វ៉េណេស៊ុយអេឡា៖តើថ្ងៃអវសានរបស់លោកនីកូឡា ម៉ាឌុយរ៉ូបានឈានមកដល់ហើយ ឬ?
ចុះផ្សាយនៅថ្ងៃ៖
ស្តាប់ - ០៧:២៩
នៅក្នុងប្រទេសវ៉េណេស៊ុយអេឡា ក្រុមអ្នកប្រឆាំង និងក្រុមអ្នកគាំទ្រលោកប្រធានាធិបតីនីកូឡា ម៉ាឌុយរ៉ូផ្តើមសាកកម្លាំងគ្នាតាមរយៈក្បួនបាតុកម្មក្នុងថ្ងៃពុធ ទី២៣ មករា។ ក្រុមគណបក្សប្រឆាំងដែលបន្តមិនទទួលស្គាល់អាណត្តិទី២ របស់លោកប្រធានាធិបតីនីកូឡា ម៉ាឌុយរ៉ូបានអំពាវនាវឲ្យបង្កើតរដ្ឋាភិបាលអន្តរកាលមួយឆ្ពោះទៅរៀបចំការបោះឆ្នោតឡើងវិញ។ អ្វីជាការកត់សម្គាល់ ក្បួនបាតុកម្មតទល់គ្នារវាងក្រុមអ្នកប្រឆាំង និងក្រុមអ្នកគាំទ្រលោកម៉ាឌុយរ៉ូពេលនេះបានធ្វើឡើង ២ថ្ងៃបន្ទាប់ពីមានទាហានចំនួន ២៧នាក់បានចេញមុខប្រកាសឲ្យមានការងើបបះបោរទម្លាក់លោកម៉ាឌុយរ៉ូ។ ចំណែកលោកម៉ាឌុយរ៉ូបានចោទអាមេរិកថាជាអ្នករៀបចំឲ្យមានរដ្ឋប្រហារទម្លាក់លោក។
ដើម្បីអាចយល់ព្រឹត្តិការណ៍ដែលកំពុងពុះកញ្ជ្រោលនៅវ៉េណេស៊ុយអេឡាបាន គេត្រូវត្រឡប់ក្រោយមើលការបោះឆ្នោតប្រធានាធិបតីក្នុងថ្ងៃទី២០ឧសភា ឆ្នាំ ២០១៨ ដែលជោគជ័យបានធ្លាក់ក្នុងដៃប្រធានាធិបតីផុតអាណត្តិលោកនីកូឡា ម៉ាឌូរ៉ូដោយទទួលបានសម្លេងគាំទ្រជិត ៧០%។ តែការបោះឆ្នោតកាលណោះត្រូវបានគណបក្សប្រឆាំងមួយចំនួនធ្វើពហិការមិនចូលរួម ហើយគណបក្សប្រឆាំងដែលបានចូលរួមបោះឆ្នោតបានប្រកាសមិនទទួលស្គាល់លទ្ធផលដោយពួកគេយល់ថា ការបោះឆ្នោតនោះមានបង្កប់ដោយភាពមិនប្រក្រតីជាច្រើន រួមទាំងការលួចបន្លំសន្លឹកឆ្នោត។ ក្រៅពីក្រុមគណបក្សប្រឆាំងនៅវ៉េណេស៊ុយអេឡា ការជាប់ឆ្នោតប្រធានាធិបតីអាណត្តិទី២ របស់លោកម៉ាឌុយរ៉ូក៏ត្រូវបានសហរដ្ឋអាមេរិក សហភាពអឺរ៉ុប និងសម្ព័ន្ធនៃ ១៤ប្រទេសក្នុងទ្វីបអាមេរិក និងការ៉ាអ៊ីបប្រកាសមិនទទួលស្គាល់ដែរ។
ទោះជាយ៉ាងនេះក្តី ក៏គ្មានអ្វីអាចរារាំងឲ្យលោកម៉ាឌុយរ៉ូស្បថចូលកាន់តំណែងប្រធានាធិបតីអាណត្តិទី២ សម្រាប់រយៈពេល ៦ឆ្នាំកាលពីថ្ងៃទី១០ មករាបានឡើយ។ ប៉ុន្តែស្របពេលគ្នានេះ ក្រុមគណបក្សប្រឆាំងក៏មិនឈរឳបដៃនៅស្ងៀមដែរ ហើយបន្តការប្រឆាំងមកដល់ពេលនេះ។ អ្នកដែលបានចេញមុខតទល់នឹងលោកម៉ាឌុយរ៉ូខ្លាំងជាងគេ គឺប្រធានសភាលោកហ័ន ហ្កាយដូ។ គួរបញ្ជាក់ថាបច្ចុប្បន្ន សភាកំពុងស្ថិតក្រោមការគ្រប់គ្រងរបស់គណបក្សប្រឆាំង ហើយគឺលោកហ័ន ហ្កាយដូរូបនេះឯងដែលបានប្រកាសឲ្យមានបាតុកម្មប្រឆាំងនឹងលោកម៉ាឌុយរ៉ូក្នុងថ្ងៃទី២៣ មករានេះ។ រីឯជម្រើសយកថ្ងៃទី២៣ មករានេះទៀតសោតក៏មិនមែនជាជម្រើសចៃដន្យដែរ ព្រោះវាជាថ្ងៃធ្លាក់ពីអំណាចរបស់អតីតអ្នកកាន់អំណាចផ្តាច់ការនៅវ៉េណេស៊ុយអេឡាលោកម៉ាក្រូ ប៉េរ៉េ ជីម៉េណេក្នុងថ្ងៃទី២៣ មករា ឆ្នាំ ១៩៥៨។
តើលោកម៉ាឌុយរ៉ូនឹងទទួលវាសនាដូចលោកជីម៉េណេកាលពី ៦១ឆ្នាំមុនឬ ?។ នៅមិនទាន់អាចឆ្លើយបានទេនៅពេលនេះ។ អ្វីដែលគេអាចឆ្លើយបាន លោកម៉ាឌុយរ៉ូកំពុងបន្តចាត់ទុកការជាប់ឆ្នោតជាថ្មីរបស់លោកថាជារឿងស្របច្បាប់ និងបានអំពាវនាវដល់ក្រុមសកម្មជនរបស់លោកឲ្យចុះផ្លូវតតាំងទល់នឹងក្រុមប្រឆាំងវិញក្នុងថ្ងៃទី២៣ មករា ឆ្នាំ ២០១៩។
លោកនីកូឡា ម៉ាឌុយរ៉ូចោទសហរដ្ឋអាមេរិកពីបទរៀបចំរដ្ឋប្រហារទម្លាក់លោក
និយាយជារួម នេះមិនមែនជាលើកទី១ ទេដែលរដ្ឋបាលអាមេរិក និងរបបដឹកនាំវ៉េណេស៊ុយអេឡាបានដំឡើងសម្លេងដាក់គ្នា។ គេអាចនិយាយបានថា ទំនាក់ទំនងរវាងទីក្រុងវ៉ាស៊ីនតោន និងទីក្រុងការ៉ាកាសមិនខុសអ្វីពីប្រេង និងទឹកឡើយ។ ក្រោមភ្នែក ច្រមុះរបស់រដ្ឋបាលអាមេរិកាំង របបដឹកនាំក្នុងជំនាន់លោកអ៊ុយហ្គោ ឆាវ៉េក៏ដូចជាលោកនីកូឡា ម៉ាឌុយរ៉ូជារបបដឹកនាំផ្តាច់ការ។ ក្នុងខែសីហា ឆ្នាំ ២០១៧ ពោលក្នុងពេលកើតមានអំពើហិង្សាយ៉ាងបង្ហូរឈាមនៅក្រោយការបោះឆ្នោតសភាវ៉េណេស៊ុយអេឡា លោកប្រធានាធិបតីអាមេរិកដូណាល់ ត្រាំបានដាក់ទណ្ឌកម្មលើលោកម៉ាឌុយរ៉ូ និងព្រមានវាយប្រហារផ្លូវយោធាទៀតផងបើចាំបាច់។
ដោយឡែក ការចោទរដ្ឋបាលអាមេរិកពីបទរៀបចំរដ្ឋប្រហារទម្លាក់លោកម៉ាឌុយរ៉ូពេលនេះត្រូវបានក្រុមមនុស្សជំនិតរបស់លោកម៉ាឌុយរ៉ូចង្អុលមុខអនុប្រធានាធិបតីអាមេរិកលោក Mike Pence។ រដ្ឋមន្រ្តីក្រសួងទូរគមនាគមន៍វ៉េណេស៊ុយអេឡាលោកហ្សក រ៉ូឌ្រីហ្គេបានចោទលោក Pence ពីបទមានសមានចិត្តជាមួយក្រុមបាតុកររបស់គណបក្សប្រឆាំង និងបានបញ្ជាឲ្យក្រុមភេរវជនបង្កអំពើហិង្សាដោយបាញ់ប្រហារលើហ្វូងបាតុកររបស់ក្រុមប្រឆាំងនៅក្នុងក្បួនបាតុកម្មថ្ងៃទី២៣ មករានេះ។ តាមលោករ៉ូឌ្រីហ្គេ លោក Mike Pence បានអំពាវនាវដល់កងទ័ពដែលបះបោរប្រឆាំងលោកម៉ាឌុយរ៉ូឲ្យប្រគល់អាវុធទៅឲ្យមនុស្សមួយក្រុមទុកសម្រាប់បាញ់ប្រហារលើហ្វូងបាតុកររបស់បក្សប្រឆាំង។
លោករ៉ូឌ្រីហ្គេបានចាត់ទុកទង្វើរបស់អនុប្រធានាធិបតីអាមេរិករបៀបនេះថាជាការលាបពណ៌ដើម្បីទម្លាក់ការទទួលខុសត្រូវនៃអំពើហិង្សានេះទៅលើរដ្ឋាភិបាល។ គួររម្លឹកថាក្នុងថ្ងៃទី២១ មករា មានក្រុមទាហាន ២៧នាក់បានប្រកាសឲ្យពលរដ្ឋងើបបះបោរប្រឆាំងលោកម៉ាឌុយរ៉ូ តែទាហានទាំង ២៧នាក់នោះត្រូវបានរដ្ឋអំណាចក្របួច ក ជាប់។
ចុះពីអំណាចខ្លួនឯង ឬត្រូវធ្លាក់ដោយបដិវត្តរបស់ពលរដ្ឋ?
អ្វីដែលគ្រប់គ្នាបារម្ភ គឺខ្លាចព្រឹត្តិការណ៍នៅវ៉េណេស៊ុយអេឡាពេលនេះនឹងដូចព្រឹត្តិការណ៍ក្នុងឆ្នាំ ២០១៧ដែលអំពើហិង្សានៅក្រោយការបោះឆ្នោតសភាបានបណ្តាលឲ្យមានមនុស្សស្លាប់ប្រមាណជា ១២៥នាក់។ គេនៅមិនទាន់ដឹងថា តើក្បួនបាតុកម្មរៀបចំដោយក្រុមគណបក្សប្រឆាំងលើកនេះមានទំហំប៉ុនណា និងមានមនុស្សប៉ុន្មាននាក់ចូលរួមទេ។ បន្ទាប់មក ក៏នៅមានក្បួនបាតុកម្មរៀបចំដោយក្រុមអ្នកគាំទ្ររដ្ឋាភិបាលរបស់លោកប្រធានាធិបតីនីកូឡា ម៉ាឌុយរ៉ូ។ តែមានការកត់សម្គាល់ថា បរិយាកាសនយោបាយកាលពីឆ្នាំ ២០១៧ មិនដូចគ្នានឹងបរិយាកាសនយោបាយនៅពេលនេះទេ។
មិនដូចគ្នាព្រោះទី១ អំណាចផ្តាច់ការរបស់លោកម៉ាឌុយរ៉ូបាននិងកំពុងទទួលរងការប្រឆាំងកាន់តែខ្លាំងនៅក្នុងស្រុក និងពីសហគមន៍អន្តរជាតិ មានសហរដ្ឋអាមេរិក សហភាពអឺរ៉ុប រួមទាំងក្រុមប្រទេសនៅអាមេរិកឡាទីនផងហើយទី២ ស្ថានភាពសេដ្ឋកិច្ចក្នុងស្រុកកំពុងបន្តធ្លាក់ដុនដាបកាន់តែខ្លាំងឡើងៗពីមួយថ្ងៃទៅមួយថ្ងៃ។ លោកម៉ាឌុយរ៉ូដែលទើបមានអាយុ ៥៦ឆ្នាំកំពុងសោយរាជ្យនៅក្នុងប្រទេសជង្រុកប្រេងកាតមួយដែលពលរដ្ឋខ្វះអាហារទទួលទានគ្រប់ប្រភេទ។ តាមអង្គការមូលនិធិរូបិយវត្ថុអន្តរជាតិ IMF អត្រាអតិផរណាអាចនឹងកើនដល់ទៅ ១០លានភាគរយក្នុងឆ្នាំ ២០១៩។ គ្រាន់តែក្នុងរយៈពេល ៣ឆ្នាំចុងក្រោយនេះ មានពលរដ្ឋវ៉េណេស៊ុយអេឡាជិត ៣លាននាក់បានភៀសខ្លួនទៅស្វែងជីវិតសមរម្យនៅក្នុងប្រទេសក្បែរខាង។
នេះជាព្រឹត្តិការណ៍មួយដែលគ្មានប្រទេសណាមួយនៅអាមេរិកឡាទីនធ្លាប់បានជួបប្រទះដូចវ៉េណេស៊ុយអេឡាពេលនេះទេ។ ក្រុមអ្នកជំនាញបានប្រមើលមើលថា បើគ្មានដំណោះស្រាយឆាប់ៗទេ នឹងមានពលរដ្ឋវ៉េណេស៊ុយអេឡាដល់ទៅ ៥លាននាក់រត់ចេញពីស្រុកកំណើតពីពេលនេះដល់ដំណាច់ឆ្នាំ ២០១៩។ ឃើញថា នេះជារឿងបន្ទាន់បំផុតដែលលោកម៉ាឌុយរ៉ូត្រូវគិតគូរ បើមិនដូច្នេះទេ លោកអាចនឹងមានជម្រើសពីរ ទី១ ចុះចេញពីអំណាចខ្លួនឯងដោយគ្មានការបង្ហូរឈាម និងទី២ ធ្លាក់ពីអំណាចដោយការងើបបះបោររបស់ពលរដ្ឋក្នុងស្រុកដោយមានការបង្ហូរឈាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ