អាមេរិកដាក់ទណ្ឌកម្មសេដ្ឋកិច្ចថ្មីទៅលើកូរ៉េខាងជើង នៅក្នុងរឿងវាយប្រហារព័ត៌មានវិទ្យាលើក្រុមហ៊ុនសូនី
ចុះផ្សាយនៅថ្ងៃ៖
ស្តាប់ - ០៦:៥០
កាលពីថ្ងៃសុក្រទី ២ មករា លោកប្រធានាធិបតីអាមេរិកបានចុះហត្ថលេខាលើក្រឹត្យមួយ ដែលបានបើកផ្លូវឲ្យអាមេរិកដាក់ទណ្ឌកម្មសេដ្ឋកិច្ចទៅលើកូរ៉េខាងជើង ដែលលោកអូបាម៉ាចោទថា ជាអ្នកនៅពីក្រោយការវាយប្រហារអ៊ីនធ័រនែតលើក្រុមហ៊ុនហូលីវូដ សូនី។ ក្នុងរយៈពេល៥០ឆ្នាំមកនេះ កូរ៉េខាងជើងនៅកំពុងជាប់ទណ្ឌកម្មសេដ្ឋកិច្ចពីអាមេរិក ជាពិសេស សម្រាប់កម្មវិធីនុយក្លេអ៊ែរយោធារបស់ខ្លួន។ លើកនេះ ក្រុមហ៊ុនកូរ៉េខាងជើងចំនួនពីរ និងបុគ្គល១០នាក់ត្រូវរងការដាក់ទណ្ឌកម្មសេដ្ឋកិច្ចថ្មី របស់អាមេរិក។ តើទណ្ឌកម្មសេដ្ឋកិច្ចថ្មីរបស់អាមេរិកទៅលើកូរ៉េខាងជើងនឹងអាចមានប្រសិទ្ធិភាព ឬប៉ះពាល់ដល់សេដ្ឋកិច្ចរបស់ទីក្រុងព្យុងយ៉ាងដែរឬទេ?
លោកប្រធានាធិបតីអាមេរិក បារ៉ាក់ អូបាម៉ា បានចុះហត្ថលេខាលើក្រឹត្យមួយ កាលពីថ្ងៃសុក្រ ដែលនិយាយពីការដាក់បន្ថែមទណ្ឌកម្មសេដ្ឋកិច្ចទៅលើកូរ៉េខាងជើង។ តាមសេតវិមាន ទណ្ឌកម្មសេដ្ឋកិច្ចទៅលើកូរ៉េខាងជើង ធ្វើឡើង ដើម្បីឆ្លើយតបទៅនឹងការវាយប្រហារអ៊ីនធ័រនែតលើក្រុមហ៊ុនសូនីដែលប៉ូលិសសហព័ន្ធFBI វាយតម្លៃថា រៀបចំឡើងដោយរបប កុម្មុយនិស្តកូរ៉េខាងជើង។
តំាងពីមុនចេញទៅវស្សមកាលម្ល៉េះ លោកអូបាម៉ា ធ្លាប់បានប្រកាសរួចហើយថា នឹងវាយបកទៅវិញ ឲ្យសមគួរ ទៅលើអ្នកដែលបានប្រព្រឹត្ត គឺអ្នកដែលបានវាយប្រហារ ព័ត៌មានវិទ្យាទៅលើក្រុមហ៊ុនសូនី។ កាលណោះ លោកអូបាម៉ាបានបញ្ជាក់យ៉ាងច្បាស់ៗថា គឺកូរ៉េខាងជើងដែលជាអ្នកនៅពីក្រោយការវាយប្រហារព័ត៌មានវិទ្យា។ ដូច្នេះ ទណ្ឌកម្មសេដ្ឋកិច្ច ទៅលើកូរ៉េខាងជើង កាលពីថ្ងៃសុក្រ គ្រាន់តែជាជំហានទីមួយ នៃការសន្យារបស់លោកអូបាម៉ាដែលថា នឹងចាត់វិធានការ វាយបកទៅលើចោរអ៊ីនធ័រនែតតែប៉ុណ្ណោះ។
នៅក្នុងរឿងវាយប្រហារព័ត៌មានវិទ្យាទៅលើក្រុមហ៊ុនហូលីវូដសូនី មានចំណុចពីរដែលតម្រូវឲ្យរដ្ឋាភិបាលអាមេរិកចាំបាច់ត្រូវតែធ្វើអន្តរាគម។ ទីមួយ គឺការការពារផលប្រយោជន៍សេដ្ឋកិច្ច ឲ្យក្រុមហ៊ុនអាមេរិក។ ពួកHackers ឬចោរអ៊ីនធ័រនែតហ៊ានចូលវាយប្រហារលើក្រុមហ៊ុនឯកជនដែលស្ថិតនៅលើទឹកដី អាមេរិក រហូតធ្វើឲ្យខាងបង់ទឹកប្រាក់រាប់រយលាន ដុល្លារ។ ទីពីរ គឺពាក់ព័ន្ធនឹងសេរីភាពបញ្ចេញមតិនៅក្នុងទឹកដី អាមេរិក។ លោកអូបាម៉ាធ្លាប់និយាយថា សូនី បានធ្វើកំហុសឆ្គងមួយ ដែលបានដក ឈប់បញ្ចាំងរឿង ដ៏ចម្រូងចម្រាស The Interview។ ប្រធានក្រុមហ៊ុនសូនីបានសម្រេចដកកុនពីរោងបញ្ចាំង ក្រោយពីពួកចោរអ៊ីនធ័រនែត បានសំឡុត វាយប្រហារ ឬបញ្ចេញទិន្នន័យរបស់ក្រុមហ៊ុនសូនី ដែលចោរលួចយកបានកាលពីខែវិច្ឆិកា។ សម្រាប់លោកអូបាម៉ា គេមិនអាចអនុញ្ញាតឲ្យមេផ្តាច់ការបរទេស ចូលមកដំឡើងអំណាច នៅក្នុងទឹកដីអាមេរិកបានទេ។
មុខសញ្ញាដែលជាប់រងទណ្ឌកម្មសេដ្ឋកិច្ចថ្មីរបស់អាមេរិក គឺមានទីភ្នាក់ងារស៊ើបការណ៍សម្ងាត់កូរ៉េខាងជើង ក្រុមហ៊ុនកូរ៉េខាងជើងពីរ ដែលធ្វើជំនួញខាងទិញ និងលក់អាវុធ។ ចំណែកបុគ្គល១០នាក់ដែលត្រូវជាប់រងទណ្ឌកម្មពីអាមេរិកដែរនោះ ភាគច្រើន គឺជាថ្នាក់ដឹកនាំជាន់ខ្ពស់របស់ក្រុមហ៊ុនទាំងពីរ ដែលកំពុងប្រចាំការនៅប្រទេសអ៊ីរ៉ង់ ស៊ីរី និងរុស្ស៊ី។ តាមទីភ្នាក់ងារព័ត៌មានបារាំង AFPបុគ្គលទាំង១០នាក់ ដែល ៣នាក់បម្រើការឲ្យរដ្ឋាភិបាលព្យុងយ៉ាង សុទ្ធតែមាន មានទំនាក់ទំនងជិតស្និទ្ធជាមួយរដ្ឋអំណាចព្យុងយ៉ាង។
មន្រ្តីអាមេរិកផ្ទាល់ក៏ទទួលស្គាល់ថា គេគ្មានភស្តុតាងអ្វីយកមកបញ្ជាក់ជាផ្លូវការថា មនុស្សទាំងនោះបានចូលរួម ដោយផ្ទាល់ក្នុងសកម្មភាពលួចទិន្នន័យរបស់ក្រុមហ៊ុនសូនីដែរ។ គេគ្រាន់តែដឹងថា មនុស្សទាំង១០នាក់ ត្រូវដាក់បញ្ចូលក្នុងបញ្ជីក្រុមមនុស្សរងទណ្ឌកម្មសេដ្ឋកិច្ចអាមេរិក ព្រោះពួកគេបម្រើការឲ្យរដ្ឋាភិបាលក្រុងព្យុងយ៉ាង ឬជាអ្នកតំណាងគណបក្សពលករកូរ៉េខាងជើង នៅបរទេស។
តាមអាមេរិក ទីភ្នាក់ងារស៊ើបការណ៍សម្ងាត់របស់កូរ៉េខាងជើងត្រូវតែជាប់រងទណ្ឌកម្មសេដ្ឋកិច្ច ព្រោះ ទីភ្នាក់ងារមួយនេះធ្វើការច្រើនទៅលើការវាយប្រហារព័ត៌មានវិទ្យា ដោយបានបណ្តុះបណ្តាលមនុស្សជាច្រើនពាន់នាក់ ដើម្បីវាយប្រហារលើព័ត៌មានវិទ្យារបស់ប្រទេសដទៃ។
ទណ្ឌកម្មសេដ្ឋកិច្ចមានលក្ខណៈជានិមិត្តរូប
ខុសពីអ៊ីរ៉ង់ និងរុស្ស៊ី ដែលអាចរងប៉ះពាល់ខ្លាំង ដោយសារទណ្ឌកម្មសេដ្ឋកិច្ចអាមេរិក កូរ៉េខាងជើងឯណោះវិញ គឺមិនសូវរងផលប៉ះពាល់ណាស់ណាទេ។ នៅក្នុងទណ្ឌកម្មសេដ្ឋកិច្ចកាលពីថ្ងៃសុក្រ គេបានចែងពីការហាមធ្វើដំណើររបស់បុគ្គលដែលរងការដាក់ទណ្ឌកម្មចូលក្នុងទឹកដីអាមេរិក ឬប្រើប្រាស់ប្រព័ន្ធហិរញ្ញវត្ថុរបស់អាមេរិក។ ប៉ុន្តែ ជាក់ស្តែង ទណ្ឌកម្មសេដ្ឋកិច្ច របស់អាមេរិក កាលពីថ្ងៃម្សិលមិញ គឺគ្រាន់តែទណ្ឌកម្មដែលអាមេរិកយកធ្វើជានិមិត្តរូបតែប៉ុណ្ណោះ ពោលគឺគ្មានផ្តល់ផល អ្វីជាដុំកំភួនទេ។ នៅក៏ព្រោះថា មន្រ្តីរបស់កូរ៉េខាងជើង ដែលជាប់ឈ្មោះ ក្នុងបញ្ជីទណ្ឌកម្ម គ្មានទ្រព្យសម្បត្តិច្រើន រាប់ពាន់លានដុល្លារ ដាក់ក្នុងធនាគារអាមេរិក ដែលអាចឲ្យអាមេរិកបង្កកដូចអ្នកដទៃនោះទេ។
កូរ៉េខាងជើងនៅជាប់រងទណ្ឌកម្មសេដ្ឋកិច្ចរបស់អាមេរិកអស់៥០ឆ្នាំមកហើយ។ អាមេរិកបានពង្រឹងទណ្ឌកម្មសេដ្ឋកិច្ចបន្ថែម កាន់តែខ្លាំង នៅប៉ុន្មានឆ្នាំចុងក្រោយ ដើម្បីប្រឆាំងនឹងការផ្គើនបាញ់សាកល្បងអាវុធនុយក្លេអ៊េរ។ ប៉ុន្តែ ទណ្ឌកម្មសេដ្ឋកិច្ចរបស់អាមេរិកទាំងអម្បាលម៉ាន មិនបានបំបាក់ទឹកចិត្ត ឬធ្វើឲ្យទីក្រុងព្យុងយ៉ាងបញ្ឈប់មហិច្ឆតា ផលិតអាវុធនុយក្លេអ៊ែរនោះទេ។ មានតែផ្ទុយទៅវិញ គឺរបបកុម្មុយនិស្តនៅតែគំរាមបាញ់សាកល្បងនុយក្លេអ៊ែរមិនឈប់ឈរ។ តាមអ្នកជំនាញខ្លះ ទណ្ឌកម្មសេដ្ឋកិច្ចរបស់អាមេរិកមិនបានបន្ទុចបង្អាក់កូរ៉េខាងជើងដើម្បីទិញ និងលក់អាវុធ ទេ។ ដោយសារតែទណ្ឌកម្មរបស់អាមេរិក កូរ៉េខាងជើងប្រើយុទ្ធសាស្រ្តបំពាក់បច្ចេកវិទ្យា ផលិតអាវុធរបស់ខ្លួន តាមរយៈការទិញដូរ នៅតាមទីផ្សារងងឹត។
យ៉ាងណាក៏ដោយ បើទោះបីជាទណ្ឌកម្មសេដ្ឋកិច្ចមានលក្ខណៈជានិមិត្តរូប នឹងមិនអាចធ្វើឲ្យសេដ្ឋកិច្ចកូរ៉េខាងជើងដួលរលំ ប៉ុន្តែ អាមេរិកសង្ឃឹមថា នឹងប្រើទណ្ឌកម្មសេដ្ឋកិច្ចដើម្បីដាក់កូរ៉េខាងជើង ឲ្យកាន់តែឯកោ និងបង្កឧបសគ្គដល់សេដ្ឋកិច្ចរបស់ប្រទេសនេះ។ ជាក់ស្តែង ក្រុមហ៊ុនទាំងពីរដែលស្ថិតនៅក្នុងបញ្ជីទណ្ឌកម្មកាលពីថ្ងៃសុក្រ គ្មានជាប់ទាក់ទងដោយផ្ទាល់នឹងការវាយប្រហារអ៊ីនធ័រនែតលើក្រុមហ៊ុនសូនីមែន ប៉ុន្តែ វាត្រូវទទួលរងទណ្ឌកម្មពី អាមេរិក ព្រោះ អាមេរិកចង់ខ្ទប់បិទផ្លូវ ដើម្បីធ្វើបាបក្រុមហ៊ុនជំនួញអាវុធរបស់កូរ៉េខាងជើង ដូចដែលកូរ៉េខាងជើង បានធ្វើទៅលើក្រុមហ៊ុនឯកជនសូនី ដែលស្ថិតនៅលើទឹកដីអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ