ្នាក់ងារចារកិច្ច និង Saoud al-Qahtani ជាទីប្រឹក្សាជាន់ខ្ពស់របស់រាជវាំង) គឺជាសហការីដ៏ជំនិតបំផុតរបស់រាជទាយាទដ៏មានអំណាច ម៉ូហាម៉េដ បេន សាល់ម៉ាន។ បើតាមអ្នកវិភាគ នេះជាការបូជាដ៏ធំធេងណាស់ ! ប៉ុន្តែបើនៅតែមិនគ្រប់គ្រាន់នឹងធ្វើឱ្យសំណុំរឿងស្ងប់ស្ងាត់ទេ ឬប្រសិនបើរឿងរ៉ាវនៅតែបន្ត នោះគឺរាជទាយាទគ្មានអ្វីការពារខ្លួនទេ។
លោកត្រាំជឿលទ្ធផលអង្កេតផ្លូវការ
ប៉ុន្តែការប្រកាសលទ្ធផលអង្កេតនៅថ្ងៃនេះ ជាជំហានថ្មីដ៏សំខាន់ ! នេះជាប្រសាសន៍របស់លោកប្រធានាធិបតីអាមេរិកដោយយល់ថា សេចក្តីបំភ្លឺរបស់រីយ៉ាដ គួរឱ្យជឿជាក់មែន។ តែអាមេរិកកំពុងបន្តតាមដានការអង្កេតអន្តរជាតិដែលធ្វើឡើងដោយអារ៉ាប៊ីសាអូឌីត និងតួកគីនេះយ៉ាងកៀកកិតដដែល។
កាលពីថ្ងៃព្រហស្បតិ៍ អាមេរិករបស់លោកត្រាំ បានប្រកាសជាលើកទីមួយ ថាអាមេរិកនឹងដាក់ទណ្ឌកម្មអារ៉ាប៊ីសាអូឌីត ប្រសិនបើការអង្កេតរកឃើញថាអ្នកកាសែតពិតជាត្រូវបានគេសម្លាប់នៅក្នុងស្ថានកុងស៊ុលមែន។ លោក ដូណាល់ ត្រាំ បានធ្វើការព្រមានជាថ្មី អំពីលទ្ធភាពនៃការដាក់ទណ្ឌកម្មលើអារ៉ាប៊ីសាអូឌីត តែមិនធ្វើដល់ថ្នាក់ ដាក់ទណ្ឌកម្មប៉ះពាល់ដល់កិច្ចសន្យាលក់អាវុធនោះ ដោយរំលើកអំពីទំនាក់ទំនងដ៏ស្អិតល្មួតរវាងអារ៉ាប៊ីសាអូឌីតនិងសហរដ្ឋអាមេរិក។
លោកប្រធានាធិបតីបានត្រឹមរំលឹកថា អារ៉ាប៊ីសាអូឌីតជាសម្ព័ន្ធមិត្តសំណព្វរបស់វ៉ាស៊ីនតោន សម្រាប់ប្រឈមនឹងសត្រូវជួរមុខគឺអ៊ីរ៉ង់ ! អារ៉ាប៊ីសាអូឌីត ជាអ្នកវិនិយោគដ៏ប្រពៃរបស់អាមេរិក ! ហេតុដូច្នេះហើយបានជាអាមេរិកចាត់ទុកដំណឹងមរណភាពរបស់អ្នកកាសែតខាស្ហូហ្ស៊ី ជាដំណឹងគួរឱ្យសោកស្តាយនិងអកុសលណាស់។
សម្រាប់លោកដូណាល់ត្រាំ ទំនួលខុសត្រូវដាក់ទណ្ឌកម្មជាភារៈរបស់សភានិងព្រឹទ្ធសភាថាជាអ្នកដែលសម្រេចបន្ត ហើយលោកនឹងរង់ចាំស្តាប់។ សមាជិកសភានិងព្រឹទ្ធសភាអាមេរិក មានជំហរតឹងតែងខ្លាំងជាងសេតវិមាន និងយល់ថាការបកស្រាយរបស់អារ៉ាប៊ីសាអូឌីតប្តូរផ្លាស់រហូតពីមួយថ្ងៃទៅមួយថ្ងៃ ដែលមិនគួរឱ្យជឿទុកចិត្តទេ ហើយលទ្ធផលនៃការអង្កេតនេះ គឺគ្រាន់តែជាបិទបាំងរឿងពិតតែប៉ុណ្ណោះ។
ការបញ្ជាក់ព័ត៌មានស្តីអំពីការស្លាប់របស់អ្នកកាសែត បានធ្វើឱ្យពិភពលោកស្ទើរទាំងមូលកំពុងស្ថិតក្នុងអារម្មណ៍កត់ស្លត់បំផុត។ លោកអគ្គលេខាធិការអង្គការសហប្រជាជាតិ ក៏បានអំពាវនាវឱ្យអារ៉ាប៊ីសាអូឌីត បើកអង្កេតស៊ីជម្រៅ។
ផលវិបាកផ្ទៃក្នុង
តាំងពីផ្ទុះរឿងហ្សាម៉ាល់ ខាស្ហូហ្ស៊ីនេះមក រូបភាពរបស់រាជទាយាទបេនសាល់ម៉ាន និងអារ៉ាប៊ីសាអូឌីត ចុះស្រអាប់ខ្លាំងណាស់។ ក្រៅអំពីការគំរាមរបស់អាមេរិកចង់ដាក់ទណ្ឌកម្ម ក្រុមហ៊ុន អ្នកជំនួញធំៗ ព្រមទាំងតំណាងស្ថាប័នគ្រាក់លើពិភពលោក ដូចយ៉ាងមូលនិធិរូបិយវត្ថុអន្តរជាតិ បានប្រកាសអវត្តមាននៅក្នុងវេទិកាសេដ្ឋកិច្ចអន្តរជាតិនៅទីក្រុងរីយាដ សប្តាហ៍ក្រោយ ...
នៅផ្ទៃក្នុងរាជវង្ស ក៏មានសកម្មភាពខ្លាំង។ បើតាមប្រភពស្និទ្ធនឹងគ្រួសាររាជវង្ស សម្ពាធអន្តរជាតិបានរុញច្រាន ព្រះចៅ សាល់ម៉ាន ជាបិតាស្នងរាជ នៅស្ងៀមលែងកើត និងបាន បង្ខំចិត្តចេញធ្វើអន្តរាគមន៍ដោយផ្ទាល់ បញ្ជាឱ្យមានការកែប្រែរចនាសម្ព័ន្ធនៃនាយកដ្ឋានចារកិច្ច ដោយដាក់ឱ្យស្ថិតនៅក្រុមការត្រួតពិនិត្យផ្ទាល់ពីរាជទាយាទ បេន សាល់ម៉ាន។
ព្រះចៅសាល់ម៉ាន ត្រូវចេញមុខប្រឈមជាមួយរាជទាយាទ ដែលមានអំណាចស្ទើរគ្រប់វិស័យ យោធា សេដ្ឋកិច្ច សង្គម... បើតាមអ្នកវិភាគខ្លះ ព្រះមហាក្សត្រ អាចនឹងដកតំណែងខ្លះពីរាជទាយាទនេះជានិម្មិត្តរូប ដើម្បីជាការព្រមានរាជបុត្រផ្សេងទៀត និងដើម្បីលួងចិត្តសហគមន៍អន្តរជាតិ។ គេធ្លាប់ឃើញស្តេចអារ៉ាប៊ីសាអូឌីត ព្រះអង្គធ្លាប់បានចេញមុខខ្ទាស់ជាមួយរាជទាយាទ ម៉ូហាម៉េដ បេន សាល់ម៉ាន ម្តងហើយ នៅពេលរាជបុត្រនេះចង់សម្របខ្លួនតាមអាមេរិក ទទួលស្គាល់ក្រុងហ្សេរ៉ុយសាឡិមជារដ្ឋធានីអ៊ីស្រាអែល។ តើក្នុងរឿងធំនៅលើនេះព្រះអង្គឆ្វេងយល់យ៉ាងណាទៅវិញ គ្រប់គ្នាក៏កំពុងរង់ចាំចម្លើយ។
សេចក្តីប្រកាសព័ត៌មានទទួលស្គាល់ការស្លាប់របស់អ្នកកាសែត ហ្សាម៉ាល់ ខាស្ហួហ្ស៊ី ធ្វើឡើងបន្ទាប់ពី ព្រះចៅសាល់ម៉ាន បានជជែកតាមទូរស័ព្ទជាមួយប្រធានាធិបតីតួកគី អែរដូហ្កាន តែប៉ុណ្ណោះ។ តួកគីមានទំនាក់ទំនងមិនល្អជាមួយអារ៉ាប៊ីសាអូឌីតនិងអាមេរិកទេ ហើយក៏មិនត្រូវការឱ្យសំណុំរឿងរីករាលវែងឆ្ងាយ ក្នុងទឹកដីខ្លួនដែរ។ ដូច្នេះ សហការជាមួយរីយាដ អាចជាឱកាសមួយបាននិយាយចូលអាមេរិកវិញផងក៏ថាបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ