ប៉ាគីស្ថាន-អាមេរិក៖លោកណាវ៉ា ស្ហារី្វទៅអាមេរិកដើម្បីនិយាយពីបញ្ហាប្រទេសអាហ្វហ្កានីស្ថាន
នៅថ្ងៃព្រហស្បតិ៍ ទី២២ តុលា លោកនាយករដ្ឋមន្រ្តីប៉ាគីស្ថានណាវ៉ា ស្ហារី្វបានផ្តើមដំណើរទស្សនកិច្ចរយៈពេល ៤ថ្ងៃនៅសហរដ្ឋអាមេរិក។ វត្តមានរបស់ប្រមុខរដ្ឋាភិបាលប៉ាគីស្ថាននៅអាមេរិកពេលនេះបានកើតមានឡើង ប៉ុន្មានថ្ងៃក្រោយពីលោកប្រធានាធិបតីអាមេរិកអូបាម៉ាបានសម្រេចចិត្តពន្យារពេលការដកកម្លំាងទ័ពអាមេរិកចេញពីប្រទេសអាហ្វហ្កានីស្ថានជិតខាង។ ការសម្រេចពន្យារពេលទុកទ័ពអាមេរិកលើទឹកដីអាហ្វហ្កានីស្ថានដោយលោកអូបាម៉ាយល់ឃើញថា ទ័ពអាហ្វហ្កានីស្ថាននៅមិនទាន់បានត្រៀមខ្លួនដើម្បីការពារប្រទេសប្រឈមទប់នឹងពួកឧទ្ទាមតាលីបង់ដោយខ្លួនឯងឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
សហរដ្ឋអាមេរិកតែងតែបានចាត់ទុកប៉ាគីស្ថានជាប្រទេសដែលមានឥទ្ធិពល និងមានទឹកមាត់ប្រៃក្នុងការនិយាយជាមួយពួកឧទ្ទាមតាលីបង់ដែលកំពុងប្រយុទ្ធប្រឆំាងនឹងរដ្ឋាភិបាលនៅក្នុងប្រទេសអាហ្វហ្កានីស្ថាន។ គឺនៅក្នុងន័យនេះហើយបានជាឆ្លៀតឱកាសវត្តមានរបស់លោកនាយករដ្ឋមន្រ្តីប៉ាគីស្ថានណាវ៉ា ស្ហារី្វនៅអាមេរិកពេលនេះ ទីក្រុងវ៉ាស៊ីនតោនត្រូវការប៉ាគីស្ថានឲ្យរៀបចំជាថ្មីនូវកិច្ចចរចាសន្តិភាពរវាងក្រុមឧទ្ទាមតាលីបង់ និងរដ្ឋាភិបាលអាហ្វហ្កានីស្ថាន។ កិច្ចចរចាដែលបានផ្អាកកាលពីរដូវក្តៅកន្លងទៅ ដោយសារតែការស្លាប់មេកើយតាលីបង់ម៉ូឡា អូម៉ា។
អ៊ីចឹងហើយបានជានៅក្នុងជំនួបរវាងលោកណាវ៉ា ស្ហារី្វ និងលោកអូបាម៉ាក្នុងសេតវិមាន លោកអូបាម៉ាស្នើឲ្យប៉ាគីស្ថាននិយាយបញ្ចុះបញ្ចូលពួកឧទ្ទាមតាលីបង់អាហ្វហ្កានីស្ថានឲ្យចូលអង្គុយតុចរចាជាថ្មីឡើងវិញ។ តែទន្ទឹមគ្នានេះ លោកអូបាម៉ាក៏បានទាមទារឲ្យប៉ាគីស្ថានបញ្ឈប់ផ្តល់ទឹកដីរបស់ខ្លួនឲ្យពួកឧទ្ទាមតាលីបង់ប្រើប្រាស់ដើម្បីរៀបចំអំពើភេរវកម្មប្រឆំាងនឹងរដ្ឋាភិបាលអាហ្វហ្កានីស្ថាន ក៏ដូចជាកម្លំាងបរទេស ពិសេសទាហានអាមេរិកដែលកំពុងបំពេញបេសកកម្មលើទឹកដីអាហ្វហ្កានីស្ថាន។
គួររម្លឹកជូនថា តំាងពីក្រោយមហាភេរវកម្ម ១១ កញ្ញា ២០០១ នៅអាមេរិកមក ទីក្រុងអ៊ីស្លាម៉ាបាតបានប្តូរជំហរឈប់គំាទ្រពួកឧទ្ទាមតាលីបង់អាហ្វហ្កានីស្ថាន។ កាលពីឆ្នំា ២០១៤ កន្លងទៅ កងទ័ពប៉ាគីស្ថានបានបើកការវាយប្រហារទ្រង់ទ្រាយធំលើជំរំពួកឧទ្ទាមតាលីបង់នៅតាមបណ្តាយព្រំដែនអាហ្វហ្កានីស្ថាន។ តែស្របពេលគ្នានេះ អាមេរិកបន្តមិនទុកចិត្ត និងចង្អុលមុខរដ្ឋាភិបាល ព្រមទំាងក្រសួងស៊ើបការណ៍សម្ងាត់ប៉ាគីស្ថានថា ជាអ្នកបន្តផ្តល់ជម្រកឲ្យពួកឧទ្ទាមតាលីបង់។
តំាងពីឆ្នំា ២០០៩ មក ប៉ាគីស្ថានបានទទួលជំនួយពីអាមេរិកប្រមាណជា ៤ ៦០០លានដុល្លារ។ នៅឆ្នំា ២០១៦ ខាងមុខ ជំនួយអាមេរិកសម្រាប់ប៉ាគីស្ថាននឹងមានប្រមាណជា ៧៩៤លានដុល្លារ។ ជំនួយអាមេរិកសម្រាប់ប៉ាគីស្ថានជាថ្នូរនឹងការសន្យារបស់ទីក្រុងអ៊ីស្លាម៉ាបាតក្នុងការប្រយុទ្ធប្រឆំាងនឹងពួកឧទ្ទាមតាលីបង់ដើម្បីស្វែងរកសន្តិភាពឲ្យអាហ្វហ្កានីស្ថាន។ តែបញ្ហានៅត្រង់ថា ស្ថានការណ៍នៅអាហ្វហ្កានីស្ថានក្រោយការដួលរលំរបបតាលីបង់រយៈពេល ១៤ឆ្នំាកន្លងទៅហាក់ដូចជាកាន់តែដុនដាបខ្លំាងទៅវិញ។ តើប៉ាគីស្ថានកំពុងដើរតួខ្លួនមួយ មុខពីរ ឬយ៉ាងណា?។ នេះជាសំណួរមួយដែលលោកអូបាម៉ាត្រូវការចម្លើយច្បាស់ពីលោកណាវ៉ា ស្ហារី្វ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ