ចិនផ្អាកការនាំចូលធ្យូងថ្មពីកូរ៉េខាងជើង
តើចិនផ្តើមទ្រាំលែងបាននឹងទង្វើរបស់កូរ៉េខាងជើងឬ ? នៅថ្ងៃសៅរ៍ទី ១៨កុម្ភៈនេះ ចិនបានប្រកាសផ្អាករាល់គ្រប់ការនាំចូលធ្យូងថ្ម មកពីប្រទេសកូរ៉េខាងជើង ចាប់ពីថ្ងៃអាទិត្យទី ១៩ កុម្ភៈនេះទៅភ្លាមតែម្តង។ នេះបើតាមសេចក្តីថ្លែងការណ៍ដ៏ខ្លី របស់ក្រសួងពាណិជ្ជកម្មចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤២
ក្រសួងពាណិជ្ជកម្មចិនបានបញ្ជាក់ថា ការផ្អាកការនាំចេញ មានសុពលភាពភ្លាម និងរហូតដល់ថ្ងៃទី ៣១ធ្នូ ២០១៧។ ប៉ុន្តែក្រសួងមិនបានផ្តល់ហេតុផល និងការពន្យល់បំភ្លឺអ្វីទាំងអស់ ទាក់ទងនឹងការសម្រេចចិត្តរបស់អាជ្ញាធរក្រុងប៉េកាំង។
បើតាមភ្នាក់ងារសារព័ត៌មានកូរ៉េខាងត្បូង យ៉ុងហាប់ កាលពីសប្តាហ៍មុន បានគូសបញ្ជាក់ថា កាមីញ៉ុងដឹកធ្យូងថ្មមកពីកូរ៉េខាងជើងជាច្រើនត្រូវបានបណ្តេញចេញមិនឱ្យឡើងចតចូលកំពង់ផែចិន វ៉េនស្ហ៊ូទេ។
វិធានការនេះធ្លាក់មកក្រោយការបាញ់សាកល្បងមីស៊ីលបាលីស្ទិករបស់កូរ៉េខាងជើងតែមួយសប្តាហ៍ប៉ុណ្ណោះ និងក្រោយពីក្រុមប្រឹក្សាសន្តិសុខបានចេញសេចក្តីថ្លែងការណ៍អំពាវនាវឱ្យ សមាជិកក្រុមប្រឹក្សាទាំងអស់ប្រឹងប្រែងអនុវត្តទណ្ឌកម្មប្រឆាំងនឹងកូរ៉េខាងជើង។
សូមបញ្ជាក់ថា ចិនធ្លាប់បានប្រកាសកាលពីខែមេសាឆ្នាំ២០១៦ ថានឹងផ្អាកការនាំចូលរ៉ែធ្យូងថ្ម ដើម្បីជាការអនុវត្តតាមសេចក្តីសម្រេចចិត្តរបស់ក្រុមប្រឹក្សាសន្តិសុខអង្គការសហប្រជាជាតិ ដាក់ទណ្ឌកម្មលើរបបព្យុងយ៉ាងកុំឱ្យមានចំណូលទៅបំប៉នកម្មវិធីនុយក្លេអ៊ែរ។ កាលពីថ្ងៃទី១១ខែធ្នូឆ្នាំ២០១៦ ចិនក៏បានផ្អាកការនាំចូលរ៉ែធ្យូងថ្មពីព្យុងយ៉ាងម្តងរយៈពេល២០ថ្ងៃ ក្រោយពេលដែលក្រុមប្រឹក្សាសន្តិសុខចេញសេចក្តីសម្រេចចិត្តចង់កំរិតការនាំធ្យូងថ្មត្រឹម៤០០,៩លានដុល្លារក្នុងមួយឆ្នាំ ចាប់ពីឆ្នាំ២០១៧ទៅ ពោលគឺ៦០%តិចជាងឆ្នាំ២០១៥។
នៅក្នុងឆ្នាំ២០១៦ កូរ៉េខាងជើងជាប្រទេសផ្គត់ផ្គង់រ៉ែធ្យូងថ្មឱ្យចិនលំដាប់ទីបួន ដោយបានលក់មកចិននូវធ្យូងថ្មប្រមាណ២២,១៨លានតោន ពោលគឺមានកំណើន១៤,៥% បើប្រៀបទៅនឹងឆ្នាំ២០១៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ