បន្ទាប់ពីអ៊ីរ៉ាក់ សហរដ្ឋអាមេរិកអាចនឹងធ្វើប្រតិបត្តិការយោធានៅស៊ីរី
សហរដ្ឋអាមេរិកត្រៀមជាស្រេចនឹងបញ្ចេញសកម្មភាព ! ប្រសិនបើមានការគំរាមកំហែងណាមួយប្រឆាំងនឹងអាមេរិក ! ប្រភពសេតវិមាន បានគូសបញ្ជាក់ទៀតថាអាមេរិកកំពុងសិក្សាយ៉ាងល្អិតល្អន់និងហ្មត់ចត់អំពីការចាប់ផ្តើមចេញធ្វើប្រតិបត្តិការយោធាវាយប្រហារលើពួកជីហាតរដ្ឋអ៊ីស្លាម នៅស៊ីរី។ នេះបើតាមការចុះផ្សាយលើទំព័រកាសែត Wall Street Journal ចេញផ្សាយនៅថ្ងៃសៅរ៍ទី ២៣សីហា២០១៤។
ចុះផ្សាយនៅថ្ងៃ៖
ស្តាប់ - ០១:៤៩
ប្រឈមមុខនឹងគ្រោះថ្នាក់បង្កឡើងដោយពួកជីហាត ទាំងមន្ទីរបញ្ចកោណ ទាំងសេតវិមាន សុទ្ធតែមើលឃើញអំពីសារៈសំខាន់នៃអន្តរាគមន៍យោធាផ្លូវអាកាសនៅស៊ីរី។ អាមេរិកទំនងជាចាំបាច់ត្រូវចេញធ្វើប្រតិបត្តិការយោធានៅស៊ីរី ! ព្រោះការវាយប្រហារតាមផ្លូវអាកាសនៅភាគខាងជើងអ៊ីរ៉ាក់ កាលពីសប្តាហ៍មុន បានទប់ស្កាត់ពួកជីហាតរដ្ឋអ៊ីស្លាម មិនឱ្យពង្រីកខ្លួនបាន !
ម្យ៉ាងទៀត ក្រោយពីបានឃើញការធ្វើឃាតអ្នកកាសែត James Foley បស្ចឹមលោកទាំងមូលកំពុងស្ថិតក្នុងស្ថានភាពតក់ស្លុត ប្រែក្លាយកំហឹងនេះទៅជាការចាត់វិធានការតប។
“អាមេរិក មិនបណ្តោយឱ្យជនឬក្រុមណាមួយ គំរាមកំហែងប្រឆាំងផលប្រយោជន៍ ឬពលរដ្ឋអាមេរិកទេ អាមេរិកត្រូវតែចាត់វិធានការប្រឆាំងនឹងការគំរាមនោះដល់ប្រភពដើមតែម្តង” ! នេះជាសេចក្តីប្រកាសរបស់ទីប្រឹក្សារងផ្នែកសន្តិសុខជាតិ។ អ្នកទទួលខុសត្រូវយោធាអាមេរិក បានលម្អិតបា្រប់សារព័ត៌មាន Wall Street Journal ដដែលថា ទិសដៅសំខាន់នៃការវាយប្រហារ គឺ ដៅឱ្យចំលើក្រុមមេដឹកនាំចលនា ឬក៏មជ្ឈមណ្ឌលបំពាក់បំប៉នសិស្សជីហាត។ ការវាយប្រហារអាចនឹងមានរយៈពេលពីមួយម៉ោងទៅមួយសប្តាហ៍។
សូមបញ្ជាក់ថា កាលពីខែមិថុនា ពួកជីហាតអ៊ីស្លាម បានប្រកាសបង្កើតរដ្ឋអ៊ីស្លាម កាលីហ្វា ដែលមានដែនដីលាតសន្ធឹងពីភាគខាងជើងអ៊ីរ៉ាក់ ដល់ភាគខាងកើតស៊ីរី។ ការទន្ទានទីរុលទៅមុខយ៉ាងលឿនរបស់ពួកជីហាតនេះ បានជំរុញឱ្យលោកប្រធានាធិបតីអាមេរិកបើកយុទ្ធនាការវាយប្រហារផ្លូវអាកាស ដើម្បីជួយកងកម្លាំងគៀរឌីស្តង់និងអ៊ីរ៉ាក់ទប់ទល់ប្រឆាំងនឹងទាហានជីហាត។ ប៉ុន្តែប្រសិនបើអាមេរិក ត្រូវបើកប្រតិបត្តិការយោធាមួយនៅស៊ីរីមែន នោះមានន័យថាអាមេរិកកំពុងតែប្តូរស្ថានភាពជម្លោះនៅស៊ីរីហើយ។ សង្គ្រាមនៅស៊ីរី ដែលហាក់ដូចជាត្រូវបានសហគមន៍អន្តរជាតិ ក្រវ៉ាត់ចោលកៀនជញ្ជាំង បើទោះជាបីជាចំនួនជនរងគ្រោះក្នុងរយៈពេលមួយចុងក្រោយនេះ បានកើនទ្វេជាពីរ ពោលគឺមានជិត២សែននាក់។ នេះបើតាមតួលេខអង្គការសហប្រជាជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ