សភាអាមេរិកនឹងចាប់ផ្តើមសរសេរបទចោទប្រកាន់ ផ្លូវការ ដើម្បីទម្លាក់លោកដូណាល់ ត្រាំ
ចុះផ្សាយនៅថ្ងៃ៖
ស្តាប់ - ០៦:០៣
ប្រធានសភាអ្នកតំណាងរាស្រ្តអាមេរិក នៅថ្ងៃព្រហស្បតិ៍ម្សិលមិញ បានបញ្ជាឲ្យគេចាប់សរសេរបទចោទប្រកាន់ជាផ្លូវការ ដើម្បីទម្លាក់តំណែងលោកប្រធានាធិបតីដូណាល់ ត្រាំ។ គណៈកម្មការស៊ើបអង្កេតរបស់សភាអ្នកតំណាងរាស្រ្តដែលគ្រប់គ្រងដោយបក្សប្រឆាំង គណបក្សប្រជាធិបតេយ្យ នឹងចងក្រងបទចោទប្រកាន់ បន្ទាប់ពីបានបើកសវនាការ សាកសួរដេញដោល សាក្សី ១៧នាក់ ក្នុងសំណុំចោទប្រកាន់ ដែលថា ប្រធានាធិបតី អាមេរិកបានដាក់សម្ពាធលើមេដឹកនាំអ៊ុយក្រែន ឲ្យស៊ើបអង្កេតលើគូប្រជែងនយោបាយរបស់លោកដូណាល់ ត្រាំ គឺលោកចូ បាយដិន ជាថ្នូនឹងជំនួយយោធាអាមេរិក។
ប្រធានសភាអ្នកតំណាងរាស្រ្តអាមេរិក លោកស្រី Nancy Pelosy នៅថ្ងៃព្រហស្បតិ៍បង្កើនល្បឿននីតិវិធីទម្លាក់លោកដូណាល់ ត្រាំ ដោយបានបញ្ជាប្រាប់គណៈកម្មការយុត្តិធម៌របស់សភា ឲ្យសរសេរបទចោទប្រកាន់លោកដូណាល់ ត្រាំ ជាផ្លូវការ។
សម្រាប់លោកស្រី Nancy Pelosy ប្រធានសភាអ្នកតំណាងរាស្រ្តអាមេរិក លោកប្រធានាធិបតី ដូណាល់ ត្រាំ គ្មានទុកជម្រើសអ្វីផ្សេងឲ្យសភានោះទេ ពីព្រោះលោកកំពុងព្យាយាមសាជាថ្មី ធ្វើឲ្យការបោះឆ្នោតពុករលួយខូច គឺដើម្បីប្រយោជន៍តែផ្ទាល់ខ្លួន។ ប្រធានសភាអ្នកតំណាងរាស្រ្តមកពីគណបក្សប្រឆាំង នៅបានវាយប្រហារខ្លាំងៗ លើលោកដូណាល់ ត្រាំ ថា ជាប្រធានាធិបតីដែលរំលោភអំណាច ធ្វើឲ្យសន្តិសុខជាតិអាមេរិកចុះខ្សោយ និងដាក់បូរណភាពបោះឆ្នោតអាមេរិកក្នុងស្ថានភាពគ្រោះថ្នាក់។
លោកប្រធានាធិបតីអាមេរិកបានធ្លាក់ចូលក្នុងសំណាញ់ស៊ើបអង្កេតរបស់សភាអ្នកតំណាងរាស្រ្ត ដែលគ្រប់គ្រងដោយគណបក្សប្រជាធិបតេយត្យ បន្ទាប់ពីសភា បានដឹងថា លោកដូណាល់ ត្រាំ បានសុំឲ្យប្រធានាធិបតី អ៊ុយក្រែន ស៊ើបអង្កេត លើកូនប្រុសរបស់លោកចូ បាយដិន ដែលជាគូប្រជែងសំខាន់របស់លោក នៅក្នុងការបោះឆ្នោតប្រធានាធិបតីឆ្នាំ២០២០។ ការស៊ើបអង្កេត និងសវនាការសាកសួរ សាក្សី ១៧នាក់ ដែលសុទ្ធតែជាមន្រ្តីជាន់ខ្ពស់ ក្នុងរដ្ឋបាលលោកដូណាល់ ត្រាំ បានបង្ហាញថា រដ្ឋបាលលោកដូណាល់ ត្រាំ បានដាក់លក្ខខណ្ឌថា នឹងទទួលជួបប្រធានាធិបតីអ៊ុយក្រែននៅសេតវិមាន បើសិន អ៊ុយក្រែនស៊ើបអង្កេតលើកូនប្រុសរបស់លោក ចូ បាយដិន។ តាមមន្រ្តីជាន់ខ្ពស់អាមេរិក រដ្ឋបាលលោកដូណាល់ ត្រាំ បានយកជំនួយ យោធា ៤០០លានដុល្លារ សម្រាប់អ៊ុយក្រែន មកធ្វើជាលេស ផងដែរដើម្បី ដាក់សម្ពាធលើរដ្ឋាភិបាលអ៊ុយក្រែន។
លោកដូណាល់ ត្រាំប្រឈមនឹងបទចោទប្រកាន់ ៣
កាលពីថ្ងៃពុធ គណៈកម្មការស៊ើបអង្កេតរបស់សភាអ្នកតំណាងរាស្រ្ត បានកោះហៅ សាស្រ្តាចារ្យ ច្បាប់៤នាក់ ដើម្បីសាកសួរពីយោបល់របស់ពួកគទាក់ទងនឹងដំណើរការផ្លូវច្បាប់ដើម្បី ទម្លាក់តំណែងលោកប្រធានាធិបតីដូណាល់ ត្រាំ។
នៅពេលសាស្ត្រាចារ្យម្នាក់ ដែលអញ្ជើញដោយបក្សសាធារណរដ្ឋរបស់លោកដូណាល់ ត្រាំ លើកឡើងពីកង្វះភស្តុតាង ដើម្បី ចោទប្រកាន់ និងទម្លាក់តំណែងលោកដូណាល់ ត្រាំ សាស្រ្តាចារ្យ បីរូបផ្សេងទៀត ដែលអញ្ជើញដោយក្រុមគណបក្សប្រជាធិបតេយ្យ បានលើកឡើងពីបទចោទប្រកាន់ ធំ ដែលលោកដូណាល់ ត្រាំ ត្រូវប្រឈម។
ទី១ គឺការំលោភអំណាច ហើយនិងពុករលួយ។ ទី២ គឺបង្កើតឧបសគ្គសម្រាប់ដំណើរការស៊ើបអង្កេត សាកសួរដេញដោលរបស់សភាអ្នកតំណាងរាស្រ្ត ចំណែកបទចោទប្រកាន់ទី ៣ គឺការព្យាយាម បង្កឧបសគ្គផងដែរ ដល់ដំណើរការស៊ើបអង្កេតរបស់តុលាការ។
នៅក្នុងបទចោទប្រកាន់រំលោភអំណាច លោកដូណាល់ ត្រាំ ត្រូវគណបក្សប្រឆាំងចោទថា បានរំលោភអំណាចប្រធានាធិបតី ដើម្បីប្រយោជន៍ផ្ទាល់ខ្លួន ពោលគឺបានសុំឲ្យសមភាគីអ៊ុយក្រែនស៊ើបអង្កេត លើគ្រួសាររបស់លោកចូ បាយដិន ដែលជាគូប្រជែង របស់លោកដូណាល់ ត្រាំ នៅក្នុងការបោះឆ្នោត ឆ្នាំក្រោយ។ សម្រាប់សាស្រ្តាចារ្យច្បាប់នៅមហាវិទ្យាល័យ Havard Noah Feldman ដោយបង្កកជំនួយយោធាអាមេរិក និងដាក់លក្ខខណ្ឌក្នុងការទទួលជួបប្រធានាធិបតី អ៊ុយក្រែន នៅសេតវិមាន លោកដូណាល់ ត្រាំ បានរំលោភអំណាច ប្រធានាធិបតី ដើម្បីផលប្រយោជន៍នយោបាយផ្ទាល់ខ្លួន។ អ្នកជំនាញច្បាប់ម្នាក់ទៀតរបស់សកលវិទ្យាល័យ Stanford គឺសាស្រ្តាចារ្យ Pamela Karlan បានវាយតម្លៃថា ការអូសទាញបញ្ចូលរដ្ឋាភិបាលបរទេស នៅក្នុងការបោះឆ្នោតអាមេរិក គឺជាសកម្មភាពរំលោភអំណាចធ្ងន់ធ្ងរ ព្រោះវាមានគោលដៅធ្វើឲ្យលទ្ធិប្រជាធិបតេយ្យចុះខ្សោយ។
នៅក្នុងបទចោទប្រកាន់ទី ២ ស្តីពីការបង្កឧបសគ្គដល់ការងារស៊ើបអង្កេតរបស់គណៈកម្មការរបស់សភាអ្នកតំណាងរាស្រ្ត លោកដូណាល់ ត្រាំ ត្រូវបានចោទប្រកាន់ រំលោភច្បាប់រដ្ឋធម្មនុញ្ញ ព្រោះលោកបានហាមមិនឲ្យអ្នកធ្វើការជាមួយលោក ផ្តល់ឯកសារ ឬចូលទៅឆ្លើយបំភ្លឺនៅក្នុងសវនាការសួរដេញដោលរបស់សភា។
នៅក្នុង បទចោទប្រកាន់ទី៣ដែលនិយាយពីការបង្កឧបសគ្គដល់នីតិវិធីតុលាការ គណៈកម្មការរបស់សភាអ្នកតំណាងរាស្រ្ត បានលើកយោងដល់របាយការណ៍របស់រដ្ឋអាជ្ញាពិសេស ដែលបានស៊ើបអង្កេតលើការលូកដៃរបស់រុស្ស៊ី នៅក្នុងការបោះឆ្នោត ដែលមានលោកដូណាល់ ត្រាំ ជាបេក្ខជនឈ្នះឆ្នោត។
នៅក្នុងរបាយការណ៍ កម្រាស ៤០០ទំព័រ លោករដ្ឋអាជ្ញាពិសេស Robert Mullerមិនបានរកឃើញភស្តុតាងដែលថា រុស្ស៊ីបានចូលរួមជាមួយក្រុមឃោសនាបោះឆ្នោតរបស់លោកដូណាល់ ត្រាំ។ ប៉ុន្តែ រដ្ឋអាជ្ញាពិសេស បានបិទបញ្ចប់ការសន្និដ្ឋានរបស់លោក ដែលថា លោកមិនអាចធានា ទេ ថា លោកប្រធានាធិបតីដូណាល់ ត្រាំ មិនបានលូកដៃ បង្កឧបសគ្គដល់ការងារស៊ើបអង្កេតរបស់តុលាការ។
សូមអាន៖ ចំណុចសំខាន់ៗគួរដឹងជុំវិញដំណើរការដកតំណែងប្រធានាធិបតីដូណាល់ត្រាំ
លោកដូណាល់ ត្រាំទាមទារឲ្យមានសវនាការឆាប់ៗ
នៅក្រោយការប្រកាសរបស់ប្រធានសភាអ្នកតំណាងរាស្រ្ត លោកដូណាល់ ត្រាំ បានប្រតិកម្មតបភ្លាមៗថា លោកចង់ឲ្យគេបើកសវនាការឆាប់ៗ នៅព្រឹទ្ធសភា ព្រោះលោកជឿជាក់ថា ព្រឹទ្ធសភានឹងលាងជម្រះ មន្ទិលសង្ស័យ និងការចោទប្រកាន់ទាំងប៉ុន្មានរបស់បក្សប្រឆាំង ទៅលើលោក។
តាមគម្រោង សភាអ្នកតំណាងរាស្រ្តនឹងបង្ហាញអត្ថបទច្បាប់ចោទប្រកាន់ផ្លូវការ នៅមុនបុណ្យណូអែល ចុងឆ្នាំ នៅពេលសវនាការនៅព្រឹទ្ធសភា នឹងអាចចាប់បើក នៅខែមករាដើមឆ្នាំ។
លោកដូណាល់ ត្រាំ ជាប្រធានាធិបតី អាមេរិក ទី៣ ដែលប្រឈមនឹងការបោះឆ្នោត ទម្លាក់ពីតំណែង នៅសភាអ្នកតំណាងរាស្រ្តគឺដូច លោក Andrew Johnson និងលោកBill Clinton។ ប៉ុន្តែ ដូចអតីតប្រធានាធិបតីទាំងពីរ លោកដូណាល់ ត្រាំ នឹងត្រូវព្រឹទ្ធសភា សម្រេចក្តីឲ្យរួចទោស ព្រោះព្រឹទ្ធសភា គ្រប់គ្រងដោយគណបក្សសាធារណរដ្ឋ ដែលបានប្រកាសរួចហើយ ពីជំហរគាំទ្រ ដាច់ខាតលោកប្រធានាធិបតីដូណាល់ ត្រាំ។
បក្សប្រជាធិបតេយ្យដឹងថា ខ្លួននឹងមិនបានទទួលជ័យជំនះ នៅព្រឹទ្ធសភានោះទេ ប៉ុន្តែ សម្រាប់បក្សប្រជាធិបតេយ្យ ផែនការឈានទៅទម្លាក់តំណែងប្រធានាធិបតី គឺដើម្បី ធ្វើយ៉ាងណាកុំឲ្យលោកដូណាល់ ត្រាំ អាចជាប់ឆ្នោត ក្លាយជាប្រធានាធិបតី អាមេរិក មួយអាណត្តិទៀតប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ