អ្នកកាសែតអាមេរិកដែលជាប់ជាចំណាប់ខ្មាំងនៅស៊ីរីត្រូវបានដោះលែង
ចុះផ្សាយនៅថ្ងៃ៖
ស្តាប់ - ០៥:៣៧
អ្នកកាសែតអាមេរិកមួយរូប ដែលត្រូវបានក្រុមជីហាតស៊ីរីចាប់ឃុំខ្លួនអស់រយៈពេលជិត ២ឆ្នាំមកហើយនោះ ត្រូវបានដោះលែងឲ្យមានសេរីភាពវិញហើយ កាលពីថ្ងៃអាទិត្យម្សិលមិញ។ ការដោះលែងចំណាប់ខ្មាំងនេះបានកើតមានឡើងមិនដល់មួយសប្តាហ៍ផង ក្រោយពីអ្នកកាសែតអាមេរិកម្នាក់ផ្សេងទៀត ឈ្មោះ James Foley ត្រូវបានក្រុមជីហាតអ៊ីរ៉ាក់សម្លាប់ដោយកាត់ក្បាល។
អ្នកកាសែតអាមេរិក ដែលត្រូវបានដោះលែង កាលពីថ្ងៃអាទិត្យនេះ មានឈ្មោះថា Theo Curtis វ័យ ៤៥ឆ្នាំ ត្រូវបានក្រុមជីហាតស៊ីរី ឈ្មោះ Jabhat al-Nusra ចាប់ខ្លួននៅក្បែរព្រំដែនស៊ីរី-តួកគី កាលពីខែតុលា ឆ្នាំ២០១២។
លោក Theo Curtis ត្រូវបានក្រុមជីហាតស៊ីរីប្រគល់ខ្លួនទៅឲ្យកងមួកខៀវ ប្រចាំនៅតំបន់ខ្ពង់រាប Golan ដើម្បីបញ្ជូនបន្តទៅឲ្យតំណាងរដ្ឋាភិបាលអាមេរិក។ លោកចន ឃែរី រដ្ឋមន្រ្តីក្រសួងការបរទេសអាមេរិកបានលើកឡើងថា “មួយសប្តាហ៍ក្រោយពីសោកនាដកម្មដែលមិនអាចពិពណ៌នាបាន យើងមានការធូរចិត្តយ៉ាងខ្លាំងដែល Theo Curtis បានរួចខ្លួន មានសេរីភាពទៅជួបជុំគ្រួសារវិញ ក្រោយពីបានជាប់ឃុំអស់រយៈពេលយ៉ាងយូរ ក្នុងដៃក្រុម Jabhat al-Nusra”។
គួរបញ្ជាក់ថា ក្រុម Jabhat al-Nusra គឺជាក្រុមជីហាត ដែលមានដើមកំណើតនៅក្នុងប្រទេសស៊ីរី ហើយជាសាខារបស់ក្រុមអាល់កៃដាប្រចាំប្រទេសស៊ីរី និងលីបង់ គឺជាក្រុមមួយផ្សេងដាច់ពីក្រុមជីហាត “រដ្ឋអ៊ីស្លាម” (ជាភាសាអង់គ្លេស Islamic State ឬ Islamic States of Iraq and the Levant ហៅកាត់ថា ISIL) ដែលជាក្រុមជីហាតមានដើមកំណើតចេញពីអ៊ីរ៉ាក់ ហើយចូលមកធ្វើសកម្មភាព នៅក្នុងប្រទេសស៊ីរី។
កាលពីដំបូង នៅពេលដែលវិបត្តិស៊ីរីទើបនឹងចាប់ផ្តើមផ្ទុះឡើង ក្រុម Jabhat al-Nusra និងក្រុមជីហាតអ៊ីរ៉ាក់ គឺជាសម្ព័ន្ធមិត្តនឹងគ្នា នៅក្នុងការប្រយុទ្ធតទល់នឹងកងកម្លាំងរបស់លោកបាស្ហា អាល់អាសាដ។ ក៏ប៉ុន្តែ ក្រោយមក ដោយសារតែក្រុមជីហាតអ៊ីរ៉ាក់មាននយោបាយជ្រុលនិយមហួសហេតុពេក ក៏ត្រូវក្រុមអាល់កៃដាកាត់កាល់លែងទទួលស្គាល់ ហើយក្រុម Jabhat al-Nusra និងក្រុមជីហាតអ៊ីរ៉ាក់ក៏បែកបាក់គ្នា ហើយថែមទាំងក្លាយជាសត្រូវនឹងគ្នាទៅទៀត។ បច្ចុប្បន្ន ក្រុមទាំងពីរនេះច្បាំងតទល់នឹងទាហានរបស់លោកបាស្ហា អាល់អាសាដផង ហើយច្បាំងនឹងគ្នាឯងផង។
គួររំឭកឡើងវិញថា កាលពីសប្តាហ៍មុន មានអ្នកកាសែតម្នាក់ ឈ្មោះ James Foley ត្រូវបានក្រុមជីហាតអ៊ីរ៉ាក់សម្លាប់ ដោយកាត់ក្បាល ដោយថតជាខ្សែអាត់វីដេអូចុះផ្សាយតាមប្រព័ន្ធអ៊ីនធ័រនែត។ នៅក្នុងខ្សែវីដេអូនេះ ក្រុមជីហាតអ៊ីរ៉ាក់ក៏បានគំរាមផងដែរថានឹងសម្លាប់អ្នកកាសែតអាមេរិកមួយរូបទៀត ប្រសិនបើអាមេរិកនៅតែបន្តប្រតិបត្តិការវាយប្រហារតាមផ្លូវអាកាស នៅក្នុងប្រទេសអ៊ីរ៉ាក់។ អ្នកកាសែតអាមេរិក ដែលក្រុមជីហាតអ៊ីរ៉ាក់គំរាមសម្លាប់នេះ មានឈ្មោះថា Steven Sotloff គឺជាមនុស្សផ្សេង ពីអ្នកកាសែតដែលត្រូវក្រុមជីហាតស៊ីរីដោះលែង កាលពីថ្ងៃអាទិត្យ។
ការដោះលែងអ្នកកាសែត Theo Curtis មិនដល់មួយសប្តាហ៍ផង ក្រោយពីការប្រហារជីវិតចំណាប់ខ្មាំង James Foley បានធ្វើឲ្យគេមានការមន្ទិលសង្ស័យ អំពីសម្បទានដែលរដ្ឋាភិបាលអាមេរិកបានធ្វើចំពោះក្រុមជីហាត ដើម្បីជាថ្នូរនឹងការដោះលែងនេះ។ រហូតមកទល់នឹងពេលនេះ គេនៅមិនទាន់ដឹងច្បាស់លាស់នៅឡើយទេ អំពីលក្ខខណ្ឌជុំវិញការដោះលែងអ្នកកាសែត Theo Curtis ក៏ប៉ុន្តែ រដ្ឋាភិបាលអាមេរិកបានបញ្ជាក់ដោយទទូចថា អាមេរិកមិនបានបង់លុយជាថ្នូរនឹងការដោះលែងចំណាប់ខ្មាំងនេះទេ។
គួរបញ្ជាក់ថា អាមេរិកតែងតែប្រកាន់ជំហរដាច់ខាតមិនបង់លុយទៅឲ្យក្រុមភេរវជន ដើម្បីជាថ្នូរនឹងការដោះលែងចំណាប់ខ្មាំង ក្នុងហេតុផលថា ប្រសិនបើគ្រប់ពេលដែលពលរដ្ឋអាមេរិកត្រូវក្រុមភេរវជនចាប់ជំរិត ហើយរដ្ឋាភិបាលអាមេរិកសុខចិត្តយកលុយទៅលោះ វានឹងធ្វើឲ្យចំណាប់ខ្មាំងអាមេរិកកាន់តែមានតម្លៃខ្ពស់ ហើយពលរដ្ឋអាមេរិកនឹងត្រូវប្រឈមមុខនឹងការចាប់ជំរិតកាន់តែខ្លាំង។ ម្យ៉ាងទៀត លុយដែលអាមេរិកយកទៅបង់ ដើម្បីលោះចំណាប់ខ្មាំងនេះនឹងក្លាយជាប្រភពហិរញ្ញវត្ថុដ៏សំខាន់ សម្រាប់ឲ្យក្រុមភេរវជនយកទៅទិញអាវុធ និងពង្រឹងកម្លាំង ដើម្បីមកធ្វើការវាយប្រហារលើអាមេរិកវិញ។
កាលពីពេលកន្លងទៅនេះ ក្រុមប្រឹក្សាសន្តិសុខអ.ស.ប ក៏ធ្លាប់បានទាមទារដែរឲ្យគ្រប់ប្រទេសទាំងអស់បញ្ឈប់ការបង់លុយឲ្យក្រុមភេរវជនជាថ្នូរនឹងចំណាប់ខ្មាំង ក៏ប៉ុន្តែ ជារឿយៗបណ្តាប្រទេសនៅអឺរ៉ុបច្រើនតែបង់លុយ ទោះបីជាដោយផ្ទាល់ ឬដោយប្រយោល ទៅឲ្យក្រុមភេរវជន ដើម្បីជាថ្នូរនឹងការដោះលែងចំណាប់ខ្មាំង។ គេធ្វើការប៉ាន់ស្មានថា គ្រាន់តែក្នុងរយៈពេល ៥ឆ្នាំកន្លងទៅនេះ ក្រុមអាល់កៃដា និងសាខាអាល់កៃដា នៅទូទាំងពិភពលោក អាចរកចំណូលបានរហូតដល់ទៅ ១២៥លានដុល្លារ ដោយសារការចាប់ចំណាប់ខ្មាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ