អាមេរិកនឹងឆ្លើយតបចំពោះការវាយប្រហារតាមប្រព័ន្ធកុំព្យូទ័ររបស់កូរ៉េខាងជើង
កាលពីថ្ងៃសុក្រម្សិលមិញនេះ លោកប្រធានាធិបតី បារាក់ អូបាម៉ា បានស្តីបន្ទោសក្រុមហ៊ុន Sony Pictures Enternainment ដែលបានសំរេចចិត្តលប់ចោលការចាក់បញ្ជាំងរឿង The Interview។ ទីភ្នាក់ងារ FBI បានចោទប្រកាន់ជាផ្លូវការថា ប្រទេសកូរ៉េខាងជើងស្ថិតនៅពីក្រោយការវាយប្រហារតាមប្រព័ន្ធអ៊ិនធ័រណេត ដោយបានលួចយកទិន្នន័យរបស់ក្រុមហ៊ុនផលិតភាពយន្តហូលីវូដ Sony។ ជាការឆ្លើយតប លោក អូបាម៉ា បានប្រកាសថា អាមេរិកនឹងចាត់វិធានការណ៍អោយបានសមស្របឆ្លើយតបចំពោះទង្វើរបស់កូរ៉េខាងជើង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
នៅក្នុងសន្និសិទកាសែតចុងក្រោយប្រចាំឆ្នាំនេះ លោកប្រធានាធិបតីសហរដ្ឋអាមេរិក បារ៉ាក់ អូបាម៉ា បានអះអាងថា ក្រុមហ៊ុនផលិតខ្សែភាពយន្ត Sony នៅហូលីវូដបានប្រព្រឹត្តិ«កំហុស» ដោយក្រុមហ៊ុននេះសុខចិត្តលប់ចោលការចាក់បញ្ជាំងខែ្សភាពយន្ត The Interview បន្ទាប់ពីបានទទួលការគំរាមកំហែងពីសំណាក់ក្រុមចោរ ព័តមានវិទ្យា Hackers។
លោក អូបាម៉ា ក៏បាននិយាយចំៗថា ប្រទេសកូរ៉េខាងជើងជាអ្នកស្ថិតនៅពីក្រោយដឹកនាំការវាយប្រហារជាទ្រង់ទ្រាយធំបែបនេះ។ ដោយពុំបានផ្តល់ព័ត៌មានលំអិត លោកប្រធានាធិបតីក៏បានសន្យាថា សហរដ្ឋអាមេរិកនឹងឆ្លើយតបវិញចំពោះកាយវិការរបស់របបដឹកនាំក្រុងព្យុងយ៉ាង។ លោកបានគូសបញ្ជាក់ផងដែរថា មកដល់ពេលនេះ សហរដ្ឋអាមេរិកពុំទាន់មានតំរុយអ្វីដែលអាចអោយដឹងថា កូរ៉េខាងជើងចូលដៃគ្នាជាមួយប្រទេសណាផ្សេងទៀតក្នុងការដឹកនាំការវាយប្រហារនេះ ដោយបង្កការខូចខាតយ៉ាងច្រើនមហិមាដល់ក្រុមហ៊ុន Sony ។
លោកប្រធានាធិបតីអាមរិករូបនេះក៏បានសង្កត់ធ្ងន់ថា គេមិនត្រូវសុខចិត្តចុះចាញ់ បណ្តោយអោយរបបផ្តាច់ការដាក់ការត្រួតពិនិត្យអ្វីទេលើសហរដ្ឋអាមេរិក។ លោក អូបាម៉ា បានបង្ហាញការសោកស្តាយចំពោះការសំរេចចិត្តរបស់ថ្នាក់ដឹកនាំក្រុមហ៊ុន Sony ដោយពុំបានពិភាក្សាឆ្លងយោបបល់ពីលោក។
ក្នុងថ្ងៃជាមួយគ្នានេះដែរ មុនសន្និសីទកាសែតបន្តិចរបស់លោក អូបាម៉ា ទីភ្នាក់ FBI បានចេញសេចក្តីប្រកាសព័ត៌មានជាផ្លូវការថា ខ្លួនមានភស្តុតាងគ្រប់គ្រាន់បញ្ជាក់ថា កូរ៉េខាងជើងជាអ្នកនៅពីក្រោយខ្នងការវាយប្រហារនេះ។ ភ្លាមៗនោះ លោក Kim Song ទីប្រឹក្សានយោបាយកូរ៉េខាងជើងប្រចាំអង្គការសហប្រជាជាតិបានឆ្លើយបដិសេធទាំងស្រុងចំពោះការចោទប្រកាន់នេះ។
សូមបញ្ជាក់ថា កាលពីថ្មីៗនេះ ក្រុមចោរតាមប្រព័ន្ធអ៊ិនធ័រណេត ឈ្មោះ ឆ្មាំសន្តិភាព (Les Gardiens de la Paix) បានចូលលួចយកប្រព័ន្ធទិន្នន័យរបស់ក្រុមហ៊ុន Sony ក្នុងនោះមានដូចជា ការឆ្លើយឆ្លងសារអេឡិចត្រូនិកចំនួនប្រមាណ ៣២ ០០០ របស់ប្រធានក្រុមហ៊ុន និងទិន្នន័យផ្ទុកព័ត៌មានផ្ទាល់ខ្លួនរបស់បុគ្គលិកក្រុមហ៊ុនចំនួន ៥ ម៉ឺននាក់។ ក្រុមហ៊ុន Sony សុខចិត្តចុះចាញ់ធ្វើតាមការសំឡុតរបស់ពួក Hackers ដោយយល់ព្រមលប់ចោលការចាក់បញ្ជាំង រឿង The Interview។ ខ្សែភាពយន្តបែបកំប្លែងដែលមានសាច់រឿងនិយាយអំពីភ្នាក់ងារស៊ើបការណ៍សម្ងាត់អាមេរិក CIAពីរនាក់ រៀបគម្រោងសម្លាប់ប្រធានាធិបតីកូរ៉េខាងជើង គីម ជុងអ៊ុន គ្រោងនឹងដាក់បញ្ជាំងតាមរោងកុន នាសបា្តហ៍ក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ